کراچی : شہرکی گیارہ حساس یونین کونسلوں میں انسداد پولیو مہم تیسرے روز بھی کامیابی سے جاری ہے۔ خیبرایجنسی کی تحصیل جمرود اور لنڈی کوتل میں آج سے مہم شروع کی جائےگی۔
تفصیلات کے مطابق کراچی کی گیارہ حساس یونین کونسلوں میں سینکڑوں والدین نےبچوں کو پولیوسے بچاؤکےقطرےپلانےسے انکار کردیاتھا، جس کےباعث مہم کے پہلےروز دو ہزارآٹھ سواور دوسرےروز دو ہزار دو سو بچے پولیو ویکسین پینے سےمحروم رہ گئے تھے۔
پولیوحکام کا کہنا ہےکہ انسداد پولیو مہم کے پہلے روز پچیاسی ہزار سےزائد بچوں کی پولیو ویکسینیشن کا ہدف مقرر کیا گیاتھا،بیاسی ہزار تین سوچھیالیس بچوں کوپولیوسےبچاؤکے قطرے پلائےجاچکےہیں۔
حکام نےبتایاکہ انسداد پولیو مہم کے پہلےاور دوسرےروز جوبچےپولیوویکسین سے محروم رہ گئے تھے ان کی تعداد پانچ ہزار کے لگ بھگ ہے۔انہیں آج تیسرے روزپولیوسے بچاؤکےقطرے پلانےکی کوشش کی جائےگی۔
دوسری جانب خیبرایجنسی کی تحصیل جمرود اور لنڈی کوتل میں بھی انسداد پولیومہم شروع ہوگئی ۔ پولیوورکرزکی تین سو اٹھانوے ٹیمیں سخت سیکیورٹی حصارمیں تقریباً ایک لاکھ اٹھانوے ہزاربچوں کو پولیوسےبچاؤکےقطرےپلائیں گی۔
آپریشن کے باعث نقل مکانی کرکےآنےوالے بچوں کو استقبالیہ کیمپس میں پولیوویکسین دی جائےگی۔
