Tag: Iran

تہران: ایران نے دعویٰ کیا ہے کہ وہ یورینیم کو 90 فی صد تک خالص افزودہ کرنے کی صلاحیت رکھتا ہے، جو نیوکلیئر ہتھیار کی بنیاد کے لیے ضروری ہے۔

تفصیلات کے مطابق صدر حسن روحانی نے بدھ کو کابینہ کے ایک اجلاس میں کہا کہ ایران کی اٹامک انرجی آرگنائزیشن 20 فی صد اور 60 فی صد تک یورینیم کی افزودگی کر سکتی ہے، اور اگر ہمارے ری ایکٹرز کو اس کی ضرورت ہو تو یہ یورینیم کو 90 فی صد تک خالص افزودہ بنا سکتے ہیں۔

خیال رہے کہ حسن روحانی اگلے ماہ اپنے عہدے سے سبک دوش ہو جائیں گے، انھوں نے 2015 کے جوہری معاہدے کی ابھی تک دوبارہ بحالی میں مذاکرات کی ناکامی کا الزام برسر اقتدار سخت گیر مذہبی عناصر پر عائد کیا ہے۔

حسن روحانی کا کہنا ہے کہ سخت گیر عناصر نے اس حکومت سے جوہری معاہدے تک پہنچنے کا موقع چھین لیا، ہمیں اس موقع سے محروم ہونے پر سخت افسوس ہے، تقریباً 6 ماہ کا موقع ضائع ہو گیا ہے۔

یاد رہے کہ جوہری معاہدہ 2018 میں اس وقت ختم ہو گیا تھا، جب امریکا اس سے نکل گیا اور صدر ڈونلڈ ٹرمپ نے ایران پر دوبارہ پابندیاں عائد کر دیں، جس نے ایران کی معیشت کو مفلوج کر دیا ہے، تہران نے اس کے جواب میں یورینیم افزودگی میں اضافہ کیا۔

ایرانی حکام کے مطابق آنے والے صدر ابراہیم رئیس نے جوہری مذاکرات میں ’ایک سخت مؤقف‘ اپنانے اور واشنگٹن سے ’کم لچک دکھانے اور زیادہ مراعات حاصل کرنے‘ کا منصوبہ بنایا ہے، کہا جا رہا ہے کہ مذاکرات کا اگلا دور ستمبر کے آخر یا اکتوبر کے اوائل سے قبل شروع نہیں ہو سکتا، خیال رہے کہ ویانا میں مذاکرات کا چھٹا دور 20 جون کو ملتوی ہوا تھا۔

تہران: ایران کے ریلوے نظام پر سائبر حملے سے پورے ملک کے ریلوے اسٹیشنز پر مسافروں میں افراتفری مچ گئی۔

تفصیلات کے مطابق ایران کے ریلوے سسٹم پر جمعے کو سائبر حملے کیے گئے، ہیکرز نے پورے ملک کے ریلوے اسٹیشنز کے ڈسپلے بورڈز پر ٹرینوں کی آمد میں مبینہ تاخیر اور منسوخی کے حوالے سے جعلی پیغامات پوسٹ کیے۔

ایران کی نیم سرکاری خبر ایجنسی کے حوالے سے امریکی خبر رساں ادارے نے بتایا کہ ہیکرز نے مضحکہ خیز طور سے ٹرینوں کی آمد میں تاخیر یا منسوخی کے پیغامات کے ساتھ ملک کے سپریم لیڈر آیت اللہ خامنہ ای کے دفتر کا فون نمبر بھی درج کیا، اور اس نمبر پر مسافروں سے معلومات طلب کرنے کا کہا گیا۔

اس ہیکر حملے سے ریلوے اسٹیشنز پر زبردست انتشار پیدا ہو گیا، تاحال کسی گروپ نے حملے کی ذمہ داری قبول نہیں کی ہے، دوسری طرف حکام نے یہ بھی کہا تھا کہ ملک بھر میں ٹرینوں کا الیکٹرانک ٹریکنگ سسٹم ختم ہو گیا ہے، تاہم یہ فوری طور پر واضح نہیں ہو سکا تھا کہ کیا یہ بھی سائبر حملے کا حصہ ہے۔

بعد ازاں مقامی نیم سرکاری میڈیا نے یہ نیوز رپورٹ ہٹا دی، اور سرکاری ریلوے کمپنی کے ترجمان صادق سكری کے حوالے سے کہا گیا کہ جو خلل آیا تھا، وہ ٹرین سروس کے لیے کسی قسم کی پریشانی کا باعث نہیں ہے۔

یاد رہے کہ 2019 میں بھی ریلوے کمپنی کے کمپیوٹر سرورز میں خرابی کے سبب ٹرین سروسز میں تاخیر کے متعدد واقعات سامنے آئے تھے، جب کہ اسی سال دسمبر میں ایران کی وزارت مواصلات نے کہا تھا کہ ملک نے ’الیکٹرانک انفراسٹرکچر‘ پر ایک بڑے پیمانے پر سائبر حملے کو ناکام بنا دیا ہے، تاہم اس حملے کے بارے میں کوئی تفصیل فراہم نہیں کی گئی تھی۔