نئی دہلی: وقف بل کے باعث پورا بھارت ہنگاموں کی لپیٹ میں آ گیا ہے، مظاہرین نے پورا بھارت بند کرنے کی دھمکی دے دی ہے۔

بھارتی میڈیا رپورٹس کے مطابق بی جے پی حکومت وقف بل کے ذریعے مسلمانوں کے حقوق سلب کرنے کی ایک اور سازش کر رہی ہے، جس پر اپوزیشن جماعتوں، مسلم تنظیموں اور انسانی حقوق کے گروپوں کی جانب سے ملک بھر میں احتجاج کی کال دے دی گئی ہے۔

بھارتی میڈیا کے مطابق کولکتہ، رانچی، احمد آباد، بہار اور منی پور سمیت متعدد شہروں میں بھی مظاہرے پھوٹ پڑے ہیں، صرف چند گھنٹوں میں عوام بڑی تعداد میں سڑکوں پر نکل آئے اور ’’وقف بل واپس لو‘‘ کے نعرے لگائے۔

وقف بل کے ذریعے مسلمانوں کی اربوں کی زمین ہڑپنے پر وزیر اعظم نریندر مودی کو عالمی سطح پر تنقید کا سامنا کرنا پڑ رہا ہے، مغربی بنگال میں بھی وقف بل کے خلاف شدید مظاہرے ہو رہے ہیں، مغربی بنگال کے علاقے مرشد آباد میں تو وقف بل کے خلاف احتجاج خون کی ہولی میں تبدیل ہو گیا۔

بھارت اور نیپال میں شدید بارش نے تباہی مچادی، 118 افراد ہلاک

مظاہرین پر احتجاج کے دوران شدید لاٹھی جارج اور شیلنگ کی گئی، جب کہ مظاہرین کی جانب سے سڑکیں بلاک اور نیشنل ہائی ویز بند کر دی گئیں، مظاہرین نے بی جے پی حکومت کو پورا بھارت بند کرنے کی دھمکی بھی دے دی۔

دوسری طرف بھارتی پولیس نے ممنوعہ احکامات جاری کرتے ہوئے انٹرنیٹ معطل کر دیا ہے۔ یاد رہے کہ وقف (ترمیمی) ایکٹ گزشتہ ہفتے آدھی رات کے بعد پارلیمنٹ نے منظور کیا تھا اور منگل سے نافذ ہو گیا تھا۔ صدر دروپدی مرمو نے 5 اپریل کو مجوزہ قانون کی منظوری دی۔

بل کے حق میں 128 اور مخالفت میں 95 ووٹ پڑے، جب کہ اپوزیشن کی طرف سے پیش کی گئی تمام ترامیم کو مسترد کر دیا گیا۔ کانگریس رہنما راہول گاندھی نے بل کو ’’آئین مخالف‘‘ اور مذہب کی آزادی پر حملہ قرار دیا، اور خبردار کیا کہ بی جے پی اور آر ایس ایس جلد ہی دیگر اقلیتوں کے حقوق کے پیچھے بھی جائیں گے۔

نئی دہلی: بھارتی ریاست گجرات میں ایک اور طیارہ گر کر تباہ ہو گیا ہے، خاتون ٹرینی پائلٹ نے طیارہ کھیت میں گرا دیا۔

بھارتی میڈیا رپورٹس کے مطابق ریاست گجرات کے شہر مہسانہ میں گزشتہ شام تربیتی طیارہ گر کر تباہ ہوا تھا، معلوم ہوا ہے کہ تکنیکی وجوہ پر طیارہ حادثے کا شکار ہوا، جس میں خاتون ٹرینی پائلٹ زخمی ہو گئی ہیں۔

بھارتی پولیس کا کہنا ہے کہ مہسانہ ہوائی اڈے سے ٹیک آف کے بعد طیارہ اچارپی کے کھیت میں گر کر تباہ ہوا، جسے 19 سالہ ٹرینی پائلٹ اڑا رہی تھیں، واقعے کا مقدمہ درج کر کے تحقیقات شروع کر دی گئی ہیں۔

مہسانہ ٹاؤن پولیس کے مطابق یہ واقعہ شام 7 بجے کے قریب پیش آیا، پولیس کا کہنا ہے کہ طیارہ سیسنا 152 کا تعلق نجی ایوی ایشن فرم بلیو رے ایوی ایشن پرائیویٹ لمیٹڈ کا تھا۔ ٹرینی پائلٹ کو مہسانہ شہر کے ایک پرائیویٹ اسپتال میں داخل کرایا گیا جہاں اس کی حالت خطرے سے باہر بتائی گئی ہے۔

رپورٹس کے مطابق بھارت میں طیارے گرنے کے اس سے قبل بھی حادثات ہو چکے ہیں، 7 مارچ کو لڑاکا طیارے سمیت ایک ہی دن میں 2 طیارے گر کر تباہ ہوئے، ایک طرف بھارت ایف 35 خریدنے کی بات کرتا ہے دوسری طرف تربیتی طیارے سنبھالے نہیں جا رہے۔

اورنگ آباد: بھارتی ریاست مہاراشٹر میں والدین نے گود لی ہوئی معصوم 4 سالہ بچی کو سفاکی سے قتل کر دیا۔

