ARYNews.tv | Urdu – Har Lamha Bakhabar

Tag: Indian army

  • مقبوضہ کشمیر میں 17 کشمیریوں کی شہادت پر پاکستان دفتر خارجہ کی شدید مذمت

    مقبوضہ کشمیر میں 17 کشمیریوں کی شہادت پر پاکستان دفتر خارجہ کی شدید مذمت

    اسلام آباد: پاکستان دفتر خارجہ نے مقبوضہ کشمیر میں قابض بھارتی فوج کی فائرنگ سے 17 کشمیریوں کی شہادت پر شدید مذمت کرتے ہوئے کہا ہے کہ بھارت کشمیریوں کی جدوجہد کو نہیں دبا سکتا۔

    تفصیلات کے مطابق آج مقبوضہ کشمیر کے ضلع اسلام آباد اور شوپیاں میں غاضب بھارتی فورسز نے آپریشن کے دوران 17 کشمیری نوجوانوں کو فائرنگ کر کے شہید کردیا جس کے بعد پاکستان دفتر خارجہ کی جانب سے شدید مذمتی بیان سامنے آیا۔

    ترجمان دفتر خارجہ نے کہا ہے کہ بھارتی اپنے ہتھکنڈوں کے ذریعے کشمیریوں کی جدوجہد کو نہیں دبا سکتے، بھارتی فوج نے مقبوضہ کشمیر کے علاقے شوپیاں اور اننت ناگ کے مختلف علاقوں میں فائرنگ کر کے 17 کشمیریوں کو شہید کیا۔

    مقبوضہ کشمیرمیں بھارتی فوج کی فائرنگ‘ 12 نوجوان شہید

    دفتر خارجہ کا کہنا تھا کہ معصول کشمیریوں کو دبانے کے لیے پیلٹ گنز کا استعمال کیا جاتا ہے، مقبوضہ کشمیر کی مختلف وادیوں میں انٹرنیٹ سروس بھی معطل ہرنے کی اطلاعات سامنے آرہی ہیں، پاکستان کشمیریوں کے ساتھ ہمیشہ اظہار یکجہتی کرتا رہے گا۔

    ترجمان کا مزید کہنا تھا کہ عالمی مرادری کشمیر میں بھارتی مظاہم کا نوٹس لے، مسئلہ کشمیر کشمیری عوام کی امنگوں کے مطابق حل ہونا چاہیے۔

    کابل ملٹری اکیڈمی حملہ: پاکستان دفتر خارجہ کی شدید مذمت

    خیال رہے کہ مقبوضہ کشمیر میں نوجوانوں کی شہادت کے بعد بھارتی فورسز کے خلاف مظاہرے کیے گئے جس پر قابض بھارتی فورسز کی جانب سے آنسو گیس کی شیلنگ اور ربڑکی گولیاں بھی برسائی گئیں۔

    دوسری جانب بھارتی پولیس نے دعویٰ کیا ہے کہ یہ نوجوان بھارتی فورسز سے جھڑپ کے دوران مارے گئے اور ان کا تعلق عسکریت پسند تنظیم سے تھا۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • مقبوضہ کشمیر: بھارتی فوج کی فائرنگ سے نوجوان شہید

    مقبوضہ کشمیر: بھارتی فوج کی فائرنگ سے نوجوان شہید

    سری نگر: مقبوضہ کشمیر میں بھارتی فوج کی دہشت گردی جاری ہے، بھارتی فوج کی فائرنگ سے نوجوان شہید ہوگیا۔

    تفصیلات کے مطابق مقبوضہ کشمیر کے ضلع بدگام میں قابض بھارتی فوج نے فائرنگ کرکے نوجوان کو شہید کردیا، فائرنگ سے 17 سالہ لڑکی سمیت 3 افراد زخمی بھی ہوئے۔

    بھارتی فوج نے بڈگام میں بیرواہ کے علاقے خان محلہ کا محاصرہ کیا اور سرچ آپریشن شروع کردیا، اس دوران قابض فوج نے بلا اشتعال فائرنگ کی جس کے نتیجے میں ایک شخص شہید اور تین افراد زخمی بھی ہوگئے۔

    بھارتی فوج نے دعویٰ کیا ہے کہ نوجوان عسکریت پسند تھا جو فائرنگ کے نتیجے میں گولیوں کا نشانہ بن گیا، دوسری جانب نوجوان کی شہادت کے خلاف کشمیریوں کی بڑی تعداد سڑکوں پر نکل آئی اور بھارتی فوج کے خلاف احتجاج کیا۔

