ARYNews.tv | Urdu – Har Lamha Bakhabar

Tag: Indian army

  • بھارتی فوج کی ایل او سی کی شہری آبادی پر فائرنگ، دو افراد زخمی

    بھارتی فوج کی ایل او سی کی شہری آبادی پر فائرنگ، دو افراد زخمی

    راولپنڈی : بھارتی فوج نے ایل او سی کے قریب شہری آبادی پر فائرنگ کردی، دو افراد زخمی ہوگئے، بھارت نے پاک فوج پر ہی شہریوں کو مارنے کا الزام لگا دیا۔

    تفصیلات کے مطابق پاک فوج کے شعبہ تعلقات عامہ آئی ایس پی آر نے لائن آف کنٹرول کی گزشتہ24گھنٹے کی صورتحال کے حوالے سے آگاہ کرتے ہوئے کہا ہے کہ بھارتی فوج  کی جانب سے لائن آف کنٹرول (ایل او سی) کے باغسر سیکٹر کی شہری آبادی پر اندھا دھند فائرنگ کی گئی۔

    بھارتی فوج نے نیزہ پیر، پانڈو، خنجر منور، پٹل اور باغسر سیکٹرز میں بلا اشتعال فائرنگ کی لیکن پاک فوج کی جانب سے بھرپور جوابی کارروائی کی گئی جس سے دشمن کی گنیں خاموش ہو گئیں۔

    بھارتی فوج کی فائرنگ کے نتیجے میں دو شہری زخمی ہوگئے، فائرنگ سے زخمی ہونے والوں میں55سالہ عظمت بی بی اور75سالہ باباجان شامل ہیں۔

    آئی ایس پی آر کے مطابق ایل او سی پر بھارتی فوج کی جانب سے اب باقاعدہ شہری آبادی کو نشانہ بنایا جارہا ہے جبکہ بھارت کی جانب سے پاک فوج پر ایل او سی کے اس پار شہری آبادی کو نشانہ بنانے کا پروپیگنڈہ کیا جارہا ہے ،پاک فوج متعدد بار بتا چکی ہے کہ وہ آبادی کو نشانہ نہیں بنا رہی۔

    آئی ایس پی آر کا مزید کہنا ہے کہ ہم شہری آبادی کو نشانہ بنانے کے بھارتی الزامات مسترد کرتے ہیں، بھارت کو جواب دیتے ہوئے کشمیری بھائیوں کا خیال رکھا جاتا ہے، پاک فضائیہ اور پاک بحریہ سرحدوں کے دفاع کیلئے ہمہ وقت چوکس چوکنا ہیں۔

  • پاک فوج کا ایل او سی پر بھارتی جارحیت کا مؤثر جواب، دشمن کی چوکیاں تباہ

    پاک فوج کا ایل او سی پر بھارتی جارحیت کا مؤثر جواب، دشمن کی چوکیاں تباہ

    راولپنڈی : گزشتہ24گھنٹوں کے دوران بھارتی فوج نے ایل او سی کے مختلف سیکٹرز پر وقفے وقفے سے فائرنگ کا سلسلہ جاری رکھا، پاک فوج کی جوابی کارروائی سے آگ اگلتی دشمن کی توپیں خاموش ہوگئیں۔

    تفصیلات کے مطابق لائن آف کنٹرول پر گزشتہ24گھنٹے کی صورتحال کیا رہی اس حوالے سے آئی ایس پی آر نے رپورٹ جاری کردی ہے رپورٹ کے مطابق بھارت کی ایل او سی پر بلااشتعال فائرنگ کئی گھٹے تک جاری رہی۔

    بھارتی فورسز نے نیزہ پیر، خنجر منور، بٹل، باغ سر، پانڈو سیکٹرز پر فائرنگ کی، آئی ایس پی آر کے مطابق بھارتی فورسز کی جانب سے وقفے وقفے سے فائرنگ کی گئی، پاک فوج نے مؤثر جوابی کارروائی کرکے بھارتی چیک پوسٹوں کو نشانہ بنایا، گزشتہ24گھنٹےمیں پاکستان کا کوئی جانی نقصان نہیں ہوا۔

    ترجمان پاک فوج کا کہنا ہے کہ لائن آف کنٹرول پر مسلح افواج ہر قسم کی بھارتی جارحیت سے نمٹنے کیلئے مکمل طور پر تیار ہیں۔

