Tag: iran israel

لبنان کی مزاحمتی تنظیم حزب اللہ نے اسرائیل کو علاقائی اور عالمی امن کیلیے ایک بڑا اسٹریٹجک خطرہ قرار دے دیا۔

تسنیم نیوز ایجنسی کی رپورٹ کے مطابق سربراہ حزب اللہ نعیم قاسم نے ٹیلی ویژن پر نشر اپنے خطاب میں اسرائیل کو نہ صرف فلسطین پر قبضہ کرنے والا بلکہ لبنان، مصر، شام، اردن، وسیع تر خطے اور عالمی استحکام کیلیے اسٹریٹجک خطرہ قرار دیا۔

نعیم قاسم نے اس بات پر زور دیا کہ اسرائیل کا نظریہ اور عزائم مسلمانوں، عیسائیوں اور یہودیوں کو یکساں طور پر خطرے میں ڈالتے ہیں اور علاقائی اور عالمی امن کو غیر مستحکم کرتے ہیں، جب سے لبنان اور اسرائیل کے درمیان جنگ بندی کا معاہدہ ہوا ہے، اسرائیلی حکومت اپنی جارحیت سے باز نہیں آئی اور 3700 سے زائد مرتبہ اس معاہدے کی خلاف ورزی کر چکی ہے۔

یہ بھی پڑھیں: اسرائیل کا حزب اللہ کے اہم کمانڈر کو شہید کرنے کا دعویٰ

سربراہ حزب اللہ نے کہا کہ اسرائیلی حکومت کو لبنان کے ساتھ طے شدہ شرائط پر عمل کرنا چاہیے اور اپنی جارحیت کو روکنا چاہیے، ہماری جدوجہد دھمکیوں سے متاثر نہیں ہوگی اور نہ ہی اپنے ہتھیار اسرائیل کے حوالے کرنے کو قبول کریں گے۔

نعیم قاسم نے حزب اللہ کو غیر مسلح کرنے کے مطالبے کو سختی سے مسترد کرتے ہوئے کہا کہ لبنان کا دفاع اور خودمختاری اندرونی معاملات ہیں جو بیرونی دباؤ سے محفوظ ہیں۔

’ہم ذلت کے سامنے سر تسلیم خم نہیں کریں گے، اپنی سرزمین کو نہیں چھوڑیں گے اور دھمکیوں کے تحت سمجھوتہ نہیں کریں گے۔ حزب اللہ کے ہتھیاروں کے بارے میں بات چیت ایک اندرونی مسئلہ ہے جس میں اسرائیل کا کوئی کردار نہیں ہے۔ مزاحمتی تنظیم کی مزاحمت فلسطین، لبنان، مصر، شام اور اردن سمیت متعدد ممالک کو متاثر کرنے والے اسٹریٹجک خطرے کے خلاف دفاع ہے۔‘

اسرائیل کو ایک وجودی خطرہ قرار دیتے ہوئے نعیم قاسم نے کہا کہ اسرائیل کا خطرہ صرف مسلمانوں تک محدود نہیں ہے بلکہ یہ عیسائیوں اور یہودیوں کو بھی خطرے میں ڈال رہا ہے۔ انہوں نے اسرائیلی حکومت کے نظریے اور اقدامات کو عالمی امن کیلیے خطرہ قرار دیتے ہوئے تنقید کی اور ان لوگوں سے مطالبہ کیا جو اسرائیل کا سامنا کرنے سے گریز کرتے ہیں۔

امریکی حکام نے دعویٰ کیا ہے کہ 13 جون کو اسرائیل کی جانب سے پہلے حملے کے بعد ایران نے آبنائے ہرمز بند کرنے کی تیاری کر لی تھی۔

خبر رساں ایجنسی روئٹرز نے اپنی رپورٹ میں دو امریکی حکام کا حوالہ دیا جنہوں نے شناخت ظاہر نہ کرنے کی شرط پر بتایا کہ 13 جون کو اسرائیلی حملے کے کچھ دیر بعد ایرانی فوج نے خلیج میں جہازوں پر بارودی سرنگیں لوڈ کر لی تھیں۔