    مزید پڑھیں: مقبوضہ کشمیرمیں بھارتی فورسز کی فائرنگ‘ 2 نوجوان شہید

    واضح رہے کہ گزشتہ روز بھی بھارتی فوج نے سرچ آپریشن کے دوران فائرنگ کرکے 2 نوجوانوں کو شہید کردیا تھا، جبکہ 20 مارچ کو قابض بھارتی فورسز نے مقبوضہ کشمیر کے ضلع کپواڑہ کے علاقے ہلمت پورہ میں سرچ آپریشن کی آڑ میں 4 کشمیری نوجوان کو شہید کردیا تھا۔

    یاد رہے کہ صدر آزاد کشمیر کا کہنا تھا کہ مسئلہ کشمیر تقسیم ہند کا نامکمل ایجنڈا ہے، ان کا کہنا تھا کہ بھارتی فوج کشمیریوں‌ کا قتل عام کررہی ہے، کشمیری خواتین کی بے حرمتی کی جارہی ہے مگر عالمی سطح پر کوئی ردعمل سامنے نہیں‌ آرہا.

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • بھارتی فوج مقبوضہ کشمیر میں خون کی ہولی کھیل رہی ہے: مشعال ملک

    بھارتی فوج مقبوضہ کشمیر میں خون کی ہولی کھیل رہی ہے: مشعال ملک

    اسلام آباد: حریت رہنماء یاسین ملک کی اہلیہ مشعال ملک نے کہا ہے کہ بھارتی جارحیت کا سلسلہ جاری ہے، بھارتی فوج مقبوضہ کشمیر میں خون کی ہولی کھیل رہی ہے۔

    ان خیالات کا اظہار انہوں نے مقبوضہ کشمیر میں 6 نوجوانوں کی شہادت پر میڈیا سے گفتگو کرتے ہوئے کیا، مشعال ملک نے واقعے کی شدید مذمت کرتے ہوئے کہا کہ 6 کشمیریوں کی شہادت پر مقبوضہ کشمیر میں مکمل ہڑتال ہے، بھارتی فوج معصوم شہریوں پر شیلنگ کر رہی ہے۔

    کشمیر اور پاکستان کے گہرے رشتے کو کوئی جدا نہیں کر سکتا، مشعال ملک

    انہوں نے کہا کہ بھارت نے کشمیر میں موبائل، انٹرنیٹ سروس بند کر رکھی ہے، جنت نظیر وادی کو بھارتی افواج نے جیل میں تبدیل کر رکھا ہے، حریت رہنماء یاسین ملک کو سینٹرل جیل منتقل کر دیا گیا ہے۔

    مشعال ملک کا مزید کہنا تھا کہ بھارتی فوج مقبوضہ کشمیر میں خون کی ہولی کھیل رہی ہے لیکن دنیا بھارتی مظالم پر خاموش تماشائی بنی ہوئی ہے، بھارت جان لے وہ کشمیریوں کا عزم متزلزل نہیں کر سکتا۔

    خیال رہے کہ آج مقوضہ کشمیر کے علاقے ضلع شوپیاں میں بھارتی فوج نے ریاستی دہشتگردی کا مظاہرہ کرتے ہوئے چھ کشمیری نوجوانوں کو فائرنگ کر کے شہید کر دیا ہے۔ شہید نوجوان کار میں سوار تھے جب بھارتی فوج نے انہیں فائرنگ کا نشانہ بنایا۔

    بھارتی فوج انسانی حقوق کے بعد اخلاقیات بھی بھول چکی ہے، مشعال ملک

    دوسری جانب نوجوانوں کی شہادت پر سید علی گیلانی، میر واعظ عمر فاروق اور محمد یاسین ملک سمیت حریت قیادت نے ہڑتال کی اپیل کی ہے، حکام نے کشمیریوں کو احتجاج سے روکنے کے لیے سری نگر، پلواما سمیت دیگر اضلاع میں سخت پابندیاں عائد کر رکھی ہیں۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں

  • بھارت کا جنگی جنون، اسکول وین پر فائرنگ، ڈرائیور شہید

    بھارت کا جنگی جنون، اسکول وین پر فائرنگ، ڈرائیور شہید

    راولپنڈی: جنگی جنون میں مبتلا بھارت نے ایک بار پھر لائن آف کنٹرول کی خلاف ورزی کرتے ہوئے بٹل سیکٹر سے گزرنے والی معصوم بچوں کی اسکول وین کو نشانہ بنا ڈالا جس کے نتیجے میں ڈرائیور شہید ہوگیا۔

    پاک فوج کے شعبہ تعلقات عامہ سے جاری بیان کے مطابق بھارت نے ایل او سی کی خلاف ورزی کرتے ہوئے بٹل سیکٹر پر فائرنگ کی اور اسکول وین کو نشانہ بنایا، جس کے نتیجے میں ایک شہری (ڈرائیور) شہید ہوگیا جبکہ وین تباہ ہوگئی۔

    آئی ایس پی آر سے جاری اعلامیے کے مطابق بھارت لائن آف کنٹرول پر معصول شہریوں کو بلااشتعال فائرنگ کا نشانہ بنانےکاسلسلہ جاری رکھے ہوئے ہے جو جنیوا کنونشن کی قوانین کی خلاف ورزی ہے۔

    بھارتی دہشت گردی کا نشانہ بننے والی وین میں سوار طالبہ کا کہنا ہے کہ ’بٹل سے دھرم سال جارہے تھے کہ راستہ میں فائرنگ ہوئی جس کے بعد ہم سب خوفزدہ اور ڈرائیور شہید ہوگئے۔

    دفتر خارجہ نے بھارت کے ڈپٹی ہائی کمشنر کو طلب کر کے شدید احتجاج ریکارڈ کروایا جبکہ وزیراعظم شاہد خاقان عباسی نے بھی واقعے پر افسوس کا اظہار کرتے ہوئے شہید کے بلند درجات کی دعا کی اور اہل خانہ سے دلی تعزیت بھی کی۔

    واضح رہے کہ بھارت نے عالمی قوانین کے کی خلاف ورزی کرتے ہوئے 2017 میں 1881، سال 2016 میں 382، 2014 اور 2015 میں 563 بار لائن آف کنٹرل پر جنگ بندی کے معاہدے کی خلاف ورزی کی۔

    مزید پڑھیں: بھارت کی لائن آف کنٹرول پر فائرنگ‘ دو خواتین‘ ایک شہری زخمی

    یاد رہے کہ نئے سال کے آغاز سے بھارتی افواج کی جانب سے لائن آف کنٹرول پر بلا سبب فائرنگ کا جاری ہے ‘ گزشتہ ماہ جنوری میں متعدد بار شہری آبادی کو فائرنگ کا نشانہ بنا یا گیا جس میں شہادتیں ہوئیں جبکہ متعدد شہری زخمی بھی ہوئے ۔

    پاکستان کی قید میں موجود بھارتی ایجنٹ کلبھوشن یادو کی اہلِ خانہ سے ملاقات کے موقع پر بھی بھارت نے بلا اشتعال فائرنگ کی جس میں پاک فوج کے تین جوان بھی شہید ہوئے۔

    مزید پڑھیں: بھارت کی لائن آف کنٹرول پر فائرنگ‘ ایک شہری شہید ‘ دو بچے زخمی

    بھارتی تسلط کے خلاف پاکستان میں منائے جانے والے یومِ یکجہتی کشمیر کی سشب بھارتی فور سز نے لائن آف کنٹرول پر واقع نیزہ پیر اور راولاکوٹ سیکٹر میں گزشتہ شب شہری آباد ی پر بلااشتعال فائرنگ اور گولہ باری کی تھی جس کے نتیجے میں ایک شہری شہید ہوگیا جبکہ دو بچے زخمی ہوگئے تھے۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • دو کشمیریوں کا قتل، بھارتی میجرسمیت دیگراہلکاروں کیخلاف مقدمہ درج

    دو کشمیریوں کا قتل، بھارتی میجرسمیت دیگراہلکاروں کیخلاف مقدمہ درج

    سری نگر : مقبوضہ کشمیرمیں عوامی احتجاج نے کٹھ پتلی انتظامیہ کو گھٹنے ٹیکنے پرمجبورکردیا، دوکشمیریوں کے قتل کا مقدمہ بھارتی میجرسمیت دیگرفوجی اہلکاروں کیخلاف درج کرلیا گیا۔

