کنشاسا : شمال مغربی کانگو میں ایک کشتی میں آگ لگنے کے بعد اُلٹ گئی، جس کے نتیجے میں کم از کم 50افراد ہلاک اور 100 سے زائد لاپتہ ہوگئے۔
گزشتہ رات پیش آنے والے حادثے کے بعد فوری کارروائی کرتے ہوئے درجنوں افراد کو بچا لیا گیا تاہم کئی افراد کے جسم کافی حد تک جھلس گئے تھے۔
اگلے روز لاپتہ افراد کی تلاش جاری رہی، جس میں ریسکیو ٹیموں کو ریڈ کراس اور صوبائی حکام کی پوری مدد حاصل تھی۔
میڈیا رپورٹ کے مطابق واقعہ اس وقت پیش آیا جب ایک خاتون کشتی میں کھانا پکا رہی تھی کہ اچانک آگ بھڑک اٹھی اور کئی مسافر جن میں خواتین اور بچے بھی شامل تھے۔
انہوں نے جھلسنے سے بچنے کیلیے سمندر میں چھلانگ لاگی لیکن تیرنے کی صلاحیت نہ ہونے کی وجہ سے پانی میں ڈوب کر جان کی بازی ہار گئے۔
واضح رہے کہ کانگو میں کشتی حادثے عام طور پر ہوتے رہتےہیں، جہاں رات کے وقت سفر اور گنجائش سے زائد مسافروں کو کشتیوں میں سوار کرانا معمول ہے۔ حکام کو بحری قوانین نافذ کرنے میں دشواری کا سامنا ہے۔
کانگو کی آبادی 100 ملین سے زائد ہے، اور یہاں کے دریا خاص طور پر اُن علاقوں میں آمد و رفت کا بڑا ذریعہ ہیں جہاں سڑکوں کا کوئی نظام موجود نہیں۔
گزشتہ چند برسوں میں درجنوں حادثات میں سینکڑوں افراد ہلاک ہو چکے ہیں، کیونکہ لوگ سڑکوں کی کمی کے باعث مسافروں اور سامان سے بھری لکڑی کی کشتیوں کا استعمال زیادہ کرتے ہیں۔
