Tag: Islamabad HC

اسلام آباد: شادی سے انکار پر 24 سالہ لڑکی کے قتل پر سزا پانے والے شہزاد کی سزا کے خلاف اپیل پر فیصلہ جاری ہو گیا، اسلام آباد ہائیکورٹ نے ٹرائل کورٹ کا 25 سال قید بامشقت سزا کا فیصلہ کالعدم قرار دے دیا۔

اسلام آباد ہائیکورٹ نے ٹرائل کورٹ کے فیصلے پر سنگین نوعیت کے سوالات اٹھا دیے ہیں، اور سزا کو بلاجواز قرار دے دیا، ہائیکورٹ نے ٹرائل کورٹ کو فیصلے کی وجوہ لکھنے کی ہدایت کرتے ہوئے کہا کہ قتلِ عمد کے ملزم کو سزائے موت کیوں نہیں دی گئی؟

اسلام آباد ہائیکورٹ نے فیصلے میں کہا کہ ٹرائل کورٹ کا پورا فیصلہ 25 سال سزا دینے کی وضاحت کرنے میں ناکام رہا ہے، اس لیے ٹرائل کورٹ 45 دن میں کیس کا وجوہ پر مبنی دوبارہ فیصلہ کرے۔

اسلام آباد ہائیکورٹ کے جسٹس محسن اختر کیانی نے 8 صفحات پر مشتمل تفصیلی فیصلہ جاری کر دیا، مدعی کے مطابق شہزاد 5 ماہ تک سونیا کا پیچھا کرتا رہا اور پھر رشتہ بھیجا، وکیل کے مطابق شادی سے انکار پر شہزاد نے سونیا اور اُس کے والد کو جان سے مارنے کی دھمکیاں دیں، 30 نومبر 2020 کو سونیا کو صبح ساڑھے 9 بجے سر میں گولی مار کر قتل کر دیا گیا، جائے وقوعہ سے ملنے والا گولی کا شیل ملزم سے ریکور ہونے والے پستول سے میچ کر گیا۔

مقدمے کی تفصیل کے مطابق اپیل کنندہ کے وکیل اور اسٹیٹ کونسل 25 سال قید سے متعلق پوچھنے پر کوئی قابلِ جواز وجہ پیش نہ کر سکے، ٹرائل کورٹ نے فیصلے میں قتل کے مقصد، گواہوں کی شہادت اور جائے وقوعہ سے ملنے والے شواہد کو تسلیم کیا، ٹرائل کورٹ حتمی پیراگراف میں 25 سال قید بامشقت کی سزا دینے کا جواز پیش نہیں کر سکی، ملزم کو دی جانے والی سزا کی واضح وجوہ بیان کرنا ٹرائل کورٹ کی بنیادی ذمہ داری ہے۔

فیصلے میں کہا گیا کہ ٹرائل کورٹ نے ملزم کو سیکشن 302 سی کے تحت 25 سال قید بامشقت کی سزا سنائی، 302 سی کے تحت سزا صرف اُن کیسز میں دی جا سکتی ہے جہاں قصاص کی سزا نہ دی جا سکتی ہو، سوال اٹھتا ہے کہ کیا ٹرائل کورٹ اس معاملے کو سیکشن 302 سی کے تحت دیکھ سکتی تھی، ٹرائل کورٹ نے بنیادی لیگل فریم ورک کو نظرانداز کیا اور بغیر جواز نتیجے پر پہنچ گئی، ٹرائل کورٹ نے محض قتل کے وقت کے تضاد کا ملزم کو فائدہ دیتے ہوئے 25 سال قید کی سزا سنائی۔

اسلام آباد ہائیکورٹ نے تحریری فیصلے میں کہا کہ عام حالات میں قتل کی سزا موت ہے، اور مخصوص پیرامیٹرز کی بنیاد پر سزائے موت کو کم کر کے عمر قید کیا جا سکتا ہے، ٹرائل کورٹ نے اس کیس میں قتلِ عمد کی سزا موت کے اہم ترین عنصر کو نظرانداز کیا، ٹرائل کورٹ کو سزائے موت نہ دینے کی وجوہات لازمی طور پر فراہم کرنی چاہئیں۔

فیصلے کے مطابق قتل کے کیس میں سزا کا تعین نہایت اہمیت کے حامل ہے، اس کے لیے احتیاط سے کام لینا چاہیے، یہ نوٹ کرنا بھی ضروری ہے کہ سزائے موت میں کمزور بنیادوں پر کمی نہیں کی جانی چاہیے، عدالت سمجھتی ہے کہ جب تک سزا کا فیصلہ وجوہ بیان کر کے درست نہ کر لیا جائے یہ عدالت فیصلہ نہیں کر سکتی۔

