Tag: Imran Khan

اسلام آباد: پی ٹی آئی کی مذاکراتی کمیٹی کے رکن سلمان اکرم راجہ کا کہنا ہے کہ بانی چیئرمین عمران خان نے کہا کہ تیسری نشست پر جوڈیشل کمیشن پر نہ مانا گیا تو چوتھی نشست نہ کریں۔

اے آر وائی نیوز کے پروگرام ’آف دی ریکارڈ‘ میں سلمان اکرم راجہ نے کہا کہ بیرسٹر گوہر کی کل بانی پی ٹی آئی عمران خان سے ملاقات ہوئی تھی تو انہوں نے ہدایت کی تھی کہ تیسری نشست کر لیں اور تحریری مطالبات دے دیں، انہوں نے ہدایت کی تھی کہ تیسری نشست میں جوڈیشل کمیشن کی بات کریں اور اگر نہ مانا گیا تو چوتھی نشست نہ کریں۔

یہ بھی پڑھیں: کل اور آج بانی سے ملاقات کیلیے کوئی پی ٹی آئی رہنما نہیں آیا، جیل ذرائع

سلمان اکرم راجہ کے مطابق عمران خان نے واضح کیا کہ حکومت مذاکرات پر نہیں چلتی تو نہ مذاکرات نہ کریں۔ انہوں نے کہا کہ بانی کو اپنے لیے جیل سے باہر آنے کی کوئی خواہش نہیں ہے بلکہ انہوں نے کہا ہے کہ رہنماؤں اور کارکنان کی ضمانت ہونی چاہیے۔

انہوں نے ککہا کہ عمران خان کو جیل میں رکھنا نظام کیلیے مشکل ہوتا جا رہا ہے، وہ کیلیے عہدہ اہم نہیں بلکہ وہ سمجھتے ہیں کہ لوگوں کا شعور بڑھ رہا ہے، پاکستانی عوام کے شعور میں جو اضافہ ہوا ہے وہ بانی کیلیے اطمینان کا باعث ہے۔

ان کا کہنا تھا کہ پی ٹی آئی ارکان کی اسپیکر سے گفتگو ہوتی ہے وہ مذاکرات کی میزبانی کرتے ہیں، اسپیکر قومی اسمبلی کو پتا ہے کہ پی ٹی آئی اس وقت کس جگہ کھڑی ہے، ہم نے حکومت کو آگاہ کر دیا ہے کہ مذاکرات کی اگلی نشست کیلیے تیار ہیں، حکومت کی طرف سے مذاکرات کی آئندہ نشست سے متعلق کوئی جواب نہیں آیا، آج عمران خان سے رفقا کی ملاقات ہوتی ہے ان کی طرف سے نام بھی دیے گئے، ہم نے کہا کہ رفقا کی جگہ مذاکراتی کمیٹی کو ہی معمول کی ملاقات کرنے دیں۔

’ہم نے معمول کی ملاقات کیلیے جیل حکام کو نام دیے اس کا بھی جواب نہیں دیا گیا۔ ہم نے یہ بھی کہا کہ جس کمرے میں معمول کی ملاقات ہوتی ہے وہیں کرنے دیں۔ ڈھائی سالہ تجربہ ہے کہ حکومت غصے میں بچگانہ قسم کے فیصلے کرتی ہے۔ حکومت کا مذاکرات سے متعلق جو بھی فیصلہ ہوگا جلد سامنے آ جائے گا۔ مذاکرات سے متعلق ہم بالکل اطمینان سے بیٹھے ہیں حکومتی فیصلے کا انتظار ہے۔‘

سلمان اکرم راجہ نے کہا کہ ایسا نہیں کہ بانی کے ٹوئٹ کی وجہ سے مذاکرات کا عمل رکا یہ پہلے ہی رکا ہوا تھا، مذاکرات کی دوسری نشست کے 5 دن بعد بانی پی ٹی آئی کا ٹوئٹ سامنے آیا، ایک طبقہ چاہتا ہے مذاکرات آگے بڑھیں لیکن بدقسمتی سے خواجہ آصف اس کا حصہ نہیں، کمیشن کا مقصد یہی ہے کہ ٹرتھ ری کنسیلئیشن کی بنیاد پر ملک کو آگے بڑھانا چاہتے ہیں، ہم چاہتے ہیں کہ ملک میں آگے بڑھیں تو سچائی کی بنیاد پر ہی بڑھیں، عمران خان کوئی ایسا سمجھوتا نہیں کریں گے جو اصولی اور قانونی نہ ہو۔

