Tag: inqelab march

اسلام آباد: جاری سیاسی دھرنوں کے باعث ایکسپو پاکستان ملتوی

اسلام آباد: وفاقی دارلحکومت میں جاری سیاسی دھرنوں کے باعث ملک میں ہونے والی سب سے بڑی نمائش ایکسپو پاکستان ملتوی کردی گئی ہے۔

زرائع کے مطابق اسلام آباد میں دھرنوں اور سیاسی عدم استحکام کے باعث غیر ملکی خریدار اور کمپنیاں پاکستان آنے سے کترا رہی ہیں، ملکی تاریخ کی سب سے بڑی نمائش ایکسپو پاکستان 23-26 اکتوبر میں منعقد کی جانی تھی۔

زرائع کے مطابق حکومت رواں سال ایکسپو پاکستان کا انعقاد نہیں کرسکے گی کیونکہ دنیا کے تمام ہی ممالک سے شرکت کو کنفرم نہیں کررہے ہیں، جس کے باعث پاکستان رواں سال اربوں کے سرمایہ کاری معاہدوں سے محروم ہوگا اور ساتھ ہی ملکی معیشت کو اربوں روپوں کا دھچکا لگے گا۔

گزشتہ سال ایکسپو پاکستان میں پاکستانی کمپنیوں سمیت جاپان، ملائیشیا، جنوبی کوریا، چین، جنوبی افریقہ، برازیل، پولینڈ، ہانگ کانگ، بنگلہ دیش، لیبیا، ، سعودی عرب، ہالینڈ، امریکا، مراکش، متحدہ عرب امارات بحرین، آذربائیجان، افغانستان، مصر اور دیگر ممالک کی کمپنیوں نے بھرپور شرکت کی تھی۔

ایکسپو پاکستان کی منتظم ٹریڈ ڈویلپمنٹ اتھارٹی آف پاکستان ائندہ چند روز میں اگلے سال نمائش کے انعقاد کی تاریخ کا باضابطہ اعلان کرے گی۔

ستمبر 19, 2014
سانحۂماڈل ٹاؤن کی رپورٹ نامکمل ہے، رانامشہود

لاہور: صوبائی وزیرِ قانون رانا مشہود احمد خان نے کہا ہے کہ سانحہ ماڈل ٹاؤن کی رپورٹ مکمل ہوتے ہی پبلک کردی جائےگی، جوائنٹ انویسٹی گیشن ٹیم کی رپورٹ میں بہت سے ابہام پائے جاتے ہیں، رانا ثناء اللہ سمیت کسی بھی شخصیت کوموردِ الزام نہیں ٹھرایا گیا۔

لاہور میں صحافیوں سے گفتگو کرتے ہوئے صوبائی وزیرِقانون نے کہا کہ سانحہ ماڈل ٹاؤن پر بننے والی رپورٹ میں کئی پہلوؤں کا احاطہ نہیں کیا گیا، رپورٹ میں رانا ثناء اللہ سمیت کسی پر ذمہ داری عائد نہیں کی گئی ہے، جلد نئی مشترکہ تحقیقاتی ٹیم قائم کردی جائےگی اوراسکی رپورٹ کو بھی شائع کیا جائے گا۔

رانا مشہود نے کہا ہے کہ شہباز شریف میرٹ پریقین رکھتے ہیں، حکومت میرٹ کی بالادستی کے لئے تمام اقدامات کرے گی۔

صوبائی وزیرنے دھرنوں پرتنقید کرتے ہوئے کہا ہے کہ دھرنوں کے باعث چینی صدر سمیت متعدد بین الاقوامی شخصیات کا دورہء پاکستان منسوخ ہوچکا ہے اورقوم جان چکی ہے کہ پاکستان کے مفاد کو کون نقصان پہنچا رہا ہے۔

صوبائی وزیرِ قانون کا کہنا تھا کہ قوم دھرنوں سے ملک کوناقابل تلافی نقصان پہنچانے والوں کا خود محاسبہ کرے گی۔

