بنی نوع انسان کی تاریخ تہذیبوں سے عبارت ہے، جب تہذیب کی ابتداء ہوتی ہے تو انسانی ذہن اِس کو اپنے عروج پر لے جاتا ہے اور پھر بالآخر تہذیب زوال کا شکار ہو کر اپنی نشانیاں چھوڑ جاتی ہے۔
قدیم اور گمشدہ تہذیبوں کے بارے میں ہماری معلومات کا انحصار اُس کی تعمیر شدہ اور چھوڑی ہوئی عمارتوں کے کھنڈرات پر ہوتا ہے۔
محکمہ آثارِ قدیمہ مٹی میں مدفون گمشدہ تہذیبوں کو ڈھونڈ کر باہر نکالتی ہے اور اُن سے مِلنے والی اشیاء کی مدد سے اُن کی کھوئی ہوئی زندگی کو بحال کرتی ہے۔
معلومات کا دوسرا ماخذ تحریر ہوتی ہے لیکن قدیم تحریروں کو دریافت کرنے اور پڑھنے میں طویل عرصہ چاہیے ہوتا ہے۔
وادی سندھ کی بات کی جائے تو اس کی تہذیب کا رسم الخط تو تھا مگر اُسے دریافت نہیں کیا جا سکا۔ اس لیے ہماری معلومات کا انحصار صرف آثارِ قدیمہ پر ہے۔
اسی طرح تاریخِ انسانی میں دیگر عظیم اور گمشدہ تہذیبیں قائم ہوئیں، پروان چڑھیں اور پھر زوال پذیر ہوکر قصہ پارینہ بن گئیں۔
ان میں سے کئی کا ذکر مؤرخین نے تفصیل سے کیا اور بعد کی تہذیبوں نے ان کے عروج و زوال کے نشانات محفوظ کیے لیکن کچھ گمشدہ تہذیبیں اچانک غائب ہوگئیں۔
کچھ تہذیبوں نے اپنی تباہی کے اسباب کے اشارے چھوڑے جبکہ دیگر کی گمشدگی تاحال ایک پوشیدہ راز بنی ہوئی ہے جس کو جاننے کیلیے ہر ممکن کوشش کی جاتی ہے۔
زیر نظر مضمون میں کچھ ایسی ہی 6 پراسرار اور گمشدہ تہذیبوں کا ذکر کیا گیا ہے جن بارے میں جان آپ پر بھی حیرتوں کے پہاڑ ٹوٹ پڑیں گے۔
مایا تہذیب
مایا تہذیب اپنے عروج پر یوکاٹن جزیرہ نما، موجودہ گوئٹے مالا، بیلیز اور میکسیکو کے حصوں میں پھیلی ہوئی تھی اور اپنی حیرت انگیز مہارتوں اور پیچیدہ ریاضیاتی نظام کے لیے مشہور تھی۔
900عیسوی کے قریب یہ تہذیب اچانک زوال پذیر ہوگئی۔ ماہرین آثار قدیمہ کے مطابق یہ تہذیب جنگوں اور موسمیاتی تبدیلیوں کا شکار ہوئی، جس کی وجہ سے قحط پڑا اور بڑے شہروں سے نقل مکانی ہوئی۔ دیہی علاقوں میں وسائل کی کمیابی نے بھی انحطاط میں کردار ادا کیا ہوگا۔
خمیر ایمپائر کی تہذیب
دنیا کے دوسری طرف خمیر ایمپائر نے موجودہ کمبوڈیا کے علاقے میں ایک مضبوط بنیاد رکھی تھی۔ انگکور اس تہذیب کا ایک عظیم شہر تھا، جس کے پیچیدہ سڑکوں اور نہری نظام کی تعمیر نے حیرت انگیز ترقی کو ظاہر کیا۔
خمیر ایمپائر کا عروج 1000 سے 1200 عیسوی کے درمیان تھا لیکن یہ اچانک ختم ہوگئی۔ ماہرین کے مطابق اس کے زوال کی وجوہات جنگ سے لے کر ماحولیاتی تباہیوں تک کچھ بھی ہوسکتی ہیں۔
ہڑپّہ : وادیِ سندھ کی تہذیب
وادیِ سندھ یا ہڑپہ تہذیب قدیم دنیا کی سب سے بڑی تہذیبوں میں سے ایک تھی، جو موجودہ ہندوستان، پاکستان اور افغانستان کے کچھ علاقوں میں پھیلی ہوئی تھی۔ اس کے عروج پر پانچ ملین کی آبادی اور شاندار تعمیرات موجود تھیں۔
یہ تہذیب تقریباً 3000 سال قبل نامعلوم وجوہات کی بنا پر ختم ہوگئی، ایک مفروضے کے مطابق، موسمیاتی تبدیلیاں، خشک سالی اور قحط اس کے زوال کی وجوہات ہوسکتی ہیں۔
ایسٹر آئی لینڈ کی تہذیب
ایسٹر آئی لینڈ جو اپنے عظیم پتھری مجسموں کے لیے مشہور ہے، پولینیشین تہذیب کا مسکن تھا۔ یہاں کے باشندے ماہر ملاح تھے اور دیگر حیرت انگیز صلاحیتوں کے حامل تھے۔ تاہم، اس تہذیب کے زوال کے بارے میں خیال کیا جاتا ہے کہ قدرتی وسائل کی کمی اس کی ایک بڑی وجہ ہوسکتی ہے۔ اس کے علاوہ بیماریاں اور دیگر عوامل بھی زوال کا سبب بنے ہوں گے۔
چاتاویوک تہذیب
موجودہ وسطی ترکی کا علاقہ کبھی دنیا کے قدیم ترین شہروں میں سے ایک چاتاویوک کا مسکن تھا۔ یہ تہذیب 9000 سے 7000 سال پہلے ترقی پذیر رہی لیکن پھر اچانک ختم ہوگئی۔
چاتاویوک کی منفرد خصوصیت اس کا شہد کے چھتے نما طرز تعمیر تھا، گھر آپس میں جڑے ہوئے تھے اور ان میں چھتوں کے راستے داخل ہوا جاتا تھا۔ یہ تہذیب اپنے پیچھے رسم و رواج اور زندگی کے بارے میں کئی اہم اشیاء چھوڑ گئی۔
مسی سیپیئنز تہذیب
700عیسوی سے لے کر یورپی استعمار تک امریکی جنوب مشرق اور وسطی علاقوں میں ایک زراعتی تہذیب آباد تھی جسے ’مسی سیپیئنز‘ تہذیب کہا جاتا ہے۔
اس کا ایک اہم شہر ’کاہوکیا‘ تھا جو موجودہ کولنز ول، الینوائے کے قریب واقع تھا تقریباً 40ہزار افراد پر مشتمل اس تہذیب نے بڑے چوک، مٹی کے بنے ہوئے اہرام اور ستاروں کا مشاہدہ کرنے کے لیے لکڑی کے ڈھانچے تعمیر کیے۔
اس تہذیب کے زوال کی وجوہات بھی یقین کے ساتھ معلوم نہیں لیکن ماحولیات کی خرابی یا قحط و بیماری ممکنہ اسباب ہوسکتے ہیں۔
