ARYNews.tv | Urdu – Har Lamha Bakhabar

Tag: India

  • بھارت مخالف مواد شئیر کرنے والے کو دہشت گرد مانا جائے گا، مودی سرکار کا کشمیر میں بھونڈا منصوبہ سامنے آ گیا

    بھارت مخالف مواد شئیر کرنے والے کو دہشت گرد مانا جائے گا، مودی سرکار کا کشمیر میں بھونڈا منصوبہ سامنے آ گیا

    مودی سرکار کا کشمیریوں سے حق خود ارادیت چھیننے کا ایک اور بھونڈا منصوبہ بے نقاب ہو گیا ہے۔

    تفصیلات کے مطابق مظلوم کشمیریوں کے لیے اپنی ہی سرزمین تنگ کر دی گئی ہے، کشمیری عوام کے لیے سوشل میڈیا پر ظلم کے خلاف آواز اٹھانا بھی جرم بن گیا۔

    مودی سرکار مقبوضہ کشمیر میں اپنے ظلم اور جبر کو دنیا سے چھپانے کے لیے روایتی اوچھے ہتھکنڈوں پر اتر آئی، اور کشمیریوں کی تحریک آزادی سے خوف زدہ سرکار نے کشمیر کے مختلف اضلاع میں سیکشن 144 کا نفاذ کر دیا۔

    سیکشن 144 کا نفاذ سائبر کرائم کے زمرے میں آتا ہے، مقبوضہ کشمیر میں تعینات بھارتی پولیس نے واضح کہا کہ بھارت مخالف مواد شئیر کرنے والے کو دہشت گرد مانا جائے گا۔

    بھارتی پولیس کے مطابق ڈسٹرکٹ مجسٹریٹ بارہ مولہ نے سیکشن 144 کا قانون پاس کیا ہے، کسی بھی شخص پر بھارتی حکومت کے خلاف سوشل میڈیا پر مہم چلانا یا ٹویٹ شئیر کرنا قانوناً جرم ہے۔

    ریاست مخالف مواد شئیر کرنے والے شخص کو دہشت گرد سمجھا جائے گا اور اس کے خلاف سخت قانونی کارروائی کی جائے گی، بھارتی پولیس نے ویڈیو پیغام میں مودی سرکار کے خلاف کوئی بھی ٹویٹ یا ویڈیو شیئر کرنے والے افراد سے نمٹنے کی تیاریوں کا عندیہ دے دیا۔

  • بیٹیوں کو جائیداد میں حصہ دیں، مسلمانوں سے اپیل

    بیٹیوں کو جائیداد میں حصہ دیں، مسلمانوں سے اپیل

    لکھنؤ: آل انڈیا مسلم پرسنل لا بورڈ نے بھارت کے مسلمانوں سے اپیل کی ہے کہ وہ جائیداد میں بیٹیوں کا حصہ ادا کریں۔

    بھارتی میڈیا کے مطابق آل انڈیا مسلم پرسنل لا بورڈ کی ورکنگ کمیٹی کی جانب سے ہفتے کو لکھنؤ میں واقع دارالعلوم فرنگی محلی ہال میں ایک کانفرنس کا انعقاد کیا گیا، جس میں خواتین کو جائیداد میں حصہ دینے پر زور دیا گیا۔

    تفہیم شرعیت کانفرنس سے خطاب میں مولانا محمد نصر اللہ ندوی نے کہا کہ اسلام پہلا مذہب ہے جس نے شریعت کے مطابق خواتین کو ان کے والدین، شوہر اور بیٹے کی جائیداد میں حصہ دیا۔ انھوں نے کہا کہ مسلم پرسنل لا بورڈ نے حکم دیا ہے کہ وراثت کے ضمن میں حصہ ماں، بہن، بیوی، بیٹی، پوتی، پڑپوتی، نواسی، سوتیلی بہن، دادی اور نانی کا حصہ دیا جائے، ان حصوں کا تعین قرآن پاک نے کیا ہے۔