    علاوہ ازیں گزشتہ روز بھارتی فوج کی فائرنگ اور گولہ باری کے باعث شہید ہونے والے نائیک خرم شہید کی نمازجنازہ ڈی جی خان میں ادا کردی گئی ،آئی ایس پی آر کے مطابق نائیک خرم شہید کو پورے فوجی اعزاز کے ساتھ سپرد خاک کردیا گیا۔

  • ابھی نندن کی حوالگی کے فوری بعد بھارتی فوج کی ایل او سی پر فائرنگ، ایک شہری شہید

    ابھی نندن کی حوالگی کے فوری بعد بھارتی فوج کی ایل او سی پر فائرنگ، ایک شہری شہید

    کوٹلی : پاکستان کی جانب سے امن کے پیغام کے جواب میں بھارت نے جنگی جنون کا مظاہرہ کرتے ہوئے ایل او سی پر شدید گولہ باری کی جس کے نتیجے میں ایک شہری شہید اور5زخمی ہوگئے۔

    تفصیلات کے مطابق بھارت کی پیٹھ پر چھرا گھونپنے کی عادت نہ گئی جس وقت گرفتار بھارتی پائلٹ کو واہگہ پر بھارتی حکومت کے حوالے کیا گیا عین اسی وقت بھارتی فوج نے اپنی سطحی سوچ کا مظاہرہ کرتے ہوئے لائن آف کنٹرول کے تین مقامات پر شہری آبادی پر بلااشتعال فائرنگ اور گولہ باری کی۔

    بھارتی فوج کی جانب سے نکیال سیکٹر پر بلا اشتعال گولہ باری سے ایک پاکستانی شہری شہید جبکہ دو افراد زخمی ہوگئے، اس کے علاوہ کھوئی رٹہ سیکٹر، سماہنی سیکٹر، راولاکوٹ میں تتہ پانی اوردرہ شیخان پر گولہ باری کی، جس سے مزید تین افراد زخمی ہوئے۔ پاک فوج کی جانب سے بھرپور جوابی کارروائی جاری ہے۔

    مزید پڑھیں: مقبوضہ کشمیرمیں بھارتی فوج کی فائرنگ ‘ 2 کشمیری شہید

    واضح رہے کہ اس سے قبل قابض بھارتی فورسز نے مقبوضہ کشمیر میں ظلم و بربریت جاری رکھتے ہوئے ضلع کپواڑہ میں دو کشمیری نوجوانوں کو فائرنگ کرکے شہید کردیا۔

    اس حوالے سے کشمیری میڈیا کا کہنا ہے کہ ظالم بھارتی فوج کی جانب سے کشمیری نوجوانوں کی شہادت کے بعد علاقے میں غیراعلانیہ کرفیو نافذ کردیا گیا ہے۔

    اس کے علاوہ انٹرنیٹ اور موبائل فون سروس بھی بند کردی گئی ہے،کشمیری میڈیا کے مطابق بھارتی فورسزنے تلاشی کے بہانے خواتین، بچوں کوگھروں سے نکال دیا تھا۔

  • احتجاج کا خوف : نریندر مودی کی آمد پر مقبوضہ کشمیر فوجی چھاؤنی میں تبدیل

    احتجاج کا خوف : نریندر مودی کی آمد پر مقبوضہ کشمیر فوجی چھاؤنی میں تبدیل

    بھارتی وزیراعظم کی آمد پر مقبوضہ کشمیر فوجی چھاؤنی میں تبدیل ہوگیا، بھارتی فوج نے پوری وادی میں کرفیو نافذ کردیا، موبائل اور انٹر نیٹ سروس معطل ہے۔ حریت رہنما گھروں میں نظر بند کر دئیے گئے۔

    تفصیلات کے مطابق بھارتی وزیر اعظم نریندرا مودی کی کشمیر آمد پر سخت حفاظتی انتطامات کیے گئے تھے، اس موقع پر بھارتی فورسز نے مقبوضہ وادی کو جیل میں تبدیل کردیا۔ گلی گلی کڑے پہرے لگا دیئے گئے۔

