Tag: insulting Islam

دبئی: عدالت نے سوشل میڈیا پر اسلام اور پیغمبر آخر الزماںﷺ کے خلاف گستاخانہ مواد اپ لوڈ کرنے والے ملعون بھارتی شہری پر 5 لاکھ درہم جرمانہ عائد کرتے ہوئے اسے ایک سال کے لیے جیل بھیج دیا۔
خلیج ٹائمز کے مطابق دبئی پولیس نے ایک بھارتی شہری کو توہین اسلام کے مقدمے میں گرفتار کرکے عدالت میں پیش کیا جہاں عدالت نے جرم ثابت ہونے پر مقدمے کا فیصلہ سناتے ہوئے مجرم کو ایک سال کے لیے جیل بھیج دیا ساتھ ہی اس پر 5 لاکھ درہم کا جرمانہ عائد کیا ہے۔
اکتیس سالہ بھارتی شہری ویلڈنگ کے شعبے سے منسلک ہے، سزا پوری ہونے اور جرمانے کی ادائیگی کے بعد اسے ملک بدر کرکے بھارت واپس بھیج دیا جائےگا۔
سرکاری وکیل نے عدالت میں مجرم کے خلاف شواہد کا ریکارڈ پیش کیا جس کے مطابق مجرم نے توہین آمیز مواد پوسٹ کرنے کے فوری بعد یو اے ای سے فرار ہونے کی کوشش کی۔

خیال رہے کہ مجرم کے خلاف گزشتہ سال 6 نومبر کو ایک بھارتی شہری نے الراشدیہ پولیس اسٹیشن میں شکایت درج کرائی تھی اور گستاخانہ مواد سے متعلق پولیس کو آگاہ کیا کہ اس کا ہم وطن شہری اس قبیح فعل میں ملوث ہے۔
شکایت کے دو روز بعد ہی مجرم کو ملک سے فرار ہوتے ہوئے گرفتار کرلیا گیا تھا اور اس کا اسمارٹ فون قبضے میں کرلیا گیا تھا جس سے اس نے توہین اسلام پر مبنی فیس بک پوسٹ کی تھیں۔
دبئی کے جنرل ڈائریکٹوریٹ آف کرمنل ایویڈینس نے تصدیق کی ہے کہ توہین آمیز پوسٹ مجرم کے موبائل فون سے ہوئیں، فیس بک سے آخری بار وہ 7نومبر کو سائن آؤٹ ہوا اور اس کے فون میں کسی ہیکنگ کے کوئی شواہد نہیں ملے تاہم یہ بات واضح نہیں ہے کہ اس کے فیس بک اکاؤنٹ کی رسائی کسی اور شخص کے پاس کسی بھی ڈیوائس کے ذریعے تھی کہ نہیں۔
تحقیقات میں مجرم کے موبائل فون سے فیس بک پر پوسٹ کیے گئے پیغامات کی کاپی حاصل کی گئی، ان کا ترجمہ کیا گیا اور پبلک پراسیکیوٹر نے انہیں کیس میں مجرم کے خلاف بطور شواہد استعمال کیا
عدالت کے اس فیصلے کے خلاف اپیل کرنے کےلیے بھارتی شہری کے پاس پندرہ دن کاوقت موجود ہے۔