    مقررین نے کہا کہ بہت سے کیسز میں بیٹیوں کو ان کا شرعی حصہ نہیں دیا جاتا، اس لیے ملک بھر کے مسلمانوں سے اپنی بیٹیوں کو جائیداد میں حصہ دینے کی اپیل کی جاتی ہے۔

    مولانا خالد رشید فرنگی محلی نے پرسنل لا بورڈ کی تاریخ پر بات کرتے ہوئے کہا کہ یہ بورڈ 1973 میں قائم ہوا تھا، اس کا بنیادی مقصد شریعت کی حفاظت اور امت مسلمہ کا اتحاد ہے۔ انھوں نے کہا کہ اس کانفرنس کا مقصد یہ ہے کہ عوام کے بیچ مسلم پرسنل لا بورڈ سے متعلق پائی جانے والی غلط فہمیوں کو دور کیا جائے۔

    مولانا عتیق احمد بستوی نے کہا کہ گھر کے انتظام کی ذمہ داری صرف خواتین پر عائد ہوتی ہے، اسلامی شریعت اس کی مکمل رہنمائی کرتی ہے، اگر ہم سب ان ہدایات پر عمل کرنا شروع کر دیں تو ہمارے گھروں سے بے چینی ختم ہو جائے گی۔

  • ہم سکھ رہنماؤں کے قتل کی تحقیقات میں کینیڈا کے ساتھ ہیں، امریکا کا اعلان

    ہم سکھ رہنماؤں کے قتل کی تحقیقات میں کینیڈا کے ساتھ ہیں، امریکا کا اعلان

    امریکا نے بھارت سے سکھ رہنماؤں کے قتل کے معاملے میں شفاف تحقیقات کا مطالبہ کیا اور اعلان کیا ہے کہ ہم سکھ رہنماؤں کے قتل کی تحقیقات میں کینیڈا کے ساتھ ہیں۔

    ہردیپ سنگھ نجر کے قتل اور گرپرونت پنوں کے ممکنہ قتل میں بھارتی ایجنسیوں کے ملوث ہونے کے ثبوت بھی منظر عام پر آ گئے ہیں۔

    کینیڈین وزیر اعظم جسٹن ٹروڈو نے ہردیپ سنگھ نجر کے قتل میں بھارتی ایجنسیوں کے ملوث ہونے کی تصدیق کی تھی، اور کینیڈا نے بھارتی حکام سے ہردیپ سنگھ کے قتل میں تحقیقات اور تعاون کا مطالبہ کیا تھا، اب امریکا نے بھی بھارت سے سکھ رہنماوٴں کے قتل کی تحقیقات میں تعاون کا مطالبہ کر دیا ہے۔

    امریکا نے سکھ رہنماؤں کے قتل میں ملوث افراد کے خلاف شفاف تحقیقات کا مطالبہ کر تے ہوئے قرار دیا کہ ہم سکھ رہنماؤں کے قتل کی تحقیقات میں کینیڈا کے ساتھ ہیں، ہم چاہتے ہیں کہ ان حملوں کے ذمہ داران کو قانون کے کٹہرے میں لایا جائے۔

    امریکا نے کہا ہم کینیڈا کی جانب سے بھارت پر لگائے گئے الزامات کو سنجیدگی سے دیکھ رہے ہیں، اس واقعے کے ذمہ داروں کو قرار واقعی سزا دی جائے۔

  • خبردار: کھانسی کے 40 سے زیادہ شربت معیار کا ٹیسٹ پاس نہ کر سکے

    خبردار: کھانسی کے 40 سے زیادہ شربت معیار کا ٹیسٹ پاس نہ کر سکے

    نئی دہلی: بھارتی کمپنی کے تیار کردہ کھانسی کے شربت سے کئی ممالک میں بچوں کی اموات کے بدترین اسکینڈل کے بعد وزارت صحت نے احتیاط کا مظاہرہ شروع کر دیا ہے، اور اس سلسلے میں کھانسی کے شربت مارکیٹ میں لائے جانے سے قبل انھیں معیار کے ٹیسٹ سے گزارا جانے لگا ہے۔

