تہران : ایران نے الزام عائد کیا ہے کہ شام میں حزب اختلاف کے حملوں کے پیچھے اسرائیل اور امریکہ کا ہاتھ ہے، یہ دونوں ممالک شام میں دہشتگردی کے ذمہ دار ہیں۔
غیر ملکی خبر رساں ادارے کی رپورٹ کے مطابق ایرانی وزیر خارجہ عباس عراقچی نے شام میں حملوں کی مذمت کرتے ہوئے انہیں لبنان اور فلسطین میں اسرائیل کی شکست کے بعد امریکی اسرائیلی منصوبہ قرار دیا ہے۔
رپورٹ کے مطابق ایرانی وزیر خارجہ نے کہا کہ شام میں حزب اختلاف کے حملوں کے پیچھے اسرائیل اور امریکہ کا ہاتھ ہے۔
ایرانی وزیر خارجہ عباس عراقچی نے اپنے شامی ہم منصب سے ٹیلی فونک گفتگو کرتے ہوئے دہشت گردی کے خلاف جدوجہد میں شام کی حکومت اس کی قوم اور فوج کے لیے ایران کی مکمل حمایت کا اعادہ کیا۔
ان کا کہنا تھا کہ شام میں دوبارہ سر اٹھانے والا دہشت گرد گروپ واشنگٹن کا اثاثہ ہے، امریکا اسرائیل شام میں دہشت گردی کے دوبارہ سر اٹھانے کے ذمہ دار ہیں۔
عباس عراقچی نے کہا کہ امریکا اور اسرائیل حیات تحریر الشام کو پراکسی کے طور پر استعمال کر رہے ہیں، حیات تحریرالشام نے بدھ کو شامی حکومت کے زیرکنٹرول علاقے پر بڑا حملہ کیا تھا۔
واضح رہے کہ شامی حکومت کے مخالف گروپ نے حلب پر قبضہ کرلیا، شام کے صدربشارالاسد کے مجسمےگرا دیے گئے،سرکاری فوج پیچھے ہٹ گئی۔
تین روز سے جاری لڑائی میں اب تک تین سو سے زائد افراد مارے جاچکے ہیں، ایرانی وزارت خارجہ کے ترجمان اسماعیل باقری نے کہا ہے کہ حلب میں باغیوں نے ایرانی قونصل خانے پر حملہ کیا ہے تاہم تمام ملازمین محفوظ رہے۔