    تفصیلات کے مطابق مقبوضہ کشمیرمیں عوامی احتجاج بلآخر رنگ لے آیا، بھارتی فوج کیخلاف قتل کا مقدمہ درج ہوگیا، مقدمہ بھارتی فوج کی دسویں رائفل بٹالین کیخلاف درج کیا گیا ہے اور بٹالین کے میجرآدتیا کونامزد کیا گیا ہے۔

    مقدمے میں قتل اوراقدام قتل کی دفعات شامل کی گئی ہیں۔

    کشمیری رہنماؤں نے شوپیاں میں نہتے کشمیریوں پرفائرنگ کرنے والے بھارتی فوجیوں کوگرفتارکرنے کا مطالبہ کیا ہے۔

    یاد رہے کہ شوپیاں میں بھارتی بھارتی فوج کی جانب سے مظاہرین پرفائرنگ سے دو نوجوانوں شہید اور چار افراد کے زخمی ہوئے،  واقعے کے خلاف شدید عوامی احتجاج  کیا گیا۔

    مزید پڑھیں :  مقبوضہ کشمیرمیں بھارتی فوج کی فائرنگ‘ 4 کشمیری شہید

    دوسری جانب مقبوضہ کشمیرکے سابق وزیراعلی عمرعبداللہ بھی کشمیریوں پرجاری مظالم پربولنے پر مجبورہوگئے، عمرعبداللہ کا کہنا تھا کہ مقبوضہ کشمیرمیں جاری قتل کے سلسلے کوروکنا ہوگا، ہم سب کوملکرکراس خون خرابے کوختم کرناہوگا۔

    سابق وزیراعلی نے کہا کہ شوپیاں میں 2 نوجوانوں کے قتل میں میجرسمیت دیگرفوجی اہلکارملوث ہیں توانکوائری مجسٹریٹ سے کیوں کرائی جارہی ہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • اقوام متحدہ کی دوغلی پالیسیوں نے کشمیریوں کومایوس کیا: سراج الحق

    اقوام متحدہ کی دوغلی پالیسیوں نے کشمیریوں کومایوس کیا: سراج الحق

    لاہور: امیر جماعت اسلامی سراج الحق کا کہنا ہے کہ اقوام متحدہ کی دوغلی اور امریکا نواز پالیسیوں کی وجہ سے کشمیریوں کو مایوسی کا سامنا ہے۔

    تفصیلات کے مطابق جماعت اسلامی کے سربراہ سراج الحق نے لاہور میں بھارتی وزیر دفاع نِرمالا سیتھا رمن کی محدود جنگ کی دھمکی کی شدید مذمت کرتے ہوئے کہا ہے کہ بھارت کسی غلط فہمی میں نہ رہے، اگر اس نے ایسی حماقت کی تو اس کا منہ توڑ جواب دیں گے۔

    سراج الحق کا کہنا تھا کہ بھارت ایل او سی پر گولہ باری کر کے معصوم شہریوں کو نشانہ بنا رہا ہے، جبکہ حکمران بھارت کی کھل کر مذمت نہیں کر رہے، بھارتی ڈپٹی ہائی کمشنر کو احتجاجی مراسلہ دینے سے مسئلہ حل نہیں ہوگا۔

    ان کا مزید کہنا تھا کہ حکومتِ پاکستان کو یہ مسئلہ اقوام متحدہ کی سلامتی کونسل میں لے کر جانا چاہیے، بھارت کی 8 لاکھ فوج نہتے کشمیریوں پر ظلم و جبر کے پہاڑ توڑ رہی ہے، میں پاکستان کی عوام سے اپیل کرتا ہوں کہ وہ 5 فروری کو مظلوم کشمیری بھائیوں سے اظہارِ یکجہتی کے لیے ضرور نکلیں۔

    نقیب اللہ قتل، سراج الحق کا کراچی میں جرگے کا اعلان

    یاد رہے جنگی جنون میں مبتلا بھارت کی جارحیت معمول بن چکی ہے، گذشتہ روز بھی بھارت نے سیز فائر کی خلاف ورزی کرتے ہوئے نکیال سیکٹر پر بلا اشتعال فائرنگ کی تھی جس کے نتیجے میں خاتون سمیت دو فراد شہید ہوگئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • بھارتی فوج کی فائرنگ سے نابینا ہونیوالی کشیمری لڑکی نے میٹرک کرلیا

