بھارت کی ایک دل چسپ ویڈیو سوشل میڈیا پر وائرل ہوئی ہے جس میں ایک بندر کو سپریم کورٹ کے کوریڈور میں ’بدمعاشی‘ کرتے دیکھا جا سکتا ہے۔
بھارتی میڈیا نے ایک دل چسپ واقعے کو رپورٹ کیا ہے جس میں کہا گیا ہے کہ کئی بندروں نے بھارتی سپریم کورٹ پر دھاوا بول دیا تھا، اور وہاں سے وکلا کے لنچ باکس مزے سے اٹھا کر کھانا کھایا۔
ویسے تو بھارت کے کئی شہروں میں بندروں کی فوج گھروں، گلیوں، چوراہوں پر گھوم رہی ہوتی ہے، لیکن اس بار بندروں نے بھارتی سپریم کورٹ کا رخ کیا، سپریم کورٹ کی راہداری میں کچھ بندر گھس آئے اور راہداری میں رکھے خانوں سے وکلا کے لنچ باکس کے بیگ اڑا لیے۔
ایک وکیل نے لنچ باکس بندر اٹھاتے بندر کی ویڈیو بنائی اور اسے سوشل میڈیا پر شیئر کر دیا، جس میں دیکھا جا سکتا ہے کہ کوریڈو میں بہت سے وکیل موجود ہیں جو دل چسپی سے بندر کی حرکتیں دیکھ رہے ہیں۔
ہندوستان ٹائمز نے اس پر دل چسپ تبصرہ کرتے ہوئے لکھا ’’سپریم کورٹ آف انڈیا میں حال ہی میں کچھ ’’غیر معمولی ملاقاتی‘‘ گھس آئے تھے، جب چند بندروں نے عدالت کی راہداری میں گھس کر کھانے کا ایک بیگ چرا لیا۔‘‘
یہ ویڈیو سپریم کورٹ کے سینئر وکیل سنجے ہیگڑے نے شیئر کی، جسے ایک لاکھ کے قریب لوگوں نے دیکھا۔
حیدرآباد : بھارت میں محبت کے نام پر لڑکی سے ملنے کیلئے چھپ کر آنے والے لڑکے کو لینے کے دینے پڑگئے، لڑکی کے اہل خانہ نے دونوں کو پکڑ کر فیصلہ کرادیا۔
بھارتی ریاست آندھرا پردیش کے ضلع کرشنا کے علاقے میں ایک انوکھا واقعہ پیش آیا، جہاں لڑکے اور لڑکی کو ملتا دیکھ کر اسی وقت ان کی شادی کروادی گئی۔
بھارتی میڈیا رپورٹ کے مطابق پولیس کا کنا ہے کہ لڑکی اپنی خالہ کے پاس رہتی تھی کیونکہ اس کی ماں کا انتقال ہوچکا تھا۔ کچھ عرصہ سے سورم پلی گاؤں کا رہنے والا شری کانت نامی نوجوان محبت کے نام پر لڑکی کے گھر آتا جاتا تھا، جسے مقامی افرا د نے دیکھ لیا۔
اسی دوران ہفتہ کی رات بھی جب لڑکا لڑکی سے ملنے کیلئے اس کے گھر آیا تو لڑکی کے رشتہ داروں نے اسے پکڑ کر رسیوں سے باندھ دیا اور اس پر زور دیا کہ وہ اس لڑکی سے شادی کرے۔ اس واقعہ کی اطلاع لڑکے نے اپنے والدین کو دی۔
لڑکے اور لڑکی کا تعلق مختلف ذاتوں سے ہونے پر لڑکے کے والدین اس شادی کیلئے راضی نہیں ہوئے تاہم دونوں کے بزرگوں کی موجودگی میں لڑکی کی شادی زبردستی لڑکے کے ساتھ کرادی گئی۔
اس واقعہ کی اطلاع ملنے پر پولیس نے فریقین کو پولیس اسٹیشن میں طلب کیا اور ان کی کونسلنگ کی۔ بعد ازاں لڑکی کو ریسکیو ہوم منتقل کر دیا گیا۔ پولیس نے اس سلسلہ میں کوئی مقدمہ درج نہیں کیا۔
اٹاوہ: ریاست اترپردیش کے شہر اٹاوہ میں ریلوے ٹریک پر آن ڈیوٹی خاتون ریلوے ملازمین بیٹھ کر ویڈیو گیم کھیلنے لگی تھیں، یہ ویڈیو سوشل میڈیا پر وائرل ہونے سے ہلچل مچ گیا ہے۔