ایران اسرائیل کشیدگی سے متعلق تمام خبریں

بحری جہازوں پر بارودی سرنگوں کی لوڈنگ سے اشارہ ملتا ہے کہ ایران دنیا کی مصروف ترین بحری جہازوں کی گزرگاہ آبنائے ہرمز کو بند کرنے میں سنجیدہ تھا، یہ اقدام پہلے سے پھیلے ہوئے تنازع میں مزید اضافہ کر سکتا تھا کیونکہ اس سے عالمی تجارت میں شدید رکاوٹ پیدا ہو جاتی۔

واضح رہے کہ تیل اور گیس کی عالمی ترسیل کا تقریباً پانچواں حصہ آبنائے ہرمز سے گزرتا ہے اور اس رکاوٹ سے ممکنہ طور پر عالمی توانائی کی قیمتوں میں اضافہ ہو سکتا تھا۔

یہ بھی پڑھیں: ایران نے امریکی حملوں میں فردو جوہری تنصیب پر بھاری نقصان کا اعتراف کر لیا

رپورٹ میں یہ بھی کہا گیا کہ یہ واضح نہیں ہو سکا کہ آیا اس کے بعد بارودی سرنگیں بحری جہازوں سے اتار لی گئیں یا نہیں۔

یہ نہیں بتایا گیا کہ امریکا نے اس بات کا اندازہ کیسے لگایا کہ بارودی سرنگیں ایرانی جہازوں پر لوڈ کر دی گئی ہیں، لیکن ایسی انٹیلی جنس عام طور پر سیٹلائٹ کی تصاویر، خفیہ ذرائع یا دونوں طریقوں کے امتزاج کے ذریعے جمع کی جاتی ہے۔

دونوں امریکی حکام نے بتایا کہ امریکی حکومت نے اس امکان کو رد نہیں کیا کہ بارودی سرنگوں کو لوڈ کرنا ایک فریب تھا، ایران امریکا کو یہ باور کروانے کیلیے ایسا کر سکتا تھا کہ وہ آبنائے کو بند کرنے میں سنجیدہ ہے لیکن حقیقت میں ایسا کرنے کا ارادہ نہیں رکھتا۔

امریکی حکام نے بتایا کہ اگر ایرانی رہنماؤں نے حکم دیا تو ایران کی فوج ضروری تیاری کر سکتی تھی۔

واشنگٹن: وائٹ ہاؤس کی پریس سیکریٹری کیرولین لیویٹ کا کہنا ہے کہ صدر ڈونلڈ ٹرمپ غزہ میں زندگیاں بچانا چاہتے ہیں۔

قطری نشریاتی ادارے الجزیرہ کی رپورٹ کے مطابق کیرولین لیویٹ نے اپنے حالیہ بیان میں کہا کہ صدر ڈونلڈ ٹرمپ اور ان کی انتظامیہ اسرائیلی حکام سے مسلسل رابطے میں ہیں اور غزہ میں جنگ کا خاتمہ اولین ترجیح ہے۔

کیرولین لیویٹ نے کہا کہ اس جنگ کے دوران اسرائیل اور غزہ دونوں سے آنے والی تصاویر کو دیکھ کر دل دہل جاتا ہے، امریکی صدر اس جنگ کو ختم ہوتے دیکھنا چاہتے ہیں، وہ لوگوں کی جان بچانا چاہتے ہیں۔

یہ بھی پڑھیں: ’نیتن یاہو غزہ جنگ بندی مذاکرات کو ناکام بنا رہا ہے‘

واضح رہے کہ آئندہ ہفتے اسرائیلی وزیر اعظم نیتن یاہو امریکا کا دورہ کریں گے جہاں ان کی ملاقات صدر ڈونلڈ ٹرمپ سے ہوگی، ملاقات کے دوران غزہ جنگ بندی کا معاملہ زیرِ غور آنے کا امکان ہے۔

