ARYNews.tv | Urdu – Har Lamha Bakhabar

Tag: India

  • آسٹریلیا نے پاک بھارت میچ کیلئے ضابطہ اخلاق جاری کردیا

    آسٹریلیا نے پاک بھارت میچ کیلئے ضابطہ اخلاق جاری کردیا

    ایڈیلیڈ: آسٹریلیا نے پاکستان اور بھارت کے درمیان عالمی کپ کے میچ کیلئے ضابطہ اخلاق جاری کردیا۔

    آسٹریلین شہر ایڈیلیڈ میں پاکستان اور بھارت کے ہزاروں تماشائیوں کے جذبات کو کنٹرول کرنا حکام کیلئے درد سر بن گیا، شائقین کرکٹ کو کنٹرول کرنے کیلئے آسٹریلیا نے ایک ماہ قبل ہی پچاسی نکات پر مشتمل ضابطہ اخلاق جاری کردیا۔

     میگا ایونٹ میں روایتی حریف پندرہ فروری کو ایڈیلیڈ اوول کے میدان میں آمنے سامنے ہونگے، گراؤنڈ انتظامیہ نے پاک بھارت میچ کیلئے اضافی خفیہ کیمرے بھی نصب کردئیے گئے۔

     ایڈیلیڈ گراؤنڈ انتظامیہ نے تماشائیوں کو ہدایت کی ہے کہ ایسے پلے کارڈ گراؤنڈ میں نہ لائیں جس سے دونوں ٹیموں کے مذہبی جذبات مجروح ہوں۔

     ایڈیلیڈ حکام نے واضح الفاظ میں بتایا ہے کہ وہ کسی بھی وقت گراؤنڈ کے دروازے بند کرنے کا حق رکھتے ہیں خواہ تمام شائقین اندر داخل ہوئے ہوں یا نہیں، پاک بھارت میچ کے ٹکٹ کئی ماہ قبل ہی فروخت ہوچکے ہیں۔

  • تاج محل کے گرد ’گوبرکے اپلے‘ جلانے پرپابندی عائد

    تاج محل کے گرد ’گوبرکے اپلے‘ جلانے پرپابندی عائد

    نئی دہلی: بھارت نے تاج محل کے گرد و نواح میں گوبر کے اپلے جلانے پرپابندی عائد کردی جس کا مقصد سفید سنگِ مرمر کے شاہکارکارنگ خراب ہونے سے بچانا ہے۔

    محبت کی اس بے مثال نشانی کو دیکھنے ہرسال لاکھوں سیاح آتے ہیں اور اسے ماحولیاتی آلودگی کے اثرات سے بچانے کے لئے حکام جاں توڑ کوششوں میں مصروف رہتے ہیں۔

    تاج زون کے نام سے پہچانے جانے والے علاقے کے چیئرمین پرادیپ بھٹناگر نے فرانسیسی خبررساں ادارے کو بتایا کہ ’’ آگرہ کے رہنے والوں پر اپلے جلانے کی پابندی عائد کرنے کا مقصد تاج محل کی دیواریں ، گنبد اور میناروں کو کاربن کی تہہ جمنے سے بچانا ہے‘‘۔

    انہوں نے مزید کہا کہ جیسے جیسے وقت گزررہا ہے تاج محل کی رنگت متغیر ہوتی جارہی ہے اس لئے حالیہ میٹنگ میں اپلے جلانے پر پابندی لگانے کا فیصلہ کیا گیا۔

    پرادیپ کے مطابق چہر کے جمالیاتی زوق کا بھی یہی تقاضا ہے کہ دیواروں پراپلے تھپے ہوئے نا دکھائی دیں۔

    بھارت میں گوبر کے اپلے آگ جلانے میں عموماًاستعمال ہوتے ہیں اوردیہی علاقوں میں دیواروں پرتھپے ہوئے اپلوں کا منظر انتہائی عام ہے۔

  • بھارت پاکستان سے برابری کی سطح پر بات کرے، رحمان ملک

    بھارت پاکستان سے برابری کی سطح پر بات کرے، رحمان ملک

    لاہور : سابق وفاقی وزیر داخلہ رحمان ملک نے کہا ہے کہ وزارت خارجہ کو افغان صدر کی پاکستان کی صوبائی سیاسی قیادت سے ملاقاتوں کا نوٹس لینا چاہیے۔افغان حکومت بین الاقوامی سفارتی قدروں کا احترام کرتے ہوئے وفاقی حکومت سے رابطہ رکھے۔

    لاہور میں میڈیا سے گفتگو کرتے ہوئے رحمان ملک نے کہا کہ بھارت پاکستان کو ایٹمی قوت تسلیم کرتے ہوئے برابری کی سطح پر بات کرے مودی کا رویہ اب بھی اپوزیشن لیڈر جیسا ہی ہے ۔

