ممبئی : بھارتی کرکٹ ٹیم کے سابق کپتان کرشنمچاری سری کانت نے کہا ہے کہ اگر اس سال آئی پی ایل نہیں ہوا تو دھونی کا کیریئر ختم ہو جائے گا۔ یہ بات انہوں نے بھارتی ٹی وی کو انٹرویو دیتے ہوئے کہی۔
ان کا کہنا تھا کہ میں بات کو توڑ موڑ کر پیش نہیں کروں گا لیکن اگر اس سال آئی پی ایل نہيں ہوتا ہے تو مہندر سنگھ دھونی کی ٹیم میں واپسی کی امید بالکل ختم ہو جائے گی۔
ایک سوال کے جواب میں سری کانت نے کہا کہ میرے مطابق لوکیش راہول وکٹ کیپر بلے باز ہو سکتے ہیں، مجھے رشبھ پنت پر بھی بھروسہ ہے وہ کافی باصلاحیت ہیں تو مجھے نہیں لگتا کہ انہیں ٹیم میں شامل کرنے میں کوئی دقت ہوگی لیکن اگر آئی پی ایل نہیں ہوتا ہے تو دھونی کا عالمی کپ ٹیم میں شامل ہونا انتہائی مشکل ہوگا۔
اس سے قبل انگلینڈ کے سابق کپتان ناصرحسین نے دھونی کی تعریف کرتے ہوئے کہا تھا کہ ان کی کافی کرکٹ بچی ہے اور وہ اب بھی ہبھارت کے لئے بہت کچھ کر سکتے ہیں۔ دھونی جیسے کھلاڑی صدیوں میں ایک بار آتے ہیں جنہیں دنیا بھر میں سراہا جاتا ہے اور ایسے میں ان پر جلد ہی ریٹائرمنٹ لینے کا دباؤ نہیں ڈالنا چاہئے۔
یاد رہے کہ مہندر سنگھ دھونی گزشتہ سال انگلینڈ میں ہوئے آئی سی سی ورلڈ کپ کے سیمی فائنل میں نیوزی لینڈ کے خلاف شکست کے بعد سے اب تک میدان میں نہیں اترے ہیں اور وہ آئی پی ایل سے ٹیم میں واپسی کرنے والے تھے۔
دھونی آئی پی ایل میں چنئی سپر کنگ ٹیم کے کپتان ہیں اور آئی پی ایل ان کے لئے آسٹریلیا میں اس سال اکتوبر میں ہونے والے آئی سی سی ٹی20 ورلڈ کپ میں انتخاب کے لئے کافی اہم ثابت ہوں گے۔
آئی پی ایل کا انعقاد 29 مارچ سے ہونا تھا لیکن کورونا وائرس کے خطرے کو دیکھتے ہوئے بی سی سی آئی نے اسے 15 اپریل تک ملتوی کر دیا تھا تاہم حالات کو دیکھتے ہوئے اس کے منعقد ہونے کےامکانات کافی کم ہیں۔