انہوں نے کہا کہ بانی پی ٹی آئی ہاؤس اریسٹ قبول نہیں کریں گے مقدمات کا سامنا کریں گے، وہ جیل کاٹیں گے اور اسی کو اپنا تاریخی کردار سمجھتے ہیں، گزشتہ نشست پر حکومتی کمیٹی نے کہا تھا کہ ان کا کوئی مطالبہ نہیں ہے، اگر حکومت چاہتی ہے کہ مینڈیٹ چوری کو بھول جائیں تو ایسا نہیں ہوگا، حکومت چاہتی ہے کہ 8 فروری کی لوٹ مار پر مٹی ڈالیں تو ایسا نہیں ہو سکتا، پی ٹی آئی کی طرف سے 31 جنوری کی ڈیڈ لائن ہے جو تیزی سے قریب آ رہی ہے، تیسری نشست میں کمیشن کے حوالے سے کوئی فیصلہ نہ ہوا تو آگے نہیں بڑھیں گے۔

راولپنڈی: اڈیالہ جیل میں قید بانی چیئرمین پاکستان تحریک انصاف (پی ٹی آئی) عمران خان سے پارٹی رہنماؤں کی ملاقاتوں کے معاملے پر جیل ذرائع کا مؤقف سامنے آگیا۔

جیل ذرائع نے اپنے بیان میں بتایا کہ پی ٹی آئی کی جانب سے کل اور آج جیل حکام سے کوئی رابطہ نہیں کیا گیا، پی ٹی آئی قیادت نے آج معمول کی ملاقات کیلیے کوئی نام نہیں دیے۔

انہوں نے بتایا کہ پارٹی رہنماؤں کی ملاقات کیلیے ایک طریقہ کار پہلے سے وضع کیا گیا ہے، عمران خان سے طے شدہ طریقہ کار کے مطابق منگل اور جمعرات کا دن مقرر ہے، پی ٹی آئی قیادت جیل حکام کو ملاقاتیوں کے نام بھیج دیتی ہے۔

یہ بھی پڑھیں: عمران خان سے ملاقات میں کیمرے اور سننے والے آلات نصب ہوتے ہیں

جیل ذرائع کے مطابق کل سے آج شام تک کسی کا نام نہیں دیا گیا اور نہ ہی کوئی ملاقات کیلیے آیا، مذاکراتی کمیٹی کی ملاقات جیل حکام کی ڈومین نہیں، جیل مینول کے مطابق مقرر ایام میں ملاقاتیں کروائی جاتی ہیں۔

دو روز قبل سیکریٹری اطلاعات پی ٹی آئی شیخ وقاص اکرم نے اپنے بیان میں کہا تھا کہ ہماری مذاکراتی ٹیم کو کئی دن گزرنے کے باوجود عمران خان سے ملاقات کی اجازت نہیں دی جا رہی۔

شیخ وقاص اکرم کا کہنا تھا کہ دوسری میٹنگ کے بعد واضح طور پر عمران خان سے ملاقات کی اہمیت کا بتایا گیا تھا، مذاکراتی ٹیم کیلیے بانی پی ٹی آئی سے بغیر ملاقات کوئی قدم اٹھانا ممکن نہیں ہے۔

انہوں نے کہا تھا کہ بار بار اسپیکر آفس سے رابطہ کرنے کے باوجود مثبت جواب نہیں مل رہا، اس سے حکومت کی سنجیدگی اور اختیار کا اندازہ ہوتا ہے۔

ان کا کہنا تھا کہ تیسری نشست سے قبل بانی سے ملاقات کی اجازت نہ ملی تو مذاکرات کا فائدہ نہیں ہوگا، بانی سے ملاقات حق ہے ہمیں رسائی چاہیے۔

اسلام آباد: پاکستان تحریک انصاف (پی ٹی آئی) نے وزیر اعلیٰ پنجاب مریم نواز کے جانوروں اور سیاسی جماعتوں کے علاج کے بیان پر ردعمل دے دیا۔

