کوئٹہ : وزیرداخلہ بلوچستان میرضیاءاللہ لانگو اور گورنر پنجاب چوہدری سرور نے مطالبہ کیا ہے کہ بین الاقوامی سطح پربھارت کو دہشت گرد ملک قرار دیا جائے۔
تفصیلات کے مطابق وزیرداخلہ بلوچستان میرضیاءاللہ لانگو نے اوی ناش کی کتاب میں بلوچ اینڈپشتون کارڈ پر باب لکھنے پرردعمل دیتے ہوئے کہا بھارت کی بلوچستان میں دہشت گردی کےثبوت فراہم کیے جاچکےہیں، کلبھوشن کابلوچستان سےگرفتارہونا مودی سرکار کے منہ پر تمانچے کیلئے کافی ہے۔
میرضیاءاللہ لانگو کا کہنا تھا کہ بھارت بلوچ یاپشتون کارڈ پرباب لکھےیاکتابیں کوئی فرق نہیں پڑتا، بلوچستان کابچہ بچہ پاکستان ہے اور تا قیامت ساتھ رہیں گے، بلوچستان کےعوام دشمن ملک بھارت کامکروہ چہرہ جانتی ہے۔
وزیرداخلہ بلوچستان نے کہا کہ بھارت کامکروہ چہرہ دنیا بھر کے سامنےعیاں ہوچکا ہے، بین الاقوامی سطح پربھارت کودہشت گرد ملک قرار دیا جائے، بھارت دہشت گردی کی پشت پناہی کررہا ہے۔
ان کا کہنا تھا کہ سی پیک کے خلاف بھارتی سازشیں دنیاکےسامنےلائے ، بھارتی دہشت گردی بےنقاب ہوچکی ہے، مقبوضہ وادی میں بھارتی جارحیت بھی سب کےسامنےہے، نہتےاورمظلوم کشمیریوں کونشانہ بنایا جارہا ہے۔
دوسری جانب گورنر پنجاب چوہدری سرور نے اپنے بیان میں کہا ہے کہ بھارتی سازشوں کےخلاف سیاسی،مذہبی جماعتوں کو متحد ہونا ہوگا، نریندر مودی کو پاکستان میں استحکام اورترقی ہضم نہیں ہورہی۔
چوہدری سرور کا کہنا تھا کہ پی ڈی ایم بھی سیاسی اور ذاتی نہیں ملکی مفادات کو تر جیح دے ، کوئی شک نہیں بھارت داعش سمیت دہشت گرد تنظیموں کاسہولت کارہے، وہ دہشت گردوں کا سہولت کاربن کراپنےپاؤں پرکلہاڑی ماررہا ہے۔
انھوں نے کہا کہ کشمیر میں دہشت گرد گروپ کھڑے کرنے کا مودی منصوبہ امن پر حملہ ہے، وزیراعظم کی قیادت میں 22کروڑپاکستانی کشمیر یوں کےساتھ ہیں ، بد قسمتی سے یواین سمیت عالمی طاقتوں کے ضمیربھی مردہ ہوچکے ہیں۔
گورنر پنجاب کا کہنا تھا کہ بھارت کوکل نہیں آج ہی دہشت گرد ملک قرار دینے کا وقت آچکا ہے، یواین کو چاہیے وہ فوری بھارت کو دہشت گر د ملک قرار دے۔
