Tag: isb Airport

ایئر پورٹ پر مسافر کے پیٹ سے ہیروئن بھرے کیپسول برآمد

راولپنڈی : اسلام آباد انٹرنیشنل ایئرپورٹ پر ایک مسافر کے پیٹ سے ہیروئن بھرے کیپسول برآمد کرکے اسے گرفتار کرلیا گیا، بحرین جانے کی کوشش کر رہا تھا۔

تفصیلات کے مطابق اینٹی نارکوٹکس فورس (اے این ایف) کے مطابق اسلام آباد انٹرنیشنل ایئرپورٹ پر ایک مسافر کے پیٹ سے ہیروئن بھرے کیپسول برآمد کرلیے گئے ہیں۔

اے این ایف ترجمان کا کہنا ہے کہ مذکورہ مسافر کے پیٹ سے690گرام ہیروئن سے بھرے کیپسول برآمد ہوئے ہیں، مسافر غیرملکی ایئرلائن کی پرواز سے بحرین جانے کی کوشش کر رہا تھا۔

علاوہ ازیں اینٹی نارکوٹکس فورس کوئٹہ کے عملے نے پشین کے علاقے میں کامیاب کارروائی کرتے ہوئے منشیات کی بڑی کھیپ قبضے میں لے لی۔

ذرائع کا کہنا ہے کہ مجموعی طور پر106کلو ہیروئن برآمد کی گئی ہے، ذرائع کے مطابق 93کلو مارفین افغانستان سے اسمگل کی گئی تھی، منشیات گوادر سے بیرون ملک اسمگل کرنے کیلئے ذخیرہ کی گئی تھی۔

مارچ 28, 2022
اسلام آباد : مسافر سے کروڑوں مالیت کی ہیروئن برآمد، ویڈیو دیکھیں

اسلام آباد : اے این ایف اور اے ایس ایف نے اسلام آباد انٹرنیشنل ایئرپورٹ پر کامیاب مشترکہ کارروائی کرتے ہوئے منشیات کے اسمگلر کو حراست میں لے لیا۔

پی آئی اے کی پرواز نمبر پی کے 9753کے ذریعے اسلام آباد سے ریاض روانہ ہونے والے کوہاٹ کے رہائشی عادل خان نامی مسافر سے1.850 کلوگرام ہیروئن برآمد ہوئی ہے۔

اے این ایف کے مطابق برآمد شدہ ہیروئن کٹنگ بورڈ کے اندر مہارت سے چھپائی گئی تھی، ملزم کو اسکیننگ پراسیس کے دوران حراست میں لیا گیا۔

ترجمان اے این ایف کا کہنا ہے کہ ملزم کو حراست میں لے کر تھانے منتقل کردیا گیا ہے، ملزم کے خلاف انسداد منشیات ایکٹ کے تحت مقدمہ درج کرکے مزید تفتیش کی جارہی ہے۔

مارچ 3, 2022
اسلام آباد ایئرپورٹ آنے والی گاڑی سے اسلحہ برآمد

اسلام آباد : ایئر پورٹ سیکیورٹی فورس (اے ایس ایف) نے اسلام آباد ایئرپورٹ کی حدود میں کامیاب کارروائی کرتے ہوئے ایک مشبتہ کار کی تلاشی لی۔

ایئرپورٹ سیکیورٹی فورس کے ترجمان کا کہنا ہے کہ نیو اسلام آباد انٹرنیشنل ائیر پورٹ پر اے ایس ایف اہلکاروں نے کارروائی کی جس میں اسلحہ برآمد کیا گیا۔

ترجمان کے مطابق اے ایس ایف اہلکاروں نے ائیر پورٹ کے داخلی دروازے پر چیکنگ کے دوران گاڑی سے اسلحہ برآمد کیا۔اے ایس ایف کے مطابق گاڑی سے ایک تیس بور پستول،20گولیاں اورتین میگزین برآمد کی گئیں ہیں۔

ابتدائی تحقیقات کے مطابق مذکورہ گاڑی کے ڈرائیور کو حراست میں لے لیا گیا ہے، اے ایس ایف نے واقعے کی مزید تحقیقات شروع کردی۔