    سری نگر اور بارہ مولا سمیت کئی علاقوں میں لوگوں کو گھروں میں محصور کیے رکھا ، لوگوں کی موٹرسائیکلیں ضبط کرلیں اور انہیں اسپتال تک بھی نہیں جانے دیا گیا، اس کے علاوہ موبائل اور انٹرنیٹ سروس بھی معطل رہی۔

    واضح رہے کہ نریندرا مودی کی آمد پر مقبوضہ کشمیر میں شٹر ڈاؤن ہڑتال کی کال دی گئی تھی، بھارتی فوج نے احتجاج کے ڈر سے حریت رہنماؤں کو گھروں میں نظربند کرکے دنیا کی آنکھوں پر پٹی باندھنے کی کوشش کی۔

    مزید پڑھیں: نریندرمودی کے دورے پرمقبوضہ کشمیرمفلوج کر دیا گیا ہے‘ مشعال ملک

    دوسری جانب پاکستانی وزیر خارجہ شاہ محمود قریشی عالمی کانفرنس میں شرکت کے لیے لندن پہنچے جہاں وہ مقبوضہ کشمیر میں ہوتے مظالم کو دنیا کے سامنے رکھیں گے۔

    مزید پڑھیں: بھارت مقبوضہ کشمیر میں ظلم کررہا ہے، عالمی دنیا خاموش ہے، شاہ محمود قریشی

    شاہ محمود قریشی کا کہنا تھا کشمیر ہماری خارجہ پالیسی کا اہم ستون ہے، کشمیریوں پر بھارتی مظالم کے خلاف بھرپور آواز اٹھائیں گے۔

  • عالمی برادری مقبوضہ کشمیر میں بھارتی فوج کے مظالم کا نوٹس لے، سینیٹر سراج الحق

    عالمی برادری مقبوضہ کشمیر میں بھارتی فوج کے مظالم کا نوٹس لے، سینیٹر سراج الحق

    اسلام آباد : امیر جماعت اسلامی سینیٹر سراج الحق نے کہا ہے کہ عالمی برادری مقبوضہ کشمیر میں بھارت کی انسانی حقوق کی بدترین خلاف ورزیوں کا فوری نوٹس لے، کشمیریوں کا ان کا جائز حق دیا جائے۔

    ان خیالات کا اظہار انہوں نے اسلام آباد میں یورپی یونین کے سفیروں سے ملاقات کے موقع پر گفتگو کرتے ہوئے کیا،اسلام آباد میں امیر جماعت اسلامی سے ڈنمارک، یورپی یونین کے سفیر، برطانیہ و جرمنی کے سینئر سفارت کاروں نے ملاقات کی۔

    اس موقع پر رکن آزاد کشمیر اسمبلی عبدالرشید ترابی، میاں اسلم، عبد الغفار عزیز بھی موجود تھے۔ سینیٹر سراج الحق کا کہنا تھا کہ بھارتی فوج مقبوضہ کشمیر میں بدترین ریاستی دہشت گردی کا مظاہرہ کررہی ہے۔

    عالمی برادری مقبوضہ کشمیر میں بھارت کی انسانی حقوق کی بدترین خلاف ورزیوں کا فوری نوٹس لے، انہوں نے اپیل کی کہ عالمی برادری مقبوضہ کشمیر میں کشمیریوں پر ظلم وستم بند کرانے میں اپنا مؤثر کردار ادا کرے۔

    مزید پڑھیں: بھارت کے یوم جمہوریہ پر کشمیریوں کا یوم سیاہ، 2 کشمیری نوجوان شہید

    کشمیریوں کو یواین قراردادوں کے مطابق استصواب رائے کا حق دلوایا جائے، انہوں نے بتایا کہ5فروری کو پوری پاکستانی قوم اور امت مسلمہ کشمیری بھائیوں سے اظہاریکجہتی کرے گی۔

  • بھارتی فوج نے ذہنی معذورپاکستانی نوجوان کو دہشت گرد سمجھ کر گرفتار کرلیا

    بھارتی فوج نے ذہنی معذورپاکستانی نوجوان کو دہشت گرد سمجھ کر گرفتار کرلیا

    ظفروال : پاک بھارت سرحد پر ذہنی معذور نوجوان بھارتی فوج ہتھے چڑھ گیا، نوجوان کو دہشت گرد سمجھ کر گولی مار کر زخمی کیااور گرفتار کرکے لے گئے، اہل خانہ نے حکومت سے اپیل کی ہے کہ رہائی کیلیے سفارتی سطح پر کوشش کی جائے۔

