اسلام آباد: کالعدم تنظیم کے احتجاج کے پیش نظر جڑواں شہروں میں سیکیورٹی سخت کردی گئی ہے۔
تفصیلات کے مطابق اسلام آباد اور راولپنڈی میں کالعدم تنظیم کے احتجاج کے باعث اسلام آباد اور راولپنڈی میں سیکیورٹی بڑھادی گئی ہے، راولپنڈی میں مرکزی شاہراہوں کو بند کردیا گیا ہے، چاندنی چوک سےفیض آباد تک مری روڈ کو مکمل سیل کردیاگیا ہے۔
رپورٹ کے مطابق راولپنڈی سے اسلام آباد جانے والی سڑک پر جگہ جگہ رکاوٹیں بھی کھڑی کردی گئیں ہیں جس کے باعث شہریوں کو سخت اذیت کا سامنا ہے، علی الصبح اسکول جانے والے طلبا بھی سڑکوں کی بندش کے باعث واپس گھروں کو لوٹ گئے۔
اس کے علاوہ اسپتال جانے والے مریض بھی راستوں کی بندش کے باعث رُل گئے، جگہ جگہ رکاوٹوں اور بندش کے باعث مریضوں کی اسپتالوں تک رسائی مشکل ہوگئی ہے۔
دوسری جانب کالعدم تنظیم کے احتجاج کے باعث جڑواں شہروں میں چلنے والی میٹرو بس سروس کو تاحکم ثانی بند کردیا گیا ہے۔
دوسری جانب کالعدم ٹی ایل پی کے ممکنہ لانگ مارچ سے نمٹنے کیلئے انتظامیہ نے دریائے جہلم پر تینوں پلوں کو آمدورفت کے لئے مکمل طور پر بند کردیا ہے ، جسکے باعث شہریوں کو مشکلات کا سامنا کرنا پر رہا ہے۔
دونوں نئے پلوں کے اطراف بنائی گئی حفاظتی دیواروں کو توڑ کر ان میں کینٹینرز رکھے گئے ہیں، جی ٹی روڈ پر واقع تمام تعلیمی اداروں کو بند کر دیا گیا ہے جبکہ اسکولوں میں آئے طلباء وطالبات کو گھروں میں بھیج دیا گیا ہے۔
