نئی دہلی: بھارتی پولیس نے عدالت سے ایک نابالغ لڑکے پر بالغ ہونے کے طور پر مقدمہ چلانے کی درخواست کر دی ہے، 16 سالہ لڑکے نے دہلی میں بریانی کے لیے ایک 17 سالہ لڑکے کو 60 بار چاقو مار کر قتل کر دیا تھا اور پھر اس کی لاش کے قریب ناچا بھی تھا۔
بھارتی میڈیا رپورٹس کے مطابق 21 نومبر 2023 کو شمال مشرقی دہلی کے ویلکم ایریا میں بریانی کے جھگڑے پر ایک 17 سالہ لڑکے کو ایک 16 سالہ نوجوان نے چاقو کے وار کر کے قتل کر دیا تھا، سامنے آنے والی سی سی ٹی وی فوٹیج میں دیکھا گیا کہ مقتول کو قاتل نے 60 بار چاقو مارا اور جرم کے بعد اس نے لاش کے گرد رقص بھی کیا۔
دہلی پولیس نے 14 فروری کو اس کیس میں 250 صفحات پر مشتمل ایک لمبی چارج شیٹ داخل کی ہے، جس میں پولیس نے کیئر اینڈ پروٹیکشن آف چلڈرن ایکٹ 2015 کے تحت جووینائل جسٹس بورڈ سے نوعمر ملزم پر بالغ ہونے کے طور پر مقدمہ چلانے کی اجازت طلب کی ہے۔ جووینائل جسٹس ایکٹ کے تحت قتل اور عصمت دری جیسے گھناؤنے جرائم کے ارتکاب پر 16 سال یا اس سے زیادہ عمر کے نابالغوں پر بالغ کے طور پر مقدمہ چلایا جا سکتا ہے۔
پولیس نے چارج شیٹ میں کہا کہ ملزم نے مقتول پر چاقو سے 60 وار کر کے اس سے 350 روپے لوٹے، قاتل بریانی لینا چاہتا تھا، لیکن مقتول نے خریدنے سے انکار کر دیا تھا۔ پولیس کی تفتیش میں یہ بات سامنے آئی کہ ملزم منشیات کے نشے میں تھا اور مقتول کے انکار پر وہ مشتعل ہوا۔ یہ واقعہ جائے وقوعہ پر نصب سی سی ٹی وی کیمرے میں بھی ریکارڈ ہوا، قاتل نے آس پاس موجود لوگوں کو چاقو دکھا کر دھمکیاں بھی دیں۔
دہلی پولیس کا کہنا تھا کہ انھوں نے واردات کے اگلے دن نابالغ کو گرفتار کیا، جس نے پولیس کو بتایا کہ وہ 50 روپے کی بریانی لے رہا تھا لیکن مقتول نے پیسے نہیں دیے، پولیس نے ملزم سے لوٹے گئے 300 روپے بھی برآمد کیے۔
دہلی پولیس کے مطابق ملزم کا سابقہ مجرمانہ ریکارڈ بھی موجود ہے، اور وہ اپنی ماں کے ساتھ رہتا ہے، جو محلے میں گھریلو ملازمہ کے طور پر کام کرتی ہے۔