    بھارتی میڈیا رپورٹس کے مطابق سینٹرل ڈرگ اسٹینڈرڈ کنٹرول آرگنائزیشن (سی ڈی ایس سی او) کی طرف سے ایک رپورٹ جاری ہوئی ہے، جس میں کہا گیا ہے کہ کھانسی کے 40 سے زیادہ ایسے شربت تیار کیے گئے ہیں جو معیار کے ٹیسٹ میں ناکام ہو گئے ہیں۔

    رپورٹ میں کہا گیا ہے کہ بھارت کی مختلف ریاستوں میں لیب ٹیسٹ کے نتائج بتاتے ہیں کہ ملک میں کھانسی کا شربت بنانے والی 40 سے زائد کمپنیاں کوالٹی ٹیسٹ میں ناکام ہو گئیں۔ اس رپورٹ میں ماضی کے افسوس ناک واقعے کا حوالہ بھی دیا گیا ہے کہ بھارتی ساختہ کھانسی کے شربت سے عالمی سطح پر 141 بچوں کی موت واقع ہوئی۔

    سرکاری ٹیسٹنگ لیبارٹریوں کی ٹیسٹ رپورٹس کے مطابق ٹیسٹ کیے گئے 1105 نمونوں میں سے 59 کو غیر معیاری قرار دیا گیا، یہ تمام ادویات باقاعدہ طور پر برانڈڈ تھیں، اور ان میں کوئی ملاوٹ بھی نہیں پائی گئی۔

    واضح رہے کہ اموات کے اسکینڈل کے بعد ڈائریکٹوریٹ جنرل آف فارن ٹریڈ (ڈی جی ایف ٹی) نے برآمد کنندگان کے لیے کھانسی کے شربت کے معیار پر حکومتی منظوری لینا لازمی قرار دیا تھا۔

  • ریسکیو حکام نے اتراکھنڈ منہدم سرنگ میں پھنسے مزدوروں کو نکالنے کے لیے ’خطرناک‘ قدم اٹھا لیا

    ریسکیو حکام نے اتراکھنڈ منہدم سرنگ میں پھنسے مزدوروں کو نکالنے کے لیے ’خطرناک‘ قدم اٹھا لیا

    نئی دہلی: ریسکیو حکام نے بھارتی ریاست اتراکھنڈ میں منہدم پہاڑی سرنگ میں پھنسے 41 مزدوروں کو نکالنے کے لیے عمودی ڈرلنگ کا ’خطرناک‘ قدم اٹھا لیا ہے۔

    بھارتی میڈیا رپورٹس کے مطابق ہمالیائی ریاست اتراکھنڈ میں دور دراز پہاڑی مقام پر منہدم سرنگ میں پھنسے اکتالیس افراد کو نکالنے کی کوششیں سترہ روز سے جاری ہیں، یہ مزدور 12 نومبر سے سرنگ میں پھنسے ہوئے ہیں۔

    مزدوروں کو نکالنے کے لیے حکام نئے طریقوں سے کام کر رہے ہیں لیکن ریسکیو کے عمل میں بہت تاخیر ہو رہی ہے، ریسکیو اہلکار چٹانوں میں افقی طور پر سوراخ کر رہے تھے تاکہ اس میں سے مزدوروں کو رینگ کر باہر نکلنے کا موقع ملے، لیکن جمعہ کو ڈرلنگ مشین ٹوٹنے کے بعد یہ آپریشن روک دیا گیا۔

    حکام کا کہنا ہے کہ سرنگ کے اندر گرنے والے پتھروں، نرم مٹی اور دھات کی موجودگی کی وجہ سے یہ آپریشن شروع سے ہی چیلنجنگ رہا ہے۔ جمعہ کے روز تک اچھی خاصی کھدائی ہو گئی تھی لیکن پھر امریکا سے منگوائی گئی جدید ڈرلنگ مشین ملبے میں موجود دھات کے ٹکڑوں کی وجہ سے پھنس گئی اور سرنگ کے اندر ہی ٹوٹ گئی، بعد ازاں پیر کی صبح مشین کو مکمل طور پر ہٹا دیا گیا، اور اب سرنگ کے عین اوپر نیچے کی طرف سیدھ میں خطرناک ڈرلنگ شروع کر دی گئی ہے۔