    بھارتی فوج کی فائرنگ سے نابینا ہونیوالی کشیمری لڑکی نے میٹرک کرلیا

    سری نگر : بھارتی فوج کی بربریت کے باعث بینائی سے محروم ہونے والی باہمت کشمیری لڑکی نے میٹرک کا امتحان پاس کرلیا، سابق وزرائے اعلیٰ اورحریت رہنماؤں نے انشاء مشتاق کو مبارکباد کا پیغام بھیجا ہے۔

    تفصیلات کے مطابق گزشتہ سال مقبوضہ کشمیر میں جاری کشیدگی کے دوران بھارتی فوج کی جانب سے مظاہرین پر پیلٹ گن سے اندھادھند فائرنگ کی گئی تھی جس کے نتیجے میں درجنوں چَھرے لگنے سے متعدد افراد شہید اورہزاروں زخمی ہوئے تھے۔

    ان میں سے ایک باہمت لڑکی انشاء مشتاق بھی ہیں جنہوں نے چھرّے لگنے سے دونوں آنکھوں سے محرومی کے باوجود صبر و استقامت کا دامن ہاتھ سے نہ چھوڑا۔

    ڈاکٹروں کے جواب دینے کے بعد بینائی سے محروم انشا نے فیصلہ کیا کہ وہ تعلیم کا سفر جاری رکھیں گی اور دسویں جماعت کا امتحان نمایاں نمبروں سے پاس کرکے اپنے والدین کا سر فخر سے بلند کرکے عوام کے دل جیت لئے۔

    برطانوی نشریاتی ادارے بی بی سی کے مطابق انشاء مشتاق کا کہنا ہے کہ میری قسمت میں جو تھا وہی ہوا، لیکن میرے ارادے کمزور نہ تھے، میں مزید پڑھنا چاہتی تھی تو میرے والدین اور دوستوں نے مجھے حوصلہ دیا۔

    انہوں نے مزید کہا کہ آج میں اس کامیابی پر بہت خوش ہوںاور میں چاہتی ہوں کہ نوجوان تعلیم کا سفر کسی بھی قیمت پر جاری رکھیں۔

    باہمت کشمیری لڑکی کی کامیابی پر وزیراعلیٰ محبوبہ مفتی، سابق وزیراعلیٰ عمرعبداللہ اور حریت رہنما میر واعظ عمرفاروق نے انہیں مبارکباد پیش کی ہے۔

    یاد رہے کہ گزشتہ سال 2016 میں کشمیری نوجوان برہان وانی کے ماورائے عدالت قتل کے خلاف احتجاجی مظاہرے کے موقع پر بھارتی فوج نے پیلٹ گنوں سے اندھا دھند فائرنگ کرکے سولہ افراد کو شہید اور سات ہزار کو شدید زخمی کردیا تھا، جن میں سے درجنوں افراد دیکھنے کی صلاحیت سے محروم ہوئے۔

  • ایل اوسی پربھارتی فوج کی فائرنگ، 75سالہ خاتون شہید

    ایل اوسی پربھارتی فوج کی فائرنگ، 75سالہ خاتون شہید

    راولپنڈی : بھارتی فوج نے لائن آف کنٹرول کے چری کوٹ سیکٹر پر بلااشتعال فائرنگ کی جس کے نتیجے میں ایک ضعیف خاتون شہید ہوگئیں، پاک فوج نے دشمن کی جارحیت کا منہ توڑ جواب دیا۔

    تفصیلات کے مطابق بھارتی فوج کی جانب سے کنٹرول لائن پر سیز فائر معاہدے کی خلاف ورزی کا سلسلہ تاحال جاری ہے۔

    لائن آف کنٹرول کے چری کوٹ سیکٹر پر بھارتی فوج نے اپنی بربریت کا مظاہرہ کرتے ہوئے شہری آبادی پر فائرنگ کردی۔

    پاک فوج کے شعبہ تعلقات عامہ آئی ایس پی آر کے مطابق بھارتی فورسز نے ککوٹا گاؤں کی شہری آبادی کو نشانہ بنایا، بلااشتعال فائرنگ سے75سالہ محمودہ بیگم موقع پر ہی شہید ہوگئیں۔

    آئی ایس پی آر کا کہنا ہے کہ پاک فوج نے بھرپور جوابی کارروائی کرتے ہوئے بھارتی بنکرز کو نشانہ بنایا جس کے بعد دشمن کی بندوقیں خاموش ہوگئیں۔