فروری 19, 2022
اسمگلنگ میں ملوث خاتون مسافر گرفتار، بھاری مالیت کی کرنسی برآمد

اسلام آباد : ایئر پورٹ پر اے ایس ایف نے اسلام آباد ایئر پورٹ پر منی لانڈرنگ کی کوشش ناکام بناتے ہوئے خاتون مسافر کو رنگے ہاتھوں پکڑ کر بھای مالیت کی رقم برآمد کرلی۔

تفصیلات کے مطابق اسلام آباد ایئرپورٹ سیکیورٹی فورس (اے ایس ایف) کے عملے نے اسلام آباد سے بیرون ملک جانے والی خاتون مسافر کے قبضے سے 79 ہزار 480 امریکی ڈالر برآمد کرلیے، مذکورہ ملزمہ یہ رقم غیر قانونی طر یقے سے پر دوحہ منتقل کرنا چاہ رہی تھی۔

خاتون مسافر کے قبضے سے 79ہزار480امریکی ڈالر برآمد ہوئے جو اس نے اپنے بیگ کے اندر کپڑوں میں مہارت سے چھپا رکھے تھے۔

مزید پڑھیں : اسلام آباد ایئر پورٹ پر منی لانڈرنگ کی کوشش ناکام، مسافرسے 50ہزار یواے ای درہم برآمد

اےایس ایف ذرائع کا کہنا ہے کہ برآمد ہونے والی رقم کی مقامی کرنسی میں مالیت ایک کروڑ40لاکھ روپے سے زائد ہے، ملزمہ کو فوری طور پر حراست میں لے کر مزید کارروائی کے لئے کسٹمز حکام کے حوالے کر دیا گیا ہے۔

جنوری 25, 2022
ایئر پورٹ عملے کی فرض شناسی : مسافر کو قیمتی سامان اور نقدی مل گئی

کراچی : اسلام آباد ایئرپورٹ پر سول ایوی ایشن (سی اے اے) کے عملے نے ایمانداری اور فرض شناسی کی مثال قائم کردی۔ ،مسافر کا قیمتی سامان اور ڈالر واپس کردیئے گئے۔،

ذرائع کے مطابق اسلام آباد ایئرپورٹ پر قیصر نوید نامی مسافر اپنا دستی سامان بھول گیا تھا، مسافر ایمریٹس ایئرلائن کی پرواز ای کے 614کے ذریعے ساؤتھ کوریا براستہ دبئی سے اسلام آباد پہنچا تھا۔

اس حوالے سے مسافر کا کہنا ہے کہ گھر پہنچ کر مجھے خیال آیا کہ میں اپنا ایک دستی سامان ایئرپورٹ پر ہی بھول گیا ہوں، میں نے سی اے اے کو اپنے سامان گم ہونے کی تحریری درخواست دی۔

درخواست کی وصولی کے بعد ایئرپورٹ کے عملے نے سی سی ٹی وی فوٹیج کی مدد سے چیک کیا تو دیکھا کہ میں سامان بیلٹ پر ہی بھول گیا تھا۔

مسافر قیصر نوید نے بتایا کہ غلطی سے دوسرا مسافر میرا سامان لے گیا تھا، ٹرمینل منیجر نے مذکورہ مسافر سے ملتان میں رابطہ کرکے میرا سامان واپس ایئرپورٹ منگوایا۔

سی اے اے ترجمان کا کہنا ہے کہ سامان ملنے پر مسافر سے رابطہ کرکے ضروری کارروائی کے بعد مسافر قیصر نوید کے حوالے کردیا گیا۔

سامان میں تقریباً 6ہزار500امریکی ڈالر،2قیمتی موبائل فون سمیت قیمتی سامان موجود تھا، سامان ملنے پر مسافر نے سول ایوی ایشن اتھارٹی کے عملے کا شکریہ ادا کیا۔

اپریل 9, 2021
اربوں روپے مالیت سے بننے والے اسلام آباد ایئر پورٹ کی چھت پھر ٹپکنے لگی

کراچی: اربوں روپے مالیت سے بننے والے اسلام آباد ایئر پورٹ کی چھت پھر ٹپکنے لگی ہے۔

