Tag: islamabad high court

اسلام آباد ہائیکورٹ: ذکی الرحمان لکھوی کی نظربندی کالعدم ،رہائی کاحکم

اسلام آباد: اسلام آباد ہائیکورٹ نے ممبئی حملہ کیس کے ملزم ذکی الرحمان لکھوی کی نظربندی کو غیرقانونی قرار دیتے ہوئے رہائی کا حکم دے دیا

اسلام آباد ہائیکورٹ میں ممبئی حملہ کیس کے ملزم ذکی الرحمان لکھوی کی نظر بندی کیخلاف درخواست کی سماعت ہوئی، جسٹس نور الحق قریشی نے عبوری حکم نامہ جاری کرتے ہوئے نظربندی کالعدم قرار دیتے ہوئے رہائی کا حکم دیدیا۔

ذکی الرحمان لکھوی کی ممبئی حملہ کیس میں پہلے ہی ضمانت ہوچکی ہے، جس کی منسوخی کیلئے وفاقی حکومت نے انسدادِ دہشت گردی کی عدالت میں درخواست دائر کر رکھی ہے، جس پرفریقین کو نوٹس جاری کیےگئے ہیں۔

تاہم وفاقی حکومت نے ضمانت کے بعد امن و امان کے خدشے کے سبب ذکی الرحمان لکھوی کو نظر بند کردیا تھا۔ جس کے خلاف ملزم نےاسلام آباد ہائی کورٹ میں اپیل دائر کی تھی۔

واضح رہے کہ ہندوستان کی جانب سے الزام لگایا گیا تھا کہ ذکی الرحمن لکھوی ممبٔی حملہ کیس کا ماسڑ مائنڈ ہیں، جس پر پاکستان نے چند سال قبل انہیں مظفر آباد سے آتے ہوئے گرفتار کیا تھا۔

مارچ 13, 2015
چیئرمین، ڈپٹی چیئرمین سینیٹ انتخابات، اٹارنی جنرل کو نوٹس جاری

اسلام آباد: اسلام آباد ہائیکورٹ نےچیئرمین اورڈپٹی چیئرمین سینیٹ کےانتخابات سے متعلق اٹارنی جنرل کو نوٹس جاری کردیا ہے۔

اسلام آباد ہائی کورٹ میں سیکریٹری اطلاعات تحریکِ انصاف شیریں مزاری کی جانب سےچیئرمین اور ڈپٹی چیئرمین سینیٹ کے انتخابات سے متعلق درخواست کی سماعت ہوئی۔

شیریں مزاری کے وکیل نے مؤقف اختیار کیا کہ فیڈریشن کے یونٹ مکمل ہونے تک چیئرمین، ڈپٹی چیئرمین کے انتخابات نہیں ہوسکتے، وکیل شیریں مزاری وکیل نے اپنے دلائل میں کہا کہ آئین کے آرٹیکل انسٹھ اور ساٹھ کے بعد چیئرمین اور ڈپٹی چیئرمین سینیٹ کےانتخابات عمل میں لائے جاسکتےہیں۔

شیریں مزاری کے وکیل نےعدالت کو بتایا کہ سینیٹ میں اس وقت فاٹا اور وفاق کی کوئی نمائندگی نہیں ہے جبکہ اسلام آباد ہائیکورٹ نے راحیلہ مگسی کی تعیناتی کا بھی نوٹیفیکیشن روک رکھا ہے۔

جسٹس اطہرمن اللہ نے استفسار کیا کہ کیاسینیٹ میں فاٹا کے ارکان موجود ہیں، جسٹس اطہر من اللہ نے ریمارکس دیتے ہوئے کہا کہ اگرکوئی سینیٹر مر جائے یا صوبوں سے کچھ سینیٹرز ریٹائر ہوجائیں تو سینیٹ کی کارروائی نہ توروکی جاسکتی ہے اور نہ ہی کارروائی غیرقانونی ہوتی ہے۔

عدالت نےاٹارنی جنرل سےتحریری جواب طلب کرتے ہوئے مقدمے کی سماعت ایک ہفتے تک ملتوی کر دی۔

مارچ 10, 2015
سلمان تاثیر قتل کیس: ممتاز قادری کی سزائے موت برقرار

اسلام آباد: گورنر سلمان تاثیر قتل کیس میں اسلام آباد ہائیکورٹ نے ملزم ممتاز قادری کی سزائے موت برقرار رکھنے کا حکم دیا ہے۔

