اسلام آباد: ملکی سیاسی صورت حال میں ہلچل، وزیراعظم نے دورہ لاہور کے باعث وفاقی کابینہ کا اجلاس ملتوی کردیا۔
ذرائع کے مطابق وزیراعظم عمران خان کی زیر صدارت کل ہونے والا وفاقی کابینہ کا اجلاس ملتوی کردیا گیا ہے، اب وزیراعظم عمران خان مختصر دورے پر لاہور روانہ ہونگے۔
ذرائع کا کہنا ہے کہ دورہ لاہور کے موقع پر وزیراعظم کی وزیراعلیٰ پنجاب عثمان بزدار سے ون آن ون ملاقات ہوگی جس میں اہم فیصلوں کا امکان ہے، اس کے علاوہ وزیراعظم کی زیر صدارت پی ٹی آئی پنجاب کی پارلیمانی بورڈ کا اجلاس ہوگا۔
ذرائع کا کہنا ہے کہ پارلیمانی بورڈ کا اجلاس نہایت اہمیت کا حامل ہے، اجلاس میں بلدیاتی انتخابات میں ٹکٹوں کی تقسیم سے متعلق امور پر حتمی مشاورت ہو گی جبکہ اجلاس میں ملکی سیاسی صورتحال اور پارٹی امور کا جائزہ لیا جائے گا۔
واضح رہے کہ وزیراعظم عمران خان کے خلاف تحریک عدم اعتماد کے اعلان کے بعد لاہور میں سیاسی سرگرمیوں میں غیر معمولی تیزی دیکھی گئی ہے، پی ڈی ایم کے اہم رہنما گذشتہ ایک ہفتے سے لاہور میں مقیم ہے جہاں انہوں نے مسلم لیگ (ق) سے کئی ملاقاتیں کیں ہیں۔
اسلام آباد: وفاقی دارالحکومت میں پولیس اور ڈاکوؤں کے درمیان ہونے والے مقابلے کے نتیجے میں پولیس اہلکار شہید ہوگیا ہے۔
اسلام آباد پولیس کے مطابق بارہ کہو میں نجی ہاؤسنگ سوسائٹی میں کام کرنیوالےافراد پر فائرنگ کی گئی، جس کے باعث تین افراد زخمی ہوئے، واقعے کی اطلاع ملنے پر پولیس نے فائرنگ کرنے والی گاڑی کا تعاقب کیا۔
پولیس کے مطابق کار سوار ملزمان نے پولیس ٹیم پر بھی فائرنگ کردی، جس کے نتیجے میں سب انسپکٹر لیاقت شہید ہوگئے، ملزمان کی فائرنگ سے ایک پولیس اہلکار زخمی بھی ہوا۔
اسلام آباد پولیس کے ایک اور بہادر سپوت نے شہریوں کی جان و مال کا تحفظ کرتے ہوئے اپنی جان کا نذرانہ پیش کر دیا۔
سب انسپکٹر لیاقت علی بھارہ کہو کے علاقے میں جرائم پیشہ عناصر سے لڑتے ہوئے شہید ہو گئے۔ انا للہ و انا الیہ راجعون#IslamabadPolice#PoliceMartyrs
تھانہ بارہ کہو پولیس کے مطابق جوابی فائرنگ کے نتیجے میں کار سوار ایک ملزم کو زخمی حالت میں گرفتار کرلیا گیا ہے اور کار کو بھی تحویل میں لیا جاچکا جبکہ دوسرا ملزم فرار ہونے میں کامیاب ہوگیا۔
آئی جی اسلام آباد کا نوٹس
تھانہ بھارہ کہو کے علاقے میں فائرنگ واقعے پر آئی جی اسلام آباد نے نوٹس لیا ہے اور ڈی آئی جی آپریشنز سے واقعہ کی رپورٹ طلب کرلی ہے، اس کے علاوہ ایس ایس پی آپریشنز،ایس ایس پی انوسٹی گیشن کی سربراہی میں پولیس ٹیمیں تشکیل دے دیں ہیں۔
ایس ایس پی آپریشنز کا بیان