    بھارت: سرنگ میں پھنسے مزدوروں کی ویڈیو سامنے آگئی

    جمعہ تک حکام 50 میٹر ملبے کو کھودنے میں کامیاب ہو گئے تھے، اور صرف 10 سے 15 میٹر رہ گیا تھا، ٹنل کا یہ حصہ مٹی کا تودہ گرنے سے منہدم ہو گیا ہے، جس میں مزدور دو ہفتوں سے پھنسے ہوئے ہیں، تاہم انھیں زندہ رکھنے کے لیے انھیں پائپ کے ذریعے خوراک پہنچائی جا رہی ہے۔ حکام کا کہنا ہے کہ وہ اُن تک تیزی سے پہنچنے کے لیے دستی کھدائی سمیت دیگر تکنیکوں کی بھی تلاش کر رہے ہیں۔

  • مودی سرکار کا فالس فلیگ آپریشن میں مرنے والے فوجیوں کو لے کر شرمناک قدم

    مودی سرکار کا فالس فلیگ آپریشن میں مرنے والے فوجیوں کو لے کر شرمناک قدم

    بھارت میں آئندہ برس عام انتخابات سے پہلے ہمیشہ کی طرح مودی سرکار اور گودی میڈیا کا گٹھ جوڑ سامنے آ گیا، اس بار بھی مودی سرکار بھارتی فوجیوں کی لاشوں پر ماتم کر کے اپنی ہندوتوا زدہ سیاست چمکاتے دکھائِی دے رہی ہے، مودی کی الیکشن مہم میں بھارتی فوجیوں کی لاشیں ایک اہم مارکیٹنگ ٹول بن چکی ہیں۔

    مودی سرکار ہندوستانی فوجیوں کی موت کو الیکشن مہم کے طور پر استعمال کرنے لگی ہے، 2024 میں عام انتخابات کے پیش نظر مودی سرکار ایک بار پھر اوچھے ہتھکنڈوں پر اتر آئی، نازی ازم کے پیروکار وزیر اعظم نریندر مودی کی بھارتیہ جنتا پارٹی اقتدار حاصل کرنے کے لیے انتہا پسند حکمت عملی میں مصروف ہو چکی ہے۔

    مودی کے گودی میڈیا نے بھی پاکستان مخالف رپورٹنگ میں اضافے کے ساتھ بی جے پی کے انتہا پسند بیانیے کی ترویج شروع کر دی ہے۔ اس کے ساتھ ہی مودی سرکار کے مسلسل فالس فلیگ آپریشنز کے جھوٹے دعوؤں کا بھی بھانڈا پھوٹنے لگا ہے، مودی سرکار نے فالس فلیگ آپریشنز اور من گھڑت انکاؤنٹر کی آڑ میں ہلاک ہونے والے فوجیوں کی موت کو سیاسی ہتھیار بنا رکھا ہے۔

    جھوٹے ڈرامے میں مودی جی اور ان کے وزرا نے ہلاک ہونے والے بھارتی فوجیوں کی لاشوں اور ان کے گھر والوں کو بھی نہ بخشا، حال ہی میں بھارتی فوجی کیپٹن شبھنم گپتا راجوری سیکٹر میں جعلی مقابلے کے دوران ہلاک ہوا، کیپٹن شبھنم گپتا کی لاش آگرہ میں اس کے آبائی گھر پہنچنے پر مودی سرکار کے وزرا نے عجیب ڈراما رچایا۔

    وزرا نے کیپٹن شبنم گپتا کی غمگین ماں کو اپنی شہرت کے لیے تصاویر کھنچوانے پر مجبور کیا، ذرائع کا کہنا ہے کہ کیپٹن شبھنم گپتا کی ماں مودی کے کارکنوں سے خود کو تنہا اکیلا چھوڑنے کی درخواست کرتی رہیں، لیکن ان کی ایک نہ سنی گئی۔