    تفصیلات کے مطابق طوطوں اور کبوتروں سے ڈرنے والی بھارتی فوج نے اپنی ذہنی پسماندگی کا مظاہرہ کرتے ہوئے پاکستان کے ذہنی طور پر معذور لڑکے کو گولی ماردی، زخمی حالت میں اٹھاکر لے گئے اور دہشت گرد قرار دے دیا۔

    ظفروال سیکٹر کا رہائشی  محمد فاروقغلطی سے چمانہ خورد کے قریب ورکنگ باؤنڈری عبور کرگیا تھا،گاؤں والے کہتے ہیں کہ فاروق ذہنی معذور ہے اسے تو اپنی بھی کوئی خبر نہیں رہتی۔

    بھارتی فوج نے پہلے فائرنگ کرکے نوجوان کو زخمی کیا اور پھر اپنے ساتھ لے گئے، اس حوالے سے بھارتی میڈیا میں ذہنی معذور نوجوان محمد فاروق کو زخمی حالت میں گرفتار دہشت گرد قرار دیا گیا۔

    دوسری جانب محمد فاروق کے اہلخانہ نے حکومت پاکستان سے اس کی رہائی کیلئے سفارتی سطح پر کوششیں شروع کرنے کی اپیل کی ہے، محمد فاروق کی والدہ کارو رو کر براحال ہے۔

    اس کا کہنا ہے کہ مجھے بیٹے سے ملادو، بھارتی فوج فاروق کو زخمی حالت میں اسپتال لے گئے جہاں اس کی حالت کے بارے میں کچھ نہیں بتایا جارہا۔

    واضح رہے کہ بھارتی میڈیا بجھی اسی پروپگینڈے میں مصروف ہے اور ایک ذہنی معذور کو دہشت گرد قرار دے کر میڈیا پر دکھایا جارہا ہے۔

  • ایل او سی پر سیز فائر کی خلاف ورزی: بھارتی فوج کی فائرنگ سے ایک شہری زخمی

    ایل او سی پر سیز فائر کی خلاف ورزی: بھارتی فوج کی فائرنگ سے ایک شہری زخمی

    سیالکوٹ : بھارتی فوج نے ایک بار پھر سیز فائر کی خلاف ورزی ورزی کرتے ہوئے ایل او سی پر اندھا دھند فائرنگ کردی جس کے نتیجے میں محمد مشتاق نامی شخص زخمی ہوگیا۔

    تفصیلات کے مطابق  وادی کشمیر سے قریب ورکنگ باؤنڈری لائن پر بھارتی فوج نے سیزفائر کی ایک بار پھر خلاف ورزی کی ہے، پاک فوج کے شعبہ تعلقات عامہ آئی ایس پی آر کے مطابق بھارتی فوج نے کھوئی رٹہ سیکٹر پر شہری آبادی کو نشانہ بنایا۔

    بھارتی سیکیورٹی فورسز کی بلا اشتعال فائرنگ اور گولہ باری سے محمد مشتاق نامی شخص زخمی ہوگیا جس کو ابتدائی طبی امداد کیلئے سی ایم ایچ کینٹ ہسپتال منتقل کیا گیا ہے۔

    بھارتی سیکورٹی فورسز کی بلااشتعال فائرنگ و مارٹر گولے گرنے سے عمارتوں کو لگے اور دیہی علاقوں کے مکینوں میں خوف و ہراس پھیل گیا، دوسری جانب بھارتی فائرنگ و گولہ باری کا چناب رینجرز نے منہ توڑ جواب دیا اور دشمن کی توپوں کا منہ بند کردیا۔

    اس سے قبل نو جنوری کو بھارتی فوج نے ایل او سی میں شاہ کوٹ سیکٹر پر سیز فائر کی خلاف ورزی کرتے ہوئے شہری آبادی پر بلا اشتعال فائرنگ کی تھی جس کی زد میں آکر ایک خاتون شہید ہوگئیں۔

    یاد رہے کہ بھارت مقبوضہ کشمیر میں ریاستی جبر کے ساتھ ساتھ ایل او سی پر اکثر سیز فائر کی خلاف ورزیاں کرتا رہا ہے لیکن پاک فوج کے فوری اور مؤثر جواب کے بعد دشمن کو منہ کی کھانا پڑتی ہیں ۔

