کراچی : قومی کرکٹ ٹیم کے سابق مایہ ناز بلے باز انضمام الحق نے انکشاف کیا ہے کہ ‘ایک میچ میں جلد آؤٹ ہونے پر سینئر بیٹسمین نے اتنی تنقید کی کہ آدھے گھنٹے تک روتا رہا اور شدید ذہنی دباؤ میں مبتلا ہوگیا تھا’۔
تفصیلات کے مطابق پاکستان کرکٹ کے سابق بلے باز انضمام الحق نے ایک ویڈیو کے دوران سینئر بلے بازوں کے افسوسناک رویے سے متعلق انکشاف کیا، انہوں نے بتایا کہ میں سینئرز کی شدید تنقید کے باعث آدھے گھنٹے تک روتا رہا اور ساری رات ذہنی دباؤ میں رہا۔
ان کا کہنا تھا کہ میں نہا رہا اور ساتھ میں روتا جارہا تھا کیونکہ مجھ پر زندگی میں ایسی تنقید کبھی نہیں ہوئی تھی۔
انضمام کا کہنا تھا کہ مجھے اس وقت مزید اضطراب ہوا جب مجھے پتہ چلا کہ اگلے روز پرواز میں میری سیٹ کپتان عمران خان کے ساتھ ہے، میں اگلے روز جہاز میں سوار ہوکر اپنی سیٹ تلاش کرنے لگا تو دیکھا واقعاً میری سیٹ عمران خان کے ساتھ تھی ‘ میں نے سوچا جب وقت خراب ہوتا ہے تو وہ مکمل طور پر خراب ہوتا ہے کل اتنی باتیں سننی پڑی ہیں آج بھی ایسا ہی کچھ ہونے والا ہے’۔
انہوں نے بتایا کہ وہ دعا کرنے لگے کہ عمران خان پورے سفر کے دوران سوتے رہیں تاکہ وہ ان کے غصے سے بچ سکیں۔
انضمام نے بتایا کہ عمران بھائی جہاز میں سوار ہوئے اور کہا کہ مجھے تمہارا طریقہ دیکھ کر لگا کہ تم سامنے والے کھلاڑی کو مار دو گے، میں سوچ رہا تھا کہ آج سامنے والی ٹیم کو اڑا دو گے، انہوں نے کہا آج تم بہترین کھیل رہے تھے، انضمام نے کا کہ میں نے عمران بھائی کی بات پر کچھ نہیں کہا کہ وہ مجھ سے مذاق کررہے ہیں یا نہیں’۔
انضمام نے بتایا کہ عمران بھائی نے یہ جملے کہنے کے بعد تکیہ گردن سے لگایا اور سو گئے اور پھر پوری پرواز میں سوتے رہے۔
خیال رہے کہ 50 سالہ سابق کرکٹر انضمام الحق انٹرنیشنل ون ڈے میچ میں 11 ہزار 739 رنز، ٹیسٹ میں 8830 رنز بنائے ہیں۔