    مزید پڑھیں: بھارت کی بلااشتعال فائرنگ، 2 بچے شہید، 3 بھارتی فوجی ہلاک

    یاد رہے کہ اس سے قبل بھی لائن آف کنٹرول پر بھارتی فوج کی جانب سے چری کوٹ سیکٹر میں آبادی پر کی جانے والی فائرنگ اور گولہ باری کے نتیجے میں2 بچے شہید ہوگئے تھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • بھارت کی ایل او سی پربلااشتعال فائرنگ، 2 بچے شہید، 3 بھارتی فوجی ہلاک

    بھارت کی ایل او سی پربلااشتعال فائرنگ، 2 بچے شہید، 3 بھارتی فوجی ہلاک

    راولاکوٹ : لائن آف کنٹرول پراشتعال انگیزی سے بھارتی فوج باز نہ آئیں ، بھارتی فوج کی جانب سے راولاکوٹ کے عباس پورسیکٹر اور چری کوٹ سیکٹر میں آبادی پر فائرنگ اورگولہ باری کے نتیجے میں2 بچے ہوگئے۔

    پاک فوج کے شعبہ تعلقات عامہ آئی ایس پی آر کے مطابق لائن آف کنٹرول پر بھارت آپے سے باہر ہوگیا اور روایتی دھرمی کا مظاہرہ کرتے ہوئے بھارتی فوج نے راولاکوٹ کے عباس پورسیکٹر اور چری کوٹ سیکٹر میں بلااشتعال فائرنگ اور گولہ باری کی ، جس کے نتیجے میں 2بچے شہید ہوگئے۔

    آئی ایس پی آر کے مطابق بھارتی فوج کی جانب سے شہری آبادی پر بلااشتعال گولہ باری کی گئی جبکہ شہید ہونے والے شہریوں کا تعلق گاؤں چفاڑ سے ہے۔

    ترجمان کا کہنا ہے کہ پاکستان فورسزکی بھرپورجوابی کارروائی نے دشمن کو خاموش رہنے پر مجبور کردیا، پاک فوج کے بھر پور جواب سے بھارتی چیک پوسٹ کو شدید نقصان پہنچا، بھارت کے 3فوجیوں کی ہلاکت کی بھی اطلاع ہے  جبکہ 5 بھارتی فوجی زخمی ہوئے۔

    آئی ایس پی آر کے مطابق بھارت کی جانب سے بلااشتعال فائرنگ کاسلسلہ وقفے وقفےسے جاری ہے۔

    مزید پڑھیں : بھارتی فوج کی بلا اشتعال فائرنگ، ایک شہری شہید، چارزخمی

    یاد رہے کہ 30ستمبر اور 2اکتوبر کو رکھ چکری اور راولا کوٹ میں بھارتی فوج کی جانب سے بلا اشتعال فائرنگ کی گئی تھی، جس میں تین شہری شہید اور پانچ زخمی ہوئے تھے، جس پر پاکستان نے بھارتی ڈپٹی ہائی کمشنر کو طلب کر کے سیز فائر خلاف ورزی پر شديد احتجاج کیا تھا۔

    پاکستان کی جانب سے بارہا تنبیہ کے باوجود بھارتی جارحيت جاری ہے، ترجمان دفتر خارجہ نے اس بات پر زور دیتے ہوئے کہا ہے کہ بھارت 2003 سیز فائر معاہدے کی پاسداری کرے۔

    مزید پڑھیں : ایل او سی پر بھارتی جارحیت، پاک فوج کا جوان اور 2 شہری شہید

    سال دو ہزار سترہ میں اب تک ہندوستان کی جانب سے 900 بار سیز فائر معاہدے کی خلاف ورزی کی گئی۔ ترجمان کے مطابق جان بوجھ کر شہری آبادی کو نشانہ بنانا خطے اور عالمی امن کے لیے خطرہ اور انسانی حقوق کی خلاف ورزی قابل مذمت ہے۔

    واضح رہے کہ رواں برس بھارتی فوج کی جانب سے متعدد بار لائن آف کنٹرول کی خلاف ورزی کی جاتی رہی ہے، بھارت اپنے داخلی اور سیاسی کشیدگی اور کشمیر میں جاری ظلم و بربریت سے توجہ ہٹانے کے لیے لائن آف کنٹرول پر بلااشتعال فائرنگ کا عمل جاری رکھے ہوئے ہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • بھارتی فوج کی بلا اشتعال فائرنگ، ایک شہری شہید، چارزخمی

