اسلام آباد: وفاقی وزیر دفاع پرویز خٹک نے کہا ہے کہ پلوامہ واقعے کا الزام پاکستان پر لگانا صدی کا سب سے بڑا جھوٹ ہے، ہم کمزور نہیں اس لیے دراندازی کا جواب دیا۔
تفصیلات کے مطابق اسپیکر اسد قیصر کی زیر صدارت قومی اسمبلی میں مشترکہ اجلاس ہوا جس میں اراکین نے پاک بھارت کشیدگی، بھارتی پائلٹ کی واپسی اور او آئی سی میں شرکت نہ کرنے پر اپنے خیالات کا اظہار کیا۔
اس موقع پر وفاقی وزیر دفاع پرویز خٹک کا کہنا تھا پلوامہ حملے میں پاکستان کا کوئی ہاتھ نہیں، اس کا الزام ہم پر عائد کرنا صدی کا سب سے بڑا جھوٹ ہے۔
مزید پڑھیں: پارلیمنٹ میں بھارتی جارحیت کے خلاف متفقہ قرارداد منظور
اُن کا کہنا تھا کہ بھارت نے رات کے اندھیرےمیں حملہ کیا اور ہم نے دن کی روشنی میں جواب دےکربتادیاکہ ہم کمزورنہیں ہیں۔ پرویز خٹک کا کہنا تھا کہ جب تک کشمیرکامسئلہ حل نہیں ہوگا تب تک پاکستان اور بھارت کے درمیان امن قائم نہیں ہوسکتا۔
دوسری جانب وفاقی وزیر اطلاعات فواد چوہدری کا کہنا تھا کہ بھارتی آج تقسیم اور پاکستان متحد ہے، بھارتی عوام ایک آدمی کی الیکشن مہم کا حصہ نہ بنیں اور اُس کو ناکام کردیں۔
فواد چوہدری کا کہنا تھا کہ پاکستان دونوں ممالک کے عوام کی خاطر امن کا خواہش مند ہے کیونکہ جنگ کی صورت میں دو طرفہ نقصان ہوگا جس کی وجہ سے پاکستان سب سے زیادہ متاثر ہوگا۔
یہ بھی پڑھیں: پاکستان کشیدگی میں کمی کےلیےکوئی بھی قدم اٹھانے کوتیارہے،شاہ محمودقریشی
یادرہے کہ بھارتی جارحیت کے خلاف پارلیمنٹ میں مشترکہ اجلاس کا انعقاد کیا گیا، گزشتہ روز وزیراعظم عمران خان نے خطے میں امن کی خاطر بھارتی پائلٹ ابھینندن کو رہا کرنے کا حکم دیا تھا۔