سیکریٹری اطلاعات پی ٹی آئی شیخ وقاص اکرم نے کہا کہ وزیر اعلیٰ پنجاب مریم نواز نے کہا کہ جانوروں کے ساتھ کچھ سیاسی جماعتوں کا علاج کرنا ہے، وہ دھمکیاں دے رہی ہیں پہلے جو کیا وہ کم تھا؟ لوگوں کو گھروں سے اٹھانا اور کاروبار بند کرنا یہی علاج مریم نواز کرنا چاہتی ہیں۔

مذاکرات کے حوالے سے شیخ وقاص اکرم نے کہا کہ حکومت کی وجہ سے مذاکرات تعطل کا شکار ہوئے کیونکہ وہ بار بار کہہ رہی ہے کہ مطالبات لکھ کر دیں، مطالبات لکھ کر دینے میں ہمیں کوئی اعتراض نہیں ہے لیکن ہمارا مطالبہ تھا کہ بانی پی ٹی آئی عمران خان سے ملاقات کروائی جائے۔

یہ بھی پڑھیں: مریم نواز کی تصاویر ایڈٹ کر کے وائرل کرنے والے ہو جائیں خبردار!

انہوں نے کہا کہ حکومتی کمیٹی کی اپنی قائدین تک پہنچ ہے ہماری نہیں، ہماری ساڑھے 3 ماہ سے عمران خان تک سیاسی رسائی نہیں ہے، ملاقات کی اجازت نہ ملی پھر بھی بانی پی ٹی آئی نے تحریری مطالبات کی ہدایت کی، مذاکرات کی تیسری نشست میں مطالبات تحریری طور پر دے دیں گے۔

ان کا کہنا تھا کہ جب سنگجانی کا جلسہ مؤخر کروانے کیلیے صبح جیل کھلوا دی گئی تھی تو اب کیوں نہیں کھل سکتی؟ حکومت ایک ملاقات نہیں کروا سکتی تو مطالبات کیسے مانے گی؟

شیخ وقاص اکرم نے مزید کہا کہ یہ کون سا جیل مینول ہے کہ اخبارات دیے نہیں جاتے نہ ٹی وی تک رسائی ہے؟ ملک کی بڑی پارٹی کے قائد کو دہشتگردوں کے ڈیتھ سیل میں رکھا ہوا ہے، کورٹ آڈر کے باوجود عمران خان کی بچوں سے بات نہیں کروائی جا رہی، نواز شریف جیل میں تھے تو شیف آتا تھا کہ کھانے میں کیا کھائیں گے۔

یاد رہے کہ آج وزیر اعلیٰ پنجاب نے ایک تقریب سے خطاب میں کہا کہ منہ اور کھر کی بیماری جانور ہی نہیں بلکہ انسانوں کو بھی ہوتی ہے، ہم نہ صرف جانوروں بلکہ کئی سیاسی جماعتوں کی بیماریوں کا بھی علاج کریں گے۔

مریم نواز نے کہا کہ ڈولتی معیشت اب سنبھلنے لگی ہے، پاکستان اسٹاک مارکیٹ نے چھہتر سال کا ریکارڈ توڑ دیا ہے، شہباز حکومت میں اچھی خبریں آنے لگی ہیں، عوام کو پنجاب حکومت کے منصوبوں کا ثمر ملنا شروع ہوگیا، جو کچھ ہو سکا پنجاب کے عوام کیلیے کریں گے۔

اسلام آباد: پاکستان تحریک انصاف (پی ٹی آئی) کا مالیاتی بحران شدید ہونے لگا جس کے باعث سینٹرل سیکرٹریٹ کے ملازمین کو 3 ماہ سے تنخواہیں نہ مل سکیں۔

ذرائع نے اے آر وائی نیوز کو بتایا کہ پی ٹی آئی سینٹرل آفس کے 25 سے زائد ملازمین کو تنخواہ ادا نہ کی جا سکی جس کے باعث ملازمین نے پی ٹی آئی قیادت سے احتجاج کیا۔

