Tag: Imran Khan

لاڑکانہ: رہنما عوام پاکستان پارٹی مفتاح اسماعیل نے 190 ملین پاؤنڈ کیس میں بانی پاکستان تحریک انصاف (پی ٹی آئی) عمران خان کو ملنے والی سزا کو درست قرار دے دیا۔

مفتاح اسماعیل نے نیوز کانفرنس میں کہا کہ عمران خان نے نیب نیب کھیل کر مخالفین کو جیلوں میں ڈالا، ان کو درست سزا ہوئی لیکن بشریٰ بی بی کے پاس عہدہ نہیں تھا ان کی سزا عجیب بات ہے۔

انہوں نے کہا کہ پی ٹی آئی بیرون ملک لابنگ اور ملک میں مذاکرات کر رہی ہے، امريکا کا مثبت عمل دخل نہیں رہا وہ چاہے تو آئی ایم ایف کے قرضوں سے نکلوا سکتا ہے۔

یہ بھی پڑھیں: مذاکرات کہیں اور ہوں گے حکومتی کمیٹی اس کی توثیق کرے گی، مفتاح اسماعیل

سابق وزیر خزانہ نے کہا کہ سابق وزیر اعظم نواز شريف نے ’ووٹ کو عزت دو‘ کا نعرہ لگایا لیکن مسلم لیگ (ن) نے اقتدار کی سیاست کی، ان کو عام انتخابات میں اپنی شکست تسلیم کر لینی چاہیے تھی۔

مفتاح اسماعیل نے مزید کہا کہ پنجاب میں شہباز شریف اور عثمان بزدار کا دور اچھا گزرا، شہباز شریف کے دور میں پنجاب میں کرپشن کی باتیں نہیں تھیں جبکہ وزیر اعلیٰ پنجاب مریم نواز کی حکومت میں کرپشن کی باتیں سامنے آ رہی ہے۔

نیوز کانفرنس میں مفتاح اسماعیل کا کہنا تھا کہ 40 فیصد عوام غربت کی لکیر سے نیچے کی زندگی گزار رہے ہیں، 2 کروڑ 65 لاکھ روپے بچے اسکول سے باہر ہیں، وفاق سے سندھ کو ملنے والے اربوں روپے کہاں جاتے ہیں؟

انہوں نے کہا کہ حکومت زحمت بن چکی ہے عوام اشیائے ضروریہ پر 25 فیصد ٹیکس دیتی ہے، میرے دور میں انکم ٹیکس 15 تھا جو اب 49.50 فیصد ہو چکا ہے۔

ان کا کہنا تھا کہ پاکستان میں بجلی اور گیس سری لنکا، کینیا اور ایتھوپیا سے بھی مہنگی ہے۔

لاہور: وفاقی وزیر اطلاعات و نشریات عطا اللہ تارڑ کا کہنا ہے کہ تاریخ کا سب سے بڑا ڈاکہ 190 ملین پاؤنڈ کا تھا۔

ورکرز سے خطاب کرتے ہوئے عطا اللہ تارڑ نے کہا کہ پیسہ اپنی جیبوں میں ڈالا گیا 25 کروڑ کا گھر بنایا ہیرے کی انگوٹھیاں لی گئیں، عدالتی فیصلے نے بانی پی ٹی آئی عمران خان کے کرپٹ ہونے پر مہر ثبت کر دی۔

عطا اللہ تارڑ نے کہا کہ بند لفافے کی منظوری کر کے اربوں روپے کی کرپشن کی گئی، جرم چھپانے کیلیے مذہب کارڈ کا استعمال کیا جا رہا ہے، پی ٹی آئی کے پاس 190 ملین کرپشن کا حساب نہیں۔

یہ بھی پڑھیں: 190 ملین پاؤنڈ کیس کا فیصلہ ہائیکورٹ کو 2 سماعتوں میں ہی پھینک دینا چاہیے

انہوں نے کہا کہ بانی پی ٹی آئی عمران خان کرپشن میں پکڑا گیا ہے، پوری دنیا نے اس کی کرپشن دیکھ لی۔

ان کا کہنا تھا کہ پاکستان کی تقدیر بدلنے کیلیے کام کر رہے ہیں، غیر ملکی سرمایہ کاری میں اضافہ ہو رہا ہے جبکہ معیشت استحکام کی راہ پر گامزن ہے۔

وفاقی وزیر اطلاعات نے مزید کہا کہ مہنگائی میں کمی ہوئی ہے، عالمی سطح پر پاکستان کی معیشت کا اعتراف کیا جا رہا ہے، پوری دنیا پاکستان کی اسٹاک مارکیٹ تعریف کر رہی ہے، ملک میں مہنگائی کی شرح 38 فیصد سے 4 فیصد پر آگئی۔