اے آر وائی نیوز کے مطابق نیو اسلام آباد ایئر پورٹ کے ڈومیسٹک ارائیول لاؤنج میں ایک بار پھر چھت ٹپکنے لگی ہے، اور پانی لاؤنج میں جمع ہو گیا۔

سی اے اے ذرائع کا کہنا ہے کہ ایئر پورٹ پر ڈریمز کی لائن پھٹ گئی ہے، پائپ لائن پھٹ جانے کی وجہ سے پانی ٹرمینل بلڈنگ کی چھت سے دھار کی صورت میں لاؤنج میں گر رہا ہے۔

لاؤنج میں پانی آنے سے مسافروں کو پریشانی کا سامنا کرنا پڑ رہا ہے، ذرائع کا کہنا ہے کہ اس ایئر پورٹ پر سسٹم کی خرابی معمول بن گئی ہے، اس سلسلے میں اے آر وائی نیوز کو موصول ایک ویڈیو میں دیکھا جا سکتا ہے کہ لاؤنج میں آنے والے پانی کو وائپرز کے ذریعے صاف کرنے کی کوشش کی جا رہی ہے۔

ذرائع کے مطابق سول ایوی ایشن اتھارٹی نے اسلام آباد ایئر پورٹ پر منیجر سمیت اہم عہدوں پر جونئیر افسران کو تعینات کر رکھا ہے، جو ایئر پورٹ کا سسٹم آپریٹ کرنے میں ناکام ہیں۔

واضح رہے کہ اس سے قبل بھی کئی مرتبہ اسلام آباد ایئرپورٹ کی چھت ٹپکنے کے واقعات سامنے آ چکے ہیں، چھت کی ٹائلیں بھی ٹوٹ کر نیچے گری تھیں۔

دسمبر 23, 2020
سول ایوی ایشن اہلکار نے ایمانداری کی اعلیٰ مثال قائم کردی

اسلام آباد : ایمانداری کی اعلیٰ مثال قائم کرتے ہوئے سول ایوی ایشن اہلکار نے مسافر کو10لاکھ روپے واپس دلوادیے، ملنے والابیگ مسافر کو واپس لوٹا دئیے۔

اطلاعات کے مطابق اسلام آباد انٹرنیشنل ائیرپورٹ پر سول ایوی ایشن اہلکار نے فرض شناسی اور دیانت داری کی اعلی مثال قائم کردی، ایک مسافر کی ائیرپورٹ پر 10 لاکھ روپے کی کھوئی ہوئی رقم واپس دلوا دی۔

اس حوالے سے ذرائع کا کہنا ہے کہ مذکورہ مسافر قومی ائیر لائن کی پرواز300 کے ذریعے کراچی سے اسلام آباد ائیر پورٹ پر پہنچا تھا اور واش روم میں محمد شاکر نامی مسافر اپنا پیسوں سے بھرا بیگ بھول گیا تھا۔

اس دوران سی اے اے اہلکار کو وہ بیگ ملا جس میں پاکستانی 10 لاکھ روپے موجود تھے، اہلکار کی اطلاع پر سی اے اے انتظامیہ نے سی سی ٹی کیمروں اور دیگر ذرائع سے مسافر کو تلاش کرلیا۔

بعد ازاں ائیر پورٹ مینجر عدنان خان اور ایس ٹی ایم آفتاب آصف نے مذکورہ مسافر سے اس کے بیگ کی شناخت معلوم کرکے پیسوں سے بھرا بیگ اس کے حوالے کردیا۔ مسافر محمد شاکر نے رقم واپس ملنے پر سول ایوی ایشن افسران کا شکریہ ادا کیا۔

نومبر 7, 2020
طوفانی جھکڑ، ایئرپورٹ کے شیشے ٹوٹ کر بکھر گئے

اسلام آباد: وفاقی دار الحکومت میں طوفانی ہواؤں اور جھکڑوں کی وجہ سے ایئر پورٹ کے شیشے ٹوٹ گئے۔

اے آر وائی نیوز کے مطابق اسلام آباد میں طوفانی جھکڑوں سے اسلام آباد ایئرپورٹ کے داخلی دروازوں کو شدید نقصان پہنچا ہے، تیز جھکڑوں کی وجہ سے داخلی راستوں کے شیشے بھی ٹوٹ گئے۔