معاملہ پارٹی چیئرمین اور سیکرٹری اطلاعات تک پہنچا تو ملازمین کی تنخواہوں کی عدم ادائیگی پر فنڈنگ مہم شروع کی گئی۔ ملازمین کے احتجاج پر فوری طور پر ارکان اسمبلی و ٹکٹ ہولڈرز سے فنڈز مانگے گئے۔

یہ بھی پڑھیں: بانی پی ٹی آئی سب کو معاف کرنے کو تیار ہیں، اسد قیصر

سینٹرل سیکرٹریٹ کے ملازمین کی ماہانہ تنخواہ 45 لاکھ روپے تک ہے۔ ذرائع نے بتایا کہ وکلا کی بھاری فیسوں کی وجہ سے فنڈز ختم ہوئے۔

چند روز قبل پی ٹی آئی رہنما شیر افضل مروت نے پارٹی کے کیسز میں وکلا کو ادا کی گئی فیسوں کے آڈٹ کا مطالبہ کیا تھا۔

نجی نیوز چینل سے گفتگو میں شیر افضل مروت کا کہنا تھا کہ کیسز کی مد میں وکلا نے فیسیں لیں جن کا آڈٹ ہونا چاہیے۔ انہوں نے واضح کیا کہ تین سے چار وکلا نے کیسز کی فیسیں لیں۔

ان کا کہنا تھا کہ کیسز ایسی نوعیت کے نہیں تھے جتنی فیسیں دی گئیں۔

شیر افضل مروت کا کہنا تھا کہ میں نے عمران خان نے 70 سے زائد کیسز لڑے لیکن کوئی فیس وصول نہیں کی۔

اسلام آباد: قومی اسمبلی میں اپوزیشن لیڈر عمر ایوب نے دعویٰ کیا ہے کہ اڈیالہ جیل میں بانی پاکستان تحریک انصاف (پی ٹی آئی) عمران خان سے ملاقات کے دوران کیمرے اور سننے والے آلات نصب ہوتے ہیں۔

عمر ایوب نے عمران خان سے بغیر نگرانی ملاقات کا مطالبہ کرتے ہوئے کہا کہ بانی پی ٹی آئی سے ملاقات کیلیے محفوظ اور نجی ماحول فراہم کیا جائے، ہماری ان سے موجودہ ملاقاتیں ایک محدود جگہ میں ہو رہی ہیں۔

پی ٹی آئی رہنما نے کہا کہ ایسی ملاقاتیں بات چیت کی رازداری اور سالمیت کو متاثر کرتی ہیں، نگرانی میں عمران خان سے ملاقاتوں کی صورتحال ناقابل قبول ہے۔

یہ بھی پڑھیں: ’مذاکراتی ٹیم کو بانی سے ملاقات کی اجازت نہیں دی جا رہی‘

انہوں نے مزید کہا کہ نگرانی آزادانہ اور مؤثر انداز میں بات چیت کو کمزور کرتی ہے، عمران خان سے ایسی جگہ ملاقاتیں کرائیں جہاں نگرانی کا خوف نہ ہو اور پرائیویسی ہو۔

گزشتہ روز سیکریٹری اطلاعات پی ٹی آئی شیخ وقاص اکرم نے اپنے بیان میں کہا تھا کہ ہماری مذاکراتی ٹیم کو کئی دن گزرنے کے باوجود عمران خان سے ملاقات کی اجازت نہیں دی جا رہی۔

شیخ وقاص اکرم کا کہنا تھا کہ دوسری میٹنگ کے بعد واضح طور پر عمران خان سے ملاقات کی اہمیت کا بتایا گیا تھا، مذاکراتی ٹیم کیلیے بانی پی ٹی آئی سے بغیر ملاقات کوئی قدم اٹھانا ممکن نہیں ہے۔

انہوں نے کہا تھا کہ بار بار اسپیکر آفس سے رابطہ کرنے کے باوجود مثبت جواب نہیں مل رہا، اس سے حکومت کی سنجیدگی اور اختیار کا اندازہ ہوتا ہے۔

ان کا کہنا تھا کہ تیسری نشست سے قبل بانی سے ملاقات کی اجازت نہ ملی تو مذاکرات کا فائدہ نہیں ہوگا، بانی سے ملاقات حق ہے ہمیں رسائی چاہیے۔