سابق آسٹریلوی فاسٹ بولر مچل جانسن کا انڈین پریمئیر لیگ (آئی پی ایل) سے متعلق بیان بھارتی میڈیا کو ایک آنکھ نہ بھایا۔
بھارتی کرکٹ بورڈ (بی سی سی آئی) پر سابق آسٹریلوی کرکٹر مچل جانسن نے الزام عائد کیا کہ بیرون ملک مقیم کھلاڑیوں پر ٹورنامنٹ کے بقیہ میچز کھیلنے کیلئے دباؤ ڈالا جارہا ہے۔
سابق آسٹریلوی کرکٹر کا کہنا تھا کہ اگر مجھے بھارت واپس جانے اور ٹورنامنٹ مکمل کرنے کا فیصلہ کرنا ہوتا تو میرا جواب ”نہیں ” ہوتا کیونکہ جان سے زیادہ کچھ نہیں، کسی پر بھی اس کیلئے زورزبردستی نہیں کرنا چاہیے۔
جانسن کا کہنا تھا کہ اگر غیر ملکی کھلاڑی خود کو محفوظ نہیں سمجھ رہے تو آئی پی ایل انتظامیہ کو لیگ کو آگے بڑھا کر دوسری ونڈو تلاش کرنے کی ضرورت ہے۔
انہوں نے کہا کہ انڈین پریمئیر لیگ (آئی پی ایل) کو مالی نقصان بہرحال برداشت کرنا پڑے گا۔
واضح رہے اس سے قبل آسٹریلوی کرکٹر مچل اسٹارک نے بھی آئی پی ایل 2025 کے بقیہ میچز کھیلنے کے لیے سکیورٹی خدشات کے باعث بھارت واپس جانے سے انکار کردیا تھا۔
آسٹریلوی میڈیا کا اس حوالے سے کہنا ہے کہ مچل اسٹارک نے فرنچائز کو بقیہ میچز سے عدم دستیابی سے متعلق آگاہ کردیا ہے، فاسٹ بولر نے خطے میں پائی جانے والی کشیدگی کی وجہ سے یہ فیصلہ کیا ہے اور انہوں نے دہلی کیپیٹلز کو بھی اپنے فیصلے سے آگاہ کر دیا ہے۔
پی ایس ایل 10: کراچی کنگز کے 6 غیر ملکی کھلاڑیوں نے دستیابی کی تصدیق کردی
واضح رہے کہ فاسٹ بولر دھرم شالا میں بلیک آوٹ سے روکے جانے والے میچ کا حصہ تھے اور اس وقت وہاں ان کی اہلیہ ایلیسا ہیلی بھی موجود تھیں اور انہوں نے ایک انٹرویو میں دھرم شالا کے حالات کھل کر بتائے تھے۔