بھارتی میڈیا رپورٹس کے مطابق اٹاوہ جنکشن ریلوے اسٹیشن پر ریلوے کی ملازم خواتین پٹریوں کے درمیان بیٹھ کر موبائل فون پر لوڈو گیم کھیلنے لگ گئی تھیں، جنکشن کے سپرنٹنڈنٹ نے ہفتہ کو وائرل ویڈیو کے حوالے سے کہا کہ اس کی تحقیقات کی جائیں گی۔
ویڈیو میں دیکھا جا سکتا ہے کہ چاروں خواتین سے متعلق بتایا جا رہا ہے کہ وہ ٹریک پر مرمت کا کام کرتی ہیں، تاہم دہلی ہاوڑا ریلوے ٹریک کی دہلی جانے والی اپ لائن پر مرمت کا کام کرنے والی یہ چار خواتین ٹریک کے درمیان بیٹھ کر موبائل پر لوڈو گیم کھیلتی نظر آتی ہیں۔
وائرل ویڈیو میں خواتین کہتی سنائی دیتی ہیں کہ وہ ریلوے ٹریک پر کام کرنے آئی ہیں، اب لوڈو نہ کھیلیں تو کیا کریں۔
نئی دہلی : بھارتی سرکار نے کئی ماہ بعد گزشتہ روز غیر باسمتی سفید چاول کی برآمدات دوبارہ شروع کرنے کی منظوری دے دی۔
اس اقدام کی وجہ یہ بیان کی جارہی ہے کہ دنیا کے سب سے بڑے چاول برآمد کنندہ بھارت کے ذخائر میں اضافہ ہو رہا ہے اور کسان آنے والے چند ہفتوں میں چاول کی نئی فصل کی کٹائی کی تیاری کر رہے ہیں۔
اس حوالے سے تاجروں کا مؤقف ہے کہ بھارت سے بڑے پیمانے پر چاول کی برآمدات عالمی ذخائر میں اضافہ کرے گی اور بین الاقوامی قیمتوں میں بھی نرمی پیدا کرے گی جس سے پاکستان، تھائی لینڈ اور ویتنام جیسے اہم برآمد کنندگان کو اپنے نرخوں میں کمی کرنے پر مجبور ہونا پڑے گا۔
بھارتی حکومت کے حکم نامے میں کہا گیا ہے کہ حکومت نے غیر باسمتی سفید چاول کی برآمدات کے لیے 490 ڈالر فی میٹرک ٹن کی کم از کم قیمت مقرر کی ہے، یہ تبدیلی اس دن کے بعد سامنے آئی ہے جب حکومت نے سفید چاول پر برآمدی ٹیکس صفر کردیا۔
رپورٹ کے مطابق سال 2023میں برآمدات پر پابندی کے بعد سے چاول کے مقامی ذخائر میں اضافہ ہوا ہے، جس سے سرکاری گوداموں میں بوریوں کے ڈھیر لگ چکے ہیں۔
فوڈ کارپوریشن آف انڈیا کی رپورٹ کے مطابق چاول کے ذخائر یکم ستمبر2024 تک 32.3 ملین میٹرک ٹن پر پہنچ چکے تھے جو گزشتہ سال کے مقابلے میں 38.6% زیادہ تھے، جس سے حکومت کو چاول کی برآمدات کی پابندیوں میں نرمی کرنے کی کافی گنجائش ملی۔
واضح رہے کہ گزشتہ سال 20 جولائی 2023کو بھارت نے چاول کی بڑھتی ہوئی قیمتوں کو کنٹرول کرنے کے لیے بڑے پیمانے پر استعمال کیے جانے والے غیر باسمتی سفید چاول کی برآمدات پر پابندی لگا کر خریداروں کو حیران کردیا تھا۔
یہ اقدام پچھلے سال ٹوٹے ہوئے چاول کی برآمدات پر پابندی کے بعد کیا گیا تھا۔ برآمد پر پابندی کے باعث ہزاروں ٹن غیر باسمتی سفید چاول بندرگاہوں پر پھنس گئے جس سے تاجروں کو نقصان کا سامنا کرنا پڑا تھا۔
عالمی سطح پر کورونا وائرس، روس یوکرین جنگ اور پیداوار کی سطح پر موسمیاتی تبدیلی کے رجحان کے اثرات کے تناظر میں بین الاقوامی منڈیوں میں چاول مہنگا ہوا تھا، چاول کی تمام عالمی کھیپوں میں ہندوستان کا حصہ 40 فیصد سے زیادہ ہے جو اس کی کل برآمدات کا تقریباً ایک چوتھائی ہے۔
