بھارت میں ایک افسوسناک واقعہ پیش آیا ہے جس میں شوہر نے اپنی زندگی کا خاتمہ کرنے سے پہلے روٹھی ہوئی بیوی کو ویڈیو پیغام بھیجا۔
بھارتی میڈیا رپورٹ کے مطابق ناراض بیوی کے میکے جانے سے دلبرداشتہ ہوکر نوجوان ہریش کھنڈیلوال نے موت کو گلے لگا لیا، مرنے سے قبل نوجوان نے تین ویڈیوز بنائیں جو سوشل میڈیا پر وائرل ہوگئیں۔
مذکورہ واقعہ بھارت کے ضلع رتلام میں پیش آیا، مذکورہ ویڈیو میں اس کا کہنا تھا کہ میری موت کہ ذمہ دار میری سسرال والے ہیں اس نے اپنی بیوی کو مخاطب کرتے ہوئے کہا کہ خوش رہو اور بابو (بیٹے) کا خیال رکھنا۔
ویڈیو بنانے کے بعد ہریش کھنڈیلوال نے اپنی زندگی کا خاتمہ کر لیا، اسے اسپتال لے جایا گیا لیکن علاج کے دوران اس کی موت واقع ہوگئی۔
ویڈیو میں اس نے کہا کہ میری بیوی کا قصور نہیں ہے، سارا قصور اس کی بہنوں اور اس کے گھر والوں کا ہے، ان کی وجہ سے وہ میرے پاس نہیں آ رہی، انہوں نے بہت برا کیا، ٹھیک ہے، کوئی مسئلہ نہیں، تم خوش رہو، بائے۔
تیسری ویڈیو میں اس نے اپنی بیوی سے کہا کہ اگر تم مجھ سے تھوڑی سی بھی محبت کرتی ہو تو کل میری لاش پر رونے آ جانا۔ میں نے اب تک جو کچھ کہا ہے صرف تمہارے لیے کہا، تم مجھ سے خوش نہیں تھی، میں غلط تھا، تم صحیح تھی، تم جیت گئیں، میں ہار گیا، بابو کا خیال رکھنا، بابو بھی آئے تو بتا دینا کہ پاپا مر گئے ہیں۔
نوجوان کے چچازاد بھائی نے پولیس کو بتایا کہ ہریش کی سالیاں کچھ دن پہلے یہاں آئیں اور ہنگامہ کیا۔ جس کے بعد بھابھی ڈلیوری کے لیے اپنے سسرال چلی گئیں۔ سسرال والوں کی وجہ سے بھائی پریشان تھا اور اس نے خودکشی کر لی، علاقہ پولیس تھانہ نے واقعے کا مقدمہ درج کرکے تفتیش شروع کردی ہے۔