ستمبر 17, 2014
اسلام آبادمیں دھرنے، وزیرِاعظم پارلیمانی رہنماؤں سے مشاورت کریںگے

اسلام آباد: دھرنوں کی صورتحال اورحکمتِ عملی طے کرنے کیلئے وزیرِاعظم نے پارلیمانی رہنماؤں کو آج طلب کرلیا ہے، دوسری جانب تحریکِ انصاف کے سربراہ عمران خان نے کور کمیٹی کا اجلاس بنی گالہ میں بلالیا ہے۔

آزادی اور انقلاب مارچ سے نمٹنے اورصورتحال کا جائزہ لینے کے لئے وزیرِاعظم نوازشریف کی زیرِصدارت اجلاس شام ساڑھے بجے ہوگا۔ وزیرِاعظم نے پارٹی کے پارلیمانی رہنماؤں کو چیمبر میں طلب کیا ہے۔

دوسری جانب تحریکِ انصاف کے چیئرمین عمران خان نے بھی کور کمیٹی کا اجلاس بنی گالہ میں طلب کرلیا ہے، جس میں جمعے کو منائے جانے والے’گو نواز گو ڈے‘ کی حکمتِ عملی کو حتمی شکل دی جائے گی۔

ستمبر 17, 2014
پنجاب پولیس کی پی اے ٹی کارکنوں کو گرفتارکرنے کی کوشش ناکام

اسلام آباد: پنجاب پولیس کی جانب سےعوامی تحریک کے کارکنوں کو گرفتارکرنے کی کوشش تحریکِ انصاف کے کارکنوں نے ناکام بنا دی ۔ تحریکِ انصاف کے چیئرمین عمران خان معاملے پر آج پریس بریفنگ دیں گے۔

اسلام آباد میں دھرنے کے شرکاء کو گرفتار کرنے سے پولیس باز نہیں آئی، پنجاب پولیس نےدھرنے سے واپس گھروں کو جانے والے پاکستان عوامی تحریک کے کارکنوں کو پی ایم سیکریٹیریٹ کے قریب گرفتار کرنے کی کوشش کی، اطلاع ملنے پر دھرنے میں موجود تحریکِ انصاف کے کارکن عوامی تحریک کے کارکنوں کی مدد کو پہنچے۔

اس موقع پر سیاسی کارکن اور پولیس آمنے سامنے ہوئی تو پتھراؤ اور لاٹھی چارج شروع ہوگیا، پی ایم سیکریٹریٹ سے سپریم کورٹ تک علاقہ میدان جنگ بن گیا۔

اسی دوران اسلام آباد پولیس نے مارگلہ چوک کے قریب سے تحریکِ انصاف کے متعدد کارکنوں کو حراست میں لے لیا گیا، تصادم کی اطلاع ملنے پر تحریکِ انصاف کی قیادت نے اپنے کارکنوں کو واپس دھرنے کے مقام پر بلالیا۔

تحریکِ انصاف کے رہنما علی امین کا کہنا ہے کہ پولیس روز انکے کارکنوں کو گرفتار کر لیتی ہے، ان کا کہنا تھا کہ سیاسی کارکنوں کو غیرقانونی طور پر گرفتارنہیں کرنے دیں گے۔

ستمبر 16, 2014
طالبان کےحملوں کی صلاحیت ختم کردی، آئی ایس پی آر

راولپنڈی: ڈی جی آئی ایس پی آرکاکہناہے کہ شدت پسندوں کی پاکستان میں منظم حملے کرنے کی صلاحیت ختم کردی ہے۔

طالبان کی پاکستان میں منظم حملوں کی صلاحیت ختم کردی،طالبان کی دوسرے درجے کی قیادت ماری گئی یاگرفتارہوگئی۔ یہ کہناتھا ڈی جی آئی ایس پی آر میجرجنرل عاصم باجوہ کا، برطانوی خبررساں ایجنسی سے انٹرویو کے دوران پاک فوج کے ترجمان نے اس تاثر کوبھی غلط قراردیاکہ شدت پسند دوبارہ سر اٹھا رہے ہیں، طالبان بکھر جانے کے بعد ادھر ادھر حملے کر رہے ہیں۔