  • بھارتی فوج کی ایک مرتبہ پھر بلااشتعال فائرنگ، پاک فوج کا جوان ظہیر احمد شہید

    بھارتی فوج کی ایک مرتبہ پھر بلااشتعال فائرنگ، پاک فوج کا جوان ظہیر احمد شہید

    راولپنڈی : بھارتی فوج کی جانب سے ایک مرتبہ پھر کنٹرول آف لائن پر بلااشتعال فائرنگ کے نتیجے میں پاک فوج کا سپاہی ظہیر احمد شہید ہوگیا۔

    پاک فوج کے شعبۂ تعلقات عامہ (آئی ایس پی آر) کے مطابق کہ بھارتی فوج نے ایک بار پھر ایل اوسی کی خلاف ورزی کرتے ہوئےتھب سیکٹر پربلااشتعال فائرنگ کی، بلااشتعال فائرنگ سے پاک فوج کا سپاہی ظہیراحمد شہید ہوگیا، شہید سپاہی ظہیر احمد کا تعلق سلطان پور بھمبر سے ہے۔

    آئی ایس پی آر کے مطابق پاک فوج نے مؤثر اور جوابی کارروائی کی، جس میں دشمن کی چوکیوں کو نشانہ بنایا گیا، جوابی کارروائی کے بعد بھارتی فوج کی توپیں خاموش ہوگئیں۔

    یاد رہے 2 نومبر کو بھی بھارتی فوج کی جانب سے لائن آف کنٹرول پر اشتعال انگیزی کی گئی تھی، فائرنگ سے 2 بچوں کی ماں منزہ بی بی شہید ہوگئیں تھیں، جس کے بعد پاکستان نے بھارتی ڈپٹی ہائی کمشنر جے پی سنگھ کو دفترِ خارجہ طلب کیا اور واقعے پر شدید احتجاج ریکارڈ کرایا تھا۔

    خیال رہے ترجمان دفترِ خارجہ نے اپنے بیان میں کہا تھا کہ بھارتی فوج مسلسل شہری آبادی کو نشانہ بنا رہی ہے، بھارت رواں سال 2312 بار سیز فائر کی خلاف ورزی کر چکا ہے۔

    مزید پڑھیں :  بھارت 2018 میں 2312 بار سیز فائر کی خلاف ورزی کر چکا ہے، دفتر خارجہ 

    واضح رہے 14 اکتوبر کو بھی بھارتی فوج نے کنٹرول لائن پر بلا اشتعال فائرنگ کی تھی جس کے نتیجے میں 8 سالہ بچہ شدید زخمی ہوگیا تھا۔

    اس سے قبل 11 اکتوبر کو بھارتی فوج نے سیالکوٹ سیکٹر پر بلا اشتعال فائرنگ کی تھی، جس میں بھارتی فورسز نے سکھیال گاؤں کو نشانہ بنایا تھا، بلا اشتعال فائرنگ سے محمد حنیف نامی شہری شدید زخمی ہوا تھا۔

    بھارتی فوج نے لائن آف کنٹرول کے قریب  وزیرِ اعظم آزاد کشمیر راجہ فاروق حیدر  کے ہیلی کاپٹر پر بھی بلا اشتعال فائرنگ کی تھی لیکن خوش قسمتی سے کوئی جانی و مالی نقصان نہیں ہوا۔

  • عالمی طاقتیں بھارت پر دباؤ ڈالیں تاکہ کشمیر میں قتل عام ختم ہو: صدر آزادکشمیر

    عالمی طاقتیں بھارت پر دباؤ ڈالیں تاکہ کشمیر میں قتل عام ختم ہو: صدر آزادکشمیر

    لندن: صدر آزاد کشمیر مسعود خان کا کہنا ہے کہ بھارت کبھی بھی کشمیریوں کے دل نہیں جیت سکتا، عالمی طاقتیں بھارت پر دباؤ ڈالیں تاکہ کشمیر میں قتل عام ختم ہو۔

