Tag: in yemen

  • اسرائیل کے یمن میں حوثیوں کے ٹھکانوں پر فضائی حملے

    اسرائیل کے یمن میں حوثیوں کے ٹھکانوں پر فضائی حملے

    اسرائیل نے گزشتہ روز حوثی اہداف پر یمن میں حملے کیے، اسرائیلی جنگی طیاروں نے یمنی حوثیوں کے زیر قبضہ حدیدہ میں پاور پلانٹس کو نشانہ بنایا، جس کے نتیجے میں کم از کم چار افراد شہید ہوئے۔

    غیر ملکی خبر رساں ادارے روئٹرز کی رپورٹ کے مطابق یہ حملے یمن میں موجود حوثی باغیوں کی جانب سے اسرائیل پر کیے جانے والے میزائل حملوں کے جواب میں کیے گئے تھے۔

    رپورٹ کے مطابق مجموعی طور پر اسرائیل کی جانب سے حدیدہ پر 10 فضائی حملے کیے گئے جن میں حدیدہ کی بندرگاہ، ائیرپورٹ، آئل اسٹوریج اور عسکری تنصیبات کو نشانہ بنایا گیا۔

    oil refinery

    عینی شاہدین نے بتایا کہ یمن میں فضائی حملوں کے بعد علاقے میں بجلی کی فراہمی منقطع ہوگئی ہے۔ حوثیوں کی وزارتِ صحت کا کہنا ہے کہ حملوں میں 4 افراد جاں بحق اور 29 زخمی ہوئے۔

    دوسری جانب اسرائیل نے دعویٰ کیا ہے کہ حوثی ملیشیا ایران کے تعاون سے اسرائیل پر حملے کرنے اور علاقائی عدم استحکام پیدا کرنے کی کوشش کر رہی ہے۔

    حوثیوں نے کہا ہے کہ ان کے حملے فلسطینیوں کے ساتھ اظہار یکجہتی کے طور پر کیے جا رہے ہیں اور انہوں نے تازہ ترین حملے میں تل ابیب کے قریب بن گوریون ایئرپورٹ پر بیلسٹک میزائل داغا تھا جس کے جواب میں اسرائیلی فوج کا کہنا تھا کہ اس نے یہ حملہ ناکام بنا دیا۔

    Hodeidah

    علاوہ ازیں حوثیوں کے زیرانتظام المسیرہ ٹی وی نے رپورٹ کیا ہے کہ اسرائیلی فضائی حملوں نے الحلی پاور پلانٹ کو مکمل طور پر تباہ کیا، الحدیدہ کے مرکزی پاور اسٹیشن کو ناکارہ بنا دیا۔

    المسیرہ کے مطابق تین مزدور پلانٹ کے ملبے تلے دبے ہوئے ہیں جبکہ امدادی کارکن مزید پھنسے ہوئے لوگوں کو تلاش کرنے کی کوشش کر رہے ہیں۔

  • یمن :بحری جہاز پر راکٹ حملہ، 7 پاکستانیوں کے  جاں‌ بحق ہونے کی اطلاع

    یمن :بحری جہاز پر راکٹ حملہ، 7 پاکستانیوں کے جاں‌ بحق ہونے کی اطلاع

    صنعا: یمن کی سمندری حدود میں کارگو شپ پر راکٹ حملے کے نتیجے میں جہاز ڈوب گیا جس کے باعث متعدد افراد جاں بحق ہوگئے جن میں 7 پاکستانی بھی شامل ہیں، جہاز پر 82 افراد سوار تھے۔

    اطلاعات کے مطابق جہاز کسی غیر ملکی کمپنی کا ہے، پاکستان سے ایجنٹ شپنگ کمپنی کے ذریعے جہاز پر 8 پاکستانی باشندوں کو نوکری ملی اور وہ اسی وقت جہاز پر موجود تھے کہ حملہ ہوگیا۔

    پاکستانی باشندوں کو مذکورہ جہاز پر نوکری دلوانے والی ایجنٹ شپنگ کمپنی نے راکٹ حملے کی تصدیق کرتے ہوئے کہا ہے کہ حملے کے نتیجے میں مال بردار جہاز ڈوب گیا صرف شپ آفیسر کبیر خادم نامی شخص بچ سکا۔ کمپنی کے مطابق جہاز پر چیف انجینر محمد شعیب، الیکٹریشن ابراہیم سمیت دیگر پاکستانی سوار ہیں۔

    ایجنٹ شپنگ کمپنی نے بتایا کہ جہاز پر موجود افراد میں سے 7 پاکستانیوں کی ہلاکت کی اطلاع ہے، یہ اطلاع کل شام کو ملی جس کے بعد عملے کے اہل خانہ کو آگاہ کردیا گیا ہے تاہم جہا زکے کپتان سمیت دیگر افراد کے بارے میں معلومات حاصل کررہے ہیں۔