اسرائیل کے اسٹریٹجک امور کے وزیر رون ڈرمر جو کہ نیتن یاہو کے قریبی اتحادی ہیں اس ہفتے غزہ میں جنگ بندی، ایران اور دیگر معاملات پر سینئر حکام کے ساتھ بات چیت کیلیے واشنگٹن ڈی سی میں موجود ہیں۔

پچھلے دنوں ڈونلڈ ٹرمپ نے وائٹ ہاؤس میں میڈیا سے گفتگو میں بتایا تھا کہ اُمید ہے غزہ میں آئندہ ہفتے تک جنگ بندی نافذ ہو جائے گی۔

تہران: ایران نے اسرائیل کے ساتھ 12 روزہ جنگ اور جوہری تنصیبات پر امریکی حملوں کے بعد واشنگٹن کے ساتھ فوری مذاکرات شروع ہونے کا امکان مسترد کر دیا۔

امریکی صدر ڈونلڈ ٹرمپ نے حال ہی میں عندیہ دیا تھا کہ ایران کے ساتھ مذاکرات اس ہفتے دوبارہ شروع ہو سکتے ہیں جبکہ وائٹ ہاؤس نے واضح کیا تھا کہ تہران کے ساتھ سرکاری طور پر کوئی بات چیت طے نہیں ہے۔

ایران اسرائیل کشیدگی سے متعلق تمام خبریں

ایران کی جوہری تنصیبات پر امریکی فضائی حملوں کے بعد وزیر خارجہ عباس عراقچی کا کہنا ہے کہ مجھے نہیں لگتا کہ امریکا کے ساتھ جوہری مذاکرات اتنی جلدی دوبارہ شروع ہوں گے۔

عباس عراقچی نے سی بی ایس کو دیے گئے انٹرویو میں کہا کہ ہمارا مذاکرات میں دوبارہ شامل ہونے کا فیصلہ اس بات سے مشروط ہوگا کہ امریکا اس دوران حملے نہ کرے تاہم میں سمجھتا ہوں کہ ان تمام تحفظات کے ساتھ ہمیں ابھی مزید وقت درکار ہے۔

ایرانی وزیر خارجہ نے واضح کیا کہ سفارت کاری کے دروازے کبھی بند نہیں ہوں گے۔

عباس عراقچی کا کہنا تھا کہ کوئی بھی بم دھماکوں کے ذریعے افزودگی کیلیے ٹیکنالوجی اور سائنس کو ختم نہیں کر سکتا، اگر یہی ارادہ رہا تو ہم تیزی سے نقصانات کو ٹھیک کر سکیں گے اور ضائع ہونے والے وقت کی تلافی کر سکیں گے۔

انٹرویو میں پوچھا گیا کہ کیا ایران یورینیم کی افزودگی جاری رکھنے کا ارادہ رکھتا ہے تو انہوں نے کہا کہ پرامن جوہری پروگرام قومی فخر اور شان کا معاملہ بن گیا ہے، ہم 12 دن کی مسلط کردہ جنگ سے بھی گزر چکے ہیں لہٰذا لوگ آسانی سے افزودگی سے پیچھے نہیں ہٹیں گے۔

ایران اور اسرائیل کے درمیان 12 روزہ جنگ کے بعد ایرانی سپریم لیڈر آیت اللہ علی خامنہ ای نے فتح کا اعلان کرتے ہوئے سوشل میڈیا پر دعویٰ کیا کہ اسرائیل کی حکومت عملی طور پر ایرانی حملوں میں کچل دی گئی ہے۔

تاہم امریکی صدر ڈونلڈ ٹرمپ نے سوشل میڈیا پر ردعمل دیتے ہوئے آیت اللہ خامنہ ای کے اعلان کو جھوٹ قرار دیتے ہوئے کہا کہ ایران کو تباہ کر دیا گیا ہے۔