    بھارتی فوج کی بلا اشتعال فائرنگ، ایک شہری شہید، چارزخمی

    راولپنڈی : بھارتی فوج نے ایک بار پھر باؤنڈری لائن پر بلااشتعال فائرنگ کرتے ہوئے ایک شہری شہید اور چار افراد کو زخمی کردیا، پاک فوج کی بھرپورجوابی کارروائی سے دو بھارتی پوسٹیں تباہ ہوگئیں۔

    آئی ایس پی آر کی جانب سے جاری کردہ تفصیلات کے مطابق بھارتی فوج آپے سے باہر ہوگئی اور روایتی دھرمی کا مظاہرہ کرتے ہوئے لائن آف کنٹرول پر ایک بار پھر شہری آبادی رکھ چکری سیکٹر پر بلا اشتعال پر فائرنگ کردی۔

    پاک فوج کی جانب سے بھرپور جوابی کارروائی کی ویڈیو آئی ایس پی آر نے جاری کر دی۔

    فائرنگ کے نتیجے میں ایک شہری شہید، 4 زخمی ہوگئے، پاک فوج کے شعبہ تعلقات عامہ (آئی ایس پی آر)کا کہنا ہے کہ پاکستان کی جوابی کارروائی میں دشمن چوکیوں کو نشانہ بنایا گیا جس سے دشمن کی دو پوسٹیں تباہ ہوگئیں۔

    اس حوالے سے سارک ساؤتھ ایشیا  کے ڈائریکٹرجنرل ڈاکٹر محمد فیصل کا کہنا ہے کہ گزشتہ بارہ روز میں بھارتی جارحیت کا یہ پانچواں واقعہ ہے، بھارتی فوج کی فائرنگ سے اب تک5خواتین سمیت11شہری شہید اور37زخمی ہوگئے ہیں۔

    واضح رہے کہ رواں برس بھارتی فوج کی جانب سے متعدد بار لائن آف کنٹرول کی خلاف ورزی کی جاتی رہی ہے، بھارت اپنے داخلی اور سیاسی کشیدگی اور کشمیر میں جاری ظلم و بربریت سے توجہ ہٹانے کے لیے لائن آف کنٹرول پر بلااشتعال فائرنگ کا عمل جاری رکھے ہوئے ہے۔

    ایل او سی کی خلاف ورزی پر بھارتی ڈپٹی ہائی کمشنرکی دفترخارجہ طلبی

    ترجمان دفترخارجہ نے کہا ہے کہ لائن آف کنٹرول کی خلاف ورزی اور نہتے شہریوں کی شہادت پر بھارتی ڈپٹی ہائی کمشنرگوتم بمبا والا کو دفترخارجہ طلب کرلیا۔

    پاکستان نے کنٹرول لائن پردہشت گردی اور معصوم عوام کی شہادتوں پر بھارت سے احتجاج کیا، سیکرٹری خارجہ نے احتجاجی مراسلہ گوتم بمباوالا کے حوالے کیا۔

    ترجمان کے مطابق بھارتی دہشت گردی میں نائب صوبیدارندیم، خاتون سمیت تین شہری شہید ہوئےتھے، اس کے علاوہ3فوجی جوانوں سمیت4شہری بھی زخمی ہوئےتھے۔

    پاکستان کی جانب سے بارہا تنبیہ کے باوجود بھارتی جارحيت جاری ہے، ترجمان دفتر خارجہ نے اس بات پر زور دیتے ہوئے کہا ہے کہ بھارت 2003 سیز فائر معاہدے کی پاسداری کرے۔

    سال دو ہزار سترہ میں اب تک ہندوستان کی جانب سے 900 بار سیز فائر معاہدے کی خلاف ورزی کی گئی۔ ترجمان کے مطابق جان بوجھ  کر شہری آبادی کو نشانہ بنانا خطے اور عالمی امن کے لیے خطرہ اور انسانی حقوق کی خلاف ورزی قابل مذمت ہے۔

    یاد رہے کہ بھارتی فورسزنے29ستمبر کو رکھ چکری سیکٹر، راولاکوٹ میں اشتعال انگیزی کی تھی۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