میجرجنرل عاصم باجوہ نے بتایا کہ ملا فضل اللہ اپنے ساتھیوں سمیت آپریشن ضربِ عضب شروع ہونے سے پہلے ہی فرار ہوچکا ہے اور وہ کنڑ میں موجود ہے، ہم نے افغان حکومت سے اس کی حوالگی کی بارہا درخواست کی ہے۔

ڈی جی آئی ایس ایس پی آرکاکہناتھا کہ فوج سیاسی بحران میں کسی فریق کی حمایت نہیں کر رہی نہ فوج سیاست میں ملوث ہے،شروع سےیہی مؤقف ہےکہ یہ سیاسی مسئلہ ہےسیاسی طورپر ہی حل ہوناچاہئے،انہوں نے یہ بھی کہا کہ فوج کسی فریق کا ساتھ دینے کی متحمل نہیں ہو سکتی کیونکہ یہ پوری قوم کی فوج ہے، پہلے کسی فریق کی حمایت کی نہ آئندہ کریں گے۔

ستمبر 15, 2014
عوامی تحریک کے مرکزی رہنماء عمر ریاض عباسی گرفتار

اسلام آباد : پاکستان عوامی تحریک کے مرکزی رہنماء عمر ریاض عباسی کو گرفتار کرلیا گیا۔.

تفصیلات کے مطابق پاکستان عوامی تحریک کے ڈپٹی سیکریٹری اطلاعات عمر ریاض عباسی کو پولیس نے ایف 8 کچہری جاتے ہوئے راستے سے گرفتار کرلیا۔

پی اے ٹی کے رہنماء رحیق عباسی نے اے آر وائی سے گفتگو کرتے ہوئے کہا کہ رہنماؤں اور کارکنان کی گرفتاریاں قابل مذمت ہیں،۔

حکومتی اقدامات سے صاف پتہ چل رہا ہے کہ حکمران مذاکرات میں سنجیدہ نہیں،انہوں نے کہا کہ اب تک ہمارے پچیس ہزار سے زائد کارکنان کو گرفتار کیا جا چکا ہے۔،

ستمبر 15, 2014
فوج ملک کی سرحدوں کی حفاظت کی ذمہ دارہے، خورشید شاہ

اسلام آباد: سید خورشید شاہ کا کہنا ہے کہ وہ آرمی چیف کے شکرگزار ہیں کہ انہوں امپائر کی انگلی اٹھنے کے بیان کا نوٹس لیا۔

پاکستان پیپلزپارٹی کے رہنما سید خورشید شاہ نےکہا کہ افواج پاکستان کوبدنام کرنے کی کوشش کی گئی، آرمی چیف کا شکرگزار ہوں،امپائر کی انگلی اٹھنے کے بیان کا نوٹس لیا فوج ملک کی سرحدوں کی حفاظت کی ذمہ دارہے۔

انہوں کا کہنا تھا کہ ہم بات چیت میں ایسی کوئی بات نہیں مانیں گے جو خلاف آئین ہو، اسلام آباد میں لوگ پریشان ہیں،امن قائم کرناحکومت کا کام ہے۔

خورشید شاہ نے کہا کہ لوگوں کے گھروں میں ماتم ہے اور دھرنے والے خوشیاں منارہے ہیں، دھرنے والوں سے بات چیت کرنا حکومت کا کام ہے، سیلاب پر سیاست نہیں کرنا چاہتے، قومی اداروں کو سیاست میں نہیں گھسیٹنا چاہئے۔

ستمبر 14, 2014
نواز شریف میں ہمت ہے تو مجھے گرفتار کریں، طاہرالقادری

اسلام آباد: پاکستان عوامی تحریک کے سربراہ ڈاکٹرطاہرالقادری نے حکمرانوں کو چیلنج کیا ہے کہ گرفتارکرکے دیکھو پھر دیکھنا تمھارے ایوان اور رائے ونڈ محل کا کیا حشر ہوگا، عوام جاگ چکی ہے۔

