Tag: Imran Khan

اسلام آباد: رہنما سنی اتحاد کونسل صاحبزادہ حامد رضا کا کہنا ہے کہ بانی پاکستان تحریک انصاف (پی ٹی آئی) عمران خان کی رہائی پر بات کرنے سے انکار کیا گیا تو مذاکرات میں آگے نہیں بڑھ سکیں گے۔

اے آر وائی نیوز کے پروگرام ’اعتراض ہے‘ میں صاحبزادہ حامد رضا نے کہا کہ مذاکرات سے متعلق معاملات محمود اچکزئی کےع لم میں ہیں جبکہ عمران خان خود بھی ان سے ملاقات کرنا چاہتے تھے، مذاکرات میں کسی جگہ پر ضرورت محسوس ہوئی تو محمود اچکزئی بھی آجائیں گے، وہ بلوچستان میں پارٹی معاملات کی وجہ سے مصروف ہیں جبکہ اختر مینگل کی اہلیہ کی طبیعت ناساز ہے تو وہ بھی مصروف ہیں۔

صاحبزادہ حامد رضا نے کہا کہ 9 مئی سے متعلق فوجی عدالتوں کا فیصلہ حتمی نہیں کیونکہ سپریم کورٹ کی ججمنٹ نہیں آئی، سپریم کورٹ نے ملٹری کورٹ سے متعلق آبزرویشن دی ہے فیصلہ نہیں دیا، ہم اس بات پر متفق ہیں کہ سویلینز کا ملٹری کورٹ میں ٹرائل نہیں ہو سکتا، مطالبہ ہے کہ 9 مئی پر جوڈیشل کمیشن بنائیں سب کچھ سامنے آ جائے گا، مجھے یہ سمجھ نہیں آتی حکومت جوڈیشل کمیشن بنانے سے کیوں بھاگ رہی ہے؟

انہوں نے کہا کہ واضح کہتا ہوں عمران خان کی رہائی ہمارے مذاکرات کے ایجنڈے کا حصہ ہوگی، بانی نے مذاکرات کیلیے 2 مطالبات سامنے رکھے ہیں، پہلا مطالبہ 9 مئی اور 24 نومبر پر جوڈیشل کمیشن جبکہ دوسرا سیاسی کارکنان کی رہائی ہے، انہوں نے اپنی رہائی اور کوئی کیس شرائط کے طور پر ابتدائی مذاکرات میں نہیں رکھا، مذاکراتی کمیٹی اور اتحادی جماعتیں سمجھتی ہیں سب سے بڑا سیاسی قیدی عمران خان ہیں۔

ان کا کہنا تھا کہ مذاکراتی کمیٹی مذاکرات کے دوران عمران خان کی رہائی کا معاملہ بھی سامنے رکھے گی، حکومتی رویے میں کوئی سنجیدگی نظر آئے گی تو اپنے مطالبات سامنے رکھیں گے، مذاکرات کے دوران حکومت بھی اپنا ایجنڈا سامنے رکھی گی بیٹھیں گے تو بات ہوگی، کارکنان کے ساتھ جو بربریت کا سلوک کیا گیا اس پر ہم کوئی لچک نہیں دکھائیں گے، مذاکرات میں عمران خان کی رہائی سے متعلق بھی کوئی لچک یا نرمی نہیں دکھائیں گے۔

رہنما سنی اتحاد کونسل نے مزید کہا کہ سب سے بڑی حقیقت یہ ہے کہ ملکی سیاست عمران خان کے اردگرد گھومتی ہے اور یہ حکومت کو بھی تسلیم کرنا پڑے گا، مذاکرات اگر بڑھانے ہیں تو حکومتی رویے میں بھی مثبت سوچ نظر آنی چاہیے، گزشتہ 3 ماہ سے بانی پی ٹی آئی سے پارٹی رہنماؤں کی ملاقات نہیں کرنے دی جا رہی۔

’مذاکرات کو آگے بڑھانے کیلیے ہماری عمران خان سے ملاقات کروانی پڑے گی۔ ان سے ملاقات میں مذاکرات سے متعلق تمام چیزیں سامنے رکھیں گے۔ مذاکرات میں ان کی آمادگی کے بغیر آگے نہیں بڑھ سکیں گے۔ وہ جس چیز پر آمادگی ظاہر کریں گے وہ کریں گے جس سے انکار کریں گے وہ نہیں کریں گے۔ ہمارے صبر کا جواب مثبت آئے گا تو ٹھیک ورنہ تلخیاں اتنی بڑھیں گی جو ناقابل بیان ہیں۔‘

اسلام آباد: وزیر اعظم کے مشیر برائے قانون و انصاف بیرسٹر عقیل ملک کا کہنا ہے کہ 9 مئی واقعات پر کمیشن بن گیا تو پی ٹی آئی قیادت اپنا سر چھپائے گی۔

