Tag: intermediate board karachi

کراچی : سندھ ہائیکورٹ نے ناظم امتحانات انٹرمیڈیٹ بورڈ عمران چشتی کے تبادلےپر حکم امتناعی جاری کرتےہوئےچیف سیکرٹری سندھ اور دیگر کو ت13اکتوبر کے لئے نوٹس جاری کر دیئے ہیں۔

عدالتی حکم نامہ میں کہا گیا ہے کہ عدالتی اجازت کے بغیر عمران چشتی کا کراچی سے باہر تبادلہ نہ کیا جائے۔

بعد ازاں سندھ ہائیکورٹ نے کیس کی سماعت ملتوی کرتے ہوئے آئندہ سماعت پر فریقین کو طلب کر لیا ۔انٹر میڈیٹ بورڈ تنازعہ کے بعد عمران چشتی کے تبادلے کا فیصلہ کیا گیا تھا ،فیصلے کے بعد عمران چشتی نے سندھ ہائیکورٹ سے رجوع کیا تھا۔

علاوہ ازیں اعلیٰ ثانوی تعلیمی بورڈ کے ناظم امتحانات عمران خان چشتی اور انٹر بورڈ کے چیئرمین اختر غوری کے درمیان شروع ہونے والے تنازعے کے حوالے سے رپورٹ تحقیقاتی افسر پیر کو صوبائی حکومت کو پیش کریں گے۔

جبکہ محکمہ قانون نے وزیر اعلیٰ ہاؤس کو لکھے گئے خط میں بتایا ہے کہ عمران چشتی سول سرونٹ نہیں ہیں ان پر سپریم کورٹ کی جانب سے جاری کئے گئے ڈیبوٹیشن افسران کے احکامات لاگو نہیں ہوتے۔

واضح رہے کہ سیکریٹری بورڈ اور جامعات اقبال درانی نے کنٹرولر انٹر بورڈسمیت چار افسران کا تبادلہ میرپورخاص کردیا تھا جس کے جواب میں ناظم امتحانات عمران چشتی نے وزیر اعلیٰ سندھ کے سیکریٹری کو لکھے گئے خط میں کہا تھا کہ انکوائری رپورٹ آنے تک تبادلہ نہ کیا جائے۔

جبکہ اس کے ساتھ ساتھ انہوں نے اپنے وکلاء کے ذریعے سندھ ہائی کورٹ سے بھی تبادلہ کیخلاف رجوع کیا تھا، جس کے بعد سندھ ہائی کورٹ نے حکم امتناعی جاری کرتے ہوئے فریقین کو نوٹسز جاری کئے اور ان کے تبادلے کے احکامات پر عمل درآمد روک دیئے۔

عدالت نے حکم دیا ہے کہ عدالت کی اجازت کے بغیر ناظم امتحانات عمران خان چشتی کا تبادلہ نہ کیا جائے۔