    انہوں نے کہا کہ پاکستان میں داعش کی طرز پر دہشت گردی پھیلائی جارہی ہے اہل تشیع کو قتل کیا جاتا ہے تاکہ شیعہ سنی اختلافات کو بڑھایا جائے، خدشہ ہے کہ آئندہ سنی علماء اور مدارس پر بھی حملے ہوسکتے ہیں۔

    رحمان ملک کا کہنا تھا کہ مولانا فضل الرحمان کے پارلیمنٹ سے پا س ہونے والی اکیسویں آئینی ترمیم پر تحفظات دور کرنا ضروری ہیں،پیپلز پارٹی کے دور حکومت میں مدرسہ اصلاحات کے لیے پانچوں وفاق المدارس اور حکومت کے درمیان معاہدہ طے پایا تھا، جسے پارلیمنٹ سے پاس کروانا چاہیئے۔

    ایک سوال کے جواب میں رحمان ملک نے کہا کہ بلاول بھٹو اور آصف زرداری کے درمیان اختلافات نہیں، انھوں نے کہا کہ عمران خان نے شادی کرکے اچھا اقدام کیا امید ہے کہ اب دھرنے نہیں ہوں گے۔

  • سڈنی ٹیسٹ: بھارتی ٹیم خطرے سے دوچار،آسٹریلیا مستحکم

    سڈنی ٹیسٹ: بھارتی ٹیم خطرے سے دوچار،آسٹریلیا مستحکم

    سڈنی : آسڑیلیا اور انڈیا کے مابین کھیلے جا رہے سڈنی ٹیسٹ میں آسٹریلیا کی پوزیشن مستحکم ہے۔ میزبان ٹیم کو بھارت کے خلاف تین سو اڑتالیس رنز کی مجموعی برتری حاصل ہے۔

    سڈنی میں جاری ٹیسٹ کے چوتھے روز بھارت نے پہلی نامکمل اننگز تین سوبیالیس رنز پانچ کھلاڑی آؤٹ پر دوبارہ شروع کی اور چار سو پجھتر رنز پر پوری ٹیم پویلین لوٹ گئی۔

    ویرات کوہلی نے ایک سو سینتالیس رنز کی اننگز کھیلی۔ ستانوے رنز کی برتری کے ساتھ آسٹریلیا نے دوسری اننگز کا آغاز کیا اور چوتھے روز کھیل کے اختتام تک چھ وکٹوں پر دو سو اکیاون رنز بنالئے ہیں۔

    میزبان ٹیم کو بھارت کے خلاف تین سو اڑتالیس رنزکی مجموعی برتری حاصل ہے۔۔ آسٹریلیا چار میچز کی سیریز پہلے ہی اپنے نام کرچکا ہے۔

  • پاکستان کی تمام تر توجہ آپریشن ضرب عضب پر مرکوز ہے، دفتر خارجہ

    پاکستان کی تمام تر توجہ آپریشن ضرب عضب پر مرکوز ہے، دفتر خارجہ

    اسلام آباد: دفتر خارجہ کی ترجمان تسنیم اسلم نے کہا ہے کہ بھارت لائن آف کنٹرول اور ورکنگ باؤنڈری پر معصوم شہریوں کو قتل کررہا ہے، پاکستان کی تمام تر توجہ ملک میں دہشتگردوں کے خلاف جاری آپریشن ضرب عضب پر مرکوز ہے۔

    دفتر خارجہ میں ہفتہ وار میڈیا بریفنگ کے دوران تسنیم اسلم کا کہنا تھا کہ پاکستان کی کوئی بھی کشتی لاپتہ نہیں،بھارت کے پاس کشتی واقعے کے ٹھوس ثبوت نہیں، اس سلسلے میں خود بھارت میں بھی سوال اٹھ رہے ہیں، نہ ہی بھارت نے پاکستان اس بارے میں مروجہ سفارتی طریقے سے آگاہ کیا ہے۔

    ان کا کہنا تھا کہ پاکستان بھارت کے ساتھ کسی بھی قسم کی کشیدگی نہیں چاہتا، پاکستان کی تمام تر توجہ ملک میں دہشتگردوں کے خلاف جاری آپریشن ضرب عضب پر مرکوز ہے،اس صورتحال میں ہم سرحدوں پر کسی بھی قسم کی کشیدگی کے متحمل نہیں ہوسکتے۔ اس لئے لائن آف کنٹرول اور ورکنگ باؤنڈری پر کسی بھی قسم کی اشتعال انگیزی کا ذمہ دار پاکستان کو قرار دینا بے بنیاد ہے۔