نئی دہلی : بھارت میں ٹاٹا الیکٹرونکس کے ایپل آئی فون بنانے والے ایک بڑے پلانٹ میں خوفناک آتشزدگی کے بعد کام بند کردیا گیا۔
آئی فون بنانے والے پلانٹ میں آتشزدگی کا واقعہ ہفتے کی صبح پیش آیا، رپورٹ کے مطابق فیکٹری انتطامیہ کے جاری بیان میں کہا گیا ہے کہ آگ لگنے کی وجوہات کا جائزہ لیا جارہا ہے، اس حوالے سے مزید حفاظتی اقدمات بھی کیے جائیں گے تاکہ مستقبل میں ایسے واقعات پیش نہ آئیں۔
فیکٹری ترجمان کے جاری کردہ بیان کے مطابق آگ لگنے کا واقعہ بھارتی ریاست تامل ناڈو کی آئی فون بنانے والی ٹاٹا فیکٹری میں پیش آیا ہے تاہم پلانٹ کے سیفٹی پروٹوکول کے تحت ملازمین آگ لگنے کے اس واقعے میں محفوظ رہے۔
ٹاٹا ترجمان کا کہنا ہے کہ فیکٹری کا پروڈکشن یونٹ بند کردیا گیا ہے اور تمام ملازمین کو واپس گھروں کو روانہ کردیا گیا ہے۔
بھارتی میڈیا رپورٹ کے مطابق آگ کیمیکلز کی وجہ سے لگی ہے، آگ کی شدت اتنی زیادہ تھی کہ پلانٹ سے متصل ایک عمارت گرگئی تاہم کسی جانی نقصان کی اطلاع نہیں ہے۔
بھارت میں بارش کے بعد پیاز، ٹماٹر اور ہری سبزیوں کی قیمتوں میں مسلسل اضافہ ہورہا ہے بڑے شہروں میں پیاز کی قیمت 70 روپے فی کلو تک پہنچ چکی ہے۔
بھارتی میڈیا رپورٹ کے مطابق بھارت میں مون سون بارشوں کے باعث کئی علاقے زیر آب آگئے جس کے نتیجے پیاز اور ٹماٹر کے ساتھ ساتھ ہری سبزیوں کی قیمتیں بھی آسمان کو چھونے لگی ہیں۔
اکنامک ٹائمز کی رپورٹ کے مطابق بڑے شہروں کے بیشتر بازاروں میں پیاز اور ٹماٹر کی قیمتیں 70 روپے فی کلو تک جا پہنچی ہے اس کے علاوہ ہری سبزیوں کی قیمتوں میں بھی زبردست اضافہ دیکھا جا رہا ہے۔
رپورٹ کے مطابق شملہ مرچ، لوکی اور پالک جیسی ہری سبزیوں کی قیمتیں 100 روپے فی کلو تک جا پہنچی ہیں جس کی وجہ سے عام لوگوں کو مشکلات کا سامنا ہے۔
دوسری جانب بھارتی تاجروں کا کہنا ہے کہ پیاز، ٹماٹر اور ہری سبزیوں کی قیمتوں میں اضافے کی اہم ملک کے کئی حصوں میں ہونے والی شدید بارش ہے۔
ایشیا کی سب سے بڑی سبزی اور پھل کی منڈی کے تاجروں کا کہنا ہے کہ مہاراشٹر، ہماچل پردیش، آندھرا پردیش میں شدید بارش کے باعث سبزی کی پیداوار متاثر ہوئی ہے، اس کے علاوہ بارش کی وجہ سے سڑکوں کو نقصان پہنچنے سے سپلائی چین متاثر ہوئی ہے۔
بھارت کی سرکاری ذرائع کا کہنا ہے کہ آنے والے دنوں میں حکومت سبزیوں کی قیمت میں کمی کے لیے اقدام کرے گی، حکومت نے گزشتہ سال بھی ٹماٹر کی قیمتوں میں بے تحاشہ اضافے کے بعد اقدام اٹھایا تھا۔
نئی دہلی: بھارت میں پہلی ’ذہین‘ سی یو وی کار لانچ کی گئی ہے، جسے خریدنے پر ایک سال کی چارجنگ سہولت مفت ملے گی۔
بھارتی میڈیا رپورٹس کے مطابق ایم جی موٹرز انڈیا نے ’ایم جی ونڈسر‘ کے نام سے ایک نئی ’انٹیلیجنٹ سی یو وی‘ کار لانچ کی ہے، جس کی قیمت کا آغاز ساڑھے 13 لاکھ انڈین روپے سے ہوتا ہے۔