بارہ کہو کےعلاقے میں فائرنگ کے واقعے پر ایس ایس پی آپریشنز فیصل کامران نے بتایا کہ ابتدائی تحقیقات سے معلوم ہوا کہ فائرنگ کا واقعہ2 گروپوں کی پرانی دشمنی پر پیش آیا، ایک گروپ کے 2ملزمان نےدوسرے گروپ پرفائرنگ کی، پولیس نےتعاقب کرکےایک ملزم کو زخمی حالت میں گرفتار کیا۔
ایس ایس پی آپریشنز نے بتایا کہ پولیس پر فائرنگ ملزم کار سوار ڈرائیور نےکی، جس سےسب انسپکٹر شہید ہوئے، واقعے میں زخمی پولیس اہلکاراور زخمی ملزم کا پمز اسپتال میں علاج جاری ہے جبکہ فائرنگ کےواقعے کی سی سی ٹی فوٹیج حاصل کرلی گئی ہے۔
اسلام آباد: وفاقی دارالحکومت کے پوش سیکٹر سے غیر ملکی شہری کی گرفتاری عمل میں لائی گئی ہے۔
پولیس کے مطابق غیر ملکی کے گھر سے جدید اسلحہ برآمد ہوا ہے، جس پر تھانہ کوہسار پولیس نے غیر ملکی کو گرفتار کیا، غیر ملکی کے گھر سے ملنے والے اسلحے میں اے کے47کلاشنکوف، ایم پی فور گن ،ایم پی 161گن سمیت ایک پستول اور سیکڑوں کی تعداد میں مختلف راؤنڈز بھی برآمد ہوئے۔
پولیس نے غیر ملکی سے ملنے والے اسلحہ کے حوالے سے مزید تفتیش کا آغاز کردیا ہے فوری طور پر یہ نہیں بتایا گیا کہ گرفتار شخص کس ملک سے تعلق رکھتا ہے؟۔
تھانہ کوہسار پولیس کی جانب سے میڈیا کو بتایا گیا کہ گرفتار ملزم پر خاتون سے زیادتی کا الزام بھی ہے، متاثرہ خاتون کی جانب سے درخواست دئیے جانے پر اس کے خلاف دوسرا مقدمہ درج کرلیا گیا ہے۔
پولیس نے مزید بتایا کہ مدعیہ غیر ملکی ہے جبکہ ملزم کا امپورٹ ایکسپورٹ کا کام ہے، متاثرہ خاتون ملزم کےدفتر میں 2 سال سےکام کررہی تھی، متاثرہ خاتون بقایا جات لینےگزشتہ رات ملزم کےگھر گئی تو ملزم اسے زبردستی گھر لے گیا اور زیادتی کا نشانہ بنا ڈالا۔
یاد رہے کہ اس سے قبل گذشتہ ماہ کی 22 تاریخ کو ایک غیر ملکی خاتون کو ڈپلومیٹک انکلیو میں گھستے ہوئے گرفتار کرلیا گیا تھا، گرفتار خاتون کا تعلق روس سے تھا۔
اسلام آباد: نور مقدم کیس حتمی مرحلے میں داخل ہو گیا ہے، عدالت نے مرکزی ملزم سے 25 سوالات کے جواب مانگ لیے ہیں۔
تفصیلات کے مطابق سیشن عدالت میں نور مقدم قتل کیس کا ٹرائل حتمی مرحلے میں داخل ہو گیا ہے، عدالت نے ملزمان سے دفاع کا بیان طلب کر لیا۔
ایڈیشنل سیشن جج عطا ربانی اس کیس کی سماعت کر رہے ہیں، عدالت نے دفاع کے بیان کا سوال نامہ ملزمان کو فراہم کر دیا، عدالت کی جانب سے مرکزی ملزم کو 25 سوالات پر مشتمل سوال نامہ دیا گیا ہے۔
سوال نامے کے مطابق ملزم سے پوچھا گیا ہے کہ کیا آپ نے جمع کرائے گئے شواہد کو سنا اور سمجھ لیا؟ کیا آپ نے 20 جولائی 2021 کو شام کے وقت گھر میں نور مقدم کو قتل کیا تھا؟
کیا آپ نے 18 جولائی سے 20 جولائی تک نور مقدم کو اغوا کیے رکھا؟ اور مقتولہ کے ساتھ زیادتی کی تصدیق ہوئی ہے، آپ اس پر کیا کہیں گے؟ کیا اپنے حق میں شواہد پیش کرنا چاہیں گے؟