    تسنیم اسلم نے کہا کہ بھارت لائن آف کنٹرول اور ورکنگ باؤنڈری پر معصوم شہریوں کو قتل کررہا ہے، اس صورت حال میں ہمیں دہشتگردی کے خلاف اپنے اقدامات پر بھارتی سرٹیفکیٹ کی ضرورت نہیں۔

  • بھارتی موسیقاراے آر رحمان آج 48 ویں سالگرہ منارہے ہیں

    بھارتی موسیقاراے آر رحمان آج 48 ویں سالگرہ منارہے ہیں

    ممبئی: عالمی شہرت یافتہ بھارتی موسیقار اے آر رحمان آج اپنی 48ویں سالگرہ منارہے ہیں۔

    1967 میں آج ہی کے روز بھارتی ریاست تمل ناڈو کے شہر چنئی میں پیدا ہونے والے اللہ رکھا رحمان کا بچپن میں نام دلیپ تھا، جب ان کی طبیعت خراب رہنے لگی تو ایک بزرگ کی دعاؤں سے وہ صحت یاب ہوئے تو دلیپ کی ماں اپنے بچوں کے ساتھ مشرف بہ اسلام ہوگئیں اور دلیپ اللہ رکھا رحمن ہوگئے۔ اے آر رحمان نے 9 برس کی عمر سے موسیقی کی دنیا میں قدم رکھا۔ انہیں پیانو،ِ ہارمونیم ، گٹار اور سینتھیسائزر پر عبور حاصل ہے، انہوں نے آکسفورڈ کے ٹرینیٹی کالج سے موسیقی میں گریجویشن کررکھا ہے۔

    اے آر حمان نے 1992 میں تامل فلم ’’روجا‘‘ سے فلمی کیریئر کا آغاز کیا جو اب تک جاری ہے۔ ان کی موسیقی آج کسی بھی فلم کی کامیابی کی ضمانت سمجھی جاتی ہے۔ اے آر رحمٰن کے کام کو ناصرف بھارت بلکہ بین الاقوامی طور پر بھی سراہا گیا ہے، انہیں اب تک  دو آسکر، ایک بافٹا اور ایک گولڈن گلوب ایوارڈ سے نوازا جا چکا ہے۔

  • بھا رت دہشت گردوں کیخلاف آپریشن میں رکاوٹ ڈال رہا ہے

    بھا رت دہشت گردوں کیخلاف آپریشن میں رکاوٹ ڈال رہا ہے

    اسلام آباد: بھارتی اشتعال انگیزی اور لائن آف کنٹرول پر فائرنگ سے ان اطلاعات کو مزید تقویت مل رہی ہے کہ بھارت دہشت گردوں کیخلاف ہونیوالے آپریشن میں رکاوٹ ڈالنا چاہتا ہے۔

    بھارتی فوج کی جانب سے سرحدی حدود کی خلاف ورزیوں کا سلسلہ جاری ہے، معصوم پاکستانیوں پر بے دریغ فائرنگ بھا رت کا معمول بن چکا ہے ، دو روز قبل شکر گڑھ کے سرحدی علا قے میں رینجرز کے اہلکاروں پر بھا رتی افواج کی سفاکانہ فائرنگ اور دو رینجرز اہلکاروں کی شہادت بھارت کی اشتعال انگیزی کا منہ بولتا ثبوت ہے۔

    بھارت کا اشتعال انگیز رویہ ان اطلاعات کو تقویت فراہم کرتا ہے کہ بھا رت بھی پاکستان میں دہشت گردوں کیخلاف ہو نیوالے بھر پور آپریشن میں رکاوٹ ڈال رہا ہے۔

    ڈی جی پنجاب رینجرز میجر جنرل طاہر جاوید کا کہنا ہے کہ بھارت کی جانب سے سرحدی خلاف ورزی عرصہ دراز سے جاری ہے، جس کی وجہ سے بھارت سے سیکٹر سطح پر مذاکرات بند کرنے کا فیصلہ کیا گیا ہے۔

    وزیرِدفاع خواجہ آصف نے بھارتی فوج کی جانب سے سرحدی حدود کیخلاف ورزی پر سخت ردعمل کا اظہار کرتے ہوئے کہا کہ جارحیت کا بھرپور جواب دے سکتےہیں۔

  • محمد حفیظ کو بھارت کا ویزہ مل گیا

    محمد حفیظ کو بھارت کا ویزہ مل گیا

    لاہور: پابندی کا شکار آف اسپنر محمد حفیظ کو بھارت کا ویزہ مل گیا۔ بولنگ ایکشن کی جانچ کے لئے آج رات چنائی جائیں گے۔