سابق گورنر پنجاب شہباز تاثیر کے قاتل ممتاز قادری کی سزائے موت کیخلاف اپیل کی سماعت اسلام آباد ہائیکورٹ میں ہوئی، عدالت نے مجرم ممتاز قادری کی اپیل خارج کرتے ہوئے سزائے موت کا حکم برقرار رکھنے کا حکم دیا۔

عدالت نے سزائے موت کے مجرم کیخلاف انسداد دہشتگردی قانون کے تحت لگائی گئی دفعات کو ختم کردیا۔

گزشتہ روز اسلام آباد ہائیکورٹ کے دو رکنی بنچ جسٹس نورالحق این قریشی اور جسٹس شوکت عزیز صدیقی نے دونوں فریقین کے دلائل سننے کے بعد سابق گورنر پنجاب سلمان تاثیر قتل کیس میں گرفتار ملک ممتاز قادری کی انسداد دہشت گردی کی عدالت سے ہونے والے سزائے موت کیخلاف اپیل پر فیصلہ محفوظ کیا تھا۔

ممتاز قادری کو انسدادِ دہشت گردی کی عدالت نے سلمان تاثیر قتل کیس میں موت کی سزا سنائی تھی، جسے درخواست گزار نے عدالت میں چیلنج کیا تھا۔

کیس کے فیصلہ کے موقع پر سکیورٹی پلان ترتیب دے دیا گیا ہے جسکے تحت ضلعی انتظامیہ اور پولیس کی جانب سے سکیورٹی خدشات کے باعث اضافی نفری تعینات کی جائے گی۔

ہائیکورٹ کی طرف سے آنے والے تمام داخلی و خارجی راستوں کو بلاک کردیا جائے گا اور عدالت کے اردگرد قائم عمارتوں پر کمانڈوز تعینات کئے جائیں گے۔

واضح رہے کہ ممتاز قادری نے چار جنوری دوہزار گیارہ کو اسوقت کے گورنر پنجاب سلمان تاثیر کو قتل کردیا تھا، عدالت نے یکم اکتوبر دوہزار گیارہ کو ممتاز قادری کو موت کی سزا سنائی تھی ۔

مارچ 9, 2015
عدالت نے ظفرجھگڑا،راحیلہ مگسی کی کامیابی کانوٹیفکیشن روک دیا

اسلام آباد: اسلام آباد ہائیکورٹ نے ن لیگ کے ظفر اقبال جھگڑا اور راحیلہ مگسی کی کامیابی کا نوٹیفیکیشن روک دیا۔

اسلام آباد ہائیکورٹ نے ن لیگ کے ظفر اقبال جھگڑا اورراحیلہ مگسی کی کامیابی کا نوٹیفیکیشن روک دیا، عدالت نے اسلام آباد سے جنرل اور خواتین کی نشستوں کیلئےالیکشن لڑنے والے لیگی امیدواروں کو مشروط اجازت دی تھی۔

دونوں امیدواروں کی نامزدگی کے خلاف اسلام آباد ہائیکورٹ میں دائر درخواست میں مؤقف اختیار کیا گیا تھا کہ آئین کے مطابق امیدوار کے لئے ضروری ہے کہ وہ جس حلقے سے انتخاب لڑے اس کے ووٹ کا اندراج بھی اس حلقے میں ہو۔

ن لیگ کے ظفراقبال جھگڑا خیبرپختونخوا سے اور راحیلہ مگسی ٹنڈالہ یار سے تعلق رکھتی ہیں۔

اسلئے دونوں امیدوار اسلام آباد سے سینیٹ الیکشن کیلئے اہل نہیں۔

راحیلہ مگسی نے کامیابی کا نوٹیفیکیشن روکےجانے پر ردعمل ظاہر کردیا اور ہائیکورٹ کا فیصلہ سپریم کورٹ میں چیلنج کرنےکا اعلان کیا ہے، راحیلہ مگسی نے نتائج کی مصدقہ نقل بھی حاصل کرلی ہے۔

مارچ 6, 2015
ہائیکورٹ نے پیمرا کو اےآروائی نیوز کے خلاف کاروائی سے روک دیا

اسلام آباد: ہائیکورٹ نے پیمرا کو اے آر وائی نیوز کے خلاف کسی بھی قسم کا حکم جاری کرنے سے روک دیا ہے جبکہ ہائیکورٹ نے اے آر وائی کی درخواست بھی سماعت کے لیے منظورکرلی ہے۔

اے آر وائی نے درخواست میں موٗقف اختیارکیا تھا کہ پیمرا مسلسل اے آر وائی کے خلاف انتقامی کارروائیاں کررہا ہے، چیئرمین پیمرا کے بغیرپیمرا آئینی ادارہ نہیں ہے۔

