اسلام آباد : پی ٹی آئی کے رہنما سینیٹر اعظم سواتی نے چیف جسٹس اسلام آباد ہائی کورٹ کے نام خط ارسال کیا ہے جس میں کہا ہے کہ مجھے آپ کی عدالت پر اعتماد نہیں ہے۔
اس حوالے سے ذرائع کا کہنا ہے کہ سینیٹر اعظم سواتی نے جیل سے چیف جسٹس اسلام آباد ہائی کورٹ کے نام ایک خط تحریر کیا ہے جس میں انہوں نے اپنے کیس میں ہونے والی تاخیر سے متعلق شکایت کی ہے۔
ذرائع کے مطابق اعظم سواتی کے خط کے متن میں تحریر ہے کہ مجھے آپ کی عدالت پر اعتماد نہیں ہے میرا مقدمہ کسی دوسری عدالت میں منتقل کیا جائے۔
اعظم سواتی کا کہنا ہے کہ فیصلے میں تاخیر کی وجہ سے مجھے اغواء کرکے پہلے بلوچستان اور پھر صوبہ سندھ لے جایا گیا۔
مذکورہ مبینہ خط میں اعظم سواتی نے بتایا ہے کہ ضمانت کی درخواست کا فیصلہ محفوظ ہونے کے بعد اسپیشل جج کا تبادلہ کیا گیا۔
دوسری جانب ہائیکورٹ ذرائع کا کہنا ہے کہ سینیٹر اعظم سواتی کی جانب سے ان کا کوئی خط ہائی کورٹ انتظامیہ کو موصول نہیں ہوا۔
ذرائع کے مطابق سینیٹر اعظم سواتی نے اسلام آباد کے سیکٹر آئی نائن میں قائم سی آئی اے سب جیل میں ڈپٹی سپرنٹنڈنٹ کو مذکورہ خط جمع کرایا ہے۔
ذرائع کا مزید کہنا ہے کہ اعظم سواتی نے یہ خط اسلام آباد ہائی کورٹ کے چیف جسٹس کو پہنچانے کے لیے جمع کرایا ہے جبکہ ہائی کورٹ ذرائع نے بتایا کہ ان کی ضمانت کا کیس سننے والے جج کا تبادلہ معمول کے مطابق ہوا ہے۔