تیز ہواؤں نے ایئر پورٹ پر لگی فار سیلنگ کو بھی نقصان پہنچایا، اور فار سیلنگ کی چھت گر گئی، تاہم کسی کے زخمی ہو نے کی اطلاع موصول نہیں ہوئی ہے۔

اس واقعے سے ایئرپورٹ کی ناقص تعمیر کا پول ایک بار پھر کھل گیا ہے، تیز ہواؤں سے ڈومیسٹک ڈپارچر لاؤنج کے اسموکنگ زون پر لگا شیشہ بھی ٹوٹ گیا، ناقص سیلنگ تیز ہواؤں کا زور برداشت نہ کر سکی ، سی ون ریموٹ ایریا کی چھت کی سیلنگ بھی نیچھے آ گری۔

واضح رہے کہ یکم مئی 2018 کو اس وقت کے وزیر اعظم شاہد خاقان عباسی نے نیو اسلام آباد انٹرنیشنل ایئر پورٹ کا افتتاح کیا تھا، یہ پاکستان میں سب سے بڑا اور جدید ترین ایئرپورٹ ہے۔

خیال رہے کہ گزشتہ رات سے اسلام آباد اور گرد و نواح میں تیز جھکڑوں کے ساتھ موسلا دھار بارش کا سلسلہ شروع ہوا ہے، ہری پور، راولپنڈی، میرپور آزاد کشمیر، کوئٹہ، جہلم، مستونگ، گجرات، جلالپور بھٹیاں میں بھی تیز بارش ہو رہی ہے۔

چلاس اور گرد و نواح میں بھی رات گئے بارش سے موسم خوش گوار ہو گیا ہے، دیامر کے تینوں تحصیلوں میں بارش کے ساتھ پہاڑوں پر برف باری بھی شروع ہو گئی ہے، مضافاتی علاقوں میں سیلابی ریلے سے رابطہ سڑکیں متاثر ہو گئیں، بارشوں کے باعث دیامر، کوہستان میں شاہر اہ قراقرم پر لینڈ سلائیڈنگ کا بھی خدشہ ہے۔

مئی 3, 2020
اسلام آباد ائیر پورٹ : طیارے کے پہیے کے نیچے آکر جنگلی جانور ہلاک

کراچی : اسلام آباد ائیر پورٹ کے رن وے پر اچانک ایک جنگلی جانور گھس آیا اور طیارے کے ویل کے نیچے آ کر مرگیا، اطلاع ملتے ہی انتظامیہ کی دوڑیں لگ گئیں۔

تفصیلات کے مطابق غیر ملکی ائیر لائن کی پرواز ابو ظہبی سے اسلام آبا د پہنچی تھی، طیارہ لینڈنگ کے بعد رن وے نمبر28 ایل پر ٹیکسی وے پر موجود تھا۔

اس موقع پر کپتان نے دیکھا کہ طیارے کے سیدھی سائیڈ پر ویل کے نیچے ایک جنگلی سور آگیا ہے جو کچل کر ہلاک ہوگیا تھا۔

کپتان نے فوری طور پر کنٹرول ٹاور کو اطلاع دی کہ اس کے طیارے کے ویل سے ایک جانور ٹکرا گیا ہے، کپتان کی اطلاع پر سی اے اے کی ٹیم فوری طور پر رن وے پر پہنچ گئی۔

بعد ازاں رن وے پر سے مردہ جانور کی باقیات فوری طور ہٹا کر رن وے کو کلیئر کر دیا گیا، اس حوالے سے ترجمان سی اے اے کا کہنا ہے کہ یہ جنگلی جانور فینسگ کے نیچے سے زمین کھود کر رن وے تک پہنچ گیا تھا۔

مزید پڑھیں: ایئرپورٹس پر طیاروں سے پرندے ٹکرانے کے واقعات میں تسلسل سے اضافہ

یاد رہے کہ ملک کے مختلف ایئرپورٹس پر طیاروں سے پرندے ٹکرانے کے واقعات میں تسلسل سے اضافہ ہورہا ہے سب سے زیادہ پی آئی اے کے طیارے متاثر ہوئے۔

