ذہانت کسی کی میراث نہیں ہوتی۔ یہ کبھی بھی، کہیں بھی، کیسے بھی حالات میں اپنی موجودگی ظاہر کردیتی ہے۔ بعض دفعہ یہ خدا کی دین ہوتی ہے۔ بعض لوگ اپنی ذہانت کو محض سستی اور کاہلی کے باعث ضائع کردیتے ہیں۔ کچھ لوگوں میں ذہانت کی کمی ہوتی ہے لیکن وہ سخت محنت سے اپنے مقاصد حاصل کرلیتے ہیں۔
کسی دانا کا کہنا ہے کہ ذہانت مشکل کام کو آسانی سے کرنے کا حل پیش کردیتی ہے جس پر عمل کر کے آپ راتوں رات کامیاب ہوجاتے ہیں۔
ریسرچ کے مطابق ہمارے آئی کیو میں جینیات کا کردار چالیس سے اسی فیصد ہوتا ہے لیکن یہ مخصوص نہیں ہے۔ اپنے طرز زندگی اور عادات میں کچھ تبدیلیاں لا کر ہم اپنے آئی کیو میں اضافہ بھی کر سکتے ہیں۔ یہاں آپ کو ایسے ہی کچھ طریقے بتائے جا رہے ہیں جنہیں اپنا کر آپ اپنے آئی کیو اور ذہانت میں اضافہ کر سکتے ہیں۔
چیزوں کو مختلف طریقے سے ادا کریں
اپنے روز مرہ کے کام کو کچھ مختلف طریقے سے ادا کریں۔ جیسے سیدھے ہاتھ سے برش کرنے کے بجائے الٹے ہاتھ سے کریں۔ کسی دوسری زبان میں گفتگو کریں۔
مراقبہ
مراقبہ نہ صرف ذہنی دباؤ کو کم کرتا ہے بلکہ یہ ذہن کو اس کا کام بہتر طور پر کرنے میں بھی مدد کرتا ہے۔ مراقبے کو اپنی زندگی کا حصہ بنائیں۔
ورزش کریں
دن میں پینتالیس منٹ کے لیے کوئی بھی ورزش کرنا بے حد فائدہ مند ہے۔ تیراکی یا بھاگنا بہترین ورزش ہے۔
دماغ کو آرام دیں
دماغ کو صرف اسی وقت آرام دیں جب وہ ضرورت محسوس کرے۔ اگر آپ کے سونے کا وقت ہے اور دماغ تھکا ہوا نہیں ہے تو کوئی کام کیا جاسکتا ہے۔
مطالعہ کریں
روزانہ مطالعہ کرنے کی عادت ڈالیں۔ یہ آپ کے آئی کیو میں اضافہ کرے گا۔ سائنس، فزکس، میتھس سب کچھ پڑھنے کی کوشش کریں۔
کچھ نیا سیکھیں
اپنے دماغ کو حاضر رکھنے کے لیے کچھ نیا سیکھیں۔ کسی شعبہ کے بارے میں، کوئی کھیل یا ایسی کوئی چیز جو پہلے سے آپ کو نہ معلوم ہو۔
پزل گیم کھیلیں
اپنے موبائل اور کمپیوٹرز پر کینڈی کرش کھیلنے کے بجائے پزل گیم کھیلیں جس سے آپ کا دماغ مشقت کرے اور کچھ نیا سیکھے۔
کچھ نیا کریں
جب آپ اپنی روزانہ کی روٹین پر عمل پیرا ہوتے ہیں تو دماغ سست ہوجاتا ہے۔ ہر روز کوئی نیا تجربہ کریں۔ اس سے آپ کا دماغ ہوشیار ہوجائے گا اور اس کی استعداد کار میں اضافہ ہوگا۔
پروٹین کھائیں
اپنے ناشتے میں پروٹین کی مقدار میں اضافہ کریں۔ یہ دماغ کی صلاحیتوں میں اضافہ کرتا ہے۔
ڈارک چاکلیٹ کھائیں
ڈارک چاکلیٹ میں شامل اینٹی آکسائیڈز اور وٹامنز صحت اور دماغ کے لیے نہایت مفید ہیں۔ روزانہ ایک سے پانچ اونس چاکلیٹ کھانا فائدہ مند ہے۔