نئی دہلی : چھٹی کلاس کے طالب علم نے فلمی اداکار سشانت سنگھ راجپوت کی طرز پر زندگی کا خاتمہ کرلیا، پولیس حکام نے عوام سے اپیل کی ہے کہ بچوں کو سوشل میڈیا سے دور رکھیں۔
تفصیلات کے مطابق فلمی اداکار سشانت سنگھ راجپوت کی خود کشی کے واقعے کے بعد بھارتی نوجوانوں میں خود کشی کا رجحان بڑھتا جارہا ہے، گزشتہ ایک ہفتے کے دوران چار واقعات تواتر سے پیش آئے ہیں۔
بھارت کے علاقے گریٹر نوئیڈا میں ایک بارہ سالہ لڑکے نے مبینہ طور پر اپنی زندگی کا خاتمہ اسی انداز میں کیا، جس طرح بالی ووڈ اداکار سشانت سنگھ راجپوت نے ایک ہفتہ قبل اپنے گھر میں خود کو پھانسی دے کر کیا تھا۔
اس حوالے سے اہل خانہ نے بتایا ہے کہ چھٹی جماعت کا طالب علم ہفتہ کو انتہائی اقدام اٹھانے سے قبل اداکار کی خودکشی کی خبریں مسلسل دیکھتا رہا ہے، اس نے شاید اسی کو دیکھ کر یہ انتہائی قدم اٹھایا ہے۔
اسسٹنٹ سپرنٹنڈنٹ پولیس (اے ایس پی) سروش مشرا نے بتایا کہ ‘لڑکے کے والد ایک نجی کمپنی میں انجینئر ہیں، لڑکا اپنی ماں، بڑی بہن اور دادی کے ساتھ گھر میں ہی تھا۔
پولیس کے مطابق وہ اوپر اپنے کمرے میں چلاگیا، دروازہ اندر سے بند کردیا اور اپنے آپ کو کپڑے سے لٹکا دیا، خود کشی سے قبل لڑکے نے خود کشی نوٹ چھوڑ دیا۔ جس میں اس نے لکھا کہ ‘اگر وہ (بالی ووڈ اداکار سشانت سنگھ راجپوت) یہ کرسکتا ہے تو، میں کیوں نہیں کر سکتا۔
پولیس افسر نے بتایا کہ ‘اہل خانہ کی درخواست پر پوسٹ مارٹم نہیں کرایا گیا، انہوں نے کہا کہ تاحال اس اقدام کی کوئی واضح وجہ نہیں معلوم ہوسکی جس کی وجہ سے لڑکے نے اپنی زندگی کا خاتمہ کیا۔ ہم تمام والدین سے گزارش کریں گے کہ وہ اپنے بچوں کو خبروں اور سوشل میڈیا پر رنجیدہ واقعات کی پریشان کن تفصیلات سے دور رکھیں۔
واضح رہے کہ ایک ہفتہ قبل فلمی اداکار سشانت سنگھ راجپوت کی خود کشی کے واقعے کے بعد دسویں جماعت کے ایک طالب علم نے بریلی میں خودکشی کی تھی، جو اپنے پسندیدہ اداکار کا نقصان برداشت نہیں کرسکا۔
اس سے قبل اڑیسہ میں ایک لڑکی نے اپنی زندگی کا خاتمہ کردیا تھا کیونکہ وہ اداکار کے انتقال کا غم برداشت نہیں کرسکی۔ اسی طرح مبینہ طور پر 17 جون کو انڈومان اور نیکوبار جزیرے کے پورٹ بلیئر میں ایک اور نوعمر نوجوان نے بھی خودکشی کرلی تھی۔
اطلاعات کے مطابق پولیس اہلکاروں کو گھر سے کوئی خودکش نوٹ نہیں ملا تاہم انہیں نوعمر کی ایک ڈائری ملی ہے۔ جس میں سخت قدم اٹھانے اور سشانت کے بارے میں بہت کچھ بتایا گیا ہے۔