اس کار کو ’ذہین سی یو وی‘ اس لیے کہا جا رہا ہے کیوں کہ اس میں سیڈان والی تسکین، اور SUV والی کشادگی یکجا کی گئی ہے، جس نے اسے بزنس کلاس کے لیے ایک پُر تعیش پیش کش بنا دیا ہے۔
’جے ایس ڈبلیو ایم جی موٹر انڈیا‘ نے اس ’ونڈسر‘ کار کی قیمت 13,49,800 روپے مقرر کی ہے، اور اسے بھارتی کی پہلی ذہین کار کہا جا رہا ہے۔
اس ذہین CUV کار کا ایئرو ڈائنامک ڈیزائن طلسماتی ہے اس لیے تیز رفتاری میں اس پر ہوا کے اثرات قابو میں رہتے ہیں، اس کا انٹیریئر شان دار اور کشادہ ہے، تحفظ کا خیال بہت زیادہ رکھا گیا ہے، اور اس کا سسٹم اسمارٹ کیکٹیویٹی پر مبنی ہے، ڈرائیونگ میں آرام دہ اور بہت سی ہائی ٹیک خصوصیات کے ساتھ اسے لانچ کیا گیا ہے۔
نیشنل اور ساؤتھ ایشیا ٹیبل ٹینس چیمپئن نینا جیسوال نے ایم جی موٹر اور پی پی ایس موٹرز کے عہدے داروں کی موجودگی میں اس کار کا افتتاح کیا۔ صارفین کے ذہنی سکون کے لیے ایم جی ونڈسر پر بیٹری پر تاحیات وارنٹی، تین سال کے بعد 60 فی صد بائی بیک کی یقین دہانی، اور ایم جی ایپ کے ذریعے پبلک چارجرز پر ایک سال کی مفت چارجنگ کی سہولت بھی دی گئی ہے۔
ایم جی ونڈسر چار رنگوں میں دستیاب ہے: اسٹاربرسٹ بلیک، پرل وائٹ، کلے بیج، اور فیروزی گرین۔ یہ تین مختلف قیمتوں میں دستیاب ہے، ایکسائٹ کی قیمت 13,49,800، ایکسکلوزیو کی 14,49,800، ایسسنس کی قیمت 15,49,800 ہے۔
حیدرآباد: پرساد کے لڈو نے ہندوستان کو مشکل میں ڈال دیا ہے، ایک اور مندر نے لڈو میں استعمال ہونے والے گھی کے نمونے ٹیسٹ کے لیے بھجوا دیے۔
بھارتی میڈیا رپورٹس کے مطابق ’تروملا تروپتی دیواستھانم‘ نامی مندر کے لڈوؤں میں استعمال ہونے والے گھی میں مبینہ ملاوٹ کی اطلاعات کے بعد، ریاست تلنگانہ کے مندر نے بھی نمونے ٹیسٹ کرنے کے لیے بھیجے ہیں۔
’سری لکشمی نرسمہا سوامی‘ نامی یہ مندر ریاست کے علاقے یادگیر گٹہ میں واقع ہے، مندر کے حکام نے پرساد کی تیاری میں استعمال ہونے والے گھی کے نمونے حیدرآباد کی فوڈ لیبارٹری کو بھیجے، ایگزیکٹو آفیسر بھاسکر راؤ کے مطابق یہ دیکھا جا رہا ہے کہ مندر کے لڈو کی تیاری میں استعمال ہونے والا گھی ملاوٹ شدہ ہے یا نہیں۔
اس ٹیسٹ کے نتائج اس ماہ کے آخر تک متوقع ہیں، حکام کے مطابق یہ مندر گزشتہ 40 سالوں سے نارمل برانڈ کا گھی استعمال کر رہا ہے اور ماہانہ تقریباً 20 ہزار سے 25 ہزار کلو گرام گھی استعمال ہوتا ہے۔
ہر لڈو میں تقریباً 90 سے 100 گرام گھی ہوتا ہے، دیگر اجزا جیسے الائچی پاؤڈر، کاجو، کشمش، چینی اور بوندی کے معیار کو یقینی بنانے کے لیے بھی اقدامات کیے جاتے ہیں۔
اتر پردیش: بھارت میں عصمت دری کا شکار ہونے والی لڑکی کو ماں اور بھائی نے خاندان کی عزت بچانے کے لیے قتل کردیا۔
