Tag: indian Actor

نئی دہلی: بھارت میں معروف یوٹیوبر اور اداکار کرونا وائرس کا شکار ہو کر مداحوں سے آکسیجن سلنڈر کی فراہمی کی اپیل کرنے پر مجبور ہوگیا، بعد ازاں موت سے قبل اپنی آخری پوسٹ میں انہوں نے لکھا کہ وہ ہمت ہار چکے ہیں۔

بھارتی میڈیا کے مطابق بھارتی اداکار و یوٹیوبر راہول ووہرا کرونا وائرس کے باعث 35 برس کی عمر میں چل بسے، موت سے قبل راہول ووہرا نے اپنے آفیشل فیس بک اکاؤنٹ سے کرونا وائرس اور اس کے علاج سے متعلق ایک مایوس کن پوسٹ کی تھی۔

بھارتی میڈیا رپورٹ میں کہا گیا کہ ہدایت کار اور لکھاری اروند گوہر نے فیس بک پوسٹ کے ذریعے راہول ووہرا کے انتقال کی تصدیق کی۔ انہوں نے لکھا تھا کہ کرونا وائرس کی تشخیص کے بعد سے انہیں اس سے ہونے والی پیچیدگیوں کی وجہ سے صحت کے سنگین مسائل کا سامنا ہے۔

بعدازاں ایک پوسٹ میں انہوں نے لکھا کہ راہول ووہرا اب نہیں رہے، میرے باصلاحیت اداکار اب نہیں رہے، انہوں نے مزید لکھا کہ گزشتہ روز راہول نے بتایا تھا کہ اگر انہیں بھی بہتر علاج میسر ہوتا تو ان کی زندگی بچ سکتی تھی۔

اروند گوہر نے کہا کہ راہول کو گزشتہ شام دوارکا میں آیوشمان منتقل کیا گیا تھا لیکن ہم انہیں نہیں بچاسکے، براہ کرم ہمیں معاف کردیں، ہم سب آپ کے مجرم ہیں۔

دوسری جانب اپنی آخری پوسٹ میں راہول ووہرا نے لکھا تھا کہ مجھے بھی اچھا علاج مل جاتا تو میں بھی بچ جاتا، تمہارا راہول ووہرا۔

انہوں نے گزشتہ ہفتے فیس بک پر ایک پوسٹ لکھی تھی جس میں انہوں نے اپنے لیے ایک آکسیجن سلنڈر کی فراہمی کے لیے مدد طلب کی تھی، میں کووڈ پازیٹو ہوں، اسپتال میں داخل ہوں، لگ بھگ 4 دن سے لیکن کوئی ریکوری نہیں ہو رہی۔

راہول ووہرا نے لکھا تھا کہ کیا کوئی ایسا ہسپتال ہے؟ جہاں آکسیجن مل جائے کیونکہ یہاں میرا آکسیجن لیول مسلسل کم ہورہا ہے اور کوئی دیکھنے والا نہیں۔

اترکھنڈ سے تعلق رکھنے والے اداکار راہول ووہرا ڈیجیٹل پلیٹ فارمز پر بہت زیادہ مقبول تھے۔

یاد رہے کہ کرونا کی دوسری لہر کے دوران بھارت میں جہاں عام افراد وبا سے غیر محفوظ ہیں، وہیں سیاسی، سماجی و شوبز شخصیات بھی بڑی تیزی سے اس کا شکار ہو رہی ہیں اور گزشتہ دو ہفتوں کے دوران 16 اداکار کرونا وائرس کے باعث چل بسے۔