واضح رہے کہ دو دن قبل عدالت نے ملزم کی جانب سے دائر کردہ 3 درخواستیں خارج کر دی تھیں، جن کے حوالے سے مدعی کے وکیل اور پبلک پراسیکیوٹر کا کہنا تھا کہ ایسی درخواستیں دائر کرنا صرف کیس کو لٹکانے کا بہانہ ہیں۔
ملزم ظاہر جعفر کی جانب سے دائر درخواستوں میں ایک آئی جی اسلام آباد کی وضاحت جاری کرنے کے خلاف تھی، دوسری تفتیشی افسر کے جائے وقوعہ کا دورہ کرنے سے متعلق تھی، اور تیسری موبائل نمبر کی اونر شپ معلوم کرنے سے متعلق تھی۔
اسلام آباد: وفاقی دارالحکومت کی عدالت عالیہ نے بھٹہ مالکان کے لیے بچوں سے جبری مشقت نہ لینے کا بیان حلفی لازمی قرار دے دیا ہے۔
تفصیلات کے مطابق اسلام آباد ہائی کورٹ کے چیف جسٹس اظہر من اللہ نے بھٹوں میں جبری مشقت سے متعلق کیس کی سماعت کی،چیف کمشنر اسلام آباد کی سربراہی میں قائم کئے گئے کمیشن نے اپنی رپورٹ عدالت میں جمع کرائی۔
عدالت عالیہ میں پیش کی گئی رپورٹ میں بتایا گیا کہ اسلام آباد میں بھٹہ مالکان کے لیے جبری مشقت نہ لینے کا بیان حلفی لازمی قرار دیا گیا ہے، چیف کمشنر اسلام آباد نے احکامات جاری کردئیے ہیں۔
جس پر چیف جسٹس اطہر من اللہ نے ریمارکس دئیے کہ چیف کمشنر رپورٹ کی بنا پر درخواست نمٹا رہے ہیں، جبری مشقت کی شکایت موصول ہوئی تو پٹیشن بحال ہو جائے گی۔
اسلام آباد ہائی کورٹ نے اپنے مختصر فیصلے میں کہا کہ کیس میں تین وکلا عدنان حیدر رندھاوا ، عمر اعجاز گیلانی اور دانیال حسن عدالتی معاون مقرر تھے، عدالتی معاونین نے بھر پور کردار کیا اس کو سراہتے ہیں۔
عدالتی معاون عدنان حیدر نے کہا کہ چیف کمشنر نے رپورٹ میں بیان حلفی لازمی قرار دینے کی بات کی، چیف کمشنر کی ریورٹ میں ہےکہ قانون سازی کی جائے،ہم نے اور بھی کچھ تجاویز اپنی رپورٹ میں دی ہیں ان کو بھی عدالت دیکھے جس پر عدالت کا کہنا تھا کہ اب یہ کہتے ہیں کہ جبری مشقت ختم ہوگئی مزید کیس زیر التوا رکھنے کا فائدہ نہیں۔
چیف جسٹس اطہر من اللہ نے اپنے ریمارکس میں کہا کہ اب تو یہ ایگزیکٹو کا کام ہے ان کے کام میں مداخلت نہیں کر سکتے، یہ ضرور ہوگا کہ چیف کمشنر کی رپورٹ کورٹ آرڈر کاحصہ ہوگی، بعد ازاں اسلام آبادہائی کورٹ نے ہدایات کے ساتھ درخواست نمٹا دی۔
اسلام آباد : پاکستان تحریک انصاف نے پہلی باراسلام آباد میں سمندر پار پاکستانیوں کےعظیم الشان اجتماع کی منظوری دے دی، 3روزہ اجتماع 13 تا16مارچ اسلام آباد میں منعقد ہوگا۔
تفصیلات کے مطابق پاکستان تحریک انصاف نے سمندر پار پاکستانیوں کی ملکی سیاست میں خیرمقدم کرتے ہوئے پہلی باراسلام آباد میں سمندر پارپاکستانیوں کےعظیم الشان اجتماع کی منظوری دے دی، وزیراعظم وچیئرمین پی ٹی آئی عمران خان خصوصی خطاب کریں گے۔