بھارتی میڈیا رپورٹس کے مطابق مہاراشٹر میں ضلع اورنگ آباد کے قصبے سلوڈ میں چار سالہ گود لی ہوئی بچی کے قتل کا دل دہلا دینے والا واقعہ پیش آیا ہے۔

پولیس حکام کا کہنا تھا کہ بچی کی موت مار پیٹ اور سر پر کسی بھاری چیز لگنے سے ہوئی ہے، ابتدائی تفتیش میں معلوم ہوا کہ قتل ہونے والی لڑکی کا نام آیت فہیم شیخ ہے، جس کے قتل کی وجہ تاحال معلوم نہیں ہو سکی ہے۔

پولیس نے دونوں ملزمان فہیم شیخ ایوب اور فوزیہ شیخ فہیم کو گرفتار کر لیا ہے، جن کے پہلے سے 4 بچے تھے، تاہم لڑکی کی خواہش میں انھوں نے لڑکی گود لینے کا فیصلہ کیا، اور 6 ماہ قبل جالنا کے شیخ نسیم عبدالقیوم سے 4 سالہ بچی آیت شیخ کو گود لیا۔

شوہر بیوی کو بے دردی سے قتل کرنے کے بعد لاش سے باتیں کرتا رہا

پولیس کے مطابق بدھ کی رات میاں بیوی نے اس لڑکی کو مارا پیٹا، اور لڑکی کے سر پر کسی سخت چیز سے وار کیا، جس سے اس کی جان چلی گئی، میاں بیوی نے اس کی لاش کو چھپکے سے دفنانے کی کوشش کی لیکن پڑوسیوں نے شک ہونے پر پولیس کو اطلاع کر دی۔

پولیس نے لڑکی کی لاش کو پوسٹ مارٹم کے لیے بھیج دیا ہے، ملزم میاں بیوی نے پولیس کے سامنے انکشاف کیا کہ انھوں نے لڑکی کو جالنا کے شیخ نسیم سے 5000 روپے میں خریدا تھا، بچی کا سودا جعفرآباد کے ایک مڈل مین کے ذریعے ہوا، جس کے دستاویزات بھی موجود ہیں۔

پولیس کا کہنا ہے کہ بچی کو مارنے کی وجہ فی الوقت معلوم نہیں ہو سکی ہے، بچی کو گود لینے کے عمل کی چھان بین کی جائے گی، اگر یہ عمل غیر قانونی پایا گیا تو بچی کے حیاتیاتی والد کے خلاف بھی مقدمہ درج کیا جائے گا۔

پولیس کے مطابق لڑکی کے حیاتیاتی والدین نازیہ فیروز خان اور شیخ نسیم عبدل کی طلاق ہو چکی ہے، نسیم نشے کا عادی تھا، بیوی نے طلاق لے کر کسی اور سے شادی کر لی، اس کی 5 بیٹیاں تھیں جن میں سے وہ 4 کو اپنے ساتھ لے گئی، جب کہ سب سے چھوٹی آیت اپنے والد کے ساتھ رہتی تھی۔

پونا: بھارتی ریاست مہاراشٹر میں ایک مشتعل ڈرائیور نے گرافکس کمپنی کی گاڑی کو آگ لگا دی، جس سے اس میں موجود 4 ملازمین جل کر ہلاک ہو گئے۔

بھارتی میڈیا رپورٹس کے مطابق مہاراشٹر کے شہر پونے میں بدھ کی صبح ایک مشتعل ٹیمپو ڈرائیور نے گاڑی کو آگ لگا دی، جس سے گرافکس کمپنی کے چار ملازمین ہلاک ہو گئے، جب کہ 6 شدید زخمی ہو گئے ہیں۔

ابتدائی طور پر اسے ایک حادثہ تصور کیا جا رہا تھا، تاہم پولیس کی تفتیش میں چونکا دینے والے حقائق سامنے آئے، پولیس کے مطابق ملزم ڈرائیور جناردن ہمبارڈیکر کا کمپنی کے عملے سے جھگڑا ہوا تھا، اس کے بعد اسے دیوالی پر بونس نہیں دیا گیا اور اس کی تنخواہ بھی کاٹی گئی، اس بات پر وہ بہت ناراض تھا۔

کالج میں طالبات کا جنسی استحصال کرنے والا پروفیسر گرفتار

پولیس کا کہنا ہے کہ ملزم ڈرائیور نے اپنے جرم کا اعتراف کر لیا ہے، گاڑی کو آگ لگنے کے بعد کچھ لوگوں نے گاڑی سے چھلانگ لگا کر اپنی جان بچائی تھی۔ ڈپٹی کمشنر آف پولیس کے مطابق ڈرائیور نے پہلے کار میں کیمیکل رکھا اور پھر سیٹ کے نیچے کپڑا رکھ دیا، اس کے بعد اس نے گاڑی کو آگ لگا دی اور چھلانگ لگا کر اپنی جان بچا لی۔

کیمیکل کی وجہ سے گاڑی میں زوردار دھماکا ہوا جس کے بعد پوری گاڑی میں آگ لگ گئی، گاڑی میں کل 12 افراد سوار تھے۔