واشنگٹن : امریکا نے اپنے شہریوں کو ایران جانے سے روک دیا، ترجمان امریکی محکمہ خارجہ ٹیمی بروس نے کہا ہے کہ امریکی شہری کسی بھی صورت ایران کا سفر نہ کریں۔
یہ ہدایات انہوں نے واشنگٹن میں پریس بریفنگ کے دوران دیں، انہوں نے بتایا کہ امریکی شہری کسی بھی صورت ایران کا سفر نہ کریں بلکہ عراق کے سفر سے بھی گریز کریں۔
امریکی محکمہ خارجہ نےامریکی شہریوں کیلئے ٹریول ایڈوائزری جاری کردی، پریس بریفنگ میں ترجمان امریکی محکمہ خارجہ کا کہنا تھا کہ مشرق وسطیٰ میں امریکی شہریوں کی مدد کیلئے مڈل ایسٹ ٹاسک فورس قائم کردی گئی ہے۔
ان کا کہنا تھا کہ یہ ٹاسک فورس اس مقصد کے لیے قائم کی گئی ہے کہ محکمہ خارجہ اور امریکی شہریوں کو وہ معلومات فراہم کی جا سکیں جن کی انہیں ضرورت ہو سکتی ہے۔
ایران اسرائیل جنگ سے متعلق ٹیمی بروس نے کہا کہ تمام مسائل کا حل مذاکرات کے ذریعے چاہتے ہیں، ہم دنیا میں امن دیکھنا چاہتے ہیں۔