    انصار برنی ویلفیئر ٹرسٹ کے سربراہ انصار برنی نے اے آر وائی نیوز کو بتایا کہ یمن کی سمندری حدود میں موجود ایک نجی کارگو شپ پر نامعلوم افراد نے راکٹ سے حملہ کیا ہے جس کے نتیجے میں متعدد افراد جاں بحق اور زخمی ہوگئے ہیں تاہم حتمی معلومات کے لیے کوششیں جاری ہیں۔

    ابتدائی معلومات کے مطابق حملے میں 7 پاکستانی باشندوں کے جاں بحق ہونے کی اطلاعات موصول ہورہی ہیں تاہم تصدیق کا عمل جاری ہے۔

    اے آر وائی نیوز کے نمائندے انجم وہاب نے بتایا کہ میزائل حملہ گزشتہ روز ہوا تھا، حملے کی جگہ یمن کی سمندری سرحد کے نزدیک ہے، جہاز پر موجود عملے کے افراد میں چیف آفیسر اور کپتان سمیت 8 افراد پاکستانی ہیں۔

    انہوں نے بتایا کہ متعدد ذرائع اور انصار برنی بھی معلومات حاصل کرنے کی کوشش کررہے ہیں، کتنے پاکستانی زخمی اور جاں بحق ہوئے یہ کہنا قبل از وقت ہوگا تاہم یہ معلومات حاصل ہوئی ہیں کہ جہاز پر 82 افراد موجود تھے، انصار برنی بھی یمن اور پاکستانی سفارت خانے سے رابطہ کرنے کی کوشش کررہے ہیں۔

    قبل ازیں معلومات حاصل ہوئی تھیں کہ جہاز پر حملے کے نتیجے میں افراد زخمی ہوئے تاہم بعد میں ان کے جاں بحق ہونے کی اطلاعات سامنے آئیں۔

    واضح رہے کہ یمن کے نزدیک سے گزرنے والے جہازوں کو صومالی قزاقوں کے حملے کے خدشے کا سامنا رہتا ہے، متعدد بار صومالی بحری قزاقوں نے کارگو اور مسافر بردار جہازوں کو اغوا کرکے حکومتوں سے کروڑوں اور لاکھوں ڈالر وصول کرکے انہیں رہا کیا ہے۔

    ماضی میں صومالی قزاقوں کے خلاف کارروائی کے لیے متعدد حکومتوں نے مشترکہ طور پر بحریک اسکواڈ بھی تشکیل دیا، قزاقوں کا زورکم ہوگیا ہے تاہم اب بھی ان کے کچھ گروپ باقی ہیں۔

    یہ قزاق ایک کشتی میں راکٹ لانچر لیے گھومتے ہیں، بحری جہاز کو دیکھتے ہی اسے رکنے کی وارننگ دیتے ہیں اور نہ رکنے پر راکٹ سے حملہ کردیتے ہیں، اس جہاز پر بھی راکٹ سے حملہ کیا گیا ہے، خدشہ ہے کہ صومالی قزاقوں نے جہاز کو رکنے کا اشارہ کیا ہوگا اور مزاحمت پر راکٹ فائر کیا ہوگا، تاہم حتمی صورتحال کےلیے معلومات حاصل کی جارہی ہیں۔

  • یمن : داعش کے فوجی بیرک پر حملے، متعدد یمنی فوجی ہلاک

    یمن : داعش کے فوجی بیرک پر حملے، متعدد یمنی فوجی ہلاک

    یمن: جاری خانہ جنگی میں داعش بھی شامل ہوگئی ، فوجی بیرک پر حملے میں متعدد یمنی فوجی ہلاک ہوگئے،ذمہ داری داعش نے قبول کرلی ہے.

    غیر ملکی خبر رساں ادارے کے مطابق یمن کے شہر شبام میں جنگجوؤں نے فوج کی ایک پٹرولنگ پارٹی کو پہلے سڑک کے کنارے نصب بم سے نشانہ بنایا جبکہ ایک خودکش بمبار نے اپنی بارود سے بھری کار کو رہائشی علاقے کے نزدیک واقع فوج کی چوکی سے ٹکرا دیا۔

    یمنی حکام کے مطابق پندرہ فوجی اور انیس شدت پسند مارے گئے۔

    دوسری جانب داعش نے کارروائی کی ذمہ داری قبول کرتے ہوئے پچاس فوجیوں کو مارنے کا دعوی کیا ہے۔