    ان خیالات کا اظہار انہوں نے پاکستان ہائی کمیشن لندن میں اوورسیز کمیونٹی سے خطاب کرتے ہوئے کیا، مسعود خان کا کہنا تھا کہ بھارتی فوج کی مقبوضہ کشمیر میں جارحیت جاری ہے۔

    انہوں نے کہا کہ بھارتی آرمی چیف اعتراف کرچکے کہ کشمیر پر جبری قبضہ برقرار رکھیں گے، تارکین وطن ہمارے لیے اثاثہ ہیں، کشمیر کے لیے کردار ادا کریں۔

    کشمیریوں پر مظالم کا مقصد تحریک آزادی کو دبانا ہے، صدر آزاد کشمیر

    ان کا مزید کہنا تھا کہ ہر جگہ کشمیر کے لیے آواز بلند کرنے پر اوورسیز کشمیریوں اور پاکستانیوں کا شکریہ ادا کرتا ہوں۔

    خیال رہے کہ گذشتہ ماہ صدر آزاد کشمیر مسعود خان نے کہا تھا کہ بھارت کشمیریوں کو آزادی مانگنے پر مظالم کا نشانہ بنا رہا ہے، کشمیریوں پر مظالم کا مقصد تحریک آزادی کو دبانا ہے۔

    انہوں نے یہ بھی کہا تھا کہ کشمیریوں پر مظالم کا مقصد تحریک آزادی کو دبانا ہے، بھارتی فوج مقبوضہ کشمیر میں جنگی جرائم میں ملوث ہے، بھارتی فوج پیلٹ گنز کا اندھا دھند استعمال کررہی ہے، پیلٹ گنز سے ہزاروں کشمیریوں کی بینائی متاثر ہوئی ہے۔

  • کشمیر میں بھارتی قبضے کے71سال مکمل،آج کشمیری یوم سیاہ منائیں گے

    کشمیر میں بھارتی قبضے کے71سال مکمل،آج کشمیری یوم سیاہ منائیں گے

    سری نگر: مقبوضہ کشمیر میں بھارتی غاصبانہ قبضے کے71سال مکمل ہونے پر دنیا بھر میں کشمیری عوام آج یوم سیاہ منائیں گے، وادی میں مظاہرے اور احتجاجی ریلیاں نکالی جائیں گی۔

    تفصیلات کے مطابق مقبوضہ کشمیر میں قابض بھارتی فوج کے 71سال مکمل ہونے پر آج کشمیری عوام دنیا بھر میں یوم سیاہ منائیں گے اس موقع پر وادی میں بھرپور احتجاج مظاہرے کیے جائیں گے۔

    یوم سیاہ کا مقصد عالمی برادری پر واضح کرنا ہے کہ بھارت نے ان کی خواہشات کے بر خلاف جموں و کشمیر پر قبضہ کر رکھا ہے اور وہ انہیں ان کا پیدائشی حق خود ارادیت دینے سے مسلسل انکار کررہا ہے۔

    آج مقبوضہ کشمیر میں مکمل ہڑتال کی جائے گی اور مختلف ممالک کے دارالحکومتوں میں احتجاجی ریلیاں بھی نکالی جائیں گی۔ ہڑتال کی کال سید علی گیلانی، میر واعظ عمرفاروق اور محمد یاسین ملک پر مشتمل مشترکہ حریت قیادت نے دی ہے جبکہ دیگر آزادی پسند تنظیموں نے اس کی حمایت کا اعلان کیا ہے۔

    دوسری جانب آزادی کے متوالوں کو روکنے کیلئے بھارتی فوج نے وادی میں کرفیو نافذ کردیا ہے، بے گناہ کشمیریوں کی گرفتاریوں کا سلسلہ بھی جاری ہے، موبائل اورانٹرنیٹ سروس بھی بند کردی گئیں، وادی میں اب تک تین دن میں شہداء کی تعداد دس ہوگئی ہے۔

    ستائیس اکتوبر1947 کو بھارت نے ریاست جموں و کشمیر میں فوجیں اتار کر ریاست کے ایک حصے پر ناجائز قبضہ کیا، جس کے خلاف لائن آف کنٹرول کے دونوں اطراف اور پوری دنیا میں بسنے والے کشمیری آج یوم سیاہ منائیں گے، اس دن بھارت نے اپنی افواج کشمیر میں داخل کی اور کشمیریوں کا حق آزادی چھین لیا تھا۔