    ویڈیو میں اترپردیش کے وزیر یوگیندر اپادھیائے کیپٹن گپتا کی غم زدہ ماں کو چیک پکڑا کر ہمدردی کا ڈھونگ رچاتے نظر آ رہے ہیں۔ ماضی میں بھی وزیر اعظم مودی سستی شہرت کے لیے بھارتی فوجیوں کی موت کو ایسے ہی سیاسی رنگ دیتے رہے ہیں۔ بالاکوٹ میں بھی ہلاک ہونے والے بھارتی فوجیوں کی لاشوں کو بھی مودی نے اپنی انتخابی مارکیٹنگ میں استعمال کیا تھا۔

    انتخابات کے قریب آتے ہی بھارتی فوجیوں کی موت پر مودی کی ڈرامے بازی میں واضح اضافہ ہوا ہے، غیر جانب دار تجزیہ نگاروں کا کہنا ہے کہ انتخابات کے سوا مودی کو پرواہ بھی نہیں ہوتی کہ کون کہاں اور کب ہلاک ہوا۔

  • 2 ماہ بعد بھارت کا کینیڈا کے لیے ویزا سروس کے حوالے سے اہم قدم

    2 ماہ بعد بھارت کا کینیڈا کے لیے ویزا سروس کے حوالے سے اہم قدم

    نئی دہلی: بھارت نے 2 ماہ بعد کینیڈا کے لیے ویزا سروس بحال کر دی۔

    بھارتی میڈیا رپورٹس کے مطابق بھارت نے دو ماہ بعد کینیڈا کے لیے ویزا سروس بحال کر دی ہے، جسے بھارت نے سمتبر میں معطل کر دیا تھا۔

    کینیڈین وزیر اعظم نے بھارت پر سکھ رہنما ہردیپ سنگھ نجر کے قتل کا الزام عائد کیا تھا، جس کے بعد بھارت اور کینیڈا کے درمیان کشیدگی بڑھ گئی تھی اور ویزا سروس روک دی گئی تھی، کینیڈا نے بھارت سے اپنے 40 سے زیادہ سفارت کار بھی واپس بلا لیے تھے۔

    اب بھارتی حکام کے حوالے سے میڈیا نے بدھ کو خبر دی ہے کہ کینیڈا کے شہریوں کے لیے ای ویزا خدمات دوبارہ شروع کر دی گئی ہیں۔

    گزشتہ ماہ اکتوبر میں بھی ہندوستان نے کینیڈا کے شہریوں کے لیے سیاحت، ملازمت، طلبہ، فلم، تبلیغی اور صحافی ویزوں کو چھوڑ کر بعض زمروں میں ویزا خدمات دوبارہ شروع کی تھیں۔

    میڈیا رپورٹس کے مطابق تمام زمروں میں ویزا سروس کی بحالی کینیڈا کے وزیر اعظم جسٹن ٹروڈو کی ورچوئل G20 لیڈرز سمٹ میں شرکت سے چند گھنٹے قبل عمل میں آئی ہے۔

  • راہل گاندھی کارپنٹر بن گئے، معذور بچوں کے اسکول کے لیے فرنیچر بنا لیا

    راہل گاندھی کارپنٹر بن گئے، معذور بچوں کے اسکول کے لیے فرنیچر بنا لیا

    نئی دہلی: کانگریس پارٹی کے رہنما راہل گاندھی نے معذور بچوں کے اسکول کے لیے کارپنٹر بن کر فرنیچر بنا لیا، ان کا تیار کردہ فرنیچر گزشتہ روز پارٹی کی جانب سے اسکول پہنچایا گیا۔

    بھارتی میڈیا رپورٹس کے مطابق گزشتہ روز دہلی کے ایک علاقے میں واقع گونگے بہرے بچوں کے اسکول پریمالابائی چوہان کو کانگریس کی جانب سے فرنیچر عطیہ کیا گیا، جس میں سے کچھ راہل گاندھی نے اپنے ہاتھوں سے تیار کیا تھا اور باقی کی تیاری کا خود آرڈر دیا تھا۔

