تہران: ایرانی وزیر خارجہ عباس عراقچی نے کہا ہے کہ اسرائیلی حملے رکنے تک کسی سے مذاکرات نہیں کرینگے۔
ایرانی سرکاری میڈیا سے بات چیت کرتے ہوئے ایرانی وزیرخارجہ عباس عراقی نے کہا کہ جب تک اسرائیلی حملے جاری رہیں گے، تہران کسی فریق کے ساتھ مذاکرات کیلئے بات چیت نہیں کرے گا۔
ایرانی وزیرخارجہ نے کہا کہ مغربی ممالک جانتے ہیں کہ اسرائیل تمام بین الاقوامی قوانین اور قراردادوں کی خلاف ورزی کررہا ہے لیکن پھر بھی مغربی ممالک ایران کے خلاف اسرائیل کی جارحیت کی مذمت نہیں کر رہے ہیں۔
ایران اسرائیل کشیدگی سے متعلق تمام خبریں
عباس عراقچی نے مزید کہا کہ ایران نے جس طرح اسرائیل کو جواب دیا ہے اس کے بعد امید ہے دیگر ممالک خود کو اس جارحیت سے دور رکھیں گے۔
ایران کے وزیر خارجہ نے مزید کہا کہ ایران کبھی بھی شہری آبادی خاص طور پر اسپتال کو نشانہ نہیں بناتا، لیکن اسرائیل جان بوجھ کر غزہ میں اسپتالوں اور رہائشی آبادیوں پر بمباری کرتا ہے۔
ایرانی سپریم لیڈر آیت اللّٰہ خامنہ اِی کا اہم بیان:
سپریم لیڈر آیت اللّٰہ خامنہ اِی کا کہنا تھا کہ اسرائیل کا امریکا سے مدد مانگنا اس کی کمزوری کو ظاہر کرتا ہے، صہیونی حکومت کے امریکی دوست منظر میں داخل ہو چکے ہیں۔
ان کا کہنا تھا کہ صہیونی حکومت کے امریکی دوست ایسی باتیں کہہ رہے ہیں جو صہیونی حکومت کی کمزوری اور نااہلی کو ظاہر کرتی ہیں۔
ماجد خادمی پاسداران انقلاب کی انٹیلی جنس سروس کے نئے سربراہ مقرر:
ایران کی جانب سے ماجد خادمی کو پاسداران انقلاب کی انٹیلی جنس سروس کا نیا سربراہ مقرر کردیا گیا ہے، ایرانی میڈیا نے ماجد خادمی کو پاسداران انقلاب کی انٹیلی جنس سروس کا نیا سربراہ بنائے جانے سے متعلق اطلاعات دی ہیں۔