اس حوالے سے سیکریٹری اوورسیزانٹرنیشنل چیپٹرزعبداللہ ریاڑ کی سیکرٹری جنرل اسد عمرسے ملاقات ہوئی ، جس میں سمندر پار پاکستانیوں کےسہ روزہ اجتماع کے انعقاد سے متعلق اہم امور پر بریفنگ دی گئی۔
سمندر پار پاکستانیوں کا 3 روزہ اجتماع 13 تا16مارچ اسلام آباد میں منعقد ہوگا ، جس میں دنیا بھر میں پی ٹی آئی کے منتخب ذمہ داران،کارکنان بڑی تعدادمیں شرکت کریں گے۔
اجتماع میں یورپ، امریکا،وسط ایشیاسمیت دنیا کے دیگر حصوں سےمندوبین مدعوکئےجائیں گے جبکہ ملکی،غیرملکی میڈیاکوبھی سمندرپارپاکستانیوں کےاجتماع کے لئے دعوت دی جائے گی۔
مرکزی سیکریٹری جنرل اسد عمر نے کہا کہ سمندر پارپاکستانی قیمتی اثاثہ ہیں، سمندر پار پاکستانی روز اوّل سے عمران خان کے شانہ بشانہ ہیں، ملکی ترقی کیلئےسمندر پار پاکستانیوں کا کردار بےمثال ہے۔
اسد عمر کا کہنا تھا کہ تحریک انصاف سمندر پار پاکستانیوں کے کردار کو تحسین کی نگاہ سے دیکھتی ہے ، سمندر پار پاکستانیوں کا یہ اجتماع ملکی سیاسی تاریخ کااہم سنگ میل ثابت ہوگا، دنیا بھر سے بھائیوں کو مدعو کریں گے اورعمران خان آئندہ کالائحہ عمل دیں گے۔
وزیراعظم عمران خان نے کہا ہے کہ اگر آپ کے پاس گھر بنانے کے لیے رقم نہیں ہے تو بینکوں سے قرضہ لے سکتے ہیں۔
اسلام آباد میں پی ایچ اے آفیسرز ریزیڈینشیا اور پی ایچ اے اپارٹمنٹس کی افتتاحی تقریب سے خطاب کرتے ہوئے انہوں نے کہا کہ پہلے عام آدمی کو قرضوں کی فراہمی کے لیے بینک اسٹاف تربیت یافتہ نہیں تھا، تاریخ میں پہلی بار تنخواہ دار طبقے کے لیے گھر بنانا آسان ہوا ہے، اب کرائے کی رقم بینکوں کو قسطوں میں دے کر گھر کا مالک بنا جاسکتا ہے۔
عمران خان کا کہنا تھا کہ اس منصوبے کی بنیاد 2008 میں رکھی گئی تھی لیکن 2016 تک کام نہ ہوسکا، 2017 میں بھی یہ منصوبہ سست روی کا شکار رہا۔
وزیراعظم نے بتایا کہ سرکاری ملازمین کے لیے 80ہزار یونٹس کا منصوبہ زیرتکمیل ہے۔
ان کا مزید کہنا تھا کہ ہاؤسنگ انڈسٹری ملکی معیشت کو اوپر لے کر جاتی ہے کیونکہ اس شعبے سے 30 دیگر صنعتیں وابستہ ہوتی ہیں۔
وزیراعظم نے اعتراف کیا کہ کورونا کے باعث عالمی سطح پر مہنگائی کی وجہ سے پاکستان بھی متاثر ہوا لیکن ملکی معیشت درست سمت میں گامزن ہے، بہتر پالیسیوں کےباعث مزدور اور کاشتکار طبقےکی آمدن میں اضافہ ہوا ہے۔
وزیراعظم عمران خان نے کہا کہ عالمی بینک نے بھی اعتراف کیا ہے کہ کورونا کےباوجود پاکستان میں غربت میں کمی آئی ہے، بہتر معاشی پالیسیوں کے باعث ملکی برآمدات کے علاوہ محصولات اور ترسیلات زر میں بھی اضافہ ہوا ہے۔
پی ڈی ایم کا سربراہی اجلاس مولانا فضل الرحمٰن کی زیر صدارت منعقد ہوا جس میں اتحاد میں شامل تمام جماعتوں نے لانگ مارچ طے شدہ تاریخ پر کرنے کا فیصلہ کیا۔