اسلام آباد: سینیٹر فیصل واوڈا کا کہنا ہے کہ پونے 4 سال پہلے جب یہ معاملہ آیا تھا تو اُس وقت کہا تھا کہ اس پر کیس بنے گا، عرصے سے کہہ رہا ہوں کہ 190 ملین پاؤنڈ کیس میں سزا ہوگی۔

اے آر وائی نیوز کے پروگرام ’اعتراض ہے‘ میں سینیٹر فیصل واوڈا نے کہا کہ شہزاد اکبر کو بات چیت کیلیے لندن بھیجا گیا تھا جو آج ملک سے مفرور ہے۔

فیصل واوڈا نے کہا کہ ویٹو پاور استعمال کر کے وفاقی کابینہ سے بند لفافے پر منظوری لی گئی تھی، اُس وقت بھی کہا تھا یہ معاملہ غلط ہے اور اس پر سزا ہوگی۔

انہوں نے کہا کہ سیاستدان ہوں اسی لیے سزاؤں سے متعلق تجزیہ دیا تھا، کہا تھا دونوں کو سزا ہوگی اور آج فیصلہ بھی آ چکا ہے، کل تک شادیانے بجائے جا رہے تھے کہ ہماری بات ہوگئی ہے، کہا جا رہا تھا کہ معاملات سیٹ ہوگئے ہیں اور آج اس کا جواب بھی مل گیا۔

سینئر سیاستدان نے مزید کہا کہ پہلے کہا گیا 9 مئی ہم نے نہیں کیا لیکن علی امین گنڈاپور نے اعتراف کر لیا، انکوائریاں ابھی کھلیں گی اور بہت نام سامنے آئیں گے، جو لوگ آج صفائیاں دے رہے ہیں یہ کابینہ کا حصہ نہیں تھے، میں کابینہ کا حصہ تھا اس وقت بھی کہا تھا یہ غلط ہو رہا ہے۔

ان کا کہنا تھا کہ آج احتساب ہو رہا ہے کیونکہ اس سے پہلے تگڑے شخص کا احتساب ہوا ہے، یہ کیس ابھی کھلے گا تو مزید چیزیں سامنے آئیں گی، جمہوریت میں بادشاہت ہے کیونکہ عہدہ مل جائے تو احتساب نہیں ہوتا، حکومت اور پی ٹی آئی دونوں چاہتے ہیں کہ بانی پی ٹی آئی عمران خان جیل میں رہیں۔

پروگرام میں فیصل واوڈا کا یہ بھی کہنا تھا کہ سابق ڈی جی آئی ایس آئی فیض حمید کا کورٹ مارشل ہوگا اور سزا ہوگی کیونکہ انہوں نے ملک، جمہوریت اور اپنے ادارے کا بیڑا غرق کیا، ان کو سزا کا فیصلہ آنے میں 45 سال نہیں لگیں گے۔

اسلام آباد: رہنما پاکستان تحریک انصاف (پی ٹی آئی) سلمان اکرم راجہ کا کہنا ہے کہ 190 ملین پاؤنڈ کیس کا فیصلہ چند ہفتوں میں ختم ہو جائے گا اس لیے اہمیت نہیں دے رہے۔

اے آر وائی نیوز کے پروگرام ’سوال ہے‘ میں سلمان اکرم راجہ نے کہا کہ 190 ملین پاؤنڈ کیس میں اسی قسم کے فیصلے کی توقع تھی، بیانیہ بنایا گیا کہ بانی پی ٹی آئی عمران خان نے اختیارات کا غلط استعمال کیا لیکن فیصلے میں یہ کہاں کہا گیا؟

سلمان اکرم راجہ نے کہا کہ این سی اے معاہدے میں کہیں نہیں لکھا کہ رقم ریاست کو ملنی چاہیے، رقم منتقلی سے متعلق حکومت پاکستان کا کوئی عمل دخل ہی نہیں ہے، کابینہ میں جو کچھ بھی ہوا رقم اس سے پہلے ہی آ رہی تھی، رقم برطانوی قانون کے مطابق سپریم کورٹ کے اکاؤنٹ میں آ رہی تھی، رقم سپریم کورٹ کے اکاؤنٹ میں آئی اور پھر نیب کو آگاہ کیا گیا، سپریم کورٹ کی جانب سے نیب کو کہا گیا کہ رقم سے متعلق کیا کرنا ہے۔

یہ بھی پڑھیں: 190 ملین پاؤنڈ سے مزید 20 ارب روپے کا منافع ریاست نے حاصل کیا، فیصل چوہدری

