لاہور : امیر جماعت اسلامی سینیٹر سراج الحق نے کہا ہے کہ سودی نظام نے ملکی معیشت تباہ کردی جس کا خمیازہ پوری قوم کو بھگتنا پڑرہا ہے، عوام کی حکومت سے توقعات ختم ہورہی ہیں۔
ان خیالات کا اظہار انہوں نے جماعت اسلامی کے مرکز منصورہ لاہور میں جاری مرکزی مجلس شوریٰ کے تین روزہ اجلاس کے افتتاحی سیشن سے خطاب کرتے ہوئے کیا۔
انہوں نے کہا کہ سود نے ملکی معیشت تباہ کردی ہے جس کا خمیازہ پوری قوم کو بھگتنا پڑرہا ہے،جب تک سودی قرضوں کی معیشت کا خاتمہ نہیں ہوتا ترقی اور خوشحالی نہیں آئے گی۔
امیر جماعت اسلامی کا مزید کہنا تھا کہ حکومت آئی ایم ایف اور مقتدر قوتوں کی بیساکھیوں پر چل رہی ہے، اچھے کام کا کریڈٹ وزیر اعظم کو اور خرابی کا الزام اسٹیبلشمنٹ پرلگ رہا ہے، سروے بتاتے ہیں کہ عوام کی پی ٹی آئی حکومت سے توقعات ختم ہورہی ہیں۔
سینیٹر سراج الحق نے کہا کہ جماعت اسلامی ملک کے نظریاتی تشخص بچانے کیلئے مسلسل سرگرم ہے، ہم نے اسلامی نظام کیلئے مسلسل آواز اٹھائی ہے، اس سلسلے میں اسمبلیوں میں قراردادیں اور بعض اوقات قوانین منظور کرائے ہیں۔
اپنے خطاب میں انہوں نے ارکان شوریٰ سے کہا کہ غلبہ دین کیلئے منتخب اداروں میں اپنی قوت بڑھانے کی ضرورت ہے، اگرچہ قومی و صوبائی اسمبلیوں اور سینیٹ میں ہماری تعداد محدود ہے مگر اس کے باوجود ہم ملک کی اسلامی و جمہوری شناخت کو قائم رکھنے کیلئے اپنی جاری رکھیں گے۔