اے آر وائی نیوز کے مطابق مولانا فضل الرحمٰن کی زیرصدارت پی ڈی ایم کا سربراہی اجلاس ہوا۔
ذرائع کے مطابق اجلاس میں شامل تمام جماعتوں نے لانگ مارچ کے حوالے سے تاریخ تبدیل نہ کرنے کا فیصلہ کیا اور کہا گیا کہ لانگ مارچ ہر حال میں 23 مارچ کو ہی ہوگا۔
ذرائع نے بتایا کہ اجلاس میں لانگ مارچ کے اسلام آباد میں قیام کو خفیہ رکھنے پر بھی اتفاق کیا گیا۔
علاوہ ازیں سابق وزیراعظم نواز شریف اور پی ڈی ایم سربراہ فضل الرحمٰن کے درمیان ٹیلیفونک رابطہ ہوا جس میں حکومت کے خلاف تحریک تیز کرنے پر اتفاق کیا گیا۔
ذرائع کے مطابق دونوں رہنماؤں نے موجودہ ملکی صورتحال اور پی ڈی ایم تحریک پر مشاورت کی اور مولانا نے نواز شریف کو پی ڈی ایم سربراہی اجلاس کے ایجنڈے پربھی اعتماد میں لیا۔
ذرائع نے بتایا کہ اس موقع پر لانگ مارچ کے علاوہ ان ہاؤس تبدیلی سمیت مختلف امور بھی زیر غور آئے۔
مولانا فضل الرحمٰن کا کہنا تھا کہ موجودہ حکومت مکمل طورپرناکام ہوچکی ہے اور اب عوام کو حکمرانوں سے نجات دلانے کا وقت آچکا ہے۔
اسلام آباد: وفاقی دارالحکومت کے تعلیمی اداروں میں کرونا کیسز سامنے آنے کا سلسلہ جاری ہے، جس کے سبب مزید 10 تعلیمی ادارے بند کرنے کا فیصلہ کیا گیا ہے۔
اے آر وائی نیوز کے مطابق ڈی ایچ او اسلام آباد نے کہا ہے کہ کرونا کیسز سامنے آنے پر شہر میں مزید 9 اسکولوں اور ایک کالج کو بند کیا جا رہا ہے۔
ڈسٹرکٹ ہیلتھ آفیسر اسلام آباد ڈاکٹر زعیم ضیا نے اس سلسلے میں ڈپٹی کمشنر کے نام مراسلہ ارسال کر کے مذکورہ اسکولوں اور کالج کی تفصیلات سے مطلع کر دیا ہے۔
مراسلے کے مطابق اسلام آباد ماڈل کالج فار بوائز چک شہزاد میں کرونا کیس رپورٹ ہونے پر اسے بند کرنے کا فیصلہ کیا گیا ہے، اسلام آباد ماڈل اسکول فارگرلز، اسلام آباد ماڈل اسکول جی سکس فور، اسلام آباد ماڈل اسکول فار بوائز بہارہ کہو کو کرونا کیسز کی وجہ سے بند کرنے کا فیصلہ کیا گیا ہے۔
ڈی ایچ او کے مطابق اسلام آباد ماڈل اسکول فار گرلز آئی ایٹ ون، اسلام آباد ماڈل اسکول فار گرلز جی الیون ون، اسلام آباد ماڈل اسکول فار گرلز جی ایٹ ٹو، اسلام آباد ماڈل اسکول فار گرلز جی سکس ون تھری بھی بند کرنے کا فیصلہ کیا گیا ہے۔
دیگر اسکولوں میں اسلام آباد ماڈل اسکول فار گرلز دانہ پنڈ بیگوال، اسلام آباد ماڈل اسکول فار بوائز چھتر شامل ہیں۔
مراسلے میں ہدایت کی گئی ہے کہ انتظامیہ متاثرہ تعلیمی ادارے تا حکم ثانی بند رکھے، اور ان میں کونٹیکٹ ٹریسنگ اور ٹیسٹنگ کی جائے، اور وفاقی انتظامیہ پازیٹیو طلبہ کے قریبی افراد کے ٹیسٹ کرائے۔
واضح رہے کہ اسلام آباد میں کرونا کیسز کی وجہ سے 50 سے زائد تعلیمی ادارے بند کیے جا چکے ہیں۔