ایئرپورٹس کے اطراف صفائی ستھرائی کے ناقص انتظامات کے باعث گندگی پر منڈلانے والے پرندے جہازوں سے ٹکرانے کی وجہ بنے اور ملکی اور غیر ملکی ائیرلائن کے طیاروں کو نقصان پہنچا۔

جنوری 20, 2020
اے ایس ایف اہلکاروں کی مسافروں سے بدتمیزی، منیجر سمیت پوری ٹیم معطل

اسلام آباد : اے ایس ایف اہلکاروں کی نیو اسلام آباد ائیرپورٹ پر مسافروں سے بد اخلاقی پر منیجر اور ڈیوٹی ٹرمینل منیجر کو معطل کردیا گیا، وزیرِاعظم عمران خان کے نوٹس لینے پر انتظامیہ کی دوڑیں لگ گئیں۔

تفصیلات کے مطابق نیواسلام آباد انٹرنیشنل ائیرپورٹ پر اے ایس ایف اہلکاروں کی جانب سے مسافروں سے بد اخلاقی کے واقعے پر وزیرِ اعظم عمران خان نے سخت نوٹس لیتے ہوئے متعلقہ افسران کے خلاف سخت ایکشن لینے کی ہدایت کی تھی۔

اس حوالے سے ذرائع کا کہنا ہے کہ پشاور فلائٹ واقعے کی عبوری رپورٹ موصول ہونے پر ہوابازی ڈویژن کو متعلقہ افسران کے خلاف سخت ایکشن لینے کی ہدایت دی گئی تھی۔

جس کے بعد ائیرپورٹ منیجر طاہرسکندر، ڈیوٹی ٹرمینل منیجر ظہور اورملک اکرم کو فوری طور پر معطل کرنے کا حکم دے دیا گیا۔

اس کے علاوہ صورتحال کو پیشہ وارانہ انداز سے نمٹنے میں ناکامی پر مذکورہ افسران کے خلاف انضباطی کاروائی کا حکم بھی دیا گیا ہے۔

ذرائع کے مطابق اسٹیشن منیجر پی آئی اے اسلام آباد پرویز نصیر اور ان کی پوری ٹیم کو معطل کرنے اور ان کے خلاف انضباطی کاروائی شروع کرنے کا حکم جاری کردیا گیا ہے۔

واقعے کی تحقیقات کیلئے بریگیڈئیرعرفان ظفر کی سربراہی میں بورڈ آف انکوائری تشکیل دے دیا گیا، انکوائری بورڈ پاکستان آرمی ایکٹ 1952کے تحت واقعے میں ملوث اے ایس ایف اہلکاروں کے خلاف کاروائی کرے گا۔

بورڈ آف انکوائری دس دنوں میں کاروائی مکمل کر کے رپورٹ پیش کرے گا۔ واضح رہے کہ سول ایوی ایشن، پی آئی اے اور اے ایس ایف کو فوری طور پر وزیرِ اعظم کے حکم پر عمل درآمد کرنے کی ہدایت دے دی گئی ہے۔

یاد رہے کہ چند روز قبل ریاض سے پشاور آنے والی پی آئی اے کی پرواز موسم کی خرابی کے باعث اسلام آباد ائیرپورٹ پر اتار لی گئی تھی۔

اے ایس ایف اہلکاروں کی بدتمیزی: واقعے پر تحقیقات کیلیے انکوائری کمیٹی قائم

موسم کی خرابی کے باعث پرواز کی روانگی میں کئی گھنٹے تاخیر پر مسافروں نے احتجاج کیا جس کو روکنے کے لیے اے ایس ایف اہلکاروں کو طلب کیا گیا۔

اے ایس ایف اہلکاروں نے معاملہ حل کرنے کے بجائے مسافروں پر تھپڑ اور گھونسوں کی بارش کردی لیکن واقعے کے بعد اے ایس ایف اور سی اے اے کی جانب سے کوئی ایکشن نہیں لیا گیا جس کے بعد ہنگامے کی ویڈیو سوشل میڈیا پر وائرل ہوگئی۔

اکتوبر 30, 2019