بھارتی میڈیا رپورٹ کے مطابق بھارت کے اتر پردیش کے سنبھل ضلع میں ایک افسوسناک واقعہ پیش آیا تھا، جہاں ایک 14 سالہ لڑکی کو زیادتی کا نشانہ بنانے کے بعد قتل کردیا گیا تھا، لڑکی کے قتل کے معاملے میں پولیس نے تفتیش کی جس کے بعد ایک سنسنی خیز انکشاف ہوا۔
بھارتی میڈیا کا کہنا ہے کہ جب 14 سالہ لڑکی کے مبینہ ملزم کے ہاتھوں قتل کی خبریں منظر عام پر آئیں تو پولیس والوں سمیت سبھی نے اس کہانی پر یقین کیا۔ تاہم مزید تحقیقات سے یہ بات سامنے آئی ہے کہ یہ ایک قتل تھا جس کی منصوبہ بندی اس کے گھر والوں نے کی تھی۔
بھارتی میڈیا کا کہنا ہے کہ پہلے رپورٹس میں یہ دعویٰ کیا گیا تھا کہ ملزم نے لڑکی کو زیادتی کا نشانہ بنانے کے بعد دو گولیاں ماریں، جس سے وہ موقع پر ہی ہلاک ہو گئی، اب تفتیش سے یہ بات سامنے آئی ہے کہ یہ جرم اس کی ماں، دو بھائی اور چچا نے کیا تھا۔
ٹائمز آف انڈیا کی ایک رپورٹ کے مطابق ایک سی سی ٹی وی فوٹیج منظر عام پر آئی ہے جس میں لڑکی کے قتل کے عین وقت پر رنکو (مبینہ زیادتی کرنے والا) کو ایک غازی آباد کے اسپتال میں دیکھا گیا تھا، رنکو پر زیادتی کا کیس درج ہے جو کہ ضمانت پر ہے۔
تفتیش کے دوران یہ بات سامنے آئی کہ ماں نے قتل کی منصوبہ بندی کی تھی، اس ڈر سے کہ اس کی بیٹی، جو پہلے رنکو کے ساتھ غازی آباد بھاگ گئی تھی، عدالت میں گواہی نہیں دے گی کہ رنکو نے اس کے ساتھ زیادتی کی ہے ورنہ ان کی عزت خراب ہوگی۔
پولیس نے جب مزید تحقیقات کی تو یہ انکشاف ہوا کہ قتل کے دن ماں اپنی بیٹی کو غازی آباد سے اپنے گاؤں سنبھل واپس لائی تھی، گھر پہنچنے کے بعد ماں نے بیٹی کو رشتہ داروں سے ملنے پر آمادہ کیا، جب لڑکی اپنے چچا کے گھر پہنچی تو انہوں نے فائرنگ کردی۔
پولیس نے بتایا کہ لڑکی کی ماں اور بھائی نے خاندان کی عزت کے لیے اسے قتل کرنے کا اعتراف کیا ہے انہیں گرفتاری کے بعد بھی اپنے کیے پر کوئی پچھتاوا نہیں ہے۔
نئی دہلی: بھارت میں لڈو کی تیاری کا تنازع شدت اختیار کر گیا ہے، پنڈتوں کو تروپتی دیو استھانم کو پاک کرنے کے لیے رسم بھی ادا کرنی پڑی۔
بھارتی میڈیا رپورٹس کے مطابق لڈو کی تیاری میں ملاوٹ شدہ گھی کے استعمال کے الزامات سامنے آنے کے بعد اس سلسلے میں بحث تیز ہو رہی ہے، اور یہ تروپتی لڈو تنازعہ اس وقت بالعموم ملک اور بالخصوص تیلگو ریاستوں میں کشیدگی کی وجہ بنا ہوا ہے۔
تروملا تروپتی دیواستھانم (مندر) آندھرا پردیش میں واقع ہے، جس کے چیف منسٹر این چندرابابو نائیڈو نے الزام لگایا ہے کہ مشہور تروپتی لڈو (مندر پر پرساد میں استعمال ہونے والے لذیذ لڈو) کی تیاری میں گھی کی بجائے جانوروں کی چربی کا استعمال کیا جا رہا ہے، اس الزام نے آندھرا پردیش، تلنگانہ اور پورے ملک میں بڑے پیمانے پر غم و غصہ کو جنم دیا ہے۔