درخواست میں مزید کہا گیا کہ پیمراآرڈی نینس میں قائم مقام چیئرمین کا کوئی عہدہ نہیں اورسپریم کورٹ نے قائم مقام چیئرمین کے عہدے کو غیرآئینی اورغیر قانونی قراردے چکی ہے اور پرویز راٹھور کو کام کرنے سے بھی روکنے کا حکم دیا ہے۔

درخواست میں کہا گیا ہے کہ پیمرا آزادانہ طور پر کام نہیں کررہا، پیمرا نے اے آر وائی کو غیرآئینی اورغیرقانونی نوٹس جاری کیے پیمرا اے آروائی کو ایک بارپھر بند کرنا چاہتا ہے، جس کی بندش سے اے آر وائی کے ہزاروں ملازمین بے روزگار ہوجائیں گے۔

فروری 25, 2015
اسلام آباد ہائیکورٹ: ممتازقادری کی سزائے موت کیخلاف اپیل پر فیصلہ محفوظ

اسلام آباد: وفاقی دارلحکومت میں اسلام آباد ہائیکورٹ نے سابق گورنر پنجاب سلمان تاثیر قتل کیس میں ممتاز قادری کی سزائے موت کیخلاف اپیل کی سماعت پر فیصلہ محفوظ کر لیا ہے۔

جسٹس نورالحق قریشی اور جسٹس شوکت عزیزصدیقی پر مشتمل دو رکنی بنچ نے ممتاز قادری کی جانب سے سزائے موت کے خلاف اپیل پر سماعت کی۔

اس موقع پر ایڈووکیٹ جنرل اسلام آباد عبدالرؤف صدیقی نے دلائل دیتے ہوئے کہا کہ کوئی برے کردار کا مالک ہو تب بھی کسی کو اختیار حاصل نہیں کہ اسے قتل کردیا جائے، یہ بات درست نہیں کہ واقعے سے قبل سلمان تاثیر اور ممتاز قادری کے درمیان کوئی مکالمہ ہوا تھا، ہر صورت قانون پر عملدرآمد ضروری ہے۔

عدالت نے دلائل سننے کے بعد ممتاز قادری کی سزائے موت کے خلاف اپیل پر فیصلہ محفوظ کرلیا ہے۔

یاد رہے کہ پولیس اہلکار ممتازقادری نے چارجنوری 2011ء میں گورنر پنجاب سلمان تاثیر کو راولپنڈی میں قتل کردیا تھا، جس کے فوری بعد ملزم کے ساتھی اہلکاروں نےا ُنہیں حراست میں لے لیا تھا اور انسدادِ دہشتگردی کی عدالت نے اُسے دومرتبہ موت کی سزاسنائی تھی لیکن عمل درآمد روک دیا گیا تھا۔

واضح رہے کہ ممتاز قادری کی سزائے موت کے خلاف اپیل ایک عرصے سے زیرِ سماعت ہے۔

فروری 11, 2015
لاپتہ افراد کیس: سماعت دو ہفتے کیلئے ملتوی

اسلام آباد: سپریم کورٹ نے کے پی کے حکومت کو لاپتہ افراد کے حوالے سے رپورٹ آئندہ سماعت سے پہلے عدالت میں جمع کروانے کا حکم دے دیا ہے۔

لاپتہ افراد کیس کی سماعت جسٹس جواد ایس خواجہ کی سربراہی میں تین رکنی بینچ نے کی۔مسخ شدہ نعشوں کی شناخت نہ ہونے اور ورثاء کے حوالے نہ کئے جانے پر عدالت نے سخت برہمی کا اظہار کیا ۔

جسٹس جواد ایس خواجہ نے اپنے ریمارکس میں کہا کہ اگر حکومت مخلص ہو تو مسخ شدہ نعشیں ورثاء کے حوالے کرنے کے لئے ڈیڑھ سال کا عرصہ کافی ہے ۔

فاضل جج نے کہا کہ اگر تمام حکومتیں سنجیدہ ہو جائیں تو یہ لاپتہ افراد کا معمہ حل ہوسکتا ہے ۔ان کا کہنا تھا کہ ہم جج ہیں لیکن انسان بھی ہیں وارثان کا دکھ دیکھا نہیں جاتا ۔مقدمے کی مزید سماعت دو ہفتے کے لئے ملتوی کر دی گئی ہے ۔

فروری 3, 2015
ممبئی حملہ کیس، زکی الرحمان کی نظربندی میں مزید1ماہ کی توسیع

اسلام آباد: ممبئی حملہ کیس کے ملزم زکی الرحمان لکھوی کی نظر بندی میں ایک مہینہ توسیع کر دی گئی ہے۔