وفاقی وزیر داخلہ شیخ رشید احمد نے کہا ہے کہ اپوزیشن کی غلطی سے اگر جمہوریت کو نقصان ہوا تو یہ ان کا ہی نقصان ہوگا یہ اپنے مارچ کی تاریخ24 یا27کرلیں۔
اسلام آباد میں پریس کانفرنس کرتے ہوئے شیخ رشید کا کہنا تھا کہ جو کہہ رہے ہیں حکومت جارہی ہےان کی آنکھیں کھل جانی چاہییں، عمران خان کہیں نہیں جارہا،حکومت اپوزیشن کی جڑوں میں بیٹھ گئی ہے۔
وزیر داخلہ نے اپوزیشن پر مزید تنقید کرتے ہوئے کہا کہ اپوزیشن کا عدم اعتماد لانا یہ منہ اور مسور کی دال کی مثل ہوگا، بل منظوری پر انکے 12ارکان کم تھےعدم اعتمادلائےتو25کم ہونگے، اللہ کومنظورہواتوعمران خان 5سال پورےکریں گے۔
اپوزیشن کے مارچ کے اعلان کے حوالے سے شیخ رشید کا کہنا تھا کہ ان کوخودخیال کرناچاہیےکہ اوآئی سی کےلوگ پاکستان آرہےہیں، اوآئی سی کےلیے22مارچ سےسڑکیں بندہونگی،کوویڈ بھی ہے،مسلم ممالک سےوفود23مارچ کی پریڈمیں شرکت کریں گے، یہ لوگ 4دن پیچھےچلیں جائیں یا4دن آگےچلےجائیں، اگر اپوزیشن نے قانون کو ہاتھ میں لیا تو ہم انہیں ہاتھ میں لے لیں گے۔
انہوں نے واضح کیا کہ ایمرجنسی اورصدارتی نظام کا بڑاشورہے لیکن فی الحال کابینہ میں اس حوالے سے کوئی تجویز زیر غور نہیں۔
وزیر داخلہ نے ملک میں ہونیوالی حالیہ دہشتگردی کی لہر کے حوالے سے کہا کہ افغان طالبان کی کامیابی کے بعد اکادکا گروپ کارروائی کررہےہیں، انارکلی میں دہشت گردی ہوئی ،اسلام آبادمیں 2دہشت گردےمارےگئے، لاہوردھماکےکےملزمان کی قدموں کی چاپ کےپیچھےچل رہےہیں،3ماہ میں دہشت گردی کی لہر35فیصد ہوگئی جوہمارےجذبےکوشکست نہیں دےسکتی، ہزاروں جانوں کی قربانی دےکردہشت گردوں کوشکست دی، پاک فوج اورقوم پہلےسے زیادہ جذبےسےزندہ ہے.
شیخ رشید کا مزید کہنا تھا کہ 11جنوری کو دو گروپ اکٹھےہوئے اور بی این اے بنی، رات کو ہی وزارت داخلہ نے اداروں کو ہوشیار رہنے کا کہا ہے۔
انہوں نے کہا کہ افغان طالبان نےگارنٹی دی کہ ان کی سرزمین پاکستان کے خلاف استعمال نہیں ہوگی، وہ دہشتگردی کے خلاف اہم کردار ادا کررہے ہیں، کالعدم ٹی ٹی پی سےبات میں افغان طالبان نےپل کا کردار ادا کیا، لیکن کالعدم ٹی ٹی پی نے سیز فائر کو توڑا۔
وزیر داخلہ نے واضح کیا کہ ٹی ٹی پی کی شرائط قبول نہیں، انہیں آئین پاکستان کو ماننا ہوگا بصورت دیگر وہ لڑے تو ہم بھی ان سے لڑیں گے۔
انہوں نے کہا کہ داسو اور بھاشاڈیم کاراستہ روکنےکےلیےدہشت گردی کی گئی،داسوڈیم پردہشت گردی والوں تک پہنچ گئےہیں، ہم چین کی دوستی کوکسی مفادپرقربان نہیں کریں گے۔
شیخ رشید کا کہنا تھا کہ بھارت میں مسلمانوں کی زندگی کو عذاب بنادیا گیا ہے، سیکولر بھارت کب کا ختم ہوچکا، پاکستان کی ترقی بھارت کو ایک آنکھ نہیں بھاتی۔
