نئی دہلی / بھارت میں قرض ادا نہ کرسکنے پر لڑکی نے خود کو آگ لگالی، دوسرے واقعے میں گھر سے باہر سونے والے معمر شخص کا گلا کاٹ دیا گیا۔
تفصیلات کے مطابق بھارتی ریاست اترپردیش کے ضلع غازی آباد میں ایک 18 سالہ لڑکی نے محض 5 ہزار روپے کے قرض کی ادائیگی میں ناکام ہونے کی وجہ سے خود کو آگ لگالی، حادثہ ضلع کے وجین نگر میں پیش آیا۔
متاثرہ لڑکی کو تشویشناک حالت میں مقامی اسپتال میں داخل کرادیا گیا ہے، جہاں اس کی حالت اب خطرے سے باہر بتائی جارہی ہے۔
اس حوالے سے پولیس کا کہنا ہے کہ لڑکی کے پڑوس میں رہنے والا نوجوان قرض کی ادائیگی کے لیے لڑکی پر مسلسل دباؤ ڈال رہا تھا جس سے تنگ آکر اس نے انتہائی قدم اٹھایا، اس لڑکی کو تشویشناک حالت میں اسپتال میں داخل کرایا گیا ہے۔
پولیس کے مطابق لڑکی کے مزدور بھائی کے پاس لاک ڈاؤن میں رقم نہیں بچی تھی، ایسی صورتحال میں جب لڑکی کو لگا کہ دباؤ بڑھتا جارہا ہے تو اس نے یہ خوفناک قدم اُٹھایا۔
خود کشی کی کوشش میں ملوث ہونے کے معاملے میں پولیس نے اس نوجوان کو حراست میں لے لیا ہے، متاثرہ کی والدہ کا کہنا ہے کہ مالک مکان کا کرایہ ادا کرنے کے لئے رقم نہیں بچی تھی, مکان مالک بھی مسلسل رقم مانگ رہا تھا۔ جس کی وجہ سے لڑکی افسردگی میں مبتلا تھی۔
دوسری جانب ریاست اترپردیش میں پرتاپ گڑھ ضلع ہیڈ کواٹر سے تیس کلومیٹر دور تھانہ پٹّی کوتوالی علاقے کے جیتا پور گاؤں میں گزشتہ شب گھر کے دروازے کے باہر سوئے ہوئے ضعیف کا گلا کاٹ کر قتل کر دیا گیا۔
مقتول کی عمر60برس تھی، پولیس نے اس کیس میں ایک ملزم کے خلاف قتل کا کیس درج کر حراست میں لے لیا ہے۔
