ریاض: سعودی فرمانروا شاہ سلمان بن عبدالعزیز کا کہنا ہے کہ آئل فیکٹری پر حملوں کے بعد پیدا ہونے والی صورت حال سے نمٹنے کی صلاحیت رکھتے ہیں۔
اپنے ایک بیان میں شاہ سلمان کا کہنا تھا ملک آرامکو پر تباہ کن حملوں کے بعد کی صورت حال سے نمٹنا جانتے ہیں، ان حملوں سے توانائی کی عالمی سپلائی کے استحکام کو نشانہ بنانے کی کوشش کی گئی تھی۔
عرب میڈیا کا کہنا ہے کہ سعودی عرب نے ان حملوں کا الزام ایک بار پھر ایران پر عاید کیا ہے اور اسی تناظر میں دیگر عالمی طاقتوں سے مدد کی گزارش بھی کی گئی ہے۔
سعودی فرمانروا نے ان حملوں کی شدید مذمت کرتے ہوئے ذمے دار ایران کو ٹھہرایا، ان کے مطابق تہران حکومت مشرقی وسطیٰ میں بدامنی کی فضا قائم کرنا چاہتی ہے۔
سعودی تیل تنصیب کو نشانہ بنانے کا مقصد عالمی معیشت کو تباہ کرنا ہے،شاہ سلمان
یاد رہے کہ 15 مئی کو بھی دو دھماکہ خیز ڈرونوں نے حملہ کرکے وسطی سعودی عرب میں ارامکو کی آئل پائپ لائن کے دو بڑے اسٹیشنوں میں آگ لگا دی تھی، اس آئل فیلڈ سے پائپ لائن کے ذریعے بحر احمر کے ساحل کے مغرب میں تیل سپلائی کیا جاتا ہے۔
آئل تنصیبات پر حملے کے فوری بعد سعودی فرمانروا شاہ سلمان کا ردِ عمل سامنے آیا تھا جس میں ان کا کہنا تھا کہ تنصیبات پر حملے سے عالمی امن کے لئے خطرات پیدا ہوگئے ہیں، سعودی عرب آئل تنصیبات اور علاقے کا بھرپور دفاع کرے گا۔