ڈاکٹرطاہرالقادری نے اسلام آباد میں انقلاب مارچ کے شرکاء سے خطاب کرتے ہوئے کہا کہ الیکشن کمیشن نے آئین کی دھجیاں اڑادی ہیں، آئین سے شق نمبرباسٹھ اور تریسٹھ کو ختم کردیا جائے کہ دنیا یہ جان لے کہ اس ملک میں پارلیمان کے نمائندوں کا کوئی معیار نہیں ہے۔

ان کا کہنا تھا کہ نواز شریف میں جرات ہے تو یہاں آکر گرفتار کرلیں، ہم بھی دیکھیں گے کہ انقلابیوں میں زیادہ جرات ہے یا پولیس میں، اگرگرفتار کیا گیا تو چوبیس گھنٹے میں حکومت گرجائے گی۔

انہوں نے کہا کہ دنیا کے غریب ترین ممالک جن کا کسی نے نام بھی نہیں سنا وہ ترقی کر رہے ہیں ، بنگلہ دیش اکہتر میں ہم سے جدا ہوا اور آج پاکستان سے آگے ہے لیکن ہمارے ملک میں غربت کی شرح جوتینتیس فی صد تھی اب پچاس فیصد پرجا پہنچی ہے۔

انہوں نے یہ بھی کہا کہ حکمران ملک کی باقی ماندہ دولت لوٹ کر بیرون ِ ملک جانے والے ہیں ، لیکن یہ دھرنا حکمرانوں کا مرنا ثابت ہوگا۔

طاہرالقادری کا کہنا ہے کہ طویل المعیاد انقلاب کا آغاز ہوچکا ہے اور قلیل المعیاد انقلاب کچھ دنوں میں آیا چاہتا ہے اورآپ اپنی نسلوں کو بتائیں گے کہ جب پاکستان بدل رہا تھا تو آپ اسلام آباد میں تھے۔

انہوں نے حکومت سے مطالبہ کیا کہ عوامی تحریک اور تحریک ِانصاف کے گرفتار کارکنوں کو فی الفور رہا کیا جائے

ستمبر 13, 2014
پاک فوج کوسیاست میں ملوث کرنے پرافسوس ہوا، ڈی جی آئی ایس پی آر

راولپنڈی: ڈی جی آئی ایس پی آرکا کہنا ہے کہ ملالہ پرحملے کرنے والے دہشت گردوں کے گروہ کوگرفتارکرلیا گیا ہے۔

ڈی جی آئی ایس پی آرمیجرجنرل عاصم سلیم باجوہ نےکہا کہ ملالہ پرحملہ کرنےوالاشوریٰ نامی گروہ مولوی فضل اللہ کی ہدایت پرعمل کرتاتھاجنہیں گرفتارکرلیاگیاہے، انہوں نے بتایا کہ مولوی فضل اللہ پاکستان میں ہونے والے حملوں میں بھی ملوث ہے۔

ڈی جی آئی ایس پی آر نے بتایا کہ نہ صرف زیارت ریذیڈنسی پرحملہ کرنے والے ملزمان کوگرفتارکیا گیا ہےبلکہ کوئٹہ اورڈاکیارڈ پرحملے بھی ناکام بنائےگئے ہیں، پاک فوج کے ترجمان نے حملے ناکام بنانے کوانٹیلی جنس کی اہم کاوش قرار دیا۔

ڈی جی آئی ایس پی آر کا یہ بھی کہنا تھا کہ پاک فوج واضح طورپرملک میں جمہوریت کی حمایت کرچکی ہے،پاک فوج کوسیاست میں ملوث کرنے پرافسوس ہوا،جبکہ مسلح افواج سیلاب زدگان کی مدد کیلئے متاثرہ علاقوں میں موجود ہے اورریلیف کی ہرممکن کاوشیں جاری ہیں۔

