اسلام آباد : تحریک انصاف کے سربراہ عمران خان نے ایک بار پھر کہا ہے کہ کراچی میں ان کے کسی کارکن کو کچھ ہوا تو الطاف حسین کے خلاف لندن کی عدالت میں جائیں گے۔
تفصیلات کے مطابق اسلام آباد میں پی ٹی آئی کی کور کمیٹی کے اجلاس کے بعد میڈیا سے بات چیت کرتے ہوئے عمران خان کا کہنا تھا کہ وہ پارلیمنٹ کے مشترکہ اجلاس میں شرکت کرکے یمن کے معاملے پر اپنا مؤقف پیش کریں گے۔
۔انہوں نے کہا کہ کراچی میں عمران اسماعیل پر دوحملے ہوئے، عمران اسماعیل کے ساتھ کراچی خود جاؤں گا، انہوں نے کہا کہ مجھے ایم کیو ایم سے ایسی امید نہیں تھی، ایم کیو ایم کے پاس جمہوری پارٹی بننے کا بہترین موقع تھا۔
ان کا کہناتھا کہ میڈیا پر یہ غلط رپورٹ کیا گیا کہ پی ٹی آئی اور ایم کیو ایم کے کارکنان میں جھڑپ ہوئی ہے، جبکہ حقیقت یہ ہے کہ متحدہ کارکنان نے حملہ کیا تھا جس کے بعد پی ٹی آئی کے کارکنان پیچھے ہٹ گئے تھے اور انہوں نے کوئی جوابی کارروائی نہیں کی۔
انہوں نے کہا کہ میں خود کراچی آؤں گا، اور عمران اسماعیل کے ساتھ ان کے حلقے کا دورہ کروں گا۔ ان کا کہنا تھا کہ اب کراچی کی عوام کیلئے فیصلے کا وقت ہے، کہ وہ کیا چاہتے ہیں؟
چیئرمین تحریک انصاف نے کہا کہ میرا ایمان ہے کہ 2015ء الیکشن کا سال ہوگا۔ اب جبکہ جوڈیشل کمیشن کا فیصلہ ہو گیا ہے، اس لئے اسمبلیوں میں واپس جانے کا فیصلہ کیا ہے۔
ایک سوال کے جواب میں عمران خان نے کہا کہ این اے 246 کے ضمنی انتخابات میں حصہ لینا ہمارا جمہوری حق ہے۔ کریم آباد میں لگائے گئے پی ٹی آئی اے کے کیمپ پر ایم کیو ایم کے کارکنوں نے پلاننگ کے ساتھ دھاوا بولا تھا۔ ہم اس حرکت کی پرزور مذمت کرتے ہیں۔