زکی الرحمان لکھوی کی نظر بندی سے متعلق کیس کی سماعت اسلام آباد ہائی کورٹ میں ہوئی، سماعت جسٹس نور الحق قریشی نے کی۔ سماعت کے دوران زکی الرحمن کے وکیل راجا رضوان عباسی نے بتایا کہ انتظامیہ نے ان کے مؤکل کی نظر بندی میں مزید ایک مہینہ کی توسیع کر دی ہے۔

ان کا کہنا تھا کہ نظر بندی کے نئے حکم نامے کو ایک اور درخواست کے ذریعے چیلنج کریں گے۔

راجا رضوان عباسی نے کہا کہ عدالت میں زکی الر حمان کی نظر بندی پہلے سے چیلنج کی ہوئی ہے، نظربندی ختم ہوتے ہی حکومت نے مزید ایک مہینہ کی توسیع کردی ہے۔

زکی الرحمان لکھوی کے وکیل نے کہا کہ آئندہ سماعت سے پہلے حکومت کیجانب سے نظر بندی کے نئے حکم نامے کو چیلنج کرینگے، مقدمے کی اگلی سماعت چھبیس جنوری تک ملتوی کر دی گئی ہے۔

اس سے قبل اسلام آباد ہائیکورٹ نے ممبئی حملہ کیس کے مرکزی ملزم زکی الرحمان لکھوی کی نظر بندی کا نوٹیفکیشن معطل کر دیا تھا۔

واضح رہے کہ مرکزی ملزم زکی الرحمان لکھوی کو ضمانت پر رہا کردیا تھا ، جس کے بعد بھارت نے زکی الرحمان لکھوی کی رہائی کی سخت الفاظ میں مذمت کی تھی اور دوبارہ گرفتار کرنے کا مطالبہ کیا تھا ، جس کے بعد ملزم زکی الرحمان لکھوی کو دوبارہ نظر بند کردیا گیا تھا۔

جنوری 19, 2015
ہائیکورٹ نےقائم مقام چیئرمین پیمرا کیجانب سےملازمین کو جاری شوکاز نوٹس معطل کردیا

aاسلام آباد: ہائیکورٹ نےقائم مقام چیئرمین پیمراپرویز راٹورکی جانب سے جاری ملازمین کوشوکاز نوٹس معطل کرکے مزید کارروائی سے روک دیا۔

جسٹس نوراللہ قریشی نے درخواست کی سماعت کرتے ہوئےپرویزراٹھور سےتحریر ی جواب طلب کر تے ہوئے حکمر دیا کہ پرویز راٹھورمقررہ وقت میں جواب جمع کرائیں، پیمراکےجنرل منیجرحاجی آدم سمیت پانچ ملازمین کی جانب سے شعیب شاہین ایڈووکیٹ عدالت میں پیش ہوئے۔

قائم مقام چیرمین پیمرا نےدرخواست گزار ملازمین کےخلاف ایف آئی آر درج کرائی ہے۔جس کواسلام آبادہائی کورٹ نےمعطل کیا تھا۔درخواست گزارنے موقف اختیارکیاکہ پیمرا آرڈینس کے مطابق قائم مقام چیئر مین ملازمین کےخلاف کارروئی اورشوکازنو ٹس جاری نہیں کر سکتا۔

دسمبر 29, 2014
مشرف نے پاکستان میں ایمرجنسی انکی مشاورت سے نہیں لگائی،شوکت عزیز

اسلام آباد: سابق وزیرِاعظم شوکت عزیز نےخصوصی عدالت کے اکیس نومبر کے فیصلے کو چیلنج کرنیکی درخواست میں مؤقف اختیار کیا ہے کہ سابق صدر پرویز مشرف نے پاکستان میں ایمرجنسی انکی مشاورت سے نہیں لگائی۔

درخواست اسلام آباد ہائی کورٹ میں زیرِ سماعت ہے، جو ان کے وکیل وسیم سجاد نے خصوصی عدالت کیخلاف درخواست ترمیم کے بعد دوبارہ دائر کی ہے۔

سابق وزیرِاعظم شوکت عزیز نے رجسٹرار آفس کیجانب سے درخواست پر اعتراضات لگائے گئے تھے۔

درخواست میں موقف اختیار کیا گیا ہے کہ اسلام آباد ہائیکورٹ کے جج آئینی طور پر درخواست کی سماعت کر سکتے ہیں، خصوصی عدالت کے ججوں کو ٹریبونل کی حیثیت حاصل ہے، درخواست پرسماعت تین فروری کواسلام آباد ہائیکورٹ کے جسٹس اطہر من اللہ کریں گے۔

دسمبر 29, 2014