    گزشتہ ماہ راہل گاندھی نے کیرتی نگر فرنیچر مارکیٹ میں جا کر کاریگروں کے ساتھ مل کر خود بھی کام کیا تھا، جس کی تصاویر اور ویڈیوز بھی سوشل میڈیا پر آئی تھیں۔

    فرنیچر حوالے کرتے ہوئے کانگریس کے مقامی رہنما اروندر سنگھ لولی نے کہا کہ وہ اپنے محبوب لیڈر راہل گاندھی کے ذریعے نفرت کے بازار میں محبت کی دکان کا پیغام پھیلانے کی کوشش کر رہے ہیں، یہ قدم اسی سلسلہ کی ایک کڑی ہے۔

    رہنما نے کہا ’’کیرتی نگر مارکیٹ میں راہل جی کے بنائے گئے بنچوں کے استعمال کے لیے گونگے بہرے بچوں کے اسکول سے بہتر کوئی جگہ نہیں ہو سکتی، وہ ملک کے ہر غریب، مجبور اور بے سہارا لوگوں کی مدد کرنا چاہتے ہیں۔‘‘

    انھوں نے کہا کہ ایک وقت تھا جب گونگے بہرے بچوں کی پیدائش کو تکلیف دہ مانا جاتا تھا، لیکن کئی نظریہ ساز شخصیتوں نے اس کو دیکھنے کا نظریہ ہی بدل دیا، اور آج بولنے اور سننے کی صلاحیت سے معذور بچے بھی مختلف شعبوں میں اپنا لوہا منوا رہے ہیں۔

  • کس ملک نے ایک ماہ میں 123 میٹرک ٹن سونا درآمد کیا؟

    کس ملک نے ایک ماہ میں 123 میٹرک ٹن سونا درآمد کیا؟

    ممبئی: بھارت نے گزشتہ ماہ 123 میٹرک ٹن سونا درآمد کر لیا ہے، جس سے بھارت کا بیرونی تجارت میں خسارہ مزید بڑھنے کا خدشہ پیدا ہو گیا ہے۔

    روئٹرز کے مطابق بھارت نے رواں برس اکتوبر کے مہینے میں جتنا سونا درآمد کیا ہے اس کی مقدار گزشتہ 31 مہینوں میں سب سے زیادہ ماہانہ مقدار ہے، اکتوبر 2023 میں بھارت میں جتنا سونا درآمد کیا گیا اس کا وزن 123 میٹرک ٹن بنتا تھا، جو اکتوبر 2022 میں درآمد شدہ سونے کے مقابلے میں 60 فی صد زیادہ ہے۔

    ایک تو محفوظ سرمایہ کاری کے لیے سونے کو انتہائی اہم سمجھا جاتا ہے، دوم گزشتہ ماہ دیوالی جیسا تہوار بھی گزرا جس میں صرافوں کے ہاں کاروبار میں بہت تیزی کا رجحان دیکھا جاتا ہے۔ سوم یہ کہ ملکی منڈیوں میں اکتوبر میں سونے کی قیمتیں گزشتہ سات ماہ کے دوران اپنی نچلی ترین سطح پر آ گئی تھی‌۔

    تاہم روئٹرز کے مطابق صرف ایک ماہ میں 123 میٹرک ٹن سونا درآمد کرنے سے بھارتی معیشت بھی متاثر ہوگی کیوں اس سے بھارت کا بیرونی تجارت کا خسارہ بڑھ جائے گا۔ اور اس کے نتیجے میں بھارتی کرنسی کی قدر و قیمت بھی مزید دباؤ میں آ جائے گی۔

    بھارت کے حکومتی ذرائع کے مطابق اکتوبر 2022 میں 77 ٹن سونا درآمد کیا گیا تھا، اور گزشتہ ایک عشرے کے دوران سونے کی ماہانہ اوسط درآمد تقریباﹰ 66 ٹن رہی تھی۔