    تفصیلات کے مطابق نیوزی لینڈ کے خلاف ابوظہبی ٹیسٹ میں حفیظ کا ایکشن رپورٹ ہوا تھا جس کے بعد آف اسپنر پر بین الاقوامی میچز میں بولنگ کرنے پر پابندی عائد کردی گئی تھی۔

    سعید اجمل کے بعد حفیظ پر پابندی پاکستان کرکٹ ٹیم کے لئے دوسرا بڑا دھچکا ثابت ہوا۔ اس پابندی کے بعد حفیظ صرف بیٹسمین بن کر رہ گئے ہیں ۔ وہ انٹرنیشنل میچز میں بولنگ کرسکیں گے یا نہیں؟بدھ کو چنائی میں ہونے والے غیر سرکاری ٹیسٹ میں معلوم ہوجائے گا۔

    حفیظ کو بھارت کا ویزہ مل گیا ہے اور وہ بولنگ ایکشن کی جانچ کے لئے آج چنائی جائیں گے۔ پی سی بی کے ڈاکٹر سہیل سلیم بھی حفیظ کے ہمراہ ہوں گے، ادھر پابندی کے شکار سعید اجمل نے بولنگ ایکشن کا ٹیسٹ نہ دینے اور ورلڈ کپ سے باہر ہونے کا فیصلہ کیا ہے۔

  • کبڈی کی عالمی تنظیم کابھارت کو چیمپئین ماننے سے انکار

    کبڈی کی عالمی تنظیم کابھارت کو چیمپئین ماننے سے انکار

    بھارت : کبڈی کی عالمی تنظیم نے اپنا فیصلہ سنادیا۔بھارت کو چیمپئین ماننے سے صاف کردیا انکار،تفصیلات کے مطابق کبڈی کی عالمی تنظیم انٹرنیشنل کبڈی فیڈریشن نے کبڈی ورلڈ کپ کے فائنل میں بھارت کی کامیابی کو غیر قانونی قرار دے دیا۔

    بھارت میں ہونے والا ایونٹ کبڈی ورلڈ کپ نہیں تھا۔اس میں عالمی قوانین کا اطلاق نہیں ہوا۔کبڈی ورلڈ کپ کا انعقاد تو آئندہ برس کیا جائے گا۔ انٹرنیشنل کبڈی فیڈریشن کے سربراہ دیوراج چتر ویدی کا کہنا ہے کہ میگا ایونٹس میں غیر جانب دار امپائرز مقرر ہوتے ہیں لیکن اس ایونٹ میں ایسا نہیں ہوا۔

    وہ بھارت کو چیمپئین نہیں مانتے۔ فائنل میں امپائرنگ کی ذمہ داری بھارتی ریفریز نے اداکی اور پاکستان کے خلاف فیصلے جاری کئے۔

    پاکستانی کپتان اور مینجمنٹ نے بھارت کے خلاف کبڈی ورلڈکپ کے فائنل میں بھارتی امپائروں کے فیصلوں کوجانبدارانہ قرار دیا تھا جس کی شکایت کبڈی کی عالمی تنظیم سے بھی کی گئی تھی۔

  • سچن ٹنڈولکر 2015 کرکٹ ورلڈ کپ کے سفیر نامزد

    سچن ٹنڈولکر 2015 کرکٹ ورلڈ کپ کے سفیر نامزد

    ممبئی: آئی سی سی نے لیجنڈ بھارتی کرکٹر سچن ٹنڈولکر کو دوہزار پندرہ کرکٹ ورلڈ کپ کاسفیر نامزدکردیا۔

    سچن ٹنڈولکر مسلسل دوسری مرتبہ عالمی کپ کے سفیر نامزد ہوئے ہیں۔ اس سے پہلے دوہزار گیارہ کے عالمی کپ میں بھی ماسٹر بلاسٹر بیٹسمین کو میگا ایونٹ کا سفیر مقرر کیا گیا تھا، نیوزی لینڈ اور آسٹریلیا میں مشترکہ طور پر منعقد ہونے والے دوہزار پندرہ ورلڈ کپ کا کاؤنٹ ڈاؤن جاری ہے، میگا ایونٹ کے آغاز میں اب دوماہ سے بھی کم وقت رہ گیا ہے۔

    بھارتی بیٹسمین کا کہنا ہے کہ دوسری مرتبہ ورلڈ کپ کیلئے سفیرمقرر کرنا ان کیلئے اعزازہے۔ سچن ٹنڈولکر ورلڈ کپ کے حوالے سے آئی سی سی نے جو اقدامات کئے ہیں ان کوپروموٹ کریں گے۔