ہندوؤں کے نزدیک جس طرح تروملا تروپتی دیواستھانم ایک قابل احترام تیرتھ یاترا مقام ہے، اسی طرح وہ اس لڈو کو بھی انتہائی مقدس سمجھتے ہیں۔
تروپتی کے لڈو تنازعہ کی جھلکیاں
آندھرا پردیش کے تروپتی مندر میں ’پرساد‘ کے طور پر پیش کیے جانے والے لڈو میں ’’جانوروں کی چربی‘‘ کی موجودگی کے الزامات پر بڑھتے ہوئے تنازعے کی وجہ سے مرکزی حکومت نے آندھرا پردیش حکومت سے رپورٹ طلب کر لی ہے۔ مرکزی وزیر خوراک پرہلاد جوشی نے بھی ان الزامات کی تحقیقات کا مطالبہ کیا ہے، جس سے عقیدت مندوں میں تشویش پھیلی ہوئی ہے۔
لڈو میں کون سی چربی ملائی گئی؟
یہ تنازع بدھ کو اس وقت شروع ہوا جب آندھرا پردیش کے وزیر اعلیٰ چندرا بابو نائیڈو نے الزام لگایا کہ ان کے پیشرو جگن موہن ریڈی نے لڈو میں غیر معیاری اجزا اور جانوروں کی چربی کے استعمال کی اجازت دی تھی۔
مندر کو پاک کرنے کے لیے رسم ادا کی جا رہی ہے
پارٹی نے تروپتی مندر میں لڈو کی تیاری کے لیے استعمال ہونے والے گھی میں گائے کی چربی، سور کی چربی، اور مچھلی کے تیل کی موجودگی کا دعویٰ کیا۔
ایک دن بعد نائیڈو کی زیر قیادت تیلگو دیشم پارٹی نے ایک لیب رپورٹ جاری کی، جس میں مبینہ طور پر مشہور سری وینکٹیشورا سوامی مندر کا انتظام کرنے والے تروملا تروپتی دیواستھانم کی طرف سے بھیجے گئے گھی کے نمونوں میں جانوروں کی چربی کی موجودگی کی تصدیق کی گئی۔
نائیڈو نے الزام لگایا کہ پچھلی حکومت نے سستے داموں کمتر معیار کا گھی خریدا، جس سے لڈو کی کوالٹی متاثر ہوئی اور مقدس مزار کو نقصان پہنچا۔ تاہم موہن ریڈی نے اپنے اوپر لگائے گئے الزامات مسترد کیے۔
گھی سپلائی کرنے والی کمپنی کا بیان
تمل ناڈو میں واقع اے آر ڈیری فوڈ پرائیویٹ لمیٹڈ (جس نے تروپتی لارڈ بالاجی مندر کو گھی سپلائی کیا تھا) نے کہا کہ حکام نے جانچ پڑتال کے بعد اس کی مصنوعات کے نمونوں کے معیار کی تصدیق کی ہے۔ کمپنی نے کہا صرف جون اور جولائی کے دوران اس نے تروملا مندر کو گھی سپلائی کیا تھا، اور یہ سپلائی لیب کی مستند رپورٹوں کے ساتھ کی گئی تھی۔
تاہم دوسری طرف چار ٹیسٹ شدہ کوالٹی چیکس میں سے ایک نمونے میں ملاوٹ کا انکشاف ہونے کے بعد مرکزی وزارت صحت نے پیر کو گھی سپلائی کرنے والی کمپنی کو وجہ بتاؤ نوٹس جاری کر دیا ہے۔
سپریم کورٹ سے رجوع
گھی میں غیر معیاری اجزا اور جانوروں کی چربی کے الزامات سامنے آنے کے بعد مندر کے سابق چیئرمین نے سپریم کورٹ سے رجوع کر لیا ہے، اور مطالبہ کیا ہے کہ الزامات کی تحقیقات کے لیے سپریم کورٹ کے ایک ریٹائرڈ جج کی سربراہی میں ایک آزاد کمیٹی تشکیل دی جائے۔
مندر کو پاک کرنے کا عمل
آندھرا پردیش کے اس مشہور مندر میں تطہیر کی چار گھنٹے طویل رسم ادا کی گئی، اور اس رسم کے ذریعے مندر کے تقدس کو بحال کیا گیا جو پرساد کے لڈو میں ملاوٹ کی وجہ سے متاثر ہوا تھا۔ اس رسم کی ادائیگی کے ذریعے عقیدت مندوں کی تشویش دور کی گئی۔