اے آر وائی نیوز کے پروگرام ’سوال یہ ہے‘ میں بیرسٹر عقیل ملک نے کہا کہ مذاکراتی کمیٹی کی تشکیل اور 2 نکاتی ایجنڈا عمران خان کی ہی طرف سے آیا، میں اس بات کے حق میں ہوں کہ پی ٹی آئی رہنماؤں کی عمران خان سے ملاقات ہونی چاہیے۔

بیرسٹر عقیل ملک نے کہا کہ اسٹیبلشمنٹ نے واضح کہا کہ سیاسی معاملات سیاسی جماعتیں آپس میں بیٹھ کر طے کریں، حکومت کے پاس تمام اختیارات ہیں کمیشن بھی بنایا جا سکتا ہے، پی ٹی آئی نے ابھی تک کمیشن بنانے کیلیے حکومت سے باضابطہ رابطہ ہی نہیں کیا۔

انہوں نے کہا کہ پی ٹی آئی نے دو نکاتی ایجنڈا دیا لیکن اصل مقصد عمران خان کی رہائی ہے، مذاکرات کی آڑ میں این آر او یا ڈھیل مانگی جا رہی ہے تو قوم کو پتا چلنا چاہیے۔

ان کا کہنا تھا کہ یہ سیاسی کیسز کی بات کرتے ہیں تو کیا 190 ملین پاؤنڈ اور توشہ خانہ کیس سیاسی ہیں؟ اگر پی ٹی آئی کا کیس سیاسی ہوتا تو کابینہ سے بند لفافوں کی منظور نہ لی جاتی۔

پروگرام میں موجود عمران خان کے وکیل فیصل چوہدری کا کہنا تھا کہ گزشتہ روز بانی پی ٹی آئی نے کہا تھا کہ اگر حکومت سنجیدہ نہیں ہوتی تو مرحلہ وار سول نافرمانی کی تحریک کا آغاز کریں گے۔

فیصل چوہدری نے کہا کہ حکومتی کمیٹی تو بن گئی ہے لیکن ان کے عمل سے پتا چلے گا کہ سنجیدہ ہیں یا نہیں، عمران خان جیل میں ہیں ان تک معلومات دیر سے پہنچتی ہیں، دیکھنا ہوگا حکومت کیا ارینجمنٹ کرتی ہے جس سے بانی کو بروقت معلومات پہنچیں، دیکھنا ہوگا ہمارے 2 نکات پر حکومتی مذاکراتی کمیٹی کی کیا رائے ہوگی۔

انہوں نے کہا کہ پہلے حکومت کے کچھ لوگ مذاکرات سے متعلق مذاق اڑا رہے تھے، ہماری بانی سے ملاقات ہوئی تو پتا چلے گا حکومتی کمیٹی کتنی بااختیار ہے۔

پروگرام میں عمران خان کے وکیل نے کہا کہ 9 مئی کے بعد جنہوں نے پارٹی چھوڑی وہ بری الذمہ ہوگئے جبکہ جنہوں نے پارٹی نہیں چھوڑی ان پر 40، 40 کیسز بنا دیے گئے، ہم کوئی رعایت نہیں مانگ رہے بلکہ چاہتے ہیں کہ تمام کیسز قانون کے مطابق چلیں۔

فیصل چوہدری کا مزید کہنا تھا کہ القادر ٹرسٹ کیس کا فیصلہ اس لیے تاخیر کا شکار ہوا ہے پراسیکیوشن کے پاس ثبوت نہیں ہیں، پراسیکیوشن کے پاس کوئی ایسی چیز نہیں جس پر سزا ہو، کیس پراسیکیوشن کسی الزام کا ثبوت تک نہیں دے سکی۔

اسلام آباد: سیکرٹری اطلاعات پاکستان تحریک انصاف (پی ٹی آئی) شیخ وقاص اکرم کا کہنا ہے کہ سول نافرمانی کی تحریک کے حوالے سے فیصلہ کل عمران خان کریں گے۔

شیخ وقاص اکرم نے اپنے ویڈیو بیان میں کہا کہ حکومت نے مذاکراتی کمیٹی کا اعلان کر دیا کل ملاقات ہوگی، دونوں جانب سے اپنے اپنے نکات سامنے رکھے جائیں گے۔

انہوں نے کہا کہ کل اندازہ ہو جائے گا کہ حکومت مذاکرات میں کتنی سنجیدہ ہے، کمیٹیوں کی ملاقات کے بعد ہماری کمیٹی عمران خان کو پیش رفت سے آگاہ کرے گی جبکہ وہ سول نافرمانی کی تحریک سے متعلق جو فیصلہ لیں گے بتا دیا جائے گا۔

یہ بھی پڑھیں: پی ٹی آئی رہنماؤں سے بیک چینل رابطے برقرار ہیں، رانا ثنا اللہ

ان کا کہنا تھا کہ سول نافرمانی کی کال ابھی موجود ہے جسے عمران خان ہی واپس لے سکتے ہیں، مذاکرات کے آگے بڑھنے سے متعلق حتمی فیصلہ بانی پی ٹی آئی ہی لیں گے۔

قبل ازیں، وزیر اعظم شہباز شریف نے پی ٹی آئی سے مذاکرات کیلیے کمیٹی تشکیل دی جس میں اسحاق ڈار، رانا ثنا اللہ، عرفان صدیقی، راجہ پرویز اشرف، نوید قمر، خالد مقبول صدیقی، علیم خان اور چوہدری سالک حسین شامل ہیں۔

بعدازاں، پی ٹی آئی نے حکومت کی جانب سے مذاکرات کی پیشکش قبول کی۔ سیاسی جماعت کا وفد کل مذاکراتی عمل میں شریک ہوگا، حکومت اور اپوزیشن میں مذاکرات کا ابتدائی دور کل ساڑھے 11 بجے ہوگا۔

چئیرمین پی ٹی آئی بیرسٹر گوہر نے حکومتی کمیٹی کی تشکیل کا خیر مقدم کرتے ہوئے حکومت کی جانب سے اس کی تشکیل کو خوش آئند قرار دیا۔

جبکہ پی ٹی آئی رہنما شوکت یوسفزئی نے اپنے ویڈیو بیان میں کہا کہ حکومت کی طرف سے مذاکرات کیلیے قائم کمیٹی کا خیر مقدم کرتے ہیں۔

انہوں نے کہا کہ سول نافرمانی کی تحریک کا اعلان عمران خان نے کیا ہے لہٰذا مؤخر بھی وہی کر سکتے ہیں، اس فیصلہ کل وہ خود کریں گے۔

حکومت سے مذاکرات کیلیے عمران خان کی جانب سے بنائی گئی کمیٹی میں اسد قیصر، عمر ایوب، سلمان اکرم راجہ، علی امین گنڈاپور اور حامد رضا شامل ہیں۔

راولپنڈی: جی ایچ کیو حملہ کیس میں پی ٹی آئی رہنما زین قریشی، راجہ ناصر محفوظ اور راجہ شہباز پر فرد جرم عائد کر دی۔ مقدمے میں مجموعی طور پر 116 ملزمان پر فرد جرم عائد ہو چکی ہے۔

جی ایچ کیو حملہ کیس کی سماعت کے دوران زین قریشی پیش نہیں ہوئے جبکہ ان کے وکیل علی بخاری کے ذریعے فرد جرم عائد کی گئی۔

کیس کی سماعت انسداد دہشتگردی کی خصوصی عدالت کے جج امجد علی شاہ نے کی۔ اس موقع پر عمران خان کو کمرہ عدالت میں پیش کیا گیا۔ عدالت نے عمران خان اور فواد چوہدری کی 5 دسمبر کی سماعت کی فوٹیج فراہم کرنے کی درخواست پر فیصلہ محفوظ کیا گیا۔

یہ بھی پڑھیں: 190 ملین پاؤنڈ کیس کا فیصلہ پیر کو نہ سنائے جانے کا امکان

دوران سماعت پراسیکیوشن نے بلال، اعجاز، عاصم اور شہیر سکندر نامی ملزمان کے شناختی کارڈ بلاک کرنے کی استدعا کی۔ کیس کی سماعت 24 دسمبر تک ملتوی کر دی گئی۔

دو روز قبل کیس میں شاہ محمود قریشی، علی امین گنڈاپور سمیت 14 ملزمان پر فرد جرم عائد کی گئی تھی۔ کیس کی اڈیالہ جیل میں سماعت ہوئی تھی۔

عدالت نے جن ملزمان پر فرد جرم عائد کی ان میں لطاسب ستی، عمر تنویر بٹ، شبلی فراز، کنوزل شوزب، تیمور مسعود، سعد علی خان، سکندر زیب، زوہیب آفریدی، فہد مسعود، راجا ناصر محفوظ شامل ہیں۔

ملزمان نے صحت جرم سے انکار کیا تھا۔

اسلام آباد: بانی پاکستان تحریک انصاف (پی ٹی آئی) اور بشریٰ بی بی کے خلاف 190 ملین پاؤنڈ کیس کا فیصلہ 23 دسمبر 2024 بروز پیر کو نہ سنائے جانے کا امکان ہے۔

ذرائع نے اے آر وائی نیوز کو بتایا کہ 23 دسمبر 2024 کو فیصلہ نہ سنایا گیا تو پھر جنوری 2025 میں فیصلہ آنے کا امکان ہے، 18 دسمبر کو احتساب عدالت نے فیصلہ محفوظ کیا تھا۔

کیس کی سماعت اڈیالہ جیل میں احتساب عدالت کے جج ناصر جاوید رانا نے کی تھی جس میں عمران خان اور بشریٰ بی بی کے وکلا اور پراسیکیوشن ٹیم نے دلائل مکمل کیے تھے۔

یہ بھی پڑھیں: 190 ملین پاؤنڈ کیس کے فیصلے سے مذاکرات پر کوئی اثر نہیں پڑے گا، رانا ثنا اللہ

چھ گھنٹے تک جاری رہنے والی سماعت کے دوران فریقین کے وکلا کی جانب سے حتمی دلائل مکمل ہونے پر کیس کا فیصلہ محفوظ کیا گیا تھا جو 23 دسمبر بروز پیر کو سنایا جائے گا۔

پراسیکیوشن

وکلا نے کہا کہ 190 ملین پاؤنڈ کا کیس سیاسی بنیادوں پر بنایا گیا جس سے عمران خان اور بشریٰ بی بی کو کوئی مالی فائدہ نہیں ہوا جبکہ پراسیکیوشن کے وکیل امجد پرویز نے کہا کہ ملزمان نے بیرون ملک سے غیرقانونی طور پر رقم منگوا کر ایڈجسٹمنٹ کی۔

وکیل امجد پرویز نے کہا کہ 6 نومبر 2019 کو ڈیڈ سائن اور رقم کی پہلی قسط 29 نومبر 2019 کو سپریم کورٹ کے اکاؤنٹ میں آ چکی تھی جبکہ ڈیڈ کی منظوری کابینہ سے 3 دسمبر 2019 کو لی گئی تھی لیکن کابینہ کو بھی نہیں بتایا گیا کہ پہلی قسط پاکستان پہنچ چکی ہے۔

امجد پرویز نے کہا کہ پیسے وفاقی حکومت کے اکاؤنٹ کے بجائے سپریم کورٹ کے اکاؤنٹ میں منگوائے گئے، عمران خان نے بطور وزیر اعظم فیور دی جس کے بدلے میں ڈونیشن ملی، معاملہ پبلک آفس ہولڈر کے پاس زیر التوا ہو تو اس شخص سے کوئی بھی چیز لینا رشوت ہے، فرحت شہزادی اور زلفی بخاری کے نام پر زمین منتقل ہوئی جبکہ زمین منتقلی کے وقت بھی ٹرسٹ کا وجود نہیں تھا۔

انہوں نے حتمی دلائل میں کہا کہ 190 ملین پاؤنڈ کی ایڈجسٹمنٹ ہونے کے بعد ٹرسٹ بنایا گیا اور رولز آف بزنس 1973 کی بھی خلاف ورزی کی گئی، کابینہ میں کوئی بھی معاملہ زیر بحث لانے سے 7 روز قبل اسے سرکولیٹ کرنا ہوتا ہے، کیا جلدی تھی کہ اس معاملے کو 7 دن پہلے کابینہ ممبران کو سرکولیٹ نہیں کیا گیا؟

عمران خان اور بشریٰ بی بی

12 دسمبر کو سماعت کے دوران عمران خان اور بشریٰ بی بی نے 342 کا حتمی بیان جمع کروایا تھا اور اس پر دستخط بھی کیے تھے، ملزمان نے 342 کے بیان میں ترمیم کی تھی۔

عمران خان نے 342 کے بیان میں دفاع میں گواہ پیش نہ کرنے کا کہا تھا۔ عدالت نے فریقین کے حتمی دلائل کیلیے 17 دسمبر کی تاریخ مقرر کرتے ہوئے سماعت ملتوی کی تھی۔

احتساب عدالت نے 6 نومبر کو ریفرنس پر سماعت کے دوران ملزمان کے 342 کے بیان کیلیے 8 نومبر کی تاریخ مقرر کی تھی۔ سماعت کے موقع پر عمران خان کو کمرہ عدالت میں پیش کیا گیا تھا جبکہ بشریٰ بی بی پیشی کیلیے اڈیالہ جیل آئی تھیں۔

دوران سماعت ریفرنس میں وکلا صفائی نے 35 گواہوں پر جرح مکمل کی تھی۔ عمران خان کے وکیل ظہیر عباس جبکہ بشریٰ بی بی کے وکیل عثمان گل نے گواہوں پر جرح کی تھی۔

نیب پراسیکیوٹر نے بتایا کہ 190 ملین پاؤنڈ ریفرنس میں مزید کوئی شواہد پیش نہیں کرنا چاہتے۔ اس پر عدالت نے ملزمان کے 342 کے بیان کیلیے 8 نومبر کی تاریخ مقرر کر دی۔