تہران: ایرانی سپریم لیڈر آیت اللہ خامنہ ای نے امریکی صدر ڈونلڈ ٹرمپ کے اس مطالبہ کو مسترد کر دیا جس میں کہا گیا تھا کہ ایران غیر مشروط سرینڈر کر دے۔
قطری نشریاتی ادارے الجزیرہ کی رپورٹ کے مطابق سپریم لیڈر آیت اللہ خامنہ ای کا سرکاری ٹی وی پر اہم پیغام جاری کیا گیا جس میں انہوں نے کہا کہ اسرائیل نے بہت بڑی غلطی کی ہے اسے سزا ضرور ملے گی۔
ایران کی تاریخ سےباخبرلوگ جانتےہیں ہم دھمکیوں کاجواب کیسےدیتےہیں،ایرانی سپریم لیڈر#ARYNews pic.twitter.com/wYCrCd7bl7
— ARY NEWS (@ARYNEWSOFFICIAL) June 18, 2025
آیت اللہ خامنہ ای نے واضح کیا کہ شہدا کے خون اور اپنی سرزمین پر حملے کو نہیں بھولیں گے، دشمن مسلم ممالک میں پھوٹ ڈالنے کی کوشش کر رہا ہے، ہماری قوم اپنے شہدا کا خون رائیگاں نہیں جانے دے گی، ایرانی قوم فضائی حدود کی خلاف ورزیوں پر خاموش نہیں رہے گی۔
ایران اسرائیل کشیدگی سے متعلق تمام خبریں
انہوں نے خبردار کیا کہ صیہونی حکومت کو اپنے اقدامات کا خمیازہ بھگتنا پڑے گا، ایران کی تاریخ سے باخبر لوگ جانتے ہیں ہم دھمکیوں کا جواب کیسے دیتے ہیں۔
ان کا کہنا تھا کہ تنازع میں امریکی فوج کی مداخلت سے بلاشبہ ناقابل تلافی نقصان ہوگا، امریکا جان لے کہ ایران ہتھیار نہیں ڈالے گا، ایران کے دفاع کیلیے فوج حکومتی حمایت کے ساتھ پوری طرح تیار ہے، یہ قوم کبھی بھی دباؤ کے سامنے ہتھیار نہیں ڈالے گی۔
یہ بھی پڑھیں: سپریم لیڈر کا جنگ کے اختیارات سے متعلق بڑا فیصلہ
واضح رہے کہ گزشتہ روز امریکی صدر ڈونلڈ ٹرمپ نے اپنے بیان میں کہا تھا کہ ایرانی سپریم لیڈر آیت اللہ خامنہ ای آسان ہدف ہیں، ہمیں معلوم ہے وہ کہاں چھپے ہیں۔
ڈونلڈ ٹرمپ نے دھمکی دی تھی کہ ہمارا صبر جواب دے رہا ہے، سپریم لیڈر کو کم از کم ابھی نہیں مارنا چاہتے وہ فی الحال محفوظ ہیں، ہم چاہتے ہیں ایرانی میزائل امریکی فوجیوں پر نہ گرے۔
دوسری جانب امریکی حکام کا کہنا تھا کہ امریکی فوج نے جنگی طیاروں کو مشرقی وسطیٰ میں منتقل کرنا شروع کر دیا ہے، اسرائیلی دفاع مضبوط بنانے کیلیے جنگی طیاروں کی منتقلی بڑھا رہے ہیں۔
