پاک بھارت حالیہ جنگ میں پاکستان کی جانب سے 1965 کی جنگ کے مقابلے میں 450 ٹن زیادہ دھماکہ خیز مواد استعمال کیا گیا۔

اس بات کا انکشاف معروف تجزیہ نگار ایئر کموڈور (ر) خالد چشتی نے اے آر وائی نیوز کے پروگرام آف دی ریکارڈ میں خصوصی گفتگو کرتے ہوئے کیا۔

انہوں نے بتایا کہ 10 مئی کو پاکستان نے جو کچھ کیا وہ ہماری قابل فخر تاریخ کا حصہ ہے، کیونکہ پاک فوج نے جس طرح بھرپور طاقت اور حکمت عملی سے بھارتی فوجی تنصیبات پر جو بھاری دھماکہ خیز مواد گرایا ہے اس سے نہ صرف بھارت کو بہت بڑا دھچکا لگا بلکہ اسی کی وجہ سے امریکا سے رجوع کیا گیا۔

خالد چشتی نے انکشاف کیا کہ مجھے اس حملے سے متعلق پوری معلومات کل ہی حاصل ہوئی ہیں جس میں یہ حیران کن بات سامنے آئی کہ جتنا بھاری دھماکہ خیز مواد اسلحہ اور گولہ بارود سال 1965 کی جنگ میں پھینکا گیا تھا 10 مئی کو اس سے کہیں زیادہ بھاری میزائلز اور گولہ بارود صرف ساڑھے چار گھنٹے میں استعمال کیا گیا۔

  پاکستان کے دفاعی نظام سے متعلق انہوں نے بتایا کہ میری ان جدید لڑاکا طیاروں کے نوجوان پائلٹوں سے ملاقات ہوئی ہے جنہوں نے مجھے بھی حیران کردیا انہوں نے بتایا کہ ہمارے جدید دفاعی نظام  نے بھارتی فوج کے اعتماد اور رافیل طیاروں کے زعم کو توڑ کر رکھ دیا۔

پائلٹوں نے بتایا کہ آپ نے یہاں جتنا بھی جدید دفاعی نظام دیکھا اور اس کا مشاہدہ کیا یہ سارے سافٹ ویئر اور سرورز اسی چھت کے نیچے تیار کیے گئے ہیں۔

پاک بھارت کشیدگی سے متعلق تمام خبریں

ایئرکموڈور (ر) خالد چشتی نے بتایا کہ اس دفاعی سسٹم کی مثال پورے ملک پر ایک سادہ شیشے کے ڈھکن کی مانند ہے جو نظر نہیں آتا، حملہ کرنے والا شکاری خود شکار بن جاتا ہے اور اس سے ٹکرا کر تباہ ہوجاتا ہے۔

ایس 400 سسٹم کیا ہے ؟

واضح رہے کہ بھارت کا دفاعی نظام ایس 400 ایک روسی اینٹی ایئر کرافٹ میزائل سسٹم ہے جو سال 2007سے اب تک مختلف اشکال میں روس، چین، بھارت، ترکی اور سعودی عرب کی افواج کے زیر استعمال ہے۔

مذکورہ میزائل سسٹم طویل فاصلے تک ہوائی اہداف کو نشانہ بنانے کے لیے تیار کیا گیا تھا اور اپنی اعلیٰ کارکردگی اور جدید ٹیکنالوجی کی وجہ سے جانا جاتا ہے۔