پی ٹی آئی رہنما نے کہا کہ مقدمہ پراسیکیوشن نے ثابت کرنا تھا ہمیں گواہ پیش کرنے کی ضرورت نہیں تھی، 190 ملین پاؤنڈ کیس کے فیصلے کو چیلنج کریں گے، عوام کی عدالت میں بھی واقعات بیان کرتے رہیں گے، فیصلہ آنے کے بعد بھی مذاکرات جاری رہیں گے، آئندہ چند ہفتے میں اس فیصلے کو اعلیٰ عدلیہ اڑا دے گی۔

انہوں نے کہا کہ ملک کی اہم سیاسی شخصیت کے ساتھ اس قسم کا کھلواڑ کیا جا رہا ہے، جوڈیشل کمیشن نہیں بنتا تو بانی پی ٹی آئی عمران خان سے آگے کیلیے رائے لیں گے، آج شاہد خاقان عباسی، محمود اچکزئی سمیت دیگر رہنماؤں سے ملاقات ہوئی، آئین و قانون کے تحفظ کیلیے تمام سیاسی جماعتوں کو ساتھ لے کر چلیں گے۔

ان کا کہنا تھا کہ مولانا فضل الرحمان سے بھی بات کریں گے ان کی اپنی ایک رائے ہے لیکن اسمبلی کی سطح پر ساتھ ہیں، اس وقت کون گارنٹی دے سکتا ہے جو 9 فروری کو ہوا وہ دوبارہ نہیں ہوگا، ایسی گارنٹی کیلیے ہمیں عوام کو ساتھ ملا کر چلنا ہوگا، 9 فروری کو جو ہوا دوبارہ ہوگا تو کوئی مستقبل میں کسی بات پر یقین نہیں کرے گا۔

اسلام آباد: حکومتی مذاکراتی کمیٹی کے رکن سینیٹر عرفان صدیقی نے واضح کیا ہے کہ جو معاملات عدالتوں میں زیر سماعت ہیں ان پر بات نہیں کی جا سکتی۔

عرفان صدیقی نے اپنے بیان میں کہا کہ ہم انکار یا اقرار نہیں کرتے لیکن کمیٹی تمام پہلوؤں کا جائزہ لے گی، پی ٹی آئی نے دو کمیشن کے حوالے سے 15 ٹی او آرز پیش کیے، ان کو مطالبات مرتب کرنے میں 42 دن لگے۔

انہوں نے کہا کہ مطالبات کے ساتھ انہوں نے الزامات کی فہرست نتھی کی، یہ مطالبات کم حکومت کے خلاف چارج شیٹ زیادہ ہے۔

یہ بھی پڑھیں: علی امین گنڈا پور کی طاقتور حلقوں سے بیک ڈور رابطوں کی تصدیق

ان کا کہنا تھا کہ بانی پی ٹی آئی عمران خان سے ملاقات کا ایک بار پھر مطالبہ کیا گیا ہے، ہم نے پرآمادگی ظاہر کی ہے کہ بانی پی ٹی آئی سے ملاقات ہو جائے گی۔

سینیٹر عرفان صدیقی نے مزید کہا کہ معاملات آگے بڑھتے ہیں تو پھر 31 جنوری کی ڈیڈ لائن نہیں ہونی چاہیے۔

’دعا کرتے ہیں عمران خان کو کل سزا ہو جائے‘

قبل ازیں، عمران خان کی ہمشیرہ علیمہ خان نے اسلام آباد ہائیکورٹ میں میڈیا سے گفتگو میں کہا کہ دعا کرتے ہیں بانی پی ٹی آئی کو کل سزا ہو جائے اور کیس جیل سے نکل کر باہر آ جائے، یہ بانی کا نہیں عدلیہ کا امتحان ہے۔

علمیہ خان نے کہا کہ القادر ٹرسٹ احمقانہ کیس ہے، اتنی تاریخیں ڈالی ہیں ہم تو صرف تاریخیں بھگت رہے ہیں، عمران خان کو کریڈٹ ملنا چاہیے سارے کیسز کا سامنا کر رہے ہیں، کوئی پاس ہوگا کوئی فیل اب بانی پی ٹی آئی نے سب کو امتحان میں ڈالا ہوا ہے۔

انہوں نے سوال اٹھایا کہ کیا عمران خان ڈیڑھ سال اس لیے جیل میں رہے کوئی آ کر انہیں نکال دے، نواز شریف رحم کرے بانی رحم کیلیے نہیں بیٹھے وہ کیسز کا سامنا کر کے سرخرو ہونا چاہتے ہیں۔

عمران خان کی ہمشیرہ کا مزید کہنا تھا کہ اگر بریت نہیں ہوتی تو یہ پہلے دن فیصلہ سنا دیتے کیس میں تھا ہی کچھ نہیں، پہلے 23 دسمبر کو فیصلہ دینا تھا پھر 6 جنوری اور اب 17 جنوری تاریخ دی گئی۔