سونا ایک ٹھوس اثاثہ ہے کئی ملک اسے اپنے ذخائر میں شامل کرکے اپنے ملک کو مالی طور پر مستحکم بناتے ہیں کیونکہ سونے کو مختلف طریقوں سے استعمال کیا جاسکتا ہے، سونا کسی بھی ملک کے دیگر اثاثوں کی قدر میں اتار چڑھاؤ سے وابستہ خطرات کو کم کرنے میں مدد کرتا ہے۔
تاہم آج ہم ایسی ملک کی خواتین کی بات کررہے ہیں جن کے پاس دنیا میں سب سے زیادہ سونا موجود ہے جو کہ 5 ممالک کے مشترکہ سونے سے بھی زیادہ ہے۔
ورلڈ گولڈ کونسل(ڈبلیو جی سی) کی رپورٹ کے مطابق ہندوستانی خواتین مجموعی طور پر حیران کن 24 ملین کلو گرام سونے کی مالک ہیں، جس نے امریکا اور چین جیسی بڑی معیشتوں سمیت کئی ممالک کے سونے کے ذخائر کو پیچھے چھوڑ دیا ہے۔
ڈبلیو جی سی کی رپورٹ کے مطابق ہندوستانی خواتین کی ملکیت میں موجود سونا دنیا کے سونے کے کل ذخائر کا تقریباً 11 فیصد ہے جو کہ 24,000 میٹرک ٹن بنتا ہے۔
ایک رپورٹ کے مطابق ہندوستان سونے کی ملکیت سے متعلق ایک مرکز کے طور پر ابھرا ہے جس کی خواتین کے پاس ہندوستان کے سونے کے کُل ذخائر کا 40 فیصد حصہ موجود ہے۔
رپورٹس کے مطابق امریکا کے پاس 8,133 ٹن، جرمنی کے پاس 3,362 ٹن، اٹلی کے پاس2,451 ٹن، فرانس کے پاس 2,436 ٹن اور روس کے پاس 2,298 ٹن سونا ہے۔
ان سب ممالک کا سونا ملا کر بھی اگر دیکھا جائے تو بھارتی خواتین ان ممالک کے مشترکہ سونے سے بھی کئی گنا زیادہ سونے کی ملکیت رکھتی ہیں۔
واضح رہے کہ ہندوستان میں سونا بہت زیادہ ثقافتی اور روایتی قدر رکھتا ہے، کسی بھی تہوار یا شادی میں سونا خریدنا اچھا سمجھا جاتا ہے، ہندوستانی خواتین نہ صرف سونے کے زیورات پہننے کو پسند کرتی ہیں بلکہ اس میں سرمایہ کاری بھی کرتی ہیں۔
