Tag: indian-rupee

  • بھارتی روپیہ ریکارڈ کم ترین سطح پر آگیا، ڈالر مستحکم

    بھارتی روپیہ ریکارڈ کم ترین سطح پر آگیا، ڈالر مستحکم

    نئی دہلی : بھارتی روپیہ مسلسل گراوٹ کا شکار ہوکر ریکارڈ کم ترین سطح پر پہنچ گیا، مرکزی بینک کی ہر ممکن کوششوں کے باوجود امریکی ڈالر نے بھارتی روپے کو مزید جھٹکا دے دیا۔

    غیرملکی خبر رساں ادارے کی رپورٹ کے مطابق امریکی ڈالر کے مقابلے میں بھارتی روپیہ جمعے کے روز اب تک کی کم ترین سطح پر پہنچ گیا، تیزی سے ہونے والی گراوٹ نے درآمد کنندگان کو ڈالر خریدنے پر مجبور کر دیا۔

    امریکی کرنسی کے مضبوط رجحان اور غیر ملکی سرمائے کے مسلسل انخلاء کے درمیان جمعہ کے روز ابتدائی تجارت میں روپیہ 8 پیسے گر کر 85.75 کی تاریخ کی کم ترین سطح پر پہنچ گیا۔

    مقامی تاجروں کے مطابق مرکزی بینک کی مداخلت سے نقصانات کو کسی حد تک محدود کیا جاسکا، گزشتہ ایک ہفتے کے دوران روپیہ تقریباً 0.3 فیصد نیچے آیا اور یہ مسلسل آٹھویں ہفتہ وار کمی تھی۔

    تجزیہ کاروں کے مطابق ماہ کے آخر اور سال کے آخر میں ادائیگی کی ذمہ داریوں کے لیے درآمد کنندگان کی جانب سے ڈالر کی بڑھتی مانگ میں اضافے سے ڈالر مضبوط ہوا، جس سے مقامی کرنسی پر دباؤ پڑا۔

    یاد رہے کہ اس سے قبل گذشتہ روز جمعرات کو بھارتی روپیہ 12 پیسے گر کر 85.27 فی ڈالر پر بند ہوا تھا۔

    رپورٹ کے مطابق بھارت کی سست ہوتی ہوئی اقتصادی ترقی اور تجارتی خسارے میں اضافے کے خدشات نے روپے کو متاثر کیا ہے جبکہ امریکی فیڈرل ریزرو کی سخت مانیٹری پالیسی اور نئے امریکی صدر ڈونلڈ ٹرمپ کی پالیسیوں کے حوالے سے توقعات نے بھی ڈالر کو مضبوط کیا۔

  • بھارتی روپیہ ایشیائی ممالک میں سب سے زیادہ بے قدرہونے والی کرنسی

    بھارتی روپیہ ایشیائی ممالک میں سب سے زیادہ بے قدرہونے والی کرنسی

    نئی دہلی : بھارتی روپے کی بے قدری جاری ہے ، جس کے باعث بھارتی کرنسی ایشیائی ممالک میں سب سے زیادہ بے قدرہونے والی کرنسی بن گئی ہے۔

    تفصیلات کے مطابق بین الاقوامی مالیاتی ادارے کا کہنا ہے ایشیا کی بیشتر کرنسیاں امریکی ڈالر کے مقابلے میں دباؤ کا شکار ہیں مگر بھارتی کرنسی کی صورت حال کافی خراب ہے۔

    بھارتی روپے کی قدر ڈالر میں تاریخ کی کم ترین سطح پرہے، ڈالر کے مقابلے میں بھارتی روپے کی قدر جنوری سے اب تک تیرہ فیصد سے زیادہ گر چکی ہے اور ایک ڈالر باہتر بھارتی روپے میں دستیاب ہے۔

    روپیہ بے قدر ہونے کے بعد پیٹرولیم مصنوعات کی قیمتوں میں اضافہ ہوا ہے، بھارت میں پیٹرول نوے روپے جبکہ ڈیزل اسی روپے سے زیادہ کا ہوگیا، پیٹرول مہنگا ہونےسےعوام اور جبکہ ڈیزل مہنگا ہونے سے کاشت کار شدید مشکلات کا شکار ہیں۔

    معاشی ماہرین کے مطابق روپے کی قدر میں کمی اور مہنگا ایندھن مودی کے لئے مشکلات کا باعث بنےگا، بھارتی روپے کی قدرمیں مستقبل قریب میں بہتری کی امید نہیں ہے۔

    روپےکی قدر کو سنبھالا دینے کیلئے درآمدات پر پابندی زیر غور ہے، جس میں الیکٹرونکس اور دفاع کے شعبے سر فہرست ہیں۔

    تاجروں کا کہنا ہے کہ امریکہ اور چین ٹیرف کے سلسلے میں جاری جنگ سے بھارتی کرنسی پر دباؤ بنا ہوا ہے۔

    خیال رہے ڈالر کی مضبوط ہوتی ہوئی حیثیت بھی ایشیا بھر کی کرنسیوں پر اثر انداز ہو رہی ہے۔