Tag: Indian Diplomat

اسلام آباد : پاکستان نے سینئر بھارتی سفارتکار کو دفتر خارجہ طلب کرکے ایل اوسی پرجنگ بندی معاہدے کی خلاف ورزیوں پر شدید احتجاج کیا اور کہا بھارتی فورسز مقامی شہری آبادی کو جان بوجھ کر نشانہ بنارہی ہے۔

تفصیلات کے مطابق بھارتی فوج کی جانب سے سیز فائر کی خلاف ورزی پر سینئر بھارتی سفارتکار کو دفتر خارجہ طلب کیا گیا اور ایل اوسی پرجنگ بندی معاہدے کی خلاف ورزیوں پر شدید احتجاج کیا۔

اس موقع پر سینئربھارتی سفارتکارکو احتجاجی مراسلہ بھی حوالے کیا گیا، جس میں کہا کہ ایل اوسی کےرکھ چکری، کھینجر سیکٹرز پر 12 نومبر کو بھارتی فورسز نے فائرنگ کی اور مقامی شہری آبادی کو جان بوجھ کر نشانہ بنایا گیا، فائرنگ کے نتیجے میں ایک شہری شہید اور 3 شدید زخمی ہوئے۔

ترجمان دفترخارجہ کاکہنا تھا کہ بھارتی فورسزنے رواں برس2729 بار جنگ بندی معاہدے کی خلاف ورزی کی ، خلاف ورزیوں کے نتیجے میں 21 افراد شہید اور 206 زخمی ہوئے۔

یاد رہے بھارتی فوج نے خنجر اور رکھ چکری سیکٹرز میں شہری آبادی کو نشانہ بنایا ، اس دوران گاؤں تری بنڈ اور سماہنی میں راکٹ اور مارٹر گولے فائر کیے گئے، بھارتی فوج کی فائرنگ سے ایک شہری شہید، اور 2 خواتین سمیت 3ا فراد زخمی ہوئے۔

آئی ایس پی آر کے مطابق پاک فوج کی جانب سے بھرپور جوابی کارروائی کی گئی، فوج نے فائرنگ کرنے والی بھارتی چیک پوسٹوں کو نشانہ بنایا۔