Tag: Islamabad

اسلام آباد: وفاقی دارالحکومت کے ایک علاقے میں ایک گھر میں ڈکیتی کے دوران پولیس کے جوانوں نے ڈاکوؤں کا گھیراؤ کر لیا، علاقہ دو طرفہ فائرنگ سے گونج اٹھا، لوگ بھی جانوں سے لاپروائی برتتے ہوئے جمع ہو گئے۔

اے آر وائی نیوز کے مطابق اسلام آباد میں تھانہ رمنا کے علاقے جی الیون وَن میں ڈاکوؤں کے ساتھ پولیس مقابلے میں 2 اہل کار زخمی ہو گئے، جب کہ دو ڈاکو گرفتار کر لیے گئے، موقع پر موجود لوگوں نے جمع ہو کر ویڈیو بھی بنانا شروع کر دی۔

تفصیلات کے مطابق تین ڈاکو آج جی الیون 1 میں واقع ایک گھر میں ڈکیتی کے لیے داخل ہوئے تھے، اطلاع ملنے پر پولیس جوانوں کے بر وقت ریسپانس نے ڈکیتی کی واردات ناکام بنا دی، پولیس اہل کاروں اور ڈاکوؤں کے درمیان کچھ دیر مقابلہ بھی ہوا، دو طرفہ فائرنگ سے علاقہ گونج اٹھا، پولیس کی فائرنگ سے ایک ڈاکو زخمی ہوا لیکن وہ فرار ہونے میں کامیاب ہو گیا۔

پولیس مقابلے کے بعد 2 ڈاکو موقع سے گرفتار کر لیے گئے، ڈاکوؤں کی فائرنگ سے دو پولیس جوان بھی زخمی ہو گئے، جنھیں فوری طور پر طبی امداد کے لیے پمز اسپتال منتقل کیا گیا۔

زخمی حالت میں فرار ہونے والے تیسرے ڈاکو کی گرفتاری کے لیے پولیس ٹیمیں سرچ آپریشن کر رہی ہیں، پولیس حکام نے اس سلسلے میں بتایا کہ 3 ڈاکو ایک گھر میں ڈکیتی کے بعد فرار ہو رہے تھے، اطلاع پر گشت پر مامور اہل کاروں نے انھیں روکنے کی کوشش کی، جس پر ڈاکوؤں نے فائرنگ کر دی۔

واقعے کے بعد آئی جی اسلام آباد، ڈی آئی جی آپریشنز، اور ایس ایس پی آپریشنز نے جائے وقوعہ کا معائنہ کیا، آئی جی اسلام آباد نے پولیس جوانوں کی جواں مردی پر انھیں شاباش بھی دی اور جوانوں کے لیے انعامات کا اعلان کیا۔

آئی جی اسلام آباد نے پمز اسپتال کا بھی دورہ کیا، اور زخمی جوانوں کی عیادت کی۔

اسلام آباد: ایف نائن پارک ماس ویکسینیشن سینٹر پر شہریوں کو کرونا ویکسینیشن روک دی گئی ہے، جس کی وجہ سے شہریوں نے ہنگامہ آرائی کی۔

تفصیلات کے مطابق اسلام آباد کے ایف نائن پارک ویکسینیشن سینٹر پر شہریوں نے ہنگامہ آرائی شروع کر دی، مظاہرین نے الزام لگایا ہے کہ انتظامیہ شہریوں کو ویکسین نہیں لگا رہی ہے۔

ہنگامہ آرائی کے بعد ڈی ایچ او اسلام آباد ڈاکٹر زعیم ایف نائن ماس ویکسینیشن سینٹر پہنچ گئے، ان کا کہنا تھا کہ ملک بھر سے شہری ویکسینیشن کے لیے اسلام آباد آر ہےہیں، اور ہماری بھرپور کوشش ہے کہ تمام شہریوں کو ویکسین لگائی جائے، لیکن امید سے زائد افراد آنے پر طلب و رسد کے مسائل سامنے آ رہے ہیں۔

ڈاکٹر زعیم نے شہریوں سے کہا کہ ویکسینیشن سینٹر میں کرونا ویکسین کا اسٹاک موجود ہے، جن میں کین سائینو کی 10 ہزار ڈوز اور سائینو فارم ویکسین کی 60 ہزار ڈوز شامل ہیں۔

پاکستان میں کرونا ویکسین کی قلت، بیرون ملک جانیوالےافراد کی نوکریاں خطرے میں پڑ گئیں 

دوسری طرف ویکسینیشن سینٹر پر کھڑے مظاہرین کا کہنا ہے کہ مرکز پر آسٹرازینیکا ویکسین دستیاب نہیں ہے۔

مظاہرین کی جانب سے ماس ویکسینیشن سینٹر انتظامیہ کے خلاف نعرے بازی بھی کی گئی، جس پر انتظامیہ نے پولیس سے مدد طلب کر لی، اسسٹنٹ کمشنر اور پولیس کی بھاری نفری ایف نائن ماس ویکسینیشن سینٹر پہنچ چکی ہے۔

سینٹر پہنچنے والے ڈی ایچ او اسلام آباد کا کہنا ہے کہ دوسرے صوبوں سے شہری آنے پر ویکسینیشن کاؤنٹرز پر لوڈ بڑھ گیا ہے، اسلام آباد میں یومیہ 25 ہزار ویکسین لگانے کی صلاحیت ہے، تاہم اس میں مزید اضافہ کر رہے ہیں۔

انھوں نے کہا کہ اب تک کسی شہری کو ویکسین لگانے سے انکار نہیں کیا گیا ہے، بیرون ملک جانے والوں کو درپیش مشکلات کا بھی اندازہ ہے، تاحال آنے والے تمام افراد کی ویکسینیشن کی گئی ہے، ای پی آئی سے اضافی ویکسین طلب کی ہے، اور کچھ ہی دیر میں دوبارہ ویکسین کا آغاز ہو جائے گا۔