جنرل عاصم باجوہ کاکہناتھا کہ آپریشن ضرب ِعضب کامیابی سے جاری ہے، آپریشن دو محاذوں پر چل رہا ہے اوراب تک دتہ خیل اور میران شاہ کلیئر ہو چکے ہیں، شمالی وزیرستان کو غیر ملکی دہشتگردوں نے یرغمال بنایا ہواتھا، جبکہ آپریشن ضربِ عضب کے ساتھ ساتھ پورے ملک میں دہشت گردوں کے خلاف کارروائی کے لئے ایک میکینزم بنایا گیا تھا اوراب تک 134خطرناک دہشتگردپکڑے جاچکے ہیں۔

فوج ہر جگہ الرٹ ہے، آخری دہشتگرد کے خاتمے یا پکڑے جانے تک آپریشن جاری رہے گا، ابھی تک 2200 سے زائد آپریشن کئے جا چکے ہیں اور یہ انٹیلیجنس کی کامیابی ہے کہ بعد میں کئے گئے آپریشن میں تخریب پسن عناصر بہت بڑی تعداد میں پکڑے گئے ہیں۔

ستمبر 12, 2014
اسلام آباد دھرنوں میں 5سے 6دہشتگرد شامل ہوگئے ہیں ، وزارتِ داخلہ

اسلام آباد:حساس اداروں کی جانب سے وزارتِ داخلہ کو بھیجی گئی رپورٹ کے مطابق پاکستان عوامی تحریک اور پاکستان تحریکِ انصاف کے دھرنوں میں دہشتگرد شامل ہوگئے ہیں۔

اسلام آباد میں پاکستان تحریکِ انصاف اور عوامی تحریک کے دھرنوں میں دہشت گردوں کی موجودگی کی اطلاع پر سیکورٹی الرٹ کردی گئی ہے جبکہ ریڈزون کے اطراف میں اضافی نفری تعینات کردی گئی ہے۔

حساس اداروں نے وزارتِ داخلہ کو دہشتگردوں کی گفتگو سے آگاہ کردیا ہے، رپورٹ میں کہا گیا ہے کہ خیبر پختونخوا کے دہشتگرد پاکستان عوامی تحریک اور تحریک انصاف کے دھرنوں کو بڑا نقصان پہنچانا چاہتے ہیں۔

تحریک انصاف کے رہنما شاہ محمود قریشی نے سیاسی جرگے سے ملاقات کے میڈیا سے گفتگو کرتے ہوئے کہا کہ وزارتِ داخلہ ماحول خراب نہ کرے، مذاکرات کے دوران اس طرح کی جملے بازی سے اجتناب کیا جائے تو بہتر ہے۔

اےآروائی نیوز کے نمائندے اظہر بن کریم کے مطابق چھ دہشت گرد جن کا تعلق صوبہ خیبر پختونخواہ سے بتایا جارہا ہے، دونوں دھرنوں میں داخل ہوچکے ہیں اور وہ دونوں دھرنوں میں دہشت گردی کی بڑی واردات کرنا چاہتے ہیں۔

سرکاری ٹیلی ویژن کے مطابق تحریک ِ انصاف اورعوامی تحریک کی جانب سے دیئے گئے دھرنوں کی انتظامیہ کو مطلع کردیا گیا ہے کہ انٹیلی جنس ذرائع سے موصول ہونے والی مصدقہ اطلاعات کے مطابق دھرنوں میں ممکنہ طور پر دہشت گردی کی بڑی کاروائی ہوسکتی ہے اوراس میں کالعدم تنظیم کے ملوث ہونے کے شواہد بھی موجود ہیں، حساس اداروں نے یہ معلومات ٹیلی فون کالز کے ذریعے حاصل کی ہیں۔

واضح رہے کہ پاکستان عوامی تحریک اور پاکستان تحریک ِ انصاف کی جانب سے اسلام آباد میں جاری دھرنوں کو تین ہفتے سے زائد وقت گزرچکاہے ، دھرنوں کی حفاظت کے لئے دونوں جماعتوں نے اپنے کارکنان پر مشتمل کمیٹیاں بھی تشکیل دی ہوئی ہیں۔

ستمبر 12, 2014