Tag: Imran Khan

اسلام آباد (22 جولائی 2025): اسلحہ و شراب برآمدگی کیس میں وزیر اعلیٰ خیبر پختونخوا علی امین گنڈاپور کا بیان ریکارڈ نہ ہو سکا۔

سیشن عدالت میں اسلحہ و شراب برآمدگی کیس کی سماعت کے دوران انٹرنیٹ مسائل کے باعث علی امین گنڈاپور کا ویڈیو لنک پر 342 کا بیان قلمبند نہ ہو سکا، جوڈیشل مجسٹریٹ مبشر حسن نے آج کی سماعت کا حکم نامہ لکھوا دیا۔

عدالتی حکم نامے کے مطابق علی امین گنڈاپور کے وارنٹ گرفتاری برقرار رکھے جاتے ہیں، وزیر اعلیٰ کے پی شوکاز نوٹس کا جواب جمع کروائیں۔

یہ بھی پڑھیں: علی امین گنڈاپور کو گرفتار کر کے عدالت میں پیش کرنے کا حکم

اس میں کہا گیا کہ کیس آج سماعت کیلیے مقرر تھا اور علی امین گنڈاپور کا 342 بیان ریکارڈ کرنا تھا، ان کو عدالت حاضری کیلیے شوکاز نوٹس جاری کیا گیا تھا، وکیل صفائی نے بتایا کہ وزیر اعلیٰ سرکاری کام کے باعث مصروف ہیں۔

حکم نامے کے مطابق کے پی میں شدید بارشوں کے باعث وزیر اعلیٰ کی مصروفیات بتائی گئیں، وکیل صفائی نے بتایا کہ علی امین 342 کا بیان ویڈیو لنک پر ریکارڈ کروانے کو تیار ہیں۔

’3 بجے کیس کی سماعت شروع ہوئی تو وکیل صفائی عدالت میں پیش ہوئے، وکیل صفائی نے ملزم کے نمبر اور زوم لنک عدالت کو مہیا کیے۔ عدالتی عملے نے کوشش کی لیکن انٹرنیٹ کنکشن میں مسائل کی وجہ سے رابطہ نہ ہوا۔ وکیل صفائی کے بیان سے معلوم ہوتا ہے علی امین گنڈاپور بیان ریکارڈ کروانا چاہتے ہیں۔‘

مزید بتایا گیا کہ وکیل صفائی نے یقین دہانی کروائی کہ آئندہ سماعت پر 342 کا بیان قلمبند کروائیں گے، علی امین گنڈاپور کو بیان قلمبند کروانے کیلیے ایک اور موقع فراہم کیا جاتا ہے، وہ اپنا بیان وڈیو لنک یا عدالت میں پیش ہو کر ریکارڈ کروا سکتے ہیں۔

عدالت نے کیس کی سماعت 24 جولائی 2025 تک ملتوی کر دی۔

اسلام آباد (22 جولائی 2025): چیئرمین پاکستان تحریک انصاف (پی ٹی آئی) بیرسٹر گوہر خان کا کہنا ہے کہ مذاکرات کا وقت ختم ہو چکا ہے اب فیصلے بانی ہی کریں گے۔

جوڈیشل کمپلیکس میں میڈیا سے گفتگو کرتے ہوئے بیرسٹر گوہر نے کہا کہ خیبر پختونخوا میں سینیٹ انتخابات خوش اسلوبی سے مکمل ہوئے، پی ٹی آئی نے تمام امیدوار مارچ 2024 میں ہی فائنل کر لیے تھے، کوئی نام عمران خان کی مشاورت کے بغیر شامل نہیں کیا گیا۔

بیرسٹر گوہر نے کہا کہ مخصوص نشستوں کی وجہ سے عمل میں تاخیر ہوئی، چھ نشستیں ملنا ہمارے لیے بہترین رہا۔

یہ بھی پڑھیں: ’جو ہو رہا ہے عمران خان کے احکامات پر ہو رہا ہے‘

انہوں نے کہا کہ 9 مئی کے بعد پریس کانفرنس کرنے والوں کو ٹکٹ دینے کی بات درست نہیں، مرزا آفریدی کا نام خود عمران خان نے فائنل کیا، مرزا آفریدی پارٹی بیانیے اور مفادات کے ساتھ کھڑے رہے۔

