دبئی : یو اے ای میں پہلی بار بجلی سے چلنے والی کاریں بنانے کا آغاز کردیا گیا، جس کا مقصد آلودگی پر قابو پانا ہے، ابتدائی طور پر سالانہ 10 ہزار گاڑیاں تیار کی جائیں گی۔
تفصیلات کے مطابق متحدہ عرب امارات کے ام جلوری ہولڈنگ گروپ نے دبئی انڈسٹریل سٹی میں الیکٹریکل کاریں تیار کرنے والی الدمانی فیکٹری کا افتتاح کردیا۔ یہ متحدہ عرب امارات میں اپنی نوعیت کی پہلی فیکٹری ہے۔
یو اے ای ذرائع ابلاغ کی رپورٹ کے مطابق الدمانی فیکٹری میں سالانہ 10 ہزار گاڑیاں تیار کی جائیں گی۔ فیکٹری کا رقبہ 45ہزار مربع فٹ پر مشتمل ہے۔
ذرائع کے مطابق اس اقدام کا مقصد متحدہ عرب امارات میں کاربن کے اخراج میں کمی اور گرین ٹرانسپورٹ کی بڑھتی ہوئی طلب کو پورا کرنا ہے۔
ٹیکوم گروپ کے ڈپٹی ایگزیکٹیو چیئرمین سعود ابو الشوارب نے بتایا کہ فیکٹری کا قیام کم کاربن والی توانائی کے حوالے سے ٹرانسپورٹ کی دنیا میں ایک اور بڑی کامیابی ہے۔
انہوں نے کہاکہ ام جلوری فیکٹری کا افتتاح اس بات کی علامت ہے کہ ہم اپنے یہاں صنعت کا معیار مسلسل بلند کررہے ہیں اور ہماری مستقل کوشش یہ ہے کہ متحدہ عرب امارات میں مختلف قسم کی صنعتوں کو فروغ دیا جائے۔
ام جلوری ہولڈنگ کی مجلس انتظامیہ کی چیئرپرسن ڈاکٹر ماجدہ العزعزی نے کہا کہ الدمانی کار فیکٹری خطے میں اپنی نوعیت کی پہلی ہے۔
ابتدائی طور یہ عارضی فیکٹری ہوگی جلد ہی اس کی گنجائش میں اضافہ کیا جائے گا۔ دو برس کے اندر اس کی سالانہ پیداواری استعداد 55 ہزار گاڑیوں تک پہنچ جائےگی۔ یہ فیکٹری 10 لاکھ مربع فٹ کے رقبے پر قائم کی جائے گی۔