    اکتوبر 2022 میں درآمد کردہ 77 ٹن سونے کی قیمت تقریباً 3.7 ارب امریکی ڈالر کے برابر رہی تھی، اس کے برعکس اس سال اکتوبر میں درآمد کردہ سونے کی مالیت 7.23 ارب ڈالر کے برابر رہی۔

  • پاکستان چھوڑ کر ہندوستان جانے والے ہندوؤں کو بدترین حالات کا سامنا، عالمی میڈیا کی گواہی

    پاکستان چھوڑ کر ہندوستان جانے والے ہندوؤں کو بدترین حالات کا سامنا، عالمی میڈیا کی گواہی

    ہندوستان ہمیشہ پاکستان میں مہاجرین کے حالات کے بارے میں جھوٹا اور منفی پروپیگنڈا کرتا آیا ہے، لیکن آج اپنے ہی ملک میں ہجرت کر کے آنے والے ہندوؤں کی حفاظت کرنے میں ناکام دکھائی دے رہا ہے۔

    عالمی میڈیا گواہی دے رہا ہے کہ پاکستان چھوڑ کر ہندوستان جانے والے ہندوؤں کو بدترین حالات کا سامنا ہے، مودی سرکار نے ہندوستان پہنچنے کے بعد پاکستانی ہندوؤں کو پروپیگنڈے کے لیے استعمال کرنے کے بعد لاوارث چھوڑ دیا ہے۔

    پاکستانی ہندوؤں کا کہنا ہے کہ انھیں ہندوستانی سرکار نے بالکل بے یار و مددگار چھوڑ دیا ہے، پاکستانی ہندوؤں کے مطابق ان کے بچے بھوکے مر رہے ہیں لیکن کسی کو پرواہ نہیں، مودی سرکار نے اپنے وعدے پورے نہیں کیے۔

    ڈی ڈبلیو کے مطابق اس وقت ہندوستان میں 2 ہزار سے زائد پاکستانی ہندو شدید مایوسی کا شکار ہیں، جب کہ دی وائر کا کہنا ہے کہ 17 مئی 2023 کو راجستھان میں 150 پاکستانی ہندوؤں کو بے گھر کر دیا گیا۔ اسی طرح بلومبرگ کے مطابق 24 اپریل 2023 کو جودھپور میں پاکستانی ہندوؤں کی پوری بستی کو بلڈوز کر دیا گیا، 16 مئی 2023 کو جیسلمیر میں بھی ہندوستانی حکومت نے 200 سے زائد پاکستانی ہندوؤں کو بے گھر کیا۔

    گارڈین کی رپورٹ کے مطابق مدھیہ پردیش میں پاکستانی ہندو خاتون کو انتہا پسندوں کے گروپ نے عصمت دری کا نشانہ بنایا، اور پولیس نے شکایت درج کرنے سے بھی انکار کر دیا، الجزیرہ کے مطابق ہندوستان میں پاکستانی ہندو بھوک، افلاس اور بے روزگاری کی سنگین صورت حال سے دوچار ہیں۔

    بی بی سی کا کہنا ہے کہ ہندوستان میں پاکستانی ہندو بنیادی ضروریات سے بھی محروم دکھائی دے رہے ہیں۔ امریکی اخبار نیویارک ٹائمز بھی کچھا ایسا ہی لکھتا ہے اور کہتا ہے کہ صورت حال یہ ہے کہ پاکستانی ہندوؤں کو ہندوستان کے اسکولوں نے تعلیم دینے سے بھی انکار کر دیا ہے۔

    اٹلانٹک کے مطابق مودی سرکار کے ناروا سلوک کے باعث 800 پاکستانی ہندو ہندوستان چھوڑنے پر مجبور ہو چکے ہیں، دی وائر نے نشان دہی کی ہے کہ راجستھان میں 2500 سے زیادہ پاکستانی ہندو، انتہا پسندوں کے مظالم کا شکار ہیں۔