راولپنڈی: چیئرمین پاکستان تحریک انصاف (پی ٹی آئی) بیرسٹر گوہر کا کہنا ہے کہ بانی نے کہا ہے وہ آج کے بعد پارٹی کے پیٹرن ان چیف ہوں گے۔
اڈیالہ جیل میں عمران خان سے ملاقات کے بعد میڈیا سے گفتگو کرتے ہوئے بیرسٹر گوہر نے کہا کہ بانی پی ٹی آئی سے توشہ خانہ ٹو کیس کے موقع پر ملاقات ہوئی، ان کے مطابق ہمارے پاس احتجاجی تحریک کے سوا کوئی راستہ نہیں، اسلام آباد کی کال دینے کے بجائے پورے ملک میں احتجاج ہوگا۔
بیرسٹر گوہر کے مطابق عمران خان احتجاجی تحریک کو وہ خود لیڈ کریں گے، انہوں نے کہا ہے احتجاجی تحریک کیلیے ہدایات عمر ایوب کو دی جائیں گی، بانی پی ٹی آئی نے احتجاج کا ابھی کوئی ٹائم فریم نہیں دیا وہ خود دیں گے۔
یہ بھی پڑھیں: مجھے امید ہے عمران خان عید سے پہلے رہا ہوں گے ، بیرسٹر گوہر
’عمران خان نے کہا ہے وہ آج کے بعد پی ٹی آئی کے پیٹرن ان چیف ہوں گے۔ تمام فیصلے وہ ہی کریں گے جس طرح پہلے کرتے تھے۔ مجھے چیئرمین شپ سے ہٹانے کی باتیں افواہیں پھیلانے والے کر رہے ہیں۔ عمران خان پیٹرن ان چیف ہیں میں پارٹی کا چیئرمین رہوں گا۔‘
انہوں نے کہا کہ پارٹی کا چیئرمین نہ ہونے کی صورت میں سب کو پتا ہے نتائج کیا ہوں گے، احتجاج کی ذمہ داری ہمیشہ علی امین گنڈاپور کو دی جاتی تھی لیکن اب ایسا نہیں، احتجاج کے حوالے سے مختلف لوگوں کو مختلف ذمہ داریاں دی جائیں گی، عمران خان نے پارٹی لیڈرشپ پر کوئی عدم اعتماد نہیں کیا۔
بیرسٹر گوہر نے کہا کہ میری ہمیشہ کوشش رہی ہے مسائل بات چیت سے حل ہوں، میں ابھی بھی چاہتا ہوں مسائل بات چیت کے ذریعے حل ہوں، عمران خان نے ہمیشہ لچک کا مظاہرہ کیا، ہم نے مشکل حالات میں حکومت کا ساتھ دیا لیکن پرامن احتجاج کریں گے کیونکہ یہ ہمارا حق ہے۔
’ہم کسی صورت پاکستان کو نقصان پہنچانے کی کوشش نہیں کریں گے۔ بانی پی ٹی آئی کے کیسز لگتے نہیں اور اگر لگتے ہیں تو شنوائی نہیں ہوتی۔ مخصوص نشستوں پر عدالتیں فیصلہ نہیں کر رہیں۔ کسی سے کوئی بات نہیں ہو رہی لیکن بانی نے مذاکرات کا آپشن کھلا رکھا ہے۔‘