اسلام آباد ہائیکورٹ نے کہا سزا کا فیصلہ کالعدم قرار دے کر کیس دوبارہ فیصلے کے لیے ریمانڈ بیک کیا جاتا ہے، ٹرائل کورٹ فریقین کو سماعت کا ایک موقع دے اور 45 دن میں وجوہ پر مبنی فیصلہ دے۔

اسلام آباد: پولیس کو عدالتی احاطے سے کسی بھی ملزم کو گرفتار کرنے سے روک دیا گیا۔

تفصیلات کے مطابق اسلام آباد ہائی کورٹ کے احاطے سے خاتون ملزمہ شبانہ کنول کی گرفتاری کے کیس کی سماعت کرتے ہوئے ہائی کورٹ کے جسٹس ارباب محمد طاہر نے بڑا حکم جاری کرتے ہوئے ہائی کورٹ اور ماتحت عدالت کے احاطے سے کسی بھی ملزم کی گرفتاری سے پولیس کو روک دیا۔

جسٹس ارباب محمد طاہر نے کہا ہائیکورٹ، سیشن کورٹ اور جوڈیشل کمپلیکس کے احاطے سے کوئی ملزم گرفتار نہیں کیا جائے گا۔

ایس ایس پی انویسٹیگیشن رخسار مہدی عدالتی حکم پر ہائیکورٹ میں پیش ہوئے، عدالت نے ان کو ہدایت کی کہ آئی جی اسلام آباد سے میٹنگ کر کے اپنا ایس او پی بنائیں اور عدالت کو اس سے آگاہ کریں، اور آئی جی صاحب کو بتائیں کہ ہائیکورٹ کے احاطے سے کوئی ملزم گرفتار نہیں ہوگا۔

ایس ایس پی انویسٹیگیشن نے کہا ہائیکورٹ کے احاطے سے اہلکار نے جو گرفتاری کی اس پر میں شرمندہ ہوں، جسٹس ارباب نے کہا آپ انتہائی قابل اور اپ رائٹ آفیسر ہیں، آپ اپنے آئی جی سے ملیں اور ایس او پی بنائیں، ایس ایس پی نے عدالت کو بتایا کہ عموماً احاطے سے گرفتاری کبھی ہوتی نہیں پتا نہیں کیوں اس کیس میں ایسا ہوا، متعلقہ اے ایس آئی معطل کو کر دیا گیا ہے اور مزید تحقیقات بھی کر رہے ہیں، آئندہ ایسا نہیں ہوگا۔

جسٹس ارباب نے کہا آپ کو تکلیف دینے کا مقصد آپ کو بتانا تھا کہ عدالت کے احاطے سے گرفتاریاں شروع ہو گئی ہیں، وہ خاتون تھی جیسے ہی اس عدالت سے باہر گئی اسے گرفتار کر لیا گیا، فیکٹ آپ کو پتا ہے کہ مئی 2023 میں کوئی ایف آئی آر درج تھی، ہم نے پوچھا کوئی اور کیس ہے تو بتا گیا کہ کوئی کیس نہیں، لیکن جب وہ باہر گئی تو اسے گرفتار کر لیا گیا، آپ اپنے آئی جی سے میٹنگ کریں اور ایس او پیز طے کریں۔

جسٹس ارباب محمد طاہر نے حکم دیا کہ ہائی کورٹ، سیشن کورٹ یا کسی خصوصی عدالت کے احاطے سے کسی کو گرفتار نہیں کیا جائے گا، انھوں نے ہدایت کی کہ آپ احاطہ عدالت سے گرفتاری روکنے پر ہدایات لیں گے، اور جو بھی اس میٹنگ کا آرڈر ہوگا آپ یہاں دیں گے، اس کے لیے ہم آپ کو دو دن کا وقت دیتے ہیں، ہدایات لے کر ہائیکورٹ کو آگاہ کر دیں۔

ایس ایس پی انویسٹیگیشن نے عدالت سے استدعا کی کہ شریک ملزم کا کیس بھی دیکھ لیں جس کی وجہ سے یہ خاتون گرفتار ہوئی، جسٹس ارباب نے کہا اسے بھی دیکھ لیں گے وہ کوئی سپارے نہیں بیچتا تھا۔ بعد ازاں عدالت نے کیس کی سماعت دو دن بعد تک ملتوی کر دی۔