ان کا کہنا تھا کہ دو سال ہوگئے اب سختیاں ختم ہونی چاہئیں سب کو ملاقات کی اجازت ملنی چاہیے، عمران خان سے ملاقات پر عدالتی احکامات کی خلاف ورزی ہو رہی ہے، آخری ملاقات بیرسٹر سیف اور پھر بانی پی ٹی آئی کی بہنوں نے کی، اس پر لوگ بلاوجہ شکوک و شبہات پھیلا رہے ہیں۔

چیئرمین پی ٹی آئی نے مزید کہا کہ پی ٹی آئی کے لوگ خود پارٹی چھوڑتے ہیں کسی کو نکالنا نہیں پڑتا، عمران خان جیل سے احتجاج کی قیادت کریں گے، اب فیصلے وہ ہی کریں گے۔

لاہور (19 جولائی 2025): وزیر اطلاعات و نشریات پنجاب عظمیٰ بخاری کا کہنا ہے کہ سینیٹ الیکشن میں ٹکٹوں کی خرید و فروخت سے بانی پاکستان تحریک انصاف (پی ٹی آئی) عمران خان مکمل باخبر ہیں۔

عظمیٰ بخاری نے پی ٹی آئی پشاور کے رہنماؤں کی پریس کانفرنس پر ردعمل دیتے ہوئے کہا کہ خیبر پختونخوا میں سینیٹ الیکشن کی ٹکٹوں کیلیے پی ٹی آئی میں بولیاں لگیں جس میں پارٹی ورکرز ہار گئے نوٹوں کی چمک جیت گئی۔

صوبائی وزیر نے کہا کہ پی ٹی آئی رہنماؤں نے خود اپنی لیڈرشپ کو بے نقاب کیا، عمران خان بھی ہارس ٹریڈنگ میں برابر کے شریک ہیں، جو جماعت ہارس ٹریڈنگ کی مخالف تھی آج اس کی حامی بن گئی ہے، کارکنوں پر اے ٹی ایمز کو ترجیح دی گئی۔

یہ بھی پڑھیں: پی ٹی آئی کارکنوں کی قیادت کو وارننگ

انہوں نے کہا کہ اقتدار کے مزے موسمی پرندے لوٹ رہے ہیں جبکہ کارکن صرف مار کھا رہے ہیں، خیبر پختونخوا میں پی ٹی آئی کی مقبولیت تیزی سے کم ہو رہی ہے، صوبے کے نوجوان سمجھ چکے ہیں کہ پارٹی نے انہیں صرف احتجاج کیلیے استعمال کیا۔

واضح رہے کہ خیبر پختونخوا میں سینیٹ الیکشن میں ٹکٹوں کی بندر بانٹ کے معاملے پر پی ٹی آئی میں اختلافات کھل کر سامنے آگئے ہیں۔

گزشتہ روز پی ٹی آئی پشاور کے تنظیمی عہدیداروں نے پارٹی قیادت سے سینیٹ الیکشن میں عرفان سلیم کو ٹکٹ دینے کا مطالبہ کیا اور مطالبہ نہ ماننے کی صورت میں صوبائی اسمبلی، وزیر اعلیٰ ہاؤس اور ایم پی ایز کے گھروں کا گھیراؤ کرنے کی دھمکی دی۔

تنظیمی عہدیداروں نے کہا کہ عرفان سلیم کو ٹکٹ نہ دینے کا فیصلہ نظریے کے خلاف ہے، پارٹی کے دیرینہ کارکنان احتجاج میں شریک ہیں، عرفان سلیم کے کاغذات واپس نہیں لیں گے، وہ سینیٹ الیکشن کے امیدوار ہیں اور رہیں گے۔

ان کا کہنا تھا کہ سینیٹ الیکشن میں حقیقی کارکنوں کی حلق تلفی دی گئی ہے، یہ ہماری نظریات کی جنگ ہے جو بانی پی ٹی آئی عمران خان نے شروع کی لیکن ختم ہم کریں گے۔

اسلام آباد (15 جولائی 2025): وزیر اعظم کے کوآرڈینیٹر اطلاعات برائے خیبر پختونخوا اختیار ولی خان کا کہنا ہے کہ پی ٹی آئی بھارتی ایجنڈے کی تکمیل چاہتی ہے۔

اختیار ولی خان نے پریس کانفرنس کرتے ہوئے کہا کہ جب بھی معیشت مضبوط ہونے لگتی ہے سازشی عناصر سرگرم ہو جاتے ہیں، پی ٹی آئی کس کے ایجنڈے پر کام کر رہی ہے اس کا فیصلہ عوام نے کرنا ہے۔

انہوں نے کہا کہ پی ٹی آئی کا 5 اگست کو احتجاج کا انتخاب مخصوص ایجنڈے کو ظاہر کرتا ہے، اس دن کی تاریخ کا تعین کرنا کشمیر کاز کو نقصان پہنچانے کی تکنیک ہے، ریاست، حکومت اور (ن) لیگ کشمیریوں کے ساتھ کھڑے ہیں۔

یہ بھی پڑھیں: عمران خان سے تمام جیل سہولتیں واپس لے لی گئیں، علیمہ خان کا دعویٰ

وزیر اعظم کے کوآرڈینیٹر نے کہا کہ نریندر مودی، اس کے دوست اور پروکسیز کو کامیاب نہیں ہونے دیں گے، ریاست کے خلاف کھڑے ہونے والوں کو طاقت سے جواب دیا جائے گا۔

ان کا کہنا تھا کہ قوم سے سوال ہے کشمیریوں کے ساتھ کھڑے ہونا ہے یا بانی پی ٹی آئی کے ساتھ؟ بانی پی ٹی آئی عمران خان کے منہ سے نکلے جملے کی بازگشت دہلی اور تل ابیب تک سنائی دیتی ہے۔

ان کا کہنا تھا کہ گیلپ سروے کے مطابق کے پی میں کرپشن بہت زیادہ ہے جبکہ 73 فیصد نے الزام لگایا سرکاری نوکریاں فروخت ہوتی ہیں، وزیر اعظم شہباز شریف نے میرٹ اور شفافیت پر بھرتیاں کرنے کو ترجیح دی ہے۔

لاہور (13 جولائی 2025): وزیر اعلیٰ خیبر پختونخوا علی امین گنڈاپور کا کہنا ہے کہ پی ٹی آئی کی سیاسی تحریک کا آغاز گزشتہ روز سے ہو چکا ہے جو 90 روز تک جاری رہے گی۔

علی امین گنڈاپور نے پی ٹی آئی رہنماؤں کے ہمراہ نیوز کانفرنس میں کہا کہ میرے خیال میں سب سے زیادہ تحاریک پی ٹی آئی نے چلائی ہے اور لوگوں کوشعور دیا، کل پورے پاکستان سے لوگ لاہور آئے اور ہماری میٹنگ ہوئی، کل تحریک کو آگے کیسے لے کر جانے سے متعلق بات ہوئی ہے، ہر شہر اور گلی میں تحریک چلائیں گے۔

وزیر اعلیٰ کے پی نے کہا کہ ملک کیلیے ہمارے کارکنون نے قربانیاں دیں، ہمارے لوگوں کو توڑا گیا اور لیڈرشپ پر تشدد کیا گیا، ہم سے انتخابی نشان لے لیا گیا لیکن 8 فروری کو لوگوں نے ووٹ دے کر ثابت کر دیا، دنیا کی تاریخ میں کسی سیاسی پارٹی کے ساتھ اتنا ظلم نہیں ہوا۔

انہوں نے کہا کہ بانی پی ٹی آئی عمران خان پاکستان کی خاطر مذاکرات کیلیے تیار ہیں، ملک کا قانون سب کیلیے برابر ہونا چاہیے آئین کی پاسداری ہونی چاہیے، ملک میں اس وقت دہشتگردی کی وجہ سے حالات خراب ہیں، بانی پی ٹی آئی عمران خان کے دور میں دہشتگردی کے واقعات نہیں ہو رہے تھے لیکن پی ڈی ایم ون آئی اور حالات خراب ہوئے، جب پی ڈی ایم ٹو آئی تو مزید حالات خراب ہوگئے۔

یہ بھی پڑھیں: بڑی سیاسی تحریک کیلیے کارکنان کو متحرک کر رہے ہیں، علی امین گنڈاپور

’ذات اور انا سے نکل کر ایک قوم بن کر سوچیں۔ ہم نے کوئی غلطی کی ہے تو اس کی سزا کیلیے بھی تیار ہیں۔ ہماری تحریک کل رات سے شروع ہوگئی ہے جو 90 دن تک جاری رہے گی۔ ہم نہیں چاہتے کہ ہمارے ملک کے بچے غلام ہوں، بچوں کو آزادی اور خود مختاری دینی ہے تو ہماری تحریک کا حصہ بنیں۔ عمران خان تحریک کی قیادت خود کریں گے۔‘

علی امین گنڈاپور نے کہا کہ پی ٹی آئی کی تحریک 90 روز میں آر یا پار ہوگی، وقت ضائع کر کے اپنے مقاصد حاصل کیے جا رہے ہیں ہم سے مخصوص نشستیں بھی لے لیں، سڑکوں پر آئینی طور پر احتجاج کر کے اپنا حق مانگنا میرا حق ہے، 90 دن میں ہم نے اپنے لیے اہداف رکھے ہیں، ہم نے فیصلہ کرنا ہے اس ملک میں کیسی سیاست کرنی چاہیے، ہم نے آفر دے دی ہے آئیں بیٹھ کر بات کریں۔

اسلام آباد (12 جولائی 2025): وزیر اعلیٰ خیبر پختونخوا علی امین گنڈاپور کا کہنا ہے کہ کے پی حکومت کا قافلہ پنجاب اسمبلی سے نکالے گئے نمائندوں سے اظہار یکجہتی کیلیے ہے۔

علی امین گنڈاپور نے قافلے سمیت پنجاب روانگی سے قبل میڈیا سے گفتگو میں کہا کہ ہمارا قافلہ غیر قانونی، غیر آئینی، غیر جمہوری اور غیر اخلاقی اقدامات کے خلاف پُرامن ردعمل ہے، ہم صرف امن، محبت، بھائی چارے اور رواداری کا پیغام لے کر پنجاب جا رہے ہیں۔

وزیر اعلیٰ کے پی نے واضح کیا کہ جو سمجھتے ہیں کہ یہ کوئی احتجاج ہے وہ جان لیں یہ محض اظہار یکجہتی ہے، ہمارا مقصد انتشار نہیں بلکہ جمہوری اقدار کا تحفظ ہے، ہر قدم پر امن کی بات کی ہے اور ہر لفظ میں آئین کی پاسداری کا واضح پیغام ہے۔

یہ بھی پڑھیں: پی ٹی آئی نے پنجاب اسمبلی کے باہر اپنی اسمبلی لگا لی

انہوں نے کہا کہ عوام دیکھ لیں یہ قافلہ نفرت نہیں صرف محبت لے کر نکل رہا ہے، جمہوریت کے علمبردار اپنے بھائیوں سے اظہار یکجہتی کیلیے نکلے ہیں، صرف یہ بتانے جا رہے ہیں کہ جمہوری نمائندوں کے ساتھ کھڑے ہیں، قافلے کا ہر قدم آئین کی سر بلندی اور عوام کے حق نمائندگی کا استعارہ ہے۔

دوسری جانب ترجمان وزیر اعلیٰ کے پی نے بتایا کہ علی امین گنڈاپور پارٹی رہنماؤں کے ہمراہ کے پی ہاؤس سے لاہور کیلیے روانہ ہوگئے، قافلے میں صوبائی وزرا، ارکان اسمبلی اور کارکنوں کی بڑی تعداد شریک ہے، علی امین گنڈاپور براستہ جی ٹی روڈ